Fierabras

Оглавление

Bagnyon Jehan. Fierabras

Fierabras

Table des matières

Cy commencent les tiltres des chapitres de l'oeuvre suyvamment nombrés pour trouver plus legierement la matiere dedans comprinse

Des roys de france payens jusques au roy Clovys premier roy de france crestien

Comment le roy clovys eut a femme la belle et noble clotildis fille du roy de bourgoigne

Comment le roy clovys fut admonnesté de la royne clotildis affectueusement qu'il deust croire en la foy crestienne et autres matieres

Comment le roy clovys fut victorieux de ses ennemys pource qu'il creust en jhesucrist

Comment le roy fut baptisé par saint remy et en son baptesme miraculeusement fut aportee la sainte ampoule par l'ange de paradis dont après tous les roys de france sont oingtz en leur consecration a reins

Comment pepin par sa prudence fut esleu roy de france quant la lignee du roy clovys deffaillit en succession

Du roy charles après qu'il eut fait beaucoup de constitucions avecques le pape Adrien/ et comment il fut fait empereur de romme

De la corpulance du roy charles et de sa maniere de vivre

A quoy le roy charles et ses enfans filz et filles estoient dedicqués

De l'estude du roy charles et de son vivre. et de ses oeuvres caritatives et aultres matieres

Comment le patriarche Iherosolimitan manda a charles qu'il luy donnast secours après qu'il eust esté degetté par les turcz

Comment charles a grant compagnie s'en alla conquester la terre saincte et plusieurs aultres matieres

Des relicques que l'empereur Charles apporta de constantinoble. Et de la terre sainte et des miracles qui furent faitz

Comment en ung lieu qui se disoit normionde Charles se tenoit suyvant guerre contre les payens après ung petit de prologue

De fierabras et comment il vint exciter l'excercite charlemaigne

Comment richard duc de normandie dist a charles quel homme estoit fierabras

La responce faicte per Rolant a l'empereur son oncle trop subite et qu'il en fut

Comment charles et rolant sont reprins par l'acteur et excusés aulcunement sur le debat devant dit

Comment olivier fut disposé de combatre Fierabras nonobstant qu'il estoit navré après plusieurs parolles

comment olivier fut entretenu de son pere regnier qu'il n'allast combattre le geant requerant charles que ainsi ne fust dont force lui fut qu'il y allast

Comment olivier parla premierement a fierabras qui ne tenoit compte de luy avecques aultres disputacions

Comment après pluseurs disputacions olivier aida a armer fierabras et des neuf espees merveilleuses. Et comment olivier se nomma a fierabras par son droit nom

Comment olivier et fierabras commencerent a batailler: et de la priere de charles pour olivier et aultres matieres

Comment olivier fit priere a dieu quant il se sentit navré

Comment après grant bataille Olivier conquist le baulme et en beut a son aise. et qu'il en fist. après comment il se trouva a terre quant Fierabras eut occis son cheval

Comment fierabras et olivier bataillerent ensemble a piedz merveilleusement. et la pierre que charles fist pour olivier

Comment en ceste bataille fierabras fut vaincu par olivier après que il eut recouvree l'une des espees de fierabras

Comment fierabras vaincu creut en dieu. et comment il fut porté par olivier et comment il fut assailly des sarrazins et tormenté

Comment olivier fut prins et bendé les yeulx piteusement qu'il ne peust estre secouru par les françois

Comment fierabras fut trouvé par charles l'empereur. et puis baptisé et guery de ses playes

Comment olivier et ses compaignons furent presentés a Balam l'admiral et cruellement passionnez de prison

De la prison ou les françoys furent visitez par la belle floripes fille de l'admiral et de la beaulté d'elle

Comment les françoys furent mis hors de prison et visitez par la noble pucelle Floripes et la beaulté de sa chambre

Comment le roy charles manda a Ballant l'admiral sept pers de france qui n'y vouloyent pas aller

Comment l'admiral transmettoit quinze roys sarrazins a l'empereur pour ravoir fierabras lesquelz furent rencontrez par les pers de france et mis a mort

Du pont merveilleux de mantrible du tribut qui y failloyt payer pour y passer et comment par belles parolles les françoys passerent oultre

Comment les barons de france vindrent parler a ballam et quel messaige ilz luy firent

Comment par le moyen de floripes les françoys furent logez et saulvez et congneuz par elle et arraisonnez et les reliques monstrees devant eulx et aultres matieres

Comment lucafar nepveu de l'admiral violantement entra en la chambre et après fut mys a mort par le duc naymes

Comment par le conseil de floripes les françoys deslogerent l'admiral de son palaix moult fort a grant bataille. et comment par enchantement une seinture fut prinse a la fille et qu'il en fut

Comment les barons furent affligez en celle tour avec floripes et ses pucelles qui souffroyent grant fain. et comment les dieux par eulx furent confondus

Comment les pers de france saillirent hors de la tour et grant bataille firent en la quelle ilz rencontrerent vingt sommiers chargés de viandes

Comment guy fut prins des sarrazins et interrogué de l'admiral et les plaintes de la belle floripes fist pour luy et aultres matieres

Comment les payens eurent proposé de pendre guy. et puis les crestiens le secoururent puissamment

Comment les pers de france devanditz furent despourveuz de vivres. et puis restaurez. et puis assiegez et combatus par les payens

Comment la tour fut esquartellee et brullee par enchantement et les françoys furent en grant peril de mort et restaurez par ung assault qu'ilz feirent sur les payens

Comment les pers de france allerent denoncer leurs affaires au roy charles et comment richard de normandie se ordonna pour y aller

Comment après que richard fut party le roy clarion trespuissant courut après luy lequel fut occis par ledit richart vaillamment

Comment le cheval de richart vint passer parmy l'excercite de l'admiral et fut veu et congneu des pers de france qu'ilz se pensoient qu'il fust mort et comment le pont de mantrible fut gardé

Comment richard de normandie passa la riviere de flagot moyennant ung cerf blanc qui se trouva devant luy miraculeusement

Comment charles fut en propos de n'aller plus avant par le conseil de ganellon traistre et ses compaignons et autres matieres

Comment après la complainte de charles Richart vint a luy qui luy raconta les affaires des pers de france et qu'il en fut

Comment par le moyen et conseil de richart de normandie a tout troys aultres barons le fort du pont de mantrible fut gaigné non pas sans grant peine et quel homme estoit galafre

Comment par force de mortalité et de bataille charles entra en mantrible après que galafre fut mort: nonobstant que alorry traitre luy vouloit estre contraire et d'autres matieres

Comment amyote geante a tout une faulx fit grant devoir contre les crestiens et comment ses deux filz furent baptisez: et de l'admiral ballant quant il sceut les nouvelles

Comment les pers de france furent assaillis plus fort que jamais. et la tour quasi mise par terre. et reconfortees par les sainctes relicques par eulx adorees et aultres matieres

Comment les françoys ouyrent nouvelles de l'ost de charles et l'admiral aussi: et comment Ganellon se porta merveilleusement quant tout seul fut envoyé a l'admiral et qu'il fist

Comment charles l'empereur ordonna .x. battailles et comment ilz firent et comment ilz furent rencontrez de la puissance de l'admiral ou l'empereur fit merveilles et aultres matieres

Comment en ceste bataille suyvant sortibrant fut occis par regnier pere d'olivier et après l'admiral fit merveilles et grant ennuy au françoys

Comment les pers de france qui estoient en la tour vindrent hors quant ilz virent l'ost et adonc fut prins l'admiral et detenu prisonnier

Comment ballam pour admonicion qu'on luy fist ne se voulut baptiser. mais fut occis. et floripes baptisee et puis espousee a guy de bourgoigne et coronnee royne et guy couronné roy de celle contree

Comment floripes donna les reliques a l'empereur. et comment elles furent esprouvees miraculeusement et du retour de charles et fin de ce livre

Comment saint jaques s'apparut a charles: et comment moyennant la conduite des estoilles il alla en galice

Des citez acquises en espaigne pour Charles. et comment aulcunes par luy furent mauldites et aultres matieres

De la grande ydole qui estoit en une cité qu'on ne pouvoit abatre et des signes et des condicions d'elles

De l'eglise de saint Jaques de galice et d'aultres qu'il fist fonder

Comment après que Aigolant le geant eut prinse espaigne et mis a mort les crestiens charles le recouvra et aultres matieres

Comment aigolant manda a charles qu'il venist a luy a peu de gens feablement pour faire juste guerre. et comment charles en habit dissimulé parla a luy et aultres matieres

Comment charles acompaigné de plusieurs gens s'en retourna au lieu devant dit et print la cité de agennes et aultres matieres

Des operations vertueuses que charles fit quant il fut retourné en france et des barons qu'il avoit en sa compagnie et de leur puissance

Des treves de charles et de aigolant et de la mort de ces gens et purquoy aigolant ne se baptisa

De la mort de aigolant et de ses gens comme plusieurs crestiens furent mortz par concupiscence d'argent et des crestiens trouvez mortz miraculeusement

De ferragus le geant merveilleux comment il emportoit les barons de france sans dangier et comment après rolant batailla contre luy

Comment lendemain Rolant et ferragus bataillerent et disputerent de la foy et par quel moyen ferragus fut occis par rolant

Comment charles alla a corduble ou le roy du lieu et le roy de cibille attendoyent et de leur destruction

Comment l'eglise de saint Jaques fut sacree par l'arcevesque Turpin et les eglises d'espaigne subjectes a elle et des eglises principales

Comment la traison fut comprise par ganellon/ et de la mort des christiens/ et comment ganellon est repris par l'acteur

