Читать книгу Чуумпу дьол - - Страница 1

Биэрискэ көлөттөн, сыарҕаттан нэһиилэ орҕостон ороммутуттан бэйэтэ даҕаны күлэ санаата.

– Чээ! Түстүм! – диэтин кытары, үстээх-түөртээх соноҕоһу айааһаан көлүнэ сылдьар пиэрмэ үлэһитэ уол Саачыкка, хайыһан көрөн баран, үүнүн тардарын мөлтөтөөтүн, бугуһуйан тэпсэҥнии турбут сылгы көтүтэ турда. Туркулаах табаһыт курдук айаннаан, айаас аттаах уол оҕото ыраатан хаалла.

Биэрискэ спортивнай ыстааныгар хатаммыт от бытархайын ылҕаата, тыастаахтык таһыйан, үтүлүгүнэн таҥаһын тэбэннэ. Сопхуос ыһыллыбытын кэннэ, өр кэмҥэ кураанах турбут пиэрмэ хотонун быйыл оҥостон киирбиттэрэ. Саханы саха оҥорбут ынах барахсан туохха да тэҥнэммэт күндү сыта, хотон аана тыаһа суох арыллаатын, Биэрискэ сирэйигэр сылаас тыынынан саба биэрдэ…

Дьикти ээ, киһи олоххо арааска даҕаны тиксээхтиир. Биэрискэ отучча сыллааҕыта, сэбиэскэй кэм өрөгөйдөөн турдаҕына, оскуоланы бүтэрбитэ. Олох араас аартыктара, кустук дьэрэкээн өҥүнэн дьэрэлиһэн, кыыс иннигэр арылыс гыммыттара! Үөрэхтэнэн, ким баҕарар буолуон сөптөөҕө. Быраастан саҕалаан, таҥас дизайнерыгар тиийэ талымастаабыта. Оччотооҕуга сүөһү сааҕар умса хоруйан, дьолгун онтон булуоҥ диэн эппиттэрэ буоллар, ол эппит киһини кини аччаабыта иирээки диэн саныа этэ, биитэр күлүү-элэк оҥостор диэн төһө эрэ өһүргэниэ турдаҕа!

Оскуолатын элбэх биэстээх бүтэрбит буолан, ийэтэ Анна Семеновна булгурутуллубат ыйыытынан, саамай олохтоох идэҕэ, быраас үөрэҕэр, иккиэн туттарса барбыттара. Быраас буолан, хачыгырас кырахымааллаах, мэктиэтигэр күлүмүрдээн көстөр үрүҥ халааты кэтэн, аанньал кэриэтэ балыыһа көрүдүөрүнэн кынталдьыйа тыкаарыйыахтаах чаҕылхай хартыыната бастакы эксээмэҥҥэ, химияҕа, өлбөөдүйэ быһыытыйбыта.

– Сатаатар, бырабааллаан хаалбыт дии. Ону мин хайдах да көннөрөр кыаҕым суох. Аҕыйах да бааллаах эксээмэннэрин барытын туттарбыта буоллар, син кэпсэтэн көрүөм этэ… – Аана оскуолаҕа бииргэ үөрэммит уола, билигин ыччаты бэйэтин идэтигэр үөрэтэр аатырбыт хирург, нэлэппит ытыстарынан, бэйэтэ да өлбөөдүйэ быһыытыйбыт хартыынаны, букатын сабан кэбиспитэ. Авиапорка киирэн иһэн, Биэрискэ, ытаабыта бэрдиттэн иһэн хаалбыт харахтарынан, университет үрдүк холуонналарын ыраахтан «төрдүс» оптуобус халыҥ түннүгүнэн батыһыннара көрөн хаалаахтаабыта…

