“Oepse daisy” kon net sowel “O bliksem”, “O gits” of “O magtag” gewees het, maar miskien is dit tyd om Juanita du Plessis in plaas van Jack Parow te speel. So sê Johan Bakkes. Die maklik begaanbare weë hou vir Johan Bakkes geen aantrekkingskrag nie; nee, vir hom altyd maar die smalle weë wat met bloedsweet gepaardgaan. Dáár waar min ander dit nog gewaag het. Hier is oudergewoonte heerlike, avontuurlustige vertellings oor ver én naby reise, propvol humor, en nooit sonder deernis vir die medemens nie.
Оглавление
C. Johan Bakkes. Oepse Daisy
Voorwoord
Dink en Begeer
’n Italjaner in Afrika
Hansie slim, berg wil klim
Putsonderwater
O, die slaap – ’n wondersoete ding
“Welcome to hell”
Weet mense wie was …?
Een aand saam met ’n Nobelpryswenner
Oorgrens-operasie
Ag, man, moenie moan nie
Die weduwee
Daar is net nooit goeie nuus nie
’n Skatologiese storie*
Hoe om nooit by die KKNK uit te kom nie
Die rylopersgids deur Keimoes
Diamond Lil
’n Reis na Brakpan
’n Storie vir ’n tydskrif
Om dit vir ander lekker te maak
Anna Rebstock’s Hochzeitsreise
Onder ’n Toskaanse son
Die vullisverwyderaar van die Marienfluss
Niks bly dieselfde nie
Die laaste perron
Onse Vader, gee ons vandag …
As eendag nie aanbreek nie
Oepse daisy
Naskrif
Erkennings en bedankings
Отрывок из книги
Life is a long journey and I am not one to get off halfway. I have always wanted to turn the next corner to see the next view and walk into it.
– Martin Booth
.....
Ek onthou dit soos gister, toe ek in 1996 oor die Serengeti-vlaktes uitgestap het. My arms in die lug en trane in my oë. Die blouwildebeeste het snorkend om my gemaal en ek het geweet, ja, hiér móés ek gewees het. Ek het ook geweet hierheen sal ek moet terugkom, keer op keer. Daardie stuk wêreld was vir my soos die oertyd, die tyd voordat die Neanderdalmens ons ou aarde begin befonkfaai het.
Veertien lange jare het verloop. Die tyd het my begin inhaal. My aptekersbrilletjies het na 3,5 gevorder. ’n Gehoorstuk was op die aankooplys. Cholestrolvlakke het my in ’n lopende hartaanval verander. Alkoholgebruik het my lewer groot genoeg gekry dat hy al kan hoërskool toe gaan … Ek het gewonder of ek ooit weer daai wydheidsgevoel van die Serengeti sou kon beleef? Was daai koppie nou te ver?