De la mort du roy Marfurius et comment rolant fut navré de quatre lances mortellement après que tous ses gens furent mortz

Comment rolant mourut saintement après plusieurs martires et oraisons faictes a dieu moult devotes. et de la complainte faicte sur son espee durandal

De la vision de la mort de Rolant et de la douleur de charles et comment il fut de luy piteusement complaint et aultres matieres

Comment on trouva olivier tout escorché et de la main des sarrazins et de la mort de ganellon hydeuse

Comment ce fait charles rendit graces a dieu et a saint denys et des constitutions qu'il fist en france

Comment charles alla en allemaigne ou il mourut sainctement et de sa mort denoncee a turpin et fut ensepvely imperialement

La recapitulacion de l'oeuvre

L'excusacion du facteur

Note concernant la transcription

Отрывок из книги

Jehan Bagnyon

Publié par Good Press, 2021

.....

La nuyt des nopces a l'eure que le roy et la royne devoyent dormir ensemble clotildis embrasee de l'amour de dieu par grant congnoissance de jhesus nostre seigneur alla dire au roy. Mon treschier seigneur je te requiers qu'il te plaise moy ottroyer une petite demande devant que j'entre au lit avec toy. le roy dist demande ce que tu vouldras. car j'en suis bien content. Clotildis luy dist. Premierement je te demande et requiers et si te admoneste que tu vueilles croire au dieu des cieulx pere tout puissant celluy qui fist le ciel et la terre et qui t'a creé. et en jhesucrist son filz le roy des roys qui par sa passion t'a racheté. et au saint esperit confirmateur et illuminateur de toutes bonnes operacions procedant du pere et du filz devantditz et sainte trinité en une seule essence a qui on doit tout honneur et toute creance Croy en celle sainte eglise et laisse tes ydoles. faites des hommes. et qui riens ne valent et pense de restaurer les saintes eglises que tu as fait brusler. Secondement je te requiers que tu vueilles demander ma part et porcion des biens de mon pere et de ma mere a Agabondus mon oncle lesquelz il fist mourir faulcement et sans occasion. mais la vengence je laisse a dieu. Quant elle eut ce dit le roy respondit. Tu m'as demandé ung point et passaige qui m'est trop difficile a toy ottroyer que je renonce a mes dieux par lesquelz je me gouverne pour adorer ton seul dieu duquel tu m'as parlé. Demande moy autre chose. et de tresbon cueur je le feray. Clotildis respondit. tant qu'il m'est possible de requerir je te supplie que tu vueilles adorer le dieu du ciel le formateur de tout a qui seul on doit adoracion. Le roy pour lors n'en fist autre responce. mais transmist tantost Aurelien son facteur a Agabondus pour avoir les biens de la royne Clotildis. Et quant Aurelien eut fait son messaige Agabondus remply de grant ire respondit au messagier qu'il auroit aussitost tout son royaulme que riens de luy. Pour celle cause Aurelien luy dist. Le roy clovys mon maistre te mande par moy que tu luy faces responce sur ma demande. autrement il sera mal content. Adonc les bourguignons tindrent conseil et dirent a Agabondus leur roy. Sire roy donnez a vostre niepce de voz biens selon ce que raison veult. car il est droit. et si congnoissons que ainsi le debvez faire. et prenez plaisir d'avoir bonnes aliances avec le roy Clovys et avec toutes ses gens a celle fin qu'ilz ne nous courent dessus. car celluy peuple est austere et furieux. et que pis est sans avoir memoire de dieu. Et sur ce point Agabondus contraint au conseil des bourguignons ses gens donnerent ung grant partie de son tresor a Aurelien messagier du roy Clovys. Et peu de temps après le noble roy clovys en visitant son royaulme la royne Clotildis fut enseinte d'enfant. et fit ung filz lequel elle vouloit baptiser tous les jours requerant le roy qu'il voulsist croire ainsi comme dessus est dit. mais il n'en vouloit riens ouyr parler ne faire Quant cestuy filz fut baptisé tantost après il expira et fut mort dont le roy fut mal content et dist a la royne. Se tu l'eussez donné et dedicqué a mes dieux il fut vif. La royne respondit pour ceste cause je ne suis rien perturbee en mon couraige/ mais rens graces et louenge a dieu mon createur quant il m'a fait si digne qu'il luy a pleu de prendre en son royaulme le premier fruyt de mon ventre. après l'an ensuyvant elle eut de rechief ung aultre filz nommé Lodomitus. lequel quant il fut baptisé il fut malade si fort que on cuidoit qu'il deust mourir. Et quant le roy le vit ainsi languir tresmal content dist a la royne. Et comment il n'en sera point aultrement de cestuy cy fors ainsi comme de l'autre son frere qu'il n'en meure quant oultre mon vouloir tu en faiz en les baptisant/ donc la royne pour la crainte du roy pria a dieu devotement pour la santé de son enfant et tantost il fut guery.

Le quatriesme chapitre.

.....