Ол кыһыны кини ийэтэ буҕаалтырынан үлэлиир тэрилтэтигэр, кыыс оҕону тугунан да кэрэхсэппэт хоммунаалынай хонтуора үдү-бады хараҥа хаассатыгар, тимир эрэһиэҥкэ нөҥүө таас чох тордоҕуттан быһа сиэммит кирдээх күрдьүгү көрөн кыстаабыта. Оннооҕор ити куһаҕан түүл курдук күннэрдээх кэмҥэ пиэрмэҕэ тахсан, «бороонно көр, ынахта ыа» диэбиттэрэ буоллар, «өлөн түһүө» этэ. «Оскуола—производство—үрдүк үөрэх» диэн хамсааһын ол саҕана уоҕа уостан эрэр эбит да буоллар, оскуоланы бүтэрбит оҕону хайаан да хотоҥҥо таһаара сатыыллара. Биэрэни ийэтэ туох диэн күрэппитэ буолла, бииргэ үөрэммит оҕолоро сорохторо тахсыбыттара, «Романтика» диэн ааттаах туспа звенолаахтар эбит этэ. Биэрискэ үөрэххэ киирбэтэх кыһыыта-абата сүрэҕин үүйэ-хаайа тутара. Сити кэмҥэ хайа эрэ дьоллоохтор университет сырдык аудиторияларыгар олорон, санаабыт баҕаларын хоту, олохторун суолун оҥостоллоро, кэскиллэрин кэҥэтэллэрэ…

Эһиилигэр, сынтаччы анньыллыбытыттан саллан, Биэрискэ университекка холоно да сатаабатаҕа. Ийэтэ, саатар, буҕаалтырга үөрэнэ бар диирин ылыммакка, кыра соҕус дьоҕурдаах буолан, анаан аҕалбыт ойууларын, ол-бу биһирэбилгэ тиксибит кумааҕыларын мунньан, аны художественнай учуулусса сиргэ тимирбит самнархай дьиэтигэр тиийбитэ.

– Театральнай, чыыста театральнай эбит, – диэн ботугураспыттара хамыыһыйаҕа олорор худуоһунньуктар. Биэрискэ таҥаһы-сабы уруһуйдуур баҕа санаата туолуох курдугуттан һэк гына түспүтэ да, эксээмэнин күнүн бутуйан кэбиһэн, эмиэ хаалан хаалбыта. Тыйыс куйахтарын кэтэ охсубут хамыыһыйа дьонуттан көрдөһө сатаабыта да, хайыай, бэйэтэ буруйдаах буоллаҕа дии.

Худуоһунньуктар эксээмэннэрэ атын үөрэхтэртэн тоҕо эрэ арыый эрдэ туттарыллар буолан, бас батар кыах көстүбүтэ. Москубаҕа иис технологиятын үөрэҕэр миэстэ баарын билбитэ. Төрдүө буолан биир миэстэҕэ анньыспыттара. Сырдык кугас харахтарынан арылыччы көрбүт бааһынайдыы хааннаах кыыстыын тэҥ баалланан, иккиэйэҕин эрэ хаалбыттара. Биэрискэ оччолорго син даҕаны сытыы эбит ээ. Миниистирдэр Сэбиэттэрин үрдүк дьиэтигэр үҥэн-сүктэн, көрдөһөн-ааттаһан тугу эмэ ситиһээйэмий диэн, чэпчэки бырамыысыланнас ааныгар тиийбитэ. Сэкирэтээр тоҕо эрэ суоҕа. Миниистир хоһугар икки киһи тугу эрэ мөккүһэллэрэ, тыл-тылларыгар киирсибэттэр быһыылааҕа, хаһыытаһа быластаан кэпсэтэллэрэ. Оттон аан тэлэллэ биэрээтин, ардырҕаспытынан иккиэн тахсан кэлбиттэрэ.

Миниистир мап-маҕан баттаҕын аннынан хара хаастарын түрдэһиннэрэн, көрдөрбүтүнэн, ханна эрэ баран хаалбыта. Биирдэһэ, болҕомтолоох хара харахтарынан чоҕулуччу одуулаабыт эдэр киһи, кыыстыын дорооболоспута.

– Гоголев диэммин, – мөккүөргэ уйуһуйан, билигин да иһигэр «оргуйа» сылдьар быһыылааҕа. Кыараҕас хос устун төттөрү-таары хаамыталыыра, тиҥилэҕэр туран эргиллибитэ. – Туох кыһалҕалаах кэллиҥ?

Биэрискэ саарбаҕалаан, мух-мах буолбута, онтон кэпсээбитэ.

– Тыа оҕото, бу миэстэҕэ тиксиэм диэн эрэнээхтиигин да, билэр киһи быһыытынан этэбин, тиксиэҥ суоҕа! Эрэйдэнэ сатаама, быһаарыллан турар! Эн дуу, Саха сирин аан дойдуга аатырдыбыт ырыаһыт кыыһа дуу, ыйааһыҥҥыт тус-туһунан. Олоххо итинник буолар, ону билэ иликкин быһыылаах.

Кини эппитин хоту буолбута. Биэрискэ санаатыгар миниистирин кэлэ-бара күнү быһа күүппүтэ да, таба туппатаҕа. Сарсыныгар кэлбитэ – быһаарыы биллэр түмүктээх тахсыбыт этэ.

Эмиэ биир сындалҕаннаах кыһын… «Романтикаҕа» үлэлиир икки кыргыттара үрдүк үөрэххэ туттарсарга путевка ситиһэн, бэлэмнэнэр кууруска эрдэ киирбиттэр этэ. Ол кууруска биир сылы мүччү түстүлэр да, туох даҕаны эксээмэнэ суох СГУ устудьуоннара буола түһэллэрэ. Пиэрмэҕэ таах тахсыбаккабын диэн кэмсиниэх санаалар быгыахтаабыттара.

– Ии! Эн курдук «туонкай осуоба» тулуйбат үлүгэрэ! Тобуккар диэри ынах сааҕын ньыһыйа сылдьаҕы-ын, итиннэ охтубут борооску, манна сыппыт ынах! Санаан көр, итиннэ үйэлэрин бараабыт дьону! Биһиги диэн эһиил болдьохпут бүтэн, көҥүл-босхо барыахпыт. Оттон кинилэр инникилэрэ биир күдьүс боруҥуй халлаан! – Биэрискэ маҥнайгы кылаастан бодоруспут дьүөгэтэ Таанньа-Татоша кэлэн, курустаал иһиккэ өрөһөлүү ууруллубут кэмпиэт-сакалаат арааһыттан биир-биир айаҕар утаарар, сойон эрэр хара чэйи сыпсырыйар. Ыстаан болтоҥноторун быыһыгар биир кэм тылыбырыы олорор. – Ааспыт олохторо кытта бороҥ! Абаанса, хамнас кэллэҕинэ, иккилии күн хайаан да арыгылыыллар, бары! Саатаан бүттэхтэрэ ол. Эмиэ даҕаны, киһи өйдүүр ээ… Өрөбүл да, уоппуска да суох дьоно. Күнтэн күн биир ыарахан үлэ! Туох да атын суох, арай, кыһын буолар, онтон сайын буолар. Ыйга биирдэ «автолавка» кэлэр, аҕалбытын барытын «сотон» ылаллар.

– Эс! Онтон хаһыат сирэйин барыыллар дии, былаан итиччэ туолла, бачча туолла диэн? Москубаҕа босхо күүлэйдиир путевка эҥин? Биһиэхэ атыыламмат мал-сал эмиэ барыта эһиэхэ дии? – Биэрискэ соһуйда.

– Ээй, тас эрэ көрүҥ дии! Тиксээччи наар тиксэр быһыылаах. Биир эмэ, таах да син баран кэлэр быһыылаах… Билбэтим.

– Кими кэпсээбиттэрэ дии, били ким-ким, Ньургустаана паапатын!

– Аа! Кырдьык! Москубаҕа күүлэйдии баран, харчытын барытын халатан ылбыт этэ дии, итириктээн киирэн биэрбит үһү, кэм да…

Кыргыттар хойукка диэри буолары-буолбаты чыбыгырастылар. Татоша массыыната кэлбитигэр «производствотыгар» төнүннэ.

Биэрискэлээх ыаллара Даайа икки ыанар ынахтаах. Кэйиик ааттаахтара. Сүөһү таска сылдьарын көрдөҕүнэ, Биэрискэ чугастааҕы ыалларын тиэргэннэринэн эргийэн-хайаан эрэйдэнэрэ. Биир эмэ сүөһү кини диэки хайыстаҕына, часкыйа түһээт, иэнэ кэдэйэринэн куотара. Хантан уонна сүөһү буостуктаах буолуой!

Хомунаалынайыгар сөптөөх үлэ суох буолбут. Онон ити кыһын милииссийэ иһинэн саҥа арыллыбыт медвытрезвитэлгэ ийэтэ хассыыр-сэкирэтээр миэстэтин булан биэрдэ. Оо дьэ, оттон, үлэ суоҕар үлэ буолаахтаатаҕа. Биэрискэни итириксит барыта уулуссаҕа көрсөн, дорооболоһон ааһар этилэр. Эҥин араас ханньары-мунньары сирэйдээх, өрүү буруйдаах сордоохтор сэкирэтээр кыыһы бэйэлэрин киһилэрин курдук көрөллөрө. Хонон тахсыбыт «өҥөлөрүн» иһин хамнастарыттан биллимтиэ соҕус төлөбүр бу кыыс сиэбигэр түһэрин билбэттэрэ эбитэ дуу?

Ситинник, бэйэ-бэйэлэригэр майгыннаһар күн-хонук биир күдьүс ааһан, баран истэ. Үлэтэ – дьиэтэ, дьиэтэ – үлэтэ. Биирдэ эмэ дьүөгэлэриниин үҥкүүгэ сылдьаллар. Эһиил туттарсыахтаах эксээмэннэригэр бэлэмнэнэн кыһаллан олорор да, хайаан да утуйан хаалбыта баар буолар.

…Бу бүгүн сирэр да, хайгыыр да сэбиэскэй кэммитигэр, оҕо ханна баҕарар баран үөрэххэ туттарсан, кэскилин оҥостор баҕатын хааччахтаабакка буола сатыыллара. Сөмөлүөт билиэтэ да аһара ыарахана суоҕа, аһыыр ас букатын да чэпчэки этэ. Биэрэ тастыҥ балта Саанньаны уонна бииргэ үөрэммит дьүөгэтэ Оляны кытта, аны, Ташкеҥҥа тиийэн хаалла. Сөмөлүөт аҕыйахта дьигиһийээт, турунан кэбистэ. Кып-кыра массыына аарыма аалы соһон ханна эрэ илтэ. Араадьыйалара быраһаайдаста, ситиһиини баҕарда уонна хаҥсыа соҕус саҥалаах туспа-туора ырыа онолуйа иһилиннэ. Сөрүүн сөмөлүөт иһиттэн тахсааттарын кытта, баанньык паарданар хоһугар киирбиттии, ип-итии салгын кыргыттары кууста. «ГДР», «Эйр Индия» эҥин диэн суруктаах улахан лайнердар хончоһон тураллар. Кыргыттар, цивилизация кытылыгар тиксибиттэриттэн көнньүөрэн, имнэнсэн ыллылар.

Биэрискэлээх Оля убайыгар, устудьуоннар уопсайдарыгар, тиийиэхтэригэр диэри, халлааннара хара таҥаһы саба бырахпыт курдук, начаас хараҥарда. Уопсайга букатын киллэрбэттэр эбит. Оля убайа Куочук, атын омук уолаттарын кытта, маҥнайгы дуу, иккис дуу балконуттан быа гына баайыллыбыт бырастыыналары түһэрэн, кыргыттары эрчимнээхтик соһон таһаардылар. Араас омук ыччата олорор уопсайдара эбит. Биһиги дьоммутун казах кыргыттара Мадина уонна Айгуль хорҕоттулар. Харчо диэн ип-итии аһары хоргуннаах миини пиалаларга кутан биэрдилэр. Тэлэбиисэрдэригэр киинэ көстөр, «Даурияны» тылбаастаабыттар. Виталий Соломин өйдөммөт тылынан «гыр-гыр-гыры-гыр» диир. Кыргыттар күлсэн быычыгыраһыы бөҕө. Биир кэмҥэ артыыстар уу сахалыы саҥарбыттарыгар туора дойду хайдах эрэ сымнаан, уруулуу быһыытыйда. Уһаппатылар, сарсыныгар кыбартыыра булуна охсон, куортамнаһан онно олорор буоллулар. Оптуобуһунан улахан куораты уһаты-туора экскурсиялаан, онон-манан сундулустулар.

Кэм-кэрдии биллибэккэ ааста. Омук сиригэр үрдүк үөрэх туһа диэн тиксибит кыргыттары орун-оннуларын буллартаан истэ. Оля университекка баалынан хапсыбакка хаалла, быыһыгар Ленингракка баран кэллэ. Эһиилги абитураҕа диэри Ташкеҥҥа хаалардыы сананна, дьиэлээтэҕинэ, баҕар, кыайан төннүө суоҕа, төрөппүттэрэ туох диэхтэрэ биллибэт. Саанньа мединститукка бырабааллаата эрээри, эмиэ дьиэлээбэтэ. Биэрискэ Чэпчэки бырамыысыланнас институтугар туттарыста. Баала кыра буолан, киэһээҥҥи факультекка үөрэнэ киирдэ. Күнүһүн таҥас өрөр фабрикаҕа быыл үрдэрээччинэн үлэлиир буолла.

Кыргыттар фабрикаттан чугас уопсайга үһүөн бииргэ олороллор. Оля уоран олорсор. Киниэхэ бу уопсайга тоҕо эрэ миэстэ тиксибэтэх, Норуот хаһаайыстыбатын институтун уопсайыгар орон биэрбиттэр да, оптуобуһунан айаннаан кэлэрдээх. Ол иһин дьүөгэлэринээн бииргэ буолар баҕаттан, орон көстүөр диэри, саһарга күһэллэр, Биэрискэлиин биир ороҥҥо хоонньоһон утуйаллар.Түүҥҥүгэ үстүү-түөртүү күн хоно-хоно тахсар буоланнар, сорох түүн Оля Саанньа оронугар утуйар. Хосторугар татааркалаахтар, манна биир эмэ түүн хонор да буоллар, оронун көҥүллээбэт, тыытыллыбатах хаар курдук кылбаа маҥан сабыылаах ороно оннук хонон турар.

Биирдэ, сыппыттарын кэннэ, арай, ким эрэ ороннорун сахсыйда. Тимир бастарынан бэйэ-бэйэлэригэр сыстыһа турар ороннор аалсыһан лыбыгырастылар. Ол икки ардыгар көрүдүөргэ ыһыы-хаһыы бөҕө буолла. Биэрэ ааны өҥөс гыммыта – дьахталлар, халааттарын да кэппэккэ, сүүрэкэлэһэ сылдьаллар. Тугу да өйдөөбөтө. Хоһун уотун арыйа баттаата. Арай көрбүттэрэ – т?өгүрүк таас хахтаах лаампалара биэтэҥнии турар! Уоту быстылар, хабыс-хараҥа буолла. Түннүккэ сырсан тиийэн, таһырдьаны өҥөйбүттэрэ – дьон бары уулуссаҕа тоҕуоруспут, ыһыы-хаһыы, ытабыл, күүгүнэһии… Кыргыттар сыгынньах атахтарынан муоста барбах ньирилиир курдугун биллилэр. Ол да буоллар тахсыбатылар. Салгыы сахсыйбата, сотору уоскуйан, дьахталлар хосторунан тарҕаһан суугунастылар. Уота суох хабыс-хараҥа, дьик-дьах, чуумпу…

Саха сирин күһүҥҥүтүн курдук халлааннаах, силбик-сиппэрэҥ кыһын кэллэ. Хаар сороҕор олус хойуутук түһэр, түһээт ууллан хаалар. Сороҕор уута-хаара биллибэт силбик салгыҥҥа ыйанан турар. Ону ол диэбэккэ, Ташкент кэлэн иһэр Саҥа дьылга бэлэмнэннэ. Уулуссалары туора дьэрэкээн лаампа гирляндалара ханнык бырааһынньык кэлэн эрэрин биллэрэр ойуулара дьиримнэстилэр, маҕаһыын, тэрилтэ барыта симэннэ. Киэҥ түннүктэргэ харыйалар күлүмүрдэстилэр, мөһүүрэ арааһа ыйанна, чыпчыҥнас уоттар чаҕылыстылар.

Биир киэһэ эмискэ ааны тоҥсуйан тобугураттылар. Биэрэ соһуйан, ходьох гынна.

– Санитарнай бэрэбиэркэ! – аан анараа өттүгэр саҥа иһилиннэ.

Хортуоска ыһаарыланан киэһээҥҥилэрин аһыы олорбут кыргыттар сүүрэкэлэһэн бардылар. Оля, чааскылаах чэйин туппутунан, таҥас ыскаабын иһигэр киирдэ. Бэрэбиэркэлээччилэр иккиэлэр эбит. Кимнээх баалларын бэлиэтэннилэр. Ону-маны туппахтаатылар даҕаны, кири булбатылар. Сааһыран эрэр узбечка баатанан орон сиһин сотон көрбүтэ – баатата харааран хаалла.

– Паал! – «быыл» диир быһыылаах.

Онтон таҥас ыскаабын аанын арыйда! Онно атахтарын хатыйа үктээн, саннытынан ыскаап эркинигэр өйөнөн, туох да кыһалҕата суох Оля чэйин сыпсырыйа турара. Дьахталлар соһуйан, кэннилэринэн чинэристилэр. Саҥата суох тахсан бардылар, тугу да ыйыталаспатылар даҕаны. Сотору буолаат, комендаан тиийэн кэллэ. Кини бу уопсайга үрдүттэн олорор, оҕо-уруу бөҕөтө. Комендаан Оляны үүрэн кэбистэ. Кыыстарын киэһээҥҥи уулуссаҕа хайдах соҕотох ыытыахтарай, үһүөн тахсан бардылар. Ол түүн тимир суол вокзалыгар хороччу олорбутунан хонон турарга быһаарыннылар. Таһырдьа хаара-самыыра биллибэт, сып-сытыы тымныы тыаллаах өксүөн.

– Биһиэхэ билигин бытарҕан тымныы… – Оля өрө тыынна.

– Саҥа дьылга бэлэмнэнэн бөҕөтө-ө… – Биэрискэ эмиэ өрө тыынна. Оля харахтарыттан бөдөҥ таммахтар мөлбөһө сүүрдүлэр.

– Саатар Саҥа дьылы дьиэҕэ көрсүбүт киһи-и… Аны бу манна вокзалга Саҥа дьыллыырбыт буолуо… – Биэрискэ кытта ытаһыан баҕарда. Харахтарын уута ыанньыйан, тохтуох буолан эрдэҕинэ, эмискэ Оля эттэ: «Саҥа дьыллыы дьиэбитигэр барабыт дуо?!»

– Барабыт дуо?! – кыргыттар һэк гына түстүлэр. Бэйэ-бэйэлэрин көрсөн, саҥата суох чочумча олордулар. Онтон ойон туран, эмиэ саҥата суох, «межгород» төлөпүөнүгэр сүүрдүлэр.

Дойдуларыгар сарсыарда түөрт чаас. Дьоно аах суһаллык иккилии мөһөөҕү ыыттылар. Кыргыттар киэһэлик номнуо поезка олорон, Новосибирскай диэки куугуната турдулар. Онтон сөмөлүөтүнэн үс чааһы тулуйан көттөхтөрүнэ, кинилэри тоҥ, томороон, тумаҥҥа сууламмыт дьоллоох Дьокуускай куорат көрсүө! Ол кэннэ күлүмүрдэс маҕан хаардаах, аам-даам тумарык төрөөбүт дойдуларыгар тиийиэхтэрэ! Араас дьэрэкээн уотунан күлүмүрдүүр Ташкент сыл аҥаара эрэ харахтарын баайан, ырай дойдута буолан кубулунан көһүннэ. Билигин хараҥа түүл курдук, хара буруо курдук кэннилэригэр түллэҥнии хаалла. Төттөрү оборон ылыа диэбиттии, кыргыттар хайыһан көрүөхтэрин да сэрэнэллэр…

… Биэрискэ Чуурай диэн кып-кыра нэһилиэккэ учууталлыы сылдьар. Чуурай туспа сэбиэтэ суох, улахан сопхуос субай сүөһүтүн туруорар учаастага. Хаһааҥҥыта эрэ тип-тигинэс олохтоох нэһилиэк «бөдөҥсүтүү» кэмигэр эстэн-быстан хаалан, билигин дьон быстах кэмҥэ үлэлээн барар сирдэрэ буолан турар… Манна киин сиргэ иҥмэтэх-баппатах дьон тахсан, үрүҥ тыыннарын өрүһүнэн бараллар. Дойдуларыттан көспөккө хаалбыт аҕыйах ыал, сылгы-сүөһү ииттэн, кимнээҕэр чиҥник олороллор. Манна түөрт эрэ кылаастаах оскуола баар. Биэрискэ маҥнайгы кылаастан илдьэ сылдьар, быйыл оскуоланы бүтэрэн, бэһис кылааска ханнык эмэ атын нэһилиэккэ дуу, оройуон киинигэр дуу үөрэнэ барыахтаах биэс оҕолоох. Ыал буолан, туспа буруо таһаарыммыта төрдүс сылыгар барда. Эрэ маннааҕы олохтоох суоппар уол, Биэрискэттэн үс сыл балыс.

– Мин оскуоланы бүтэрэн бааллыы сырыттахпына, кэргэн тахсар уолуҥ буолуохсут бу баар диэн, алтыс кылааска үөрэнэр кырачааны ыйбыттара буоллар, «өлөн» түһүөм этэ! – диэн күлэр Биэрискэ.

Саҥарбат Сааба уола Махсыым аҕатын курдук эмиэ соччо саҥата суох, мүчүк эрэ гынар. Саҥата суоҕуттан сылтаан дуу, иккис кылааска хаала сылдьыбыттаах. Оскуолатын арыый да хойутуу бүтэрбитэ. Онно-манна баһын батара сатаабакка, олохтоох СПТУ-га үөрэнэн, суоппар-силиэсэр идэтин баһылаан, массыына уруулун хайдах туппутай да, биир күдьүс үлэлии-хамсыы сылдьар. Аҕала сатаан уһуну-киэҥи толкуйдаан эрэйдэммэккэ, төрөөбүт Чуурайыгар тахсан, бастаан суоппар миэстэтэ суоҕун иһин, бороон көрөөччүнэн, онтон тас үлэһитинэн сылдьымахтаспыта, ол кэннэ дьэ, үүт таһар эргэ «ЗИЛ» самасыбаалга олорбута.

Күн аайы сэттэ, сороҕор алта алюминий билээгэ ыаммытынан үүтү оройуоҥҥа, ыарахан сыт олоҕуран хаалбыт үүт собуота диэн дьиэҕэ, пиэрмэ дайааркаларынааҕар ордук чобуоххайбыт дьахталларга киллэрэн туттарар. Сэппэрээтэр тыаһын баһыйа сатаан хаһыытаһан кэпсэтэллэр. Махсыым, тыла суох киһиэхэ дылы, отой саҥарбат, кини кэллэҕинэ, дьахталлар дьэ бэлэстэрин тарбыыллар. Лабараанныы кэлбит, арылхай сырдык харахтардаах Чурапчы кыыһын сыыттыы сатаан, хайдах да буолуохтарын билбэттэр. Махсыым билээгэтин туппутунан көһүннэ да, күө-дьаа көбдьүөрэ түһэллэр. Киһибит саҥарбат, сүүһүн аннынан көрүтэлиир эрэ. Чурапчы кыыһа даҕаны, биирдэ быган баран, кэлин хоһуттан тахсыбатаҕа. Өрүү буоларын курдук, бүгүн эмиэ Махсыым икки атаҕынан нэһиилэ куотан таҕыста.

Күһүҥҥү күн, сайыны төттөрү эргитиэм диэбиттии, чаҕылыйан, итии көмүс уотунан сандаарар. Махсыым сопхуос киин хонтуоратын хараҥа көрүдүөрүттэн тахсан, үрдүк үктэллээх кирилиэһинэн түһэн истэҕинэ, биир кыыс чэпчэкитик дугунан, умсары туттубутунан киниэхэ утары сүүрэн тахсан эрэрэ. Ама да хатыҥырын иһин, уҥуоҕунан баҕас уһун киһини көрбөккө, кыыс кэтиллэ түстэ! Кэтиллибит омунугар хараҕыттан уот чаҕылыйда, охтон түстэ. Махсыым туох буолбутун ситэри өйдөөбөккө таалан турда. Ол икки ардыгар хонтуора иннигэр өрүү үмүөрүһэр дьон ойон тиийдилэр, кирилиэстэн охтубут кыыһы окумалыттан өйөөн, өрө тардан туруордулар, сыыһын-буорун тэбээн биэрдилэр. Ол – Биэрискэ этэ.

– Чуурайга барар массыынаны ыйыта кэлбитим ээ… – Биэрискэ хараҕын уутун нэһиилэ кыанна.

– Оттон ити киһиҥ дии, Чуурайга баран эрэр! Аата Махсыым диэн! – дьон күйгүөрэ түстүлэр. Кыыһы аһыммыт харахтарынан көрдүлэр, сирэйин өҥөҥнөстүлэр.

– Ыл, нохоо! Кыыһы хабыынаҕар уктан илдьэ бар! