Читать книгу Барыта алҕас этэ… - - Страница 1

Биир үтүө күн Маайыс, тугу да гынара суоҕуттан мирк диэннэригэр киирэн эрэрэ даҕаны, ылларардыы ылларбыта. Билигин кэлэн кэмсиммит да, кэмсиммэтэх да иһин, хайаахтыай, аныгы олох абытайдаах дьалхаана буоллаҕа… Быһата, Маайыс биир уоллуун… букатын алҕас билсибитэ.

Тоҕо эбитэ буолла, Маайыс курдук дьулугур үрдүк уҥуохтаах, көбүс-көнө атахтардаах, намылыйбыт уһун суһуохтаах, аныгы оҕо диэтэххэ, косметика диэни билбэтэх ыраас-кэрэ сэбэрэлээх кыыс сахаҕа да элбээтэ эбээт? Биһиги кыыспыт көстөр дьүһүнүнэн киһи хараҕа хатанар, дэҥҥэ мичийэн ыллаҕына сандаарыс гына түһэр ыраас хааннаах, хобо чуораанныы лыҥкыныыр куоластаах, синньигэс биилинэн оонньоон, курбуһаҕынан долгулдьуйан ааһар ураты таһаалаах буолан, оннооҕор, араас «мисскэлэргэ» мэлдьи батыһа сылдьан ыҥырар идэлээхтэр.

Ол эрээри Маайыс – баҕар, Дьокуускайга үөрэммэтэх буолан буолуо – ханна да кытта сатаабат. Питер курдук киэҥ дьалхааннаах сиринэн кэрийдэр да, үөрэх туһугар муннукка ытаабыт, атыҥҥа аралдьыйбатах уонна эбиитин сэдэх идэлээх буолан, салалта тус ыҥырыытынан Сахатын сиригэр үлэлии кэлбитэ үс эрэ сыл буолла. Үлэлиир сирэ – дьоһун сир, саха киһитэ иҥэн-тоҥон уһуннук тохтоон үлэлээбэтэх, кытаанах хонтуора. Онно кини, үлэттэн ордон, алтыһарга-сэлэһэргэ билсиэн-көрсүөн сөптөөх эдэр ыччат эйгэтэ суох буолан, хаайтаран, ханна да сылдьыбат кыыс биирдэ, быыс булбучча, миркэҕэ киирбитэ. Ол да иһин эмискэ хараҕа аһыллыбыт буолуон эмиэ сөп.

Виталийдыын дьикти баҕайытык билсибиттэрэ. Туохтан эрэ төрүөттэнэн уол маатыралаан ыһыллаҥната олороругар түбэспитэ. Үөхсэ аҕай олордоҕуна, арай приватка Маайыс «тоҥсуйбута» уонна боростуой баҕайытык ыйытан барбыта. Кини дьиҥэр да оннуга. Кыыс, бу үлүгэрдээх харса-хабыра суох, дьөрү да дьэбир тыллаах-өстөөх туох киһитэ буоллаҕай диэн таах, уоскутаары эрэ буолбатах, биир үксүн дьиктиргээн, билэ сатаан бастакынан тыл көтөхпүтэ… Виталий буоллаҕына, сөрү-сөпкө наардаабыт курдук суруйар, хайдахтаах да тылынан быдьардык саҥардаҕына холку баҕайытык тэтимин ыһыктыбакка хардарар, эбиитин өссө, үөрэтэ сатыырга дылытык, сэмэлиэх кэриҥнээх дьикти «саҥалаах» чоп курдук чобуо кыыһы, кырдьыга, бастаан абааһы көрбүтэ, онтон улам кэпсэттэҕин аайы сэҥээрэн испитэ.

Күннэтэ кэпсэл ырааппыта, аны иккиэн күүтүһэр, хаһан чатка киирэллэрин болдьоһор буолбуттара. Бу икки бэйэ-бэйэлэрин билсибэт киһи тугу сэлэһэллэрэ буолуо диигитий? Сэгэриэм, солуута да суох, суолтата да чычаас быыкаа сонун сыыһа, түбэһиэх туох эмэ айымньы да буоллун, күҥҥэ көстөр бары эгэлгэ туһунан таах кэпсэтии, санааны атастаһыы эдэр дьону балачча билсэллэригэр күөртээбитэ эрэ быһыылааҕа.

Сарсыарда, сүүрэн кэлээт, Маайыс:

– Доҕоор, мин ойдум, аны 2–3 чааһынан кэлээ инибин, – диэт, ыстанан хаалара.

Оччоҕо уол ити кэмҥэ суоттанан, кыыһын кэтэһэ таарыйа, туох баар күннээҕи үлэтин бэрт түргэнник бүтэрэ охсоро. Онтон Маайыс кэлэригэр тугунан эмэ булгуччу соһутаары, интернети биир гына «кэрийэн», итини-маны ааҕан илистэ быһыытыйара. Итинник сылаарҕаан олордоҕуна эмискэ кыыс «тиийэн» кэлэрэ, аҕыйах тылынан ханна сылдьыбытын, тугу истибитин тэбии охсоро. Маайыс уол куруук чатка баарыгар үөрэнэн да хаалбыта. Кининэн сирэйдээн, куруук кэтэһэр-күүтэр киһилээх буолан, сарсыардаттан бэрт тиэтэлинэн компьютерын холбуу биэрэрэ, Виталий баарын көрөөт, үөрүүтүттэн мичээрдээн ылара.

Биирдэ политиктар тустарынан, туохтан сылтаммыта буолла, мөккүһэн турбуттара. Ханнык эрэ түгэҥҥэ, кыыс собус-соруйан уолу кыынньаабыта, букатын да дьиҥ иһигэр бэйэтэ санаабатын курдук төттөрү куолулаан үтэн-анньан турбута уонна кини тугу диирин долгуйа күүппүтэ. Соһуйуон иһин, Виталий бэрт тулуурдаах уонна олохтоох тыллаах буолан биэрбитэ. Кырдьыга, кыыс, кинини эмиэ кыыһыран, маатыралаан-үөхсэн да турдаҕына соһуйбаттыы бэлэмнэммитэ эрээри, бу сырыыга тоҕо эрэ оннук буолбатаҕа.

Итинтэн ыла Маайыс кыра-кыралаан уолу чыычылыыр идэлэммитэ, кырдьык-хордьук уол сэрэйбэтин курдук араастаан дьээбэлиирэ уонна, соһуйуон иһин, түмүгэр бэйэтэ наһаа астынара, ис-иһиттэн долгуйа үөрэрэ. Уол ол курдук өйдөөҕүн, олохтоох тылын, наһаа тобуллаҕастык, хайдахтаах да киһиэхэ чугастык, түргэнник тиийэр гына наҕыллык быһаарарын кыыс сөбүлээбитэ. Биирдэ кини үлэтигэр ыктаран, санаата оонньоон, хомойон, ытыахча да буола сыһан, эмиэ приватка киирэн Виталийга үҥсэргээбитигэр, оруобуна били урут эһэтэ оҕонньор уоскутарыныы, наллаан сүбэлээн, тугу эрэ холобурдаан күллэрэн, устунан таһы-быһа умуннаран кэбиспиттээх. Онуоха чэпчээбит, санаатын дьайҕардыбыт кыыс соһуйан саҥа аллайбыта:

– Сэгээр, хата, эн туох эрэ психологкын ээ, быһыыта? Сеанскар төһө харчыны ылааччыгыный? – диэн күлбүттээх.

Уол оонньууну тута өйдөөн:

– Уу, хотуой, мин өҥөм наһаа сыаналаах, кырдьыаххар да диэри төлүүрүҥ биллибэт, – диэн төттөрү хаадьылаабыта…

Ити тухары дьиҥ-дьиҥэр кинилэр үчүгэйдик билсэ иликтэрэ. Онтон арай биир күн Виталий чуолкайдаһан турбута.

– Бэйи эрэ, эн аатыҥ-суолуҥ кимий? Мин буоллаҕына, инженербин, кэргэним суох, таптыы сылдьыбытым диэн баһаам. Билигин көҥүл-босхо хаамабын эрээри, доҕор кыыһым суох… Билсэбит дуо?

Маайыс күлбүтэ, билсибиппит ырааппыт курдук эрээри, кырдьык да билсэ илик эбиппит диэн хардарбыта. Хаартыскаларын Виталий утуу-субуу: «Лови!» – дии-дии, ыытан-кутан испитэ. Маайыс мониторун тобус-толору толорбут уол мөссүөнүн наһаа сөбүлүү көрбүтэ, ордук өйдөөх баҕайы харахтарын. Бу – сайын, арааһа, сөтүөлээн тахсыбыт быһыылаах, кытылга турар, оттон бу – кустуу сылдьан түспүт, бу – мээчиги хабаары охтон аҕай эрэр, бу – отоннуу сылдьар, арааһа, сүрэҕэлдьээбит дуу, тоҕо эрэ сыппыт эҥин… Хайа, бу – хайыһардаан дайбыт, бу – хайа эрэ кыыстыын таһырдьа, мууска кутуллубут катокка, хаҥкылаан сырылаппыттар.Үчүгэй да баҕайы! Оттон бу – бүүс-бүтүннүү бурдук буолан тугу эрэ буһара сылдьар, бу – үҥкүүлүү сылдьар, бу – даачаҕа дуу, тыаҕа дуу, хаар күрдьэр быһыылаах, бу – компьютерыгар киириэх айылаах тугу эрэ көрөн аҕай олорор.

Оттон кыыс бэйэтин киэнэ хантан кэлиэй? Инженер уол курдук кини компьютеры хантан билиэй? Санаа хоту талбытын ыытар кыаҕа суоҕа, кими эмэ көрдөһүөн кыбыстара. Ону, инньэ диэн быһаарбытыгар, Виталий тоҕо эрэ ылыммыта, баалаабатаҕа.

Ити курдук үс ыйы быһа суруйсубуттара. Онтон биирдэ уол соһуйбут курдук суруйбута:

– Маша, оттон, хата, төлөпүөн диэн баар дии? Давай, я позвоню?

Иккиэн күлбүттэрэ, кыыс тута төлөпүөнүн биэрбитэ, уол кини куолаһын истээт «бүтээхтээбитэ».

Кини туруупкаҕа иһиттэҕинэ, Маайыс наһаа сэмэйдик, намыыннык, тарда соҕус унаарытан саҥарара, биир кэм холку бэйэлээҕэ уонна долгуйарын даҕаны букатын биллэрбэккэ кыана туттар кытаанах соҕус быһыылааҕа. Виталий маннык сылаас уонна нарын куоластаах кыыһы, кырдьыга, биирдэ да көрсө, истэ илигэ. Туруупканы тутан олорон хараҕын симнэҕинэ, букатын билбэт кэрэчээнэтин мөссүөнэ субу устан кини иннигэр көстөн кэлэрэ. Санаатыгар, Маайыс кыып-кыра, хаап-хатыҥыр уонна төөп-төгүрүк оҕолуу мыттайбыт сирэйдээҕэ, кыбыста быһыытыйбыттыы сабыччы көрбүт кыараҕас харахтардааҕа, кыргыылаах баттаҕын сымнаҕас тыал ыһан үргэҥнэтэрэ. Уол сүрэҕэ дьиктитик мөхсөн, түөһүн иһэ сып-сылаастык илгийэн, кими эрэ наһаа күүскэ таптыан, туохтан эрэ көмүскүөн баҕарар ураты иэйиигэ куустарбыта.

Оттон Маайыс, Виталийы хаартыскатынан инники көрбүт киһи быһыытынан, улам-улам сөбүлүүрэ күүһүрүөххэ дылыта, арай, көрсүөх диэтэр эрэ… кини сибилигин да сүүрүөх курдук туруктааҕыттан симиттэ санаан, көрбөккө да олорон, имнэрэ тэтэр гына түһэллэрэ.

* * *

– Маайыс, привет:-)), – диэбитинэн Виталий «ыҥыра» олорор эбит…

Кыыс өөр баҕайы саҥата суох соҥуоран олорон баран, аат эрэ харата:

– Дорообо… – диэбитэ.

– Хайа-а, дорогая:-)), туох буоллуҥ? Неужто нездоровится? Как жаль:((, – диэн уол айманан, арааһы ыйыталаһан барбыта да, Маайыс сатаан кэпсэтэриттэн ааспыта, бэҕэһээҥҥи дьахтар куолаһа кини кулгааҕар субу иһиллэргэ дылыта…

Онтон, синим биир дии санаат, суруйбута:

– Виталя, мин эйигин мэһэйдиир санаам суоҕа, этиэҥ этэ буоллаҕа дии, кэргэннээхпин диэн? Мин туох диэн утарыамый? Ол эрээри, бу кылгас да кэмҥэ, виртуально да буоллун, бэртээхэйдик сэһэргэһэр доҕордоно сылдьыбыппар эйиэхэ махтанабын, дьоллоох буол, Виталя… – диэт, толору уу-хаар бычалыйбыт харахтарынан ситэ тугу да көрбөккө, приваты саба баттаабыта, миркэтиттэн куоппута…

Кыыс үлэтигэр олорорун умнан, кимиэхэ өһүрэрин дуу, кимтэн эмэ атаҕастаммыт курдук санаммытын дуу бэйэтэ да өйдөөбөккө, тоҕо эрэ ис-иһиттэн хоргутан, кистээн ытаабыта. Суох, Виталийга кыыһырар санаата суоҕа, туох диэн даҕаны кини уолу буруйдуой? Барыта мирк, чат буоллаҕа дии?! Хантан, кырдьыга да, ити ситим курдук илимҥэ иһирэхтик сэһэргэһэр киһини булуоҥуй? Барыта албын-түөкэй буолара баа буолуо дуо? Атына – уруһуй, оо, дьэ… буолан истэхпит. Баҕар, Виталий диэн киһи… букатын да суоҕа, соруйан оҥорон-сэрэйэн көрөн ааттаныы буолуо. Ханнык эмэ оҕо дуу, пенсионер дуу албыннаабыт буоллун, хантан тугу билиэҥий?! Ол эрээри Маайыс сүрэҕинэн таайар курдуга, уол хаартыскаҕа көстөр сэбэрэтигэр куолаһа да дьүөрэлэһэрэ, толкуйдаах тыла-өһө, наҕыла, барыта сөп түбэһэргэ дылыта. Суох, кини сыыһыан сатаммат, уол дьиҥэр да баар киһи буолуо ээ. Оттон албын өттүн… билбит суох.

Маайыс аны хаһан да миркэҕэ да, чатка да киириэм суоҕа дии саныы олорбута, тохтоло суох сүүрэр хараҕын уутун кыра оҕолуу илиитин тас өттүнэн хаһыйаат, кумааҕытын үрдүгэр түспүтэ. Бэйэтиттэн бэйэтэ кэлэйбитэ, барытын умнуохтааҕын туһунан букатыннаахтык сананан эрэрэ да…

Сонно тута төлөпүөнэ өрө тырылыы түспүтэ. Бобуулаах кэмҥэ, бобуулаах сиргэ Виталий эрийэрин кыыс сүрэҕинэн сэрэйбитэ, туруупканы ылыан баҕарбатаҕа. Ол эрээри кини дьаһалын истиэн баҕарбат илиитэ, тоҕо эрэ тохтообокко, бэрт сорунуулаахтык тылыгырыы турар аппарааты ылан кулгааҕар даҕайбыта…

Виталий уларыйан, кэһиэҕирэ охсубут куолаһын чуут билбитэ.

– Машенька, иһит, тохтуу түс… Мин эйигин албынныыр санаам суоҕа… Ол эрээри итинник түбэлтэ буолбутун мин билбэтэхпин… Оччотугар көрсүөххэ, мин туох баар кистээбит кырдьыкпын иһит, ол кэнниттэн бэйэҥ быһаарыаҥ этэ… – диэбитэ Виталий уонна ыарахан баҕайытык үөһэ тыыммыта…

Маайыс сүрэҕэ тугу эрэ сэрэйэн «парк» гыммыта, туох да диэҕин билбэтэҕэ эрээри, бадаҕа, кини саҥата быһыылааҕа:

– Ханна бааргыный? Аадырыһыҥ? – диэбитэ.

Туманнырбыт харахтарын быһа симпитэ, олоппоско сытар суумкатын харбаат, таһырдьа ыстаммыта… Бобуулаах тэрилтэ эрэ, кистэлэҥ үлэ эрэ… бу түгэҥҥэ кыыс төбөтүгэр туох да суоҕа, арай баара: сыччах дууһатын кыланыыта, сүрэҕин ооккотун дьикти бүтэҥитик битигириир дьулаан тыаһа…

* * *

Маайыс, этиллибитин курдук, аһаҕас ааны оргууй арыйан, хараҥа баҕайы хоско киирэн кэлбитэ да, тугу да бу диэн өйдөөн көрбөтөҕө, ким да баара биллибэт курдуга. Чочумча турбахтаабыта, эмиэ албын буоллаҕа диэн мунаара таалбыта. Онтон харахтара борук-сорукка дьэ үөрэнэн, кэҥэс хос иһигэр түннүк анныгар бэрт көлөттүгэс көрүҥнээх күөхтүҥү кириэһилэ турарын бэлиэтии көрбүтэ уонна онно киһи олорор буолуохтааҕын сэрэйбитэ эрэ.

Кырдьык, ол кэтит кириэһилэҕэ Виталий олороро. Кини кыыс киирэн иһэр тыаһын ыраахтан истибитэ уонна… сыыспытын өйдөөбүтэ. Хас эмэ ыйы быһа хараҕар ойуулаан-оҥорон көрбүт кыра хатыҥыр кыыс туттуута буолбатах быһыылааҕа. Маайыс, кини таптыы охсубут кэрэчээн кыыһа, букатын атын эбит, күүстээх чоруун атахтардаах, бигэтик үрдүк хобулукка дугуммут буолуон сөбө, эдэр кыыс холугар киэҥ соҕустук атыллыырыттан сэрэйдэххэ, бэрт уһун атахтардаах быһыылаах, ол аата уҥуоҕунан лаппа үрдүк эбит диэн быһаара охсубута.

Онтон Маайыс киирбитигэр илэ бэйэтин саҥата суох тонолуппакка көрбүтэ, тылыттан маппыта: кини иннигэр үрдүк бэйэлээх, сип-синньигэс бииллээх, күөкэйбит уһун моойдоох, хойуу баттаҕын кэтэҕэр хомуйан чөкөппүт этиэхтэн эриэккэс кыысчаан, килбиктик эрээри, сорунуулаахтык туттан турара. Ама дуу… Виталий били өйүгэр оҥорбут хартыыната сонно сууралла охсубута, түргэнник кыыс сирэйин, сырдык сэбэрэтин көрө охсуон баҕарбыта, ол иһин нэһиилэ:

– Маша, дорообо, кэлиий, чугаһаа, аас… Бырастыы гын, мин… бу баарбын… – эрэ диэбитэ.

Кыыс соһуйбута:

– Уот… уотуҥ ханан холбоноруй? – диэн ыйыппыта.

Виталий:

– Суох, түбүгүрүмэ, мин манна светильниги холбуом, – диэбитэ уонна, хайдах эрэ бэрт нүһэрдик нөрүс гынан, сиргэ ханна эрэ баар көстүбэт кнопканы даҕайбыта быһыылааҕа…

«Оо!!!» – диэн соһуйан саҥа аллайыан, Маайыс иһиттэн саҥата тахсыбатаҕа. Кини иннигэр Виталий буолбатах, чахчы да атын киһи олороро… Хаар маҥан баттахтаах, сирэйэ баас дуу, чэр дуу буолбут, сабыччы түспүт халтаһатыгар мэһэйдэппит соҕотох харахтаах, олуона көстүүлээх хаһан да харахтаабатах дьиппиэн дьээдьэтэ этэ. Кыыс, куттанан төттөрү сүүрүөн, турар сиригэр хам хатаммыт курдуга, дөйбүт да быһыылааҕа.

– Маша, бырастыы гын, мин барытын быһаара сатаан көрүөм… Тулуйан истиэҥ дуо? – диэн кини билэр куолаһа, суох ити сирэйтэн буолбатах, ханна эрэ ити эҥээртэн иһиллэргэ дылы буолбута.

Кыыс чугаһаабытыгар кини сирэйин Виталий, дьэ, табан көрбүтэ: муус-маҥан нарыын-нарын иэдэстэрдээҕэ, ойуу курдук дыргыллыбыт уһун хойуу хаастардааҕа, кип-киэҥ, кыратык ыйаастыгас, өйдөөх харахтарын көмүскээбиттии уһун-уһун кыламаннара ибигирэһэллэрэ, сүһүөхтээх үрдүк мунна кинини ордук тупсарара эрээри быдан тоҥуй көрүҥнүүргэ дылыта, хайа… уонна чараас бэйэлээх быыкаайык уостара… уолу олус долгуппуттара… Биир кырааска сыстыбатах, кэрэтийэ сатаан кэмэ суоҕу бистибит билиҥҥи кыргыттартан чахчы ураты кыыс кини соҕотохсуйбут курус ыыспатыгар дьикти хартыына кэриэтэ биирдэ буола түспүт эбит.

Бачча бэйэлээх, таҥара табатын курдук кэрэ саха кыысчаана хайдах соҕотох үһүө? Хаһан кинини киһи диэхтиэй, тэҥниэй диэн санааттан сонно харааста быһыытыйбыта, бэйэтин бодотуттан бэйэтэ абаран, соххор хараҕыттан соҕотох таммах сүрэҕэлдьээбиттии ыгыллан тахсан чэрдээх иэдэһигэр, ханна да барыан билбэттии, мунаарбыттыы ыйаммыта…

Кыыс чугаһаабыта, кириэһилэҕэ олорор киһи иннигэр тобугуттан тардыһан оргууй олорбута уонна дьиктиргээбит харахтарынан кинини тонолуппакка одуулаабыта.

– Виталий, эн?..

– Мин, Маша, бу – мин, дьиҥнээх илэ бэйэм эн иннигэр олоробун, эн дьүүлгүн истээри. Үөхтэххинэ да, кэлэйдэххинэ да, эргиллибэттии куоттаххына да… тулуйарга бэлэммин… – диэбитэ киһи нэһиилэ иһиллэрдик.

Ким да, тугу да ыган таһааран саҥарбат ыарахан чуумпута тыҥаабыта. Онтон Виталий кэпсээн барбыта…

* * *

Сабыс-саҥа инженер идэлэммит кыһыл дипломнаах уолу куорат саамай биллэр институтугар үлэҕэ анаабыттар. Күһүөрү аан бастаан үлэҕэ барар кэмэ чугаһаабытын баттаһа, бултуу диэн, тыаҕа тахсыбыттар. Көмүс күһүн кэрэ көстүүтүнэн астынан, аатыгар эрэ булчуттар тыанан-өрүһүнэн бэркэ сылдьыбыттар.

Биир ардахтаах күн тыа саҕатыгар турар үүтээҥҥэ тохтоон хонон ааһарга быһаарыммыттар. Арай ол түүн хаайыыттан куоппут алта адьырҕа киһи кинилэргэ кэтиллэ биэрбиттэр, бары тэриллэрин, сэптэрин-сэбиргэллэрин, сааларын-саадахтарын былдьаан, туоҕа да суох хаалларарга, халыырга санаммыттар. Хабыр хапсыһыы буолбут.

Ол сылдьан, уоттаах хардаҕаһынан кинини төбөҕө саайан эрэр курдуктара… эмискэ ылы-чып, хабыс-хараҥа буолбута. Биирдэ өйдөммүтэ – хойуу инчэҕэй кытыан быыһыгар сытар эбит, төһө өр туймаарыйан сыппыта биллибэт, сыҕарыйа сатаан, илиитин-атаҕын көннөрө сатыыра да, кыаҕа тиийбэтэ, хамсаата да халлаана төттөрү эргийэн, эмиэ харыстала суох хараҥа сатыылыыра…

Дьиҥэр ити түбэлтэ элбэх киһини, ыалы аймаабыта. Бииргэ барбыт биир уолларын били баҕайылар букатын да ытан кэбиспиттэр, атынын улаханнык эчэппиттэр. Арай Виталийдара арыый инники өйдөнөн, нэһиилэ оронон тахсан суол чугаһыгар туора сыппытынан сирдэтэн, көрдөөччүлэр кинилэри булбуттар.

Ол кэнниттэн – балыыһа, ыарыы, тугу да көрбөт туруктаах харахтар, тохтоон быстыбат төбө ыарыыта, хамсаабат илии-атах… Ыарахан күннэр этилэр. Кини дьолугар, эдьиийэ тыаттан киирэн ыарыылаан абыраабыта. Сыппыта сыл кэриҥэ буолан баран нэһиилэ олорор, кыратык хамсыыр, саҥарар буолбута. Эдьиийэ киниэхэ олус бэркэ сыһыаннаһара, мэлдьи үөрэ-көтө кэлэрэ, сонуна баһаам буолара, аралдьыйара элбэҕэ, ол эрээри палаатаҕа киирбиттэр, атыттарга кэлбиттэр кинини куруук соһуйбуттуу, дьиктиргии көрөллөрүн кэнникинэн сатаан өйдөөбөт буолан испитэ, ааранан тугу эрэ кистииллэр дии санаан дьаархаммыта.

Биирдэ аҕаһын: «Сиэркилэтэ аҕалыый», – диэбитин анарааҥҥыта тоҕо эрэ эмиэ умнан, устунан аралдьытан кэбиспитэ. Ол иһин соруһан туран, палаататтан эдьиийэ тахсыбытыгар, нэһиилэ уунан тэйиччи сытар суумкатын ороон, пудреницаны таһааран көрүнэбин диэн… куһаҕан буола сыспыта. Кини иннигэр сөҕүмэр дьүһүннээх, кэбилэммит сэбэрэлээх, дьаабы да дьаабы, билбэт киһитэ олороро… Сүрүүн, чахчы да кэйгэллэммит диэн маны этэн эрдэхтэрэ.

Виталий сэниэтэ суох илиититтэн сиэркилэтэ сиргэ кэлэн түспүтэ, икки аҥыы хайа барбыта. Оттон уол өөр да өр саҥата суох сыппыта, арааһы эргитэ санаабыта уонна кэскилэ түІнэстибит эдэркээн сааһыныын бырастыыласпыт курдук биири санаахтаабыта. Эдьиийэ да, сиэстэрэ да киирэн кэпсэтэ сатыыр саҥаларын уол истибэтэҕэ. Ити күнтэн ыла киниэхэ букатын атын олох аанын арыйбыта…

Ама дуу, туох үлүгэрэй? Туох иһин? Мин эдэрбин эбээт? Субу соторутааҕыта туох баар барыта мин туспар чэпчэкитик да кыаллыах курдуга. Төһөлөөх үлэлиэм, дьоммун үөрдүөм этэй? Оо, абакка эбит, таптыам, кэргэн ылыам диэн ыралааҕым… Ханнаный?! Бүттэҕим… Доҕотторо мэлдьи киэн туттар бастыҥ уоллара, эчи даҕаны, эрэннэрэрэ суох маннык быстахха эһиннэҕэ?!

Ити ыар санаа кинини бобо туппута уонна ыбылы ылбыт ытарчатыттан ыһыктыбатаҕа. Виталий майгылыын уларыйбыта. Дьулаан сирэйигэр дьүөрэ кэбиһэн дьэбидийбитэ. Кимниин да санаатын үллэстэн сиһилии кэпсэппэт, үтүөрэргэ таласпат, туохха да кыттыспат-орооспот буола сатаабыта, күн сирин сырдыгар ымсыырбат, ырааҕы-ырааһы ыралаабат буолбута, ырыых-ыраах бэйэтигэр бүкпүтэ. Дьонуттан тыаҕа барбаппын, миэхэ дьиэтэ ылан кулуҥ диэн көрдөспүтэ. Аймахтара бары сүбэлэһэн биир хостоох дьиэни куорат киинигэр атыыласпыттара, көһөрбүттэрэ. Ол күнтэн ыла оннооҕор эдьиийин көмөтүттэн кыккыраччы аккаастаммыта, барыларын тэйиппитэ, соҕотох олорорго букатыннаахтык быһаарыммыта.

Субу сүүрэ-көтө сылдьыбыт бэйэкэтэ курус кириэһи-лэҕэ эрэ олорор кыаммат эдэр киһиэхэ кубулуйуута дьиҥ иһигэр киниэхэ ордук ыара. Хайдахтаах санаа оонньооһунун, санаа самныытын, санаа кэхтиитин турууласпытын кыһалҕалаах эрэ сэрэйиэ эбитэ ини? Бэйэтэ туругун таска биллэрэ сатаабата, ким да көмөтүн ылыммата олоххо туруулаһыытын бэлиэтэ этэ. Били анаммыт үлэтигэр кинини хамнастыыр эрэ туһуттан… дьиэҕэ олорон тугу эмэ гынарыгар сөбүлэнэллэригэр, көҥүллүүллэригэр үөрэппит преподавателэ, кырдьаҕас киһи сүүрэн-көтөн кэпсэппи-тин уол хойут сэрэйэн эрэ билбитэ. Онон Виталий аһылыгар уонна эмигэр туттар син сөп соҕус хамнастаах буолбута. Инбэлиит диэтэххэ үлэтин ымпыгын-чымпыгын билэрин бары соһуйа хайҕаабыттара, кэнникинэн ыйытааччы, сүбэлэтээччи даҕаны элбээбитэ. Уол онно кыһаллыбата. Киниэхэ саатар эрэ буоллаҕа. Ыйтан ый, сылтан сыл ситигирдик ааһан испиттэрэ.

Биир үтүө күн киниэхэ урут хаһан эрэ үөрэнэр эрдэххэ билсэ сылдьыбыт кыыһа, хантан эрэ истэн, кини ханна олорорун булан, кыра оҕотун сиэппитинэн киирэн кэлбитэ. Эрэйдээх-буруйдаах дьылҕатын дуомун ытаммыта. Эрин, кинини оҕотунуун атаҕастаабыт киһини, үүрбүтүн уонна манна куоракка күрээбитин кэпсээбитэ, аҕыйах кэмҥэ бу дьиэҕэ кинини тулуйарыгар көрдөспүтэ. Виталий саҥарбатаҕа. Таптаабатар да, урут кыыстыын билсэ эрэ сылдьыбыт эдэр сааһын өйдөбүлүгэр Аняны, аны кэлэн кимниин билсиэмий да диэн, киниэхэ олорорун утарбатаҕа. Бастаан утаа Аня арааһы-сонуну астаан, аһатан-сиэтэн, таҥаһы-сабы тэҥҥэ сууйан-сотон, кырдьык, сырдык сардаҥаны ыспахтыыр кэриэтэ кини соҕотохсуйбут киэһэлэрин киэргэтэргэ дылы гыммыта…

Онтон… Саҥа дьыл түүн Аня киниэхэ хоонньугар киирэн ытаабыта-соҥообута, мэлдьи кинини эрэ таптаабытын туһунан сипсийбитэ, көрдөспүтэ-ааттаспыта… Уол бэйэтэ да киһи ымсыырбат дьылҕатыттан төлөрүйэр-быыһанар кыаҕа суоҕун бэркэ билэрэ. Ол иһин киниэхэ синэ биирэ: тугу да саҥарбатаҕа, оргууй аҕай ытаан санна дьигиҥниир эдэр дьахтар санныгар илиитин уурбута…

Ити итинэн ааспыта. Аня уруккутун курдук эгэ-дьэгэ буолбат буолбута, сороҕор туохтан эрэ эмискэ кыйыттар-кыыһырар, ардыгар аһыы арыгы сыттаах кэлэн иһити-хомуоһу тыаһатар идэлэммитэ. Тырыттар-тымтар кэмигэр киһини тэйитэр кэдэрги соҕус кэмэлдьитин уол абааһы көрбүтэ. Бырааптаах хаһаайка кэриэтэ тимир-тамыр туттара, ол быыһыгар хастыы да күн мэлийэн хаалара. Оҕотун тыаҕа таһаарбыта, бэйэтэ ханна эрэ үлэлиир аатырбыта. Кинини, босхоҥ буолбут сордооҕу, солото суох солкоҕо суулуурун-оҕолуурун, көрөрүн-истэрин уонна сылайарын-сындалыйарын туһунан дьоҥҥо оІорон кэпсиир идэлэммитэ.

Биирдэ Виталий тулуйбатаҕа:

– Аня, эн биһикки туох да сыһыаммыт суох, миигин сылатыма, дойдулаа, миэхэ булкуһума, – диэн холкутук эппитэ.

Онуоха дьахтар утарбыта:

– Ээ, эрэйдээх, миигинэ суох хайдах кыаныаххыный? Дьэ, туох да диэ, мин эйигин көрөрбүн киһи барыта, оннооҕор тэрилтэҥ кытта билэр. Син биир ситиһиэм: миигин ойох ылбытыҥ эрэ баар буолуо, саатар, пенсияҕын аҥаардаһаа инибин? – дии-дии күл да күл буолбута, куукунаҕа баран эбии истэ быһыылааҕа, бэркэ хорсуннук туттан төттөрү-таары хаампыта.

Виталий саҥата суох компьютерыгар нөрүйэн олорбута, киҥэ-наара алдьаммыта, үлэлиэх санаата төннүбүєєєтэ. Таах олоро сатаан чатка киирбитэ, тылга тииһэ сатаан, кыһыытын-абатын таһаара таарыйа, итиннэ толугураһан олорор дьону хаадьылаан, этиспитэ буола сатыы олорбута. Санаатыгар ити тыллары барытын куһаҕан-быртах майгылаах Аняҕа этиэхтээҕэ да, тыл таһааран айдааны күөдьүтүөн кини баҕарбатаҕа… Ол иһин айылааҕын, этиһиэн баҕалаахтары интернет илимигэр булан, бэркэ итийэн этэ-тыына олордоҕуна, арай кып-кыһылынан чыпчыҥнаан кыыс «кэлбитэ» уонна «тук-тук-тук, к Вам можно?» диэбитигэр эмиэ оргуйан турбута, буруйа суох кыыс үрдүгэр түспүтэ, киниэхэ быдьар соҕустук бары абатын-сататын таһааран испитэ…

Онтон, арай биирдэ өйдөөбүтэ, уоскуйан хаалбыт этэ. Хаһан да кимниин да буолбатаҕын курдук, олус бэркэ кэпсэтэ-сэлэһэ, оннооҕор дьээбэлэһэ олороруттан бэйэтэ да соһуйбута. Туох чэпчэки тыыннаах кыыһай диэн санаан аһарбыта. Улам, оттомноох тыллардаах суругу хос-хос аахтаҕын аайы, маннык сэһэргэһиигэ олус да наадыйарын кэмниэ-кэнэҕэс бэйэтэ да өйдөөбүтэ быһыылааҕа.

Ити киэһэ Аня хотууска кэлбэтэҕэ. Сарсыныгар, кимэ эбитэ буолла, биир киһилиин киирэн, тыаҕа тахсарын туһунан, онно балачча буолуон биллэрээт, мэлис гыммыта. Онуоха Виталий, туох эрэ ыарахан сүгэһэри түһэрбиттии, үөһэ тыыммыта.

Ити күнтэн ыла Маайыс диэн кэрэ кыыс кини курус тыыннаах кэриэтэ олоҕор баар буолбута. Кини улугурбут этигэр-сиинигэр саҥа тымыр тыган киирбиккэ дылыта. Уол, бу сытар буолуоҕуттан ыла, тоҕо эрэ, дьэ, суунуон-тарааныан, минньигэстик аһыан баҕарар буолбута. Күннэтэ кэпсэтиини күөртээри эрдэттэн бэлэмнэнэн саҥа билсиитин күүтэр идэлэммитэ. Кыыс диэтэххэ, олус дириҥник, оттомноохтук толкуйдуурун уол кырдьыга да сөхпүтэ, дьикти интэриэс кини кутун биир муннугар киирэн кирийбитэ, туох эрэ кэрэни түстүөх кистэли иҥэриэхчэ кутугунаппыта. Уол хаартыскатын көрдөрүөн иһин, саҥатык хантан кэлиэй? Баара да буоллар, киһиэхэ буолуохтааҕар, кыылга да киһиргэнэр кэрээнэ суохха дылыта. Ол иһин, син биир бу кыыстыын мин туохпун ситимниэмий дии санаат, урукку хаартыскаларын мунньан, биир-биир ыыталыыр буолбута. Санаатыгар, Виталий ити хаартыскалары булан ыытар-бэрийэр кэмигэр эмиэ эдэр, киһи кэрэхсиир мөссүөннээх, таптыан-таптатыан баҕалаах курдук сананан, аралдьыйан ылара. Сорох ардыгар эчэйиилээх этим дуу диэн эчикийэ санаабатах түгэннэриттэн соһуйара уонна бу тухары Маайыстыын курдук кими да кытта ис-иһиттэн арыллан-хомуллан астына сэһэргэспэтэҕэ ырааппытыттан курутуйара. Ол эрээри уһун да уһун түүннэр киниэхэ мэһэй буолбуттара – Маша, Машенька, Маайыс кыыс, лыҥкынатар куоластаах наһаа да намыын барахсан, ама, түүл дуу, үһүйээн дуу курдук симэлийиэ буоллаҕай? Оо, тугун баҕас куруһай кинини көрбөт дьылҕалааҕа, таптыыр-таптатар кыаҕа суох, оһолломмут буруйугар, олоҕун устата тулуйуохтаах муҥа буоллаҕа? Итинник санаа кинини утуйар уутун аймыыра, ардыгар, араас санаа эргичитэн-урбачытан, олус хаарыйан-эрэйэн, сордоох хараҕыттан халаан уутун халыс гыннарара. Бэрдэ диэн биирэ: Виталийы бу түгэҥҥэ туораттан ким да көрбөтө, кини ыгыллан-тууйуллан мөлтөөн ылар кэмчи кэмин, муҥун, ытыыр сэдэх түгэнин туоһулара – сиэрэй обуойдаах түөрт эркиннэрэ саҥата суох иһийэн тураахтыыллара, эмэгэти эрэ санатар, эчэйбит эдэркээн уолга көмөлөһөр кыахтара суоҕуттан киһини ордук самнарар тыыннаналлара…

«Јйдөөх да кыыс, билиитэ да үксүн, оо, абаккам, уруккум эбитэ буоллун, хайдах эрэ сүүрэн тиийиэ этимий? Сэмэй бэйэлээх сирэйин ооккотун көрөөт таайыам этэ буоллаҕа: миэнэ дуу, атын уол анала дуу? Кини миигин сириэ этэ дуо? Суох ини? Виталий кыргыттарга мэлдьи да бэрт сыһыаннаах буолара, иирсэр-хаадьылыыр, атаҕастыыр-албынныыр кэмэлдьитэ суоҕа ээ. Оттон Маайыһы кини, бука, таптыа да таптыа этэ ээ…» – уол итинник санаата оонньууруттан эрэйдэнэр буолбута эрээри, күнүс миркэҕэ кыыс суруйбутун көрдөр эрэ барыта ааһа охсоро, кини иһиттэн чэпчиирэ, үөрэрэ-көтөрө, оттон киэһэ эт кулгааҕынан кэрэчээн кыыһын астына истэрэ. Биирдэ Маайыс… хайдах эрэ… кинини көрүөн баҕарар курдугун тылын тамаҕыттан таайбыта, ааранан дьаархаммыта, эмискэ сүрэҕэр ыттарбыта, ол иһин, түргэн үлүгэрдик атын сонуҥҥа аралдьыта охсубута… «Акаарыа, кыыс эйигин көрдөр эрэ – бүттүҥ, маннык кэпсэтиилэр, астык сэһэргэһиилэр итинэн бүтүөхтэрэ, ону кытта эн бэйэҥ… симэлийээхтиэҥ буоллаҕа…» – ити куттал санаа кини кутун хамсаппыта, эрдэттэн чаҕыппыта.

Виталий ити туһунан санаабат буола сатыыра, барыта бүгүҥҥүнэн эрэ аастар диэн дьулуһар буолбута, Маайыстыын астына билсэр-кэпсэтэр кэмнэрин кыаҕа баарынан уһата-тарда сатаабыта.

…Ол эрээри, эн бэйэҥ быһаарыныаҥ иннинэ, мэлдьи туох эмэ бүөлүү түһэрин куолутунан, бу да сырыыга… оннук буолбута. «Билигин суунуом, ып-ыраас киһи, Машенькабыныын астыктык да астыктык кэпсэтиэм уонна сылаастык утуйуом», – дии санаан, Виталий ваннаҕа киирбитэ.

Тахсыбыта – айдаарбытынан Аня олорор! Тыаттан киирбит, биир киһи аргыстаах, аһаабыттар, онно эбии оҕотун соһо сылдьар! Били кэпсэтиэх буолбут санаата сонно суураллан, уку-сакы кэлээскэтинэн анньынан тиийэн, Виталий оронугар ыттар, эркин диэки хайыһан саҥата суох сытар уонна: «Оо, таҥара, Маайыс, мааҕын баҕар, даачаҕа барыам диирэ, эрийбэтэр ханны-ык, мин кэпсэтэр кыаҕым суох буоллаҕа», – диэн баар дуу, суох дуу таҥараттан көрдөһө саныыр…

Сарсыарда, били хоммут киһи туруон иннинэ, «саһыла киирбит» Аня киниэхэ чугаһаан, араастаан куолаһын уларыта-уларыта, эриллибитэ:

– Виталий, эн биһикки хаһан ЗАГСка барыахпытый? Тиэтэйиэххэ наада, быйыл ыал буолбуттарга чэпчэтии элбэх буолуо дииллэр, – дии-дии, туох эрэ онно суоҕу элбэҕи кэпсии-кэпсии, күлэн сыһыгыраабыта.

Онуоха Виталий:

– Забудь раз и навсегда, ты мне – никто, и вообще, убирайтесь вон, хватит издеваться! Или вызываю милицию! – диэн, бу тухары саҥарбакка тулуйбут бары абатын таһааран, бэрт кырыктаахтык эппититтэн бэйэтэ да соһуйбута.

Киһи уһукта биэрэн, дьыала куһаҕаннаппытын өйдөөн, хомунар аакка барбыта, оҕо ытаабыта. Онуоха Аня, айаҕын муҥунан алларастыы-алларастыы:

– Ха-ха-ха, айуу, бу да киһи, күллэрдэххин? Бэйи эрэ, арба даҕаны, эн бэйэлээххэ кыргыттар наадыйан эрийэллэр эбит дуу? Уу, киһи да күлүөх, хайа чээкэ эйиэхэ наадыйбытай? Хата, мин онно түбэһэ кэлэр кырасаабысса буоллаҕым, киирээт да, өр толкуйдаабакка, хардаран хаалбытым! Ойоҕунабын диэбитим, өссө ону баара миэхэ оҕо оҥорбут, төрөөрү олоробун диэбитим, доҕор! Дьиҥэр, эн сордоох оҕо да оҥорор кыаҕа суох эрээригин? Оттон, аһынаммын, эр киһи диэммин киэргэттэҕим, балачча баһан соҕус үрдэттэҕим дии?! Онон, ити эрийэр бодуруугаҕын өтөрүнэн көрбөтүҥ буолуо. Аныгы дьахталлар маннык инбэлииккэ тоҕо наадыйдахтарай?! – диэбитигэр, Виталий хараҕа хараҥарбыта, хаһыытыы түһээт, аттыгар баар кинигэни, дьахтары туһулаат, күүһүн муҥунан кыыраппыта.

Ыҥырыллыбатах ыалдьыттара хомунан барбыттара. Оттон илиилэрэ салҕалас буолбут Виталий компьютерыгар чугаһаан, аа-дьуо холбообута, уонна… эрэнэ-эрэйэ, иһигэр бэҕэһээҥҥи таҥаратыттан көрдөһө-ааттаһа, Маайыһын күүппүтэ…

– Онтон салгыытын эн билэҕин… Маайыс эйигин мин… үчүгэйкээн кыыс диэн сэрэйэрим ээ, ол гынан баран… – Виталий наһаа да кэрэҕин диэн тоҕо эрэ тыла тахсыбатаҕа. Ол иһин санаатын быһа эппитэ. – Мин миигин эрийбит-эрэйдээбит дьылҕам оҥоһуутун билэбин. Интернетинэн да балачча хасыһан көрөбүн, миэхэ көмөлөһүөх күүс суох. Мин кими да дьоллуур да, кэрэҕэ сирдиир да кэнэҕэским суох. Кырыымчык нүһэр олохпун кимиэхэ да соҥнообоппун. Ол иһин эйигин, туохха да соруйбакка таах кэпсэтэр доҕор оҥостубутум, ама, албын аатырыа дуо? Биир да түгэҥҥэ эйиэхэ сымыйалыыр санаам суоҕа. Арай, аһыллыбытым дьиктититтэн таайдахпына, эн курдук холку уонна өйдөөх кыыс (уол дьиҥэр «кини мин аттыбар баар буоларыгар наадыйар эбиппин» диэн санаабыта да, хантан миэхэ оннук дьол тосхойуой диэн, таһыгар атыннык эппитэ) кыра да кэмҥэ миэхэ көстөн-кэпсэтэн ааспыккар махтанар эбиппин…

* * *

Маайыс наһаа хараастыбыта, истибитин итэҕэйбэккэ олорбута, уол кэпсээнэ уһунуттан сылайан дуу, биитэр санааҕа түһэн дуу, кини мааҕын үйэҕэ муостаҕа олорунан кэбиспитин да аахайбатаҕа… Виталий, истибит да киһи итэҕэйбэт, ыар билиниитин кыыс сүрэҕэр ыарыылаахтык ылыммыта… Биирдэ өйдөөбүтэ, иккиэн да саҥата суох олороллор эбит. Арай ыйыппакка сүүрэр харах уутун ыраас таммахтара уоллаах кыыс тохтоло суох мускуйар илиилэрин инчэппиттэрэ ырааппыт эбит.

– Маша, миигин бырастыы, кырдьык да, хаартысканан… албыннаабыппар, буруйдаах эбиппин… – уу чуумпуну Виталий кэһиэҕирбит намыһах куолаһа уйгуурдубута.

Иккиэн да онтон соһуйан дьик гыммыттара. Олорбохтуу түһэн баран:

– Тыый, туох диэтэҥий, оттон бэйэлээх бэйэҥ киэннэрэ буоллаҕа эбээт. Эн ыыппатаҕыҥ буоллар, мин эн уруккугун хантан билиэ этимий? – диэн Маайыс уоскута сатаабыта.

Виталий киниттэн тугу эрэ эрэйэргэ-күүтэргэ дылыта да, кыыс атыны тугу да саҥарбатаҕа, ордук-хос ыйыппатаҕа да, сураспатаҕа да…

– Виталий, мин… сотору Питердиибин ээ… син балачча буоларым буолуо, – диэбитэ арай кини тыІаабыт чуумпуну быһа түһэн.

Бүттэхпит ити. Оо, тугун баҕас куһаҕанай? Кыыс бардаҕа, кинини умуннаҕа. Субу көрөөт, аны кинини хаһан да көрсүбэт аналлааҕа эрдэттэн ыйыллыбыт эбит. Виталий туох баар күүһүн мунньунан мичээрдээбитэ буола сатаабыта, төбөтүн кэҕиҥнэппитэ.

…Кыыс тоҕо эрэ дьиктитик иһийбитэ. Уу чуумпу нүһэрдик ыгылыппыта. Виталий: «…Манан мин дьолум ирээтэ бүттэҕэ, кэрэчээн Маайыһым, быраһаай… Оо, ол иһин даа, маннык кэрэ кыысчаан, ама да, мин курдук эрэннэрэрэ суохха, ырата мэлийбиккэ, кэскилэ кэхтибиккэ кэлэн көстүбүтэ да махтал ини…» – диэн иһигэр кытаанахтык саныы олорбута, сырдыгы көрдөрөр соҕотох хараҕын быыллаах муостаҕа туһулаабыта, сибилигин көрбүт нарын мөссүөнүн өйүгэр хатыы сатыырдыы, илиитинэн сүүһүн саба туттубута.

Оттон Маайыс, көрдөххө тоҥкуруун курдуга эрээри, эмиэ да элбэҕи эргитэ саныы олорбута…

…Бу баччалаах бэйэтэ, куба курдук куоҕайан тахсыар диэри, сибэкки кэриэтэ көрдөх аайы тыллан иһэр кыыһы, дьиҥэр элбэх уол тастан-кырыыттан сэҥээрэ көрөрө. Ол эрээри кыыс кэрэтиттэн саллан-чаҕыйан дуу, атынтан туохтан эрэ тардыстан дуу, киниэхэ чугаһааччы дэҥҥэ баар буолара. Оччоҕо Маайыс ордук-хос эйэҥкэлэспэккэ утарытынан баары баарынан сэһэргэһэрэ уонна… ол онон умнуллара… Кинини кэргэн кэл, таптыыбын диэбит икки киһи баара, олор иккиэн Питергэ этилэр, биирдэрэ – олус бэртээхэй бииргэ үөрэммит нуучча уола, иккиһэ – саха аатырар эрээри, бааһынай бастыҥа, куорат уола. Иккиэннэрин да киһи быһыытынан кыыс үрдүктүк сыаналыыра эрээри, онтон атын кини өйүгэр-санаатыгар туох да суоҕа. Ол иһин көннөрү, холку баҕайытык күлэн кэбиһитэлээбитэ, кинилэр аналлара буолбатаҕын кыаҕа тиийэринэн быһаара сатаан санаатын аһаҕастык этитэлээбитэ.

Оттон манна төрөөбүт дойдутугар кэлиэҕиттэн, хата, кыргыттар элбэхтик иҥээҥнииллэр, араастаан таҥас-сап моһуонун, муода хаамыытын туһунан туоһулаһар идэлээхтэр, онно-манна чэччийиэх диэн ыҥырааччылар да, ол Маайыс санаатын хоту буолбатах этэ. Кини ордук-хос көрүлээһини, бириэмэни сүүйэр таах сырыыны уруккуттан да утарара. Ол оннугар кинигэтин ордороро, библиотеканы манаан, онтон сонун таһаарыылары сурунан ылара. Дьонугар сыстаҕас буолан, бииргэ сырыылартан ураты, атас-доҕор дии-дии ыстаҥалыыр ыарыы киниэхэ төрүкү да суоҕа. Ону баара, бу мирк диэҥҥэ дьиктитик ыллардаҕа. Тоҕо эрэ Виталийы, наһаа уһуннук күүппүт курдук, олус түргэнник уонна дьикти баҕайытык бэйэтигэр чугастык ылыммыта… Кинилэр кэпсэтэр уһун киэһэлэрэ, сөбүлээн суруйсар истиҥ чаттара… кыыс санаатыгар туохтааҕар да күндү этэ… Хомойуох иһин… бу барыта «ааспыта» диэн өйдөбүлгэ тиксиэх муҥай?!

Маайыс санаатыгар, аны Виталий кинини чугаһатыа суоҕа, «албыннаабытын» буруй оҥостон бэйэтин дууһатын кэбийиэ… уонна миигин тэйитэр былааннаах эбит, ол иһин да бу ыҥырдаҕа диэн наһаа хомойбута… Таптыыбын диир кыаҕа суоҕа, аһынабын диирэ, тыыннаах киһиэхэ, аньыыта да бэрт буоллаҕа. Таптал туһунан саныыр да бобуулаах курдуга, кими сымыйалыаҥый? Ситэри билбэтэх, сирэй көрсүбэтэх киһигин тута итинник үрдүктүк сыаналааһын, дьиҥэр, бэйэни албыннаныы буоллаҕа. Ол да буоллар, кыыс сүрэҕэ уолга аһынар икки, харыһыйар икки былаастаах тардыһар курдуга. Туох эрэ үтүөнү оҥорон, бу уол олоҕун сырдата түһүөх баҕа санааҕа куустаран кыыс им-дьим олорбута. Кини мааҕын уолу көрөөт, оннооҕор куттаммытын да сатаан өйдөөбөтөҕө, өһүргэммэтэҕэ. Ийэ оҕотун харыһыйар, сүрэҕэр ыксары ыга кууһан көмүскүүр иэйиитигэр маарынныыр туох эрэ дьикти баҕайытык кинини хам тутан долгуппута. Сүүрэн тиийэн кууһан ылаат, уол баастаах-чэрдээх дьаабы сирэйин уоскутан ууруон, салыннар даҕаны сыллаан ылыах санаа хаста да көтөн түспүтэ.

Ол эрээри Маайыс инньэ гынар кыаҕа суоҕа, кини хаһан да уолга сыстыбатах, буолаары буолан эр дьоҥҥо чугаһаабатах туҥуй-сэмэй майгыта кинини көстүбэт ситиинэн ыга баайбыта. Ол оннугар кыыс өйүгэр уол кэпсээнэ ыраахтан дуораан курдук иһиллибитэ, дьылҕа кытаанах кыһарыйыыта кини тута… сөбүлүү көрбүт (дьиҥэр, истибит, аахпыт буоллаҕа ини?) Виталигын самнарбытыттан курутуйбута уонна ону кытта тэҥҥэ атыны санаабыта. «Миигин хайгыыр профессор уола баара, наһаа сэҥээрэр буолара… абам эбит, билсэ барарым дуу, хайдах да быһаарыллыбат боппуруос диэн суох, мин булгуччу ыйыталаһыам, билиэм… уонна Виталийга көмөлөһүөм…»

Маайыс оргууйдук төбөтүн көтөҕөн уол диэки көрбүтэ, анарааҥҥыта кыыстан куотар курдук илиитинэн бүөлүү туппут хараҕын кистээбит этэ уонна уол диэҕи итэҕэппэт кыырыктыйбыт баттахтар дьикти баҕайытык, «тоойуом, бу эн аналыҥ буолбатах, ааны сабан бар, уһаама» диэхтии, сааһа-наара суох ыһыллан, кулгааҕын кэннигэр мустубут этилэрэ. Кыыс, тугун дьиибэтэй диэн мунаара көрбүтэ да, сылаас тыыны билбэтэх, өлбүтү санатар тымныы баттахтар тугу да саҥарар кыахтара суоҕа…

Кини турбута. Уол хамсаабатаҕа. Кыыс аан диэки баран иһэн:

– Виталий, мин бу эргин кэллэрбин эрэ билсэ сылдьыам, – диэн, хоргуппаттын эрэ диэбит курдук, олуона соҕустук тыл көтөхпүтэ.

Киһи сүр ыараханнык үөһэ тыыммыта уонна:

– Бэркэ сылдьаар, наадаҕын ситиһээр, – диэн аат эрэ харата, уларыйан хаалбыт кэһиэхтээх куолаһынан хардарбыта уонна илиитинэн хайдах эрэ сүүһүн дуу, оройун дуу таарыйарыгар… били кыырыктыйбыт баттах… хамсыырга дылы гыммыта.

Маайыс харахтара кэҥээбитэ: хайдах хайдаҕый диэн өссө эбии бутуллубута уонна төттөрү уолга чугаһаан кэлбитэ. Онуоха биирэ эмискэ:

– Чугаһаама! Барар сиргэр бар! – диэн хаҕыстык соруйардыы саҥарбыта.

Кыыс дьик гына тохтуу түспүтэ, онтон эргиллэ биэрбитэ да, хобулугунан тоһугураан тахсан барбыта.

Барда-аа!.. Бүттэҕим… аны кэлбэт! Оо, таҥаралара диэн ханна эбитэй, көмөлөспөт да буолан…

– …Абыранаахтыыр ээ… – диэн Виталя абаккатыттан кимҥэ да туһаайбыта биллибэттик саҥа аллайбыта, сутуруктарынан кириэһилэтин тоҕоноҕун охсубута уонна икки илиитинэн сирэйин саба туттубута, били баттаҕын туура тарпыта.

Онуоха баттах оннугар килэгир тараҕай төбө килбэс гыммыта, борук-сорук дьиэ иһигэр бу дьулаан соҕус хартыына, дьэ, силигэ сиппитэ… Кырдьыга, бу түгэҥҥэ Маайыс манна суоҕа ордук да курдук этэ.

Онтон ыла нүһэр хараҥа күннэр Виталий сүрэҕин эмэн барбыттара. Оо, күн-дьыл уһаан да биэрээхтиириэн, түүн кэлэн быстыбатыан, сарсыарда уһуктан дьоллооботоҕуон? Уол санаатыгар Маайыс, итиччэ бэйэлээх үлэһит, талбыт курдук талыы көрүҥнээх кыыс, кинини умнубута чуолкай. Сордоох, эриирдээх-бутуурдаах муҥнаах олохтоох эр киһи элээмэтигэр тугу да гынаары наадыйдаҕай! Куһаҕана диэн, кини өйүттэн кыыс тахсан биэрбэтэҕэ. Урут эдэр сылдьан, аһара мэниктээбит түгэнэ да суоҕа ээ, силимнэһиэх курдук сыһыаҥҥа тиийбит доҕордоһуу да суоҕа… Ол да буоллар кини билсэригэр, эр киһитин тобоҕун киэргэтэ, ээ, таптал диэн арааһын көрбүт буоллаҕым, кыыс оҕо кэрэтин-маанытын миигиттэн ордук ким билиэй диэх курдук баһа соҕус киһиргээн да ылааччы этэ.

Дьиҥ иһигэр кини хантан тапталы билээхтиэй? Дьылҕа анаан бэлэх уунара дэҥҥэ буоллаҕа, оннук кэрэ түгэн киниэхэ тосхойо илигинэ ити иэдээн таҕыстаҕа, кини дьылҕатын соҕотохто туора соттоҕо.

* * *

Оттон Маайыс ити кэмҥэ киниттэн, кырдьык да ырааҕа. Били үнүр уолтан бараат, дьиэтигэр ыстаммыта, ыскаапка турар халыҥ паапкалартан биири ойутан таһааран суумкатыгар батары биэрээт, төттөрү үлэтигэр ыстаммыта. Тоҥсуура суох тойонугар киирэн соһуппута, чыыннаах-хааннаах саастаах салайааччы мэлдьи чуолкай кыыс бүгүн хайдах эрэ сирэйэ-хараҕа турбутун бэлиэтии көрөн тугу да саҥарбатаҕа, кыыс этэрин күүтэн көрөн олорбута.

Маайыс тохтоло суох, уруккутунааҕар ураты түргэнник субурутан барбыта:

– Миэхэ командировка наада… Били сыл саҥатыгар миэхэ этиллэ сылдьыбыт бырайыагы оҥорорго сөбүлэһэр эбиппин, хойутаабатах буоллахпына… күн сарсын да көтөргө бэлэммин… – диэбитигэр тойоно соһуйан хаастарын үөһэ диэки ыйаан таһаарбыта уонна:

– Бай, тоойуом, ол аата хайдаҕый? Эн толкуйдаатыҥ дуо, чахчы? Сорудах кырдьык уустук… уонна сатаннаҕына… салгыы кыраныысса таһыгар тахсыылаах ээ… – диэн эмиэ да мунаарбытын биллэрбитэ.

Иһигэр олус үөрбүтэ, ити бырайыак бу кыыска анаабыт курдуга, атын үлэһит кыайымыан сөбө, кини соҕотоҕо да, мүччүрүйбэт сокуон курдук, кылгас кэмҥэ күүскэ үлэлиэн сөбүн ыйа сытара.

Маайыс:

– Мин барытын ыараҥнаттым, өйдүүбүн уонна сөбүлэһэбин, – диэбитэ.

– Оччоҕо сарсыарда көтөҕүн, барыта бэлэм, эйигин онно олохтуохтара, көрсүөхтэрэ, сорудаххын анарааттан истиэҕиҥ, – диэн тойоно тута быһаарбыта.

Ити курдук кыыс Питергэ сонно көтөн кэлбитэ. Бастакы үлэ күнүгэр олус тиэтэйэрин туораттан көрүөхтэрэ диэн дьиксинэ да санаатар, өйө-санаата… урукку билсиилээхтэригэр тиийэ турара.

Маайыс киэһээҥҥэ диэри нэһиилэ тиийбитэ. Јссө күнүс профессорын уолун төлөпүөнүнэн булан үөрбүтэ ааһа илигэ. Бүтээт, буута быстарынан Невскэй проспект арҕаа эҥээригэр элээрбитэ. Онно турар улахан научнай инсти-тут үрдүк кирилиэһигэр күүтэн, уоскуйа сатыы турбута.

Көрсүбэтэхтэрэ ырааппыт эдэр уол чэпчэки баҕайытык ойон кэлэн кыыска илиитин ууммута, сирэйин-хараҕын сыныйан көрбүтэ уонна уруут-уруккуттан таптыыр сахатын кыыһа өссө тупсан, дьиктитик киэркэйэн кини иннигэр турарын итэҕэйбэт курдугун омуннаах соҕустук төлүтэ биэрэн ыһа-тоҕо кэпсээн барбыта. Аттыгар олорооччулар дьиибэргии-сонургуу, ымсыыра да көрбүттэрэ: эдэркээн уоллаах кыыс, арааһа, омук кыыһа буолуо ээ, кыраһыабайа да бэрт эбит, бэртээхэй да паара буолан көстөллөр.

Маайыс дэлби күлбүтэ-үөрбүтэ, харахтара чаҕылыҥнаан, сирэйэ сандааран олороро. Кини саҥата тоҕо эрэ балачча элбээбитин уол дьиктиргээбитэ да, сөбүлүү истибитэ. Буолумуна даҕаны, Маша наһаа сэмэйэ таптыыр уол сыһыана (кини туһугар кэлэн!) доҕордуу өйдөбүлтэн ырааппатыгар саамай улахан биричиинэ дии саныыра. Онон бу сырыыга уол күлүгэр имнэммитэ «хайыы, майгылыын-сигилилиин биллэ да аһыллыбыт дии, баҕар, мин диэки, дьэ, истиҥник көрөөрөй, иэйиибин итэҕэйээрэй» диэн үөрэ түспүтэ.

Кинилэр чугас эрэстэрээҥҥэ киирэн сэһэргэһэ олорбуттара, өөр да өр ааспыттан ыла мунньуллубут сонуннарын ырыппыттара. Сарсын эмиэ көрсүөх буолбуттара, Маайыс көрсүһүү истиҥ киэһэтиттэн дуоһуйа астынан атаартарбыта, уол дьиэтигэр көтүөҕэр кыната эрэ суох дайа турбута…

Оттон ити кэмҥэ Виталий ыалдьыбыта… Туоҕа да буолара биллибэтэ эрээри, күүскэ ыалдьыбыта. Быраас кэлэн, мэлдьи аныыр эмин саҥата суох суруйбута уонна… ханна эрэ баран сынньаннаргын диэн си буолуохтааҕар сүбэлээн көрбүтэ…

Ол эрээри Виталий ханна да барарга санамматаҕа, кини ыарыыта биллэрэ. Мэлдьи кыаммат курдук турук, төбө ыарыыта, харах ыарыыта, көҕүс хайдыах курдук ыарахан сүгэһэр сытара кинини дьулаппата, үөрэнэн да хаалбыта. Арай бу сырыыга тыынара ыараабыта, ону даҕаны ахсарбат буола сатаабыта. Эдэр эрээри, эмэҕирбит эмээхсин доруобуйатынааҕар лаппа айгыраабыт туруктаах, санаата кэлбэт, саҥаны кэрэхсээбэт, туох эрэ хаа иһигэр сытар үөннүү, күнү-түүнү эрэ кэтэһэр киһи сордоох дьылҕа тугу аныырын кэтэһэр эрэ курдуга, атыҥҥа наадыйбата.

Дьиҥэр кини аҕыйах да кэмҥэ ыар ыарыытын умна быһыытыйбыт курдуга. Ардыгар санаан ылара: баҕар, маннык куруук бэйэ бодотун тардына соҕус сырыттаҕына, (били Маайыстыын сэлэһэр кэмчи да кэмнэригэр) аны алҕас арыый үтүөрүө эбитэ дуу? Ол эрээри кини билэрэ: үтүөрэр да күнүгэр кириэһилэттэн турбат, босхоҥ кэриэтэ дьүһүн-бодо кэбилэммит киһитэ инникигэ эрэлэ суоҕа чуолкай! Ама да, остуоруйаҕа дылы, ким кинини кэлэн, аптаах ууга оройунан уган ороон таһаарарыгар харахтыын көрөр, сирэйдиин тупсар, илиилиин-атахтыын хамсыыр буолуой?! Сымыйата биллэр.

Ыы, дьэ, Маша кыыс ханна эрэ сырыттаҕай… Биирдэ эмэ санаан ааһара дуу, кинини? Саатар, соһуйбут түгэнин сөҕөн өйдөөн да кэлиэ буолуо ээ? Ол эрээри тоҕо да кинини санаахтыай? Бу ынырыгы умуннарбын эрэ диир иниэ?

Итинник араас санааттан Виталий бэйэтэ да билбэтинэн илиилэрин тарбахтара таһыгырыахтарыгар диэри ыгыта тутара, биир бэйэтэ бүтүннүү күүрэн, сымыһаҕын ытырара уонна… көмүскэл көрдөөбүттүү, көмүскэтиттэн мөлбөһөн, кэмчи харах уута биир-биир сүрэҕэлдьээбиттии бытааннык таммалыыра.

Оттон Маайыс күн аайы профессор уолуттан арахпат буолбута. Үлэтэ (ол аата куораттан анаан ыыппыт улахан сорудахтара) бастаан утаа билсиһии курдук буолан чэпчэкитин билэрэ, ол иһин аҕыйах күҥҥэ иллэҥнээҕин кыыс туһанан хааларга суоттаммыта. Бу сотору – өскөтүн кинини араас тестэринэн, кэпсэтиилэринэн сөбүлээтэхтэринэ – ыраах ыытыахтара, оччоҕо бу куоракка өтөрүнэн кэлбэт кутталланар. Онуоха диэри кини ситиһиэхтээх дьыалата баһаама. Аан бастакы – профессор уолун «иннин ылыы» этэ…

Биһиги кыыспыт күлэн-үөрэн эргичиҥнээтэҕинэ уолан киһини уутун аралдьытар гына уларыйар эбит. Ону таһынан өссө үөрбүтэ-көппүтэ таһыгар соҕус уонна санаата хараҕар суруллар уратылаах омук буолан, нуучча уола табыллыбыта туораттан да көстөрө. Кини Машеньканы өрдөөҕүттэн билэрэ да диэххэ сөбө. Бу ураты ыраас, килбик уонна наһаа билиигэ дьоҕурдаах, үрдүккэ тардыһыылаах кыыс уол көрөн турдаҕына сиппит курдуга. Аҕата оҕонньор уу иһэ-иһэ хайгыыра. Кини студеннарыттан, саатар, аҥаардара Машенька курдук өйдөөхтөрө буоллар, профессор букатын да үлэлээбэккэ, олор научнай үлэлэрин көрө-көрө килиэптээн олорор кыахтаныа эбитэ буолуо… Ону баара, олоххо оннук хаһан да буолбат. Машенькалар биирдэр-иккилэр эрэ. Хаһан эрэ Дьокуускайтан кэлэ сылдьар үөлээннээҕэр: «Эдэр ыччаты сэнээмэҥ, билигин да бэрдэриилээх оҕолордоох дьоллоох омуккут, кытаатан ону мүччү эрэ тутумаҥ, харыстааҥ. Инникигитин салайсыахтаах кыахтаах бэйэлээх биир кыыс оҕо ити сылдьар», – диэн этэн турар. Ону анарааҥҥыта туох диэн сыаналаабытын билбэт. Оттон уола, Маша күн-түүн ситэн-хотон, тупсан истэҕин аайы хараҕа уоттаммытын, тэҥнээҕин курдук барыны кэпсэтэрин эмиэ да сэҥээрэ, эмиэ да сонньуйа көрөрө… Профессор санаатыгар кыыс хаһан да нуучча уолугар кэргэн барыа суоҕа, тоҕо эрэ оннук көрүҥнээх. Оттон уол буоллаҕына, элбэх дьахтарга сыҥаламмат чинчилээх. Ити хоту дойду кыыһын көрбүтүнэн хааллаҕына, биир институттан тахсыбакка үйэтин моҥуур кутталлаах…Ону көрө-билэ сылдьар кырдьаҕас аҕа хайыай, оҕотун ытыктыыра, таптыыра бэрт, ол иһин уол тус олоҕор хаһан да кыбытык буолан кыттыспат санаалааҕа.

Маайыс бүгүн эмиэ киэһэриитэ уол үлэтин таһыгар баар буолбута. Бу сырыыга кинилэр теплоходунан хатааһылыы барбыттара… Кыыс сирэйэ-хараҕа олус турбут көрүҥнээҕэ. Сотору ыраах үлэҕэ барарын эппитигэр уол күп-күөх харахтара толбоннура, хараІара түстүлэр, хайдах эрэ санаарҕаабыт курдук буолла. Онтон кыыс, күлэн мичийээт, уолтан биир улахан көрдөһүүлээҕин эттэ:

– Эн институккар ылан көрүөҥ суоҕа дуо… Биир эдэр киһи баар, мин ырааҕынан аймаҕым… Сүрдээх ыарахан майгылаах, ылыныа да биллибэт эрээри, ийэм көрдөспүтүн аанньа ыйытабын… Сирэйэ-хараҕа оһоллоох, илиитэ-атаҕа ситэри хамсаабат. Саамай куһаҕана олоххо эрэлин сүтэрбит… Эмтэниэн баҕарбат…

– Ону ким көрүөй? Эмтэнэр кэмигэр ким сибээстэһэрий? – диэтэ уол.

– Мин кэлэ-бара эйигиттэн эрэ сураһыахпын сөп, дьонун чугаһаппат, онон кимэ да суох, – диэтэ Маайыс. – Төлөбүрүн мин дьонум уйунуохтара, мин ааппыттан счекка түһүө, – диэн быһаарда.

Профессор уола мунааран турбахтаата эрээри, иһигэр, арааһа, барыны эргиттэ быһыылаах:

– Машенька, это просто так не делается, дело времени, не могу дать гарантий что всё наладится, надо ведь осмотреть насколько его состояние серьёзно, и на что можно расчитывать… Ты меня понимаешь? – диэтэ сэрэнэн.

Кыыс үөрдэ, бачча бэйэлээх, сылы сыллата уочараттыыр ыарыһахтардаах, үлүгэрдээх улахан суолталаах уонна кыахтаах, дойдуга соҕотох килииникэ сүрүн бырааһа син ылыныах курдук эттэ, быһа аккаастаабата.

Кинилэр киэһэни быһа кэпсэттилэр. Кыыс ис-иһиттэн олус долгуйан туран, Виталий остуоруйатын кыаҕа баарынан кэпсээтэ. Туох эмэ эрэл кыыма баар буолуох буоллаҕына, көмөлөһөр кыахтаах бу эрэ институт килииникэтэ баарын уонна онно бигэ эрэнэрин эттэ.

Уол, кыра оҕо үһү дуо, тута өйдөөтө… Машенька аймаҕа буолбатах ээ, кини таптыыр кыыһа аймахтаһыан баҕарар киһилээх эбит, онтуката иэдээҥҥэ түбэспит… Оо, оттон кини буоллаҕына, Маша, кэрэчээн саха кыыһа Машенька, кинини санаан, истиҥник ахтан кэлбит диэн бэйэтин албыннана санаахтаабыта да баара… Бу хаһан да чугастык сыһыаннаспатах уоллаах кыыс икки ардыларыгар аҥаардастыы астынар уол иэйиитэ кыыска туох да кыымы сахпатаҕыттан кини, кырдьыга, сүрдээҕин хомойбута, сүрэҕэр ыттарбыта эрээри:

– Конечно, моя милая Машенька, ради тебя я пойду на все… Я понимаю, ты нашла себе человека, который достоин твоих рук… Я правильно понял? А почему… коли ты любишь его, тебе мешают его увечья? – диэн эмискэ ыйыппытыгар кыыс соһуйан ах барда.

– Мин буолбатах… кини миигин чугаһатыа суоҕа, кытаанах уол… – эрэ диэтэ Маайыс уонна түҥнэри хайыста… уһун кыламаннарыгар ыйанан хараҕын уута бычалыйда.

Профессор уола сөбүлэннэ. Иһигэр санаата: «Көрөн иһиллиэ. Сорохтор үчүгэй буолаат, санаалара уларыйааччы. Мин сэттэ сыл Машаны таптаатым, оттон анараа киһини көрүөхпүт, кини таптала дуу, миэнэ дуу. Хайабыт киэнэ күүстээҕин…»

Биир сарсыарда Виталий ситэ уһукта да илигинэ, төлөпүөн тыаһа тырылыы түстэ. Үлэтиттэн эрийэллэр. Профсоюз хотуна кэлиэх буолла. Уол туох эрэ бырааһынньыгы умуннаҕым дуу, хайдах буолан билиннэхтэрэй диэн мунаарда. Киниэхэ профсоюз көмөтө улахан эрээри, дьону кытта тэҥҥэ сылдьыбат буолан алтыһыыта кыра.

Виталий туран суунна-тараанна, били кыырыктыйбыт паригын саба уурунна, аһаабыта буолла. Сотору буолаат, мэлдьи биллэр-көстөр, киниэхэ кэлээччи бэрэссэдээтэл дьахтары кытта биир билбэт киһитэ киирэн кэллилэр.

Били үнүрүүн эмп анаабыт бырааһа Виталийы санаторийга ыыта сатааҥ диэн үлэтин салалтатыгар төлөпүөннүү сылдьыбыт. Ону профсоюзка мунньахтаан баран, Санкт-Петербурга баар киһини чэбдигирдэр килииникэҕэ эмтэтэ ыытарга диэн быһаарбыттар. Ороскуотун барытын тэрилтэ уйунар. Соһуйан хаалбыт Виталий туох да диэн булбата. Кини интернетинэн ол килииникэни кытта сибээстээх. Бастатан туран, онно уочарат. Иккиһинэн, хас биирдии көрүү-истии, оннооҕор бэрэбиэркэлиир да сеанс, улахан харчы төлөбүрдээх. Кини ону үйэлээх сааһыгар да төлүүрэ саарбах. Үсүһүнэн, өссө киниэхэ туһалыа эрэ, суох эрэ…

– Эн харчытыгар санаарҕаама, биһиги бэйэбит ону төлүүбүт, төһө да буоллун, рекламаттан үппүт киирэ турар, онон ким эрэ туһатыгар барыахтаах эбиискэни көҕүрэтэбин диэмэ, – диэтэ билбэт киһитэ холкутук.

– Оттон… баҕар, оннугун оннук буолуо эрээри, ол миэхэ туһалыырын саарбаҕалыыбын… – диэтэ уол кырдьыгынан.

– Ол туһунан боппуруос, нэдиэлэ бүтүүтэ манна оннооҕу профессор таарыйыахтаах, биһиги кинини көрдө-һөн эйигин приёмҥа суруйуохпут, онтон көстөн иһиэ… – диэтэ үөрэ түспүт дьахтар.

Кинилэр кэннилэриттэн Виталий дөйбүт курдук өр олордо. Мааҕын үлэтин дьоно эппит сонуннара төбөтүттэн тоҕо эрэ тахсыбат. Киниэхэ сотору-сотору үлэтин хайҕаан эрийээччилэр, хайдахтаах да сорудаҕы уол син биир кыайарын билиммиттэрэ ыраатта эрээри, кини ардыгар баҕас «инбэлиит эрээри кыайбыт» дииллэр быһыылаах диэн өссө өһүргэнэ санааччы. Ол да иһин бу сырыыга эмиэ ол тоҕо наһаа күндүргэтэн киниэхэ эрэ итинник, сыаната биллибэт улахан өҥөнү босхо туһаайдахтарай диэх санаа үүйэ-хаайа тутта. Кыратык да туһаммыт киһи куһаҕана суох буолуо эбит ээ диэн эмиэ да ымсыырар… Ол эрээри, били эбээтэ хаһан эрэ этэринии: «Ээ, мин диэхтээн, кэнним уһаабыт, инним кылгаабыт эрэйдээх», – диэн эмиэ баҕарталыыр…

Итинтэн ыла түүн түһүүр идэлэннэ…

Арай түһээтэҕинэ, уруккутун курдук чэпчэки баҕайытык ыстанан туран балыыһа кирилиэһиттэн аллара ыстанар, иннин хоту сүүрэр, сылаас тыал иэдэстэрин ил гынан ааһар. Киниэхэ утары Маша сүүрэн иһэр! Кыыс үрдүк эрээри, олус чэпчэкитик туттар, атахтара салгыҥҥа уйдарыах курдук дайаллар… Виталий куттанар, бай, аны кини мин сирэйбин көрүө, уол сонно саба туттар, арай илиитин иминэн бигээбитэ, харахтара орун-оннуларыгар, ханан да иэдэстэригэр чэр диэн суох… Илиитин ыытан кэбиспитэ – Маша кинини көрөн турар, мичээрдиир уонна илиитин уунар… Уол сүрэҕэ мөҕүл гынар, кыыска саба түһэр, иэдэһин кыыс нарын иэдэһигэр даҕайаары төҥкөйөн эрдэҕинэ… туох эрэ ыйылаабыт хатан тыас тула аймана түһэр…

Уһуктан кэлбитэ… ааҥҥа ким эрэ кэлэн чуорааны чылыгыратан тыаһатар эбит…

Ити сырыыга үлэтин дьоно профессоры дьиэтигэр аҕалбыттара. Ыарыһаҕы болҕойон-сыныйан көрөөт, туома күн аҥаара токкоолоһон, иҥэн-тоҥон ыйыталаһан баран, профессор Дьокуускайдааҕы киини кытта кэпсэтэн, онно салгыы көрүөх буолан тута кэпсэппитэ. Ол иһин Виталий манна киирбитэ үс хонно. Араастаан да анализтыыллар эбит диэн сөҕөр, Питер киһитэ бырыынчыга да бэрт эбит дэһэллэрин кулгааҕын уһугунан иһиттэ. Эдэр баҕайы эрээри, кытаанах соҕус, ордук-хос элбэх саҥата суох киһи урукку-хойукку, өлүөр эрдэҕинээҕи хаартыскатын бөҕө хомуйтарда. Уол ыксаан сороҕун тыаттан дьонуттан ылларда. Түрүлүөнү тарда сатаабатар да, хас да сиргэ иһиллэн, уу чуумпуну аннынан кини дьылҕатын таайа сатааччылар син биир балайда буоллулар.

Виталийы луохтуур наһаа интэриэһиргиирин уол кэнники хайдах эрэ сөбүлээмээри гынна. Туох баар уруккутун-хойуккутун ыйыталаһа сатаан баран, дьахтары кытта сыһыаныгар тиийэ токкоолоспута да баара. Ол барыта кини доруобуйатын бары өттүнэн көрөргө тыын суолталаах үһү. Инньэ гынан, Виталий тулуйа сатыыра, туттунара, толкуйдуура элбээн сытар. Сарсын этиэхтээхтэр: кинини – киһини, ол остуоруйаҕа кэпсииллэринии, дэбигис уларытар-тилиннэрэр кыаллар дуу, суох дуу? Кииҥҥэ эмтээн туһа тахсар дуу, суох дуу? Оо, бу түүнү эрэ тулуйбут киһии-и…

Эдэр луохтуур этиитин кэнниттэн Виталий эмиэ дөйөн сытар. Ама, оннук өргө дуо? Ама, кырдьык дуо? Ама?! Тоҕо да итинник дөбөҥнүк табыллыан ким урут эрдэ эппэтэҕэй? Боростуой да эбит буолбатах дуо?! Саас-сааһынан саныы сатыыр да, уол сүрэҕэ ыалдьыах буолан нэһиилэ сытар. Бэйи эрэ, хайдах этэй? Мааҕын сарсыарда хааһытын сиэт, саҥардыы сытан эрдэҕинэ Питер луохтуура сулбу хааман киирэн кэлбитэ. Доргуччу баҕайы саҥаран, биир тыынынан субуйан субу курдук эппитэ:

– Бэрэбиэркэ көрдөрбүтүнэн, эн эдэриҥ уонна тыын уорганнарыҥ чэгиэннэрин быһыытынан, бу эчэйииҥ сүүс бырыһыан туоратыллар кыахтаах. Ол аата? Аан бастаан хамсыыр кыаххын төннөрөргө икки эпэрээссийэ наада, боростуой эпэрээссийэлэр. Оттон хараххар өссө биир-икки, табыллыбатаҕына үс эпэрээссийэ, ол кэнниттэн саамай уустуга сирэйиҥ чэрдэрин ыраастааһын. Кыаллыан сөп. Биир эрэ ноолоох, салгыы кыра-кыра атын эпэрээссийэлэри, туруккуттан көрөн, корректировка курдук оҥорору аахсыбатахха, тулуйан сытан биһиги килииникэбитигэр кэлимник эмтэннэххинэ, үс сылынан сабыс-саҥа уол буола түһүөххүн сөп… Сөбүлэһэҕин дуо?

Виталий онно тута «дөйбүтэ» уонна билигин да «өйдөнө» илик. Хата, дөйүөн иннинэ ыйытта быһыылааҕа:

– Кырдьык дуо?

Луохтуур күлбүтэ:

– Сымыйанан эмтээри баччалаах сиргэ кэллэҕим дуу?

Виталий Питер килииникэтигэр сыппыта үһүс ыйа. Манна кэлэригэр дьонугар тахса сылдьыбыта уонна кими да сураһары, билсэри боппута, бэйэтэ эрэ биллэрдэҕинэ кэпсэтиэх буолан болдьоспуттара. Дьоно уоллара кытаанаҕын билэр, бачча тухары эппититтэн арахсыбат майгылааҕар үөрэммит буолан, эрэнэ-күүтэ эрэ хаалбыттара.

Виталий манна килииникэҕэ билэр дьоно диэн быраастар эрэ. Эриэккэс дьон диэтэҕиҥ: элэккэйдэрэ, турбуттара-олорбуттара. Барахсаттар, итинник дьон да баар буолан наука сыҕарыйар буоллаҕа. Ол эрээри, дьиктитэ диэн баар, хаһан да кини тус олоҕун ыйыппат идэлээхтэр. Дьиҥэр, киһи-киһи курдук, син дьонноох-сэргэлээх киһини ыйыталлара буоллар, кэпсэтиэх, интэриэһиргиэх эбит да… наар аанньа ким да ити тиэмэни таарыйбат. Ааспыкка эпэрээссийэ кэнниттэн илиилэрэ чахчы тубустулар.

Кыра-кыралаан хачайданан, мокоруон кэриэтэ сынньылыйбыт быччыҥнара санаатыгар тыыннаммыт, сэниэлэммит курдуктар. Араас эрчиллиилэри кумааҕыга ойуулаан биэрбиттэрин тугун да көтүппэккэ оҥорор, дьарыктыыр. Инньэ гынан сиһэ кытта сэниэлэннэ, сыттаҕына сылайбат, турарыгар таах өндөс гынна да хорос гынар буолан ньээҥкэ эмээхсини үөртэ.

Сарсын аны атахтарын оҥоруохтаахтар, ол баҕас таах кыаллар диэн эмээхсин олус бөҕөх. Виталийы хайгыыр, кэмигэр кэпсэтэн кэлэҥҥин атахтаныаҥ буоллаҕа, оннооҕор буолбут эрийэ хаппыт сотолоохтору абырахтыыр идэлээхтэр диэн сэһэргиир кини. Онон буоллаҕына кыаллаа ини.

…Маайыс кыраныысса таһыгар тахсыбыта ыраатта.Үлэтэ олус уустук, онно эбии бу дойду айылҕатыгар үөрэммэккэ эрэйдэннэ эрээри, үксүн хонтуоратыгар сылдьар, аралдьыйар дьарыктаах буолан, өссө наһаа тууйуллубат. Кыыс үлэтэ – наар кумааҕыны кытта эрийсии уонна тылынан кэпсэтии, тылбаас. Икки тус суолталаах үлэ тэҥҥэ бардаҕына – бэрт. Ону баара, сорох күн наар тылбааска баран хааллахха, суруга хаалан хаалар. Оччоҕо түүннэри бүтэрэ сатаан хойукка диэри түбүгүрэр.

Өссө биир куһаҕана – дойдутун кытта бириэмэтэ атын буолан сибээстэһэргэ олус уустук. Үксүн түүн кэпсэтэр. Ол да буоллар, ситэ утуйбатах түүнүн кини аахсыбат, ордук биир суолтан үөрэн сүргэтэ көтөҕүллэн сылдьар. Питертэн үтүө сонун кэллэҕинэ, көтүөн кыната суох буолар. Бэҕэһээ Виталийга өссө биир эпэрээссийэни оҥорбуттар. Хараҕын чөлүгэр түһэрэ сатыахпыт да, көрөрө ыарахан буолсу быһыылаах дииллэр, онон бүгүн биллиэхтээх, хайдах-хайдах буолар. Виталий хаампыта сыл аҥаара буолла. Профессорын уола этэринэн, Виталий үрдүк уҥуохтаах эбит, атахтанаат бэйэтин көрүнэргэ барбыт, омунугар быыстала суох хачайданан, уруккута буолбатах, киппэ көрүҥнэммит диир.

– Если ты у меня красавица, так он подавно красивее тебя, – диэн дьээбэлиир өссө.

Ол аайы Маайыс үөрэн имэ тэтэрэр, анараа уолга хайдах да махтаныан билбэт. Оччоҕо Питер луохтуура уол, туох эрэ толкуйга түспүт киһи курдук, күө-дьаа саҥата тоҕо эрэ соҕотохто уостан хаалар. Маайыс Виталий эмтэниитин төлөбүрүн чөкө, биир да күнү уһаппакка, төлөөн иһэр.

Маннааҕы үлэтин хамнаһа, дьолго, балачча буолан, кини аһыгар-таҥаһыгар холкутук тиийэр. Оттон ол да иһин бу дойдуга сөбүлэһэн кэллэҕэ дии… Дьиэтээҕи дьоно кыыстара манна кэлбит дьиҥ төрүөтүн билбэттэр. Бастаан аккаастаммытыгар ийэтэ сөбүлээбэтэҕэ, сайда сатаабат, иннин көрүммэт туох абааһы оҕотой диэх курдук мөҕүттүбүтэ. Дьоно кыыс чыын-хаан диэҥҥэ наадыйбатын мэлдьи сэмэлииллэрэ, кинилэр итиччэ дьоҕурдаах кыыс хайдах баҕарар үрдүк солоҕо холкутук тиксиэхтээҕин суоттаабыттара ырааппыта эбээт. Онон аны эмискэ барар буолбутугар, дьэ эрэ, кини да буоллар, киһи этэрин ылынна, өйдөөтө дии санаабыттара.

…Бүгүн Виталий олоҕор биир саамай долгутуулаах күн. Бэҕэһээ киэһэттэн аһаабакка сытар. Бүгүн – бүтэһик эпэрээссийэ.

Бу килииникэҕэ сыппыта төрдүс сыла. Кыра-кыра уларыйыылары аахсыбатахха, бука барыта били Дьокуускайга тиийэн кинини көрөн манна аҕалбыт луохтуур эппитин курдук буолла. Ол урут уол дии саныыр этэ буоллаҕа, билигин онтуката, хата, доктор, профессор буолбута ырааппыт киһини кини Владимир Евгеньевич диэн ыҥырар. Көрдөҕүн аайы: «Всё по плану, дружок, держимся и надеемся только на лучшее», – диир идэлээх холку луохтуур бэҕэһээ эмискэ соһутта ээ… Ол кини өйүттэн букатын тахсыбат.

Арай сарсыарда куолутунан киниэхэ киирээт, көрөн-истэн кэпсэтэн баран, тахсаары туран, арай:

– Виталий, а ты с Машей когда разговаривал? – диэн ыйыппата дуо?!

Виталий мух-мах барбыта, соһуйан хараҕын килэччи эрэ көрбүтэ быһыылааҕа. Онтон дьэ өйдөнөн, Владимир Евгеньевич эмиэ саҥата суох тахсан барбыта.

Ити аата тугуй? Кими ыйытар буоллаҕай диэн таайбыта, онтон дьэ сэрэйэ санаабыта. Арба да, ньээҥкэтигэр кэпсээтэ этэ дуу кини тапталын, үс ый сулус оҥостубут кэрэчээн кыыһын туһунан. Ол кыыс кини иэдээннээх мөссүөнүн көрбүтүн тулуйбатаҕа, киниттэн арахпыта, быраҕан барбыта… ыраах. Оттон Виталий кинини – ол сиппэтэх тапталын – дууһатын ырата, санаатын туллуга оҥостубута. Сарсыарда турдар кыыһын санаабытынан уһуктар, киэһэ нухарыйдар эрэ, кини борук-сорук хоһугар умса көрөн олорор Маайыс мөссүөнэ кинини манаан туран утутар… Оннооҕор эпэрээссийэҕэ утуйарыгар кинини саныыр, наркозтан тахсарыгар – Маайыс сырдык сирэйэ субу баар… Виталий онтон хаһан да салгыбат, биир кэлим, улаханнык долгуйбакка ол кэмҥэ көстөн ааспыт сахатын кыыһын күн-түүн суохтуур. Билигин хаардаах Дьокуускайга бэйэтэ Хаарчаана курдук туналыйа сырыттаҕа… Баҕар, кэргэн тахсан оҕо да сиэтэ сылдьара буолуо ээ. Оо, хаарыаны, кыратык да буоллар кыыс олоҕун ыраахтан көрбүт буоллар.

Былырыын дойдутун наһаа ахтыбытыгар дьоно кэлэн барбыттара. Ол кинилэр үһүс сырыылара этэ. Аан бастаан кини атаҕар турбутугар кэлбиттэрэ, онтон сайылаан кэриэтэ күүлэйдээн, уоппускаларыгар олорон барбыттара. Онно Виталий олус сэргэхсийбитэ. Ийэтэ-аҕата уол үлэлиир тэрилтэтигэр махталлара муҥура суох. Оттон Маайыһы ханна баран көрдүөй? Чат диэҥҥэ ол кэнниттэн үктэммэтэҕэ даҕаны. Ол да буоллар, хойутуу, быыс буллар эрэ, күн аайы кэриэтэ Виталий Дьокуускай чатыгар булгуччу киирэр, кими да кытта сэлэспэккэ, кинини көрдүүр… уонна булбат! Умнуллубут таптал эрээри, уостубат таптал диэн ити. Виталий сүрэҕин аҥаара ол кыыстыын ханна эрэ тэйиччи сылдьарга дылы.

Атаҕар туран эрэр уолан уол ымыы оҥостор кыыһа ханна да баара биллибэт. Кини, саатар, Виталий бачча киһитийбитин көрдөр туох эрэ диэ эбитэ буолла? Бука, соһуйуо уонна үөрүө буолуо, баҕар… аны кинини сэҥээрээрэй?

Сарсын сирэйин бүтэһик чэрдэрин суох оҥорор кытаанах эпэрээссийэ түмүгэ биллиэ, онон булгуччу бу бүтэһик кимиини кини тулуйуохтаах. Ол кэнниттэн тугу гынара буолуой? Ээ, ылла да Дьокуускайга Маайыһын көрдүү сүүрүө. Булгуччу була эрэ сатыа. Түбэһиэх хаамыа, көрдүө буоллаҕа. Хас биирдии хонтуораҕа киирэн, хас биирдии киһини сыныйан көрүө! Билигин баҕас туохтан тутуллуой? Ити үс сыллааҕытын курдук босхоҥ буоллаҕай, ама? Бачча атахтаммыт киһи сүүрүө да сүүрүө, көрүө да көрүө… Кини сылдьарыгар дьон наадыйыа да суоҕа, тоҕо диэтэххэ, ким билиэй, кини дьаабы чэрдэрдээх сирэйин саҥалыы оҥорторон сонун сэбэрэлэммитин? Киһи курдук киһи, ким да омнуолуо суоҕа ээ. Ити санаатыттан бэйэтэ да астына дуоһуйан, Виталий нухарыйа быһыытыйда.

…Виталий бу аптаах курдук балыыһаҕа, дьиҥэр улахан институт бастыҥ килииникэтигэр оруобуна түөрт сыл үс ый сытта… Бүгүн кини олоҕор саамай сырдык долгутуулаах күн. Бүгүн кинини ыарыһах испииһэгиттэн таһааран, доруобай киһи аатын төннөрөр өрөгөйдөөх күннэрэ буолуохтаах. Дьиҥэр тустаах уол бэйэтин эрэ иһигэр, дууһатыгар иитиэхтэнэр бырааһынньык. Бу институт иһигэр ити эпэрээссийэ улахан түгэн ахсааныгар киирбэт да быһыылаах. Манна анараа дойдуга бара сыспыттары кытта төннөрөр, аныгылыы ньыма эрэ буолуо дуо, саҥаттан саҥа, ким да тутта илик албастарынан араастаан эмтиир сир эбит. Кини ону бэйэтинэн биллэ. Кытаанах тургутууну тулуйдаҕа. Дьиҥ чахчы эттэххэ, кини ким да билбэтинэн ыраахха ыҥырар сулус курдук оҥостон, үҥэр таҥаратын кэриэтэ кистээн саныыр, сүрэхтиин-быардыын тардыһар кэрэчээн кыыһын мөссүөнэ маннык түмүккэ тиэртэҕэ. Кини мэлдьи иһигэр саныыр, били сордоох күн мирк илимигэр уйдаран киирэн этиһэ олорботоҕо буоллар, бука, кини Маайыһын билсиэ да суоҕа буолуо. Итини этэн эрдэхтэрэ, куһаҕан үчүгэйэ суох буолбат диэн. Быдьар тыллары ыскайдыы олорбут уолга итиччэ үчүгэй кыыс киирбитэ да баар ээ? Тугун дьиктитэй? Кырдьык, баҕар, дьылҕата буолуо ээ. Онон, бу Дьокуускайыгар тиийдэр эрэ, аан бастаан, киһи билбэт киһитэ буолан, үлэтигэр тиийиэ, онтон булгуччу Маайыһын булуоҕа, сибэкки тутуурдаах тиийэн соһутуо. Буоллун, ким да буоллун, баҕар кэргэннээх буоллун, баҕар сарсын да сыбаайбалаары сырыттын, син биир чугаһыа уонна махтал тылларын этиэҕэ.

Маайыс, мин күндү ыраас чыычааҕым, сырдык ымыым, инники кэрэһитим, Эн эрэ баар буолаҥҥын мин бэйэ бодобун тардыннаҕым, олоххо тардыстаҕым, кими эрэ итэҕэйдэҕим, дьол баҕалаах амтанын ыраахтан да сэрэйдэҕим. Миэхэ олоххун бэлэхтээ диэхпин эн тылгын истэ илик буруйдаахпын, бу сыллар усталарыгар мин биир да күнү, биир да чааһы эйигин ахтыбакка аһарбатым эрээри, эн тускунан тугу да билэр кыаҕым суоҕа… Онон, тойонноо мин дьылҕабын, иһит сүрэҕим иэйиитин уонна эн этэргин күүтэбин. Аналым миэнэ Эн дуу? Эбэтэр атын киһи дьолугар анаммыккын, оттон миэхэ, сыччах, быстах кэмҥэ көстөн аастыҥ, миигин эмтээри, киһи оҥороору, кэрэҕэ угуйаары? Барытын тулуйарга бэлэммин, истэргэ-өйдүүргэ бигэтик быһаарынным…

Итинник этэн баран, холкутук төбөтүн төҥкөтүө, сылаастык нөрүйэн Маайыс кэрэчээн иэдэһиттэн сыллаан ылыа, кыыс оҕо ыраас тириитин ураты кэрэ килбик сытын муннунан… билиэ, дууһатынан долгуйа сэрэйиэ. Көр, ол эрэ кэнниттэн ийэлээх аҕатыгар ыстаныа, чугас дьонугар ыалдьыттыа, барыларын көрсөн ахтылҕанын таһаарыа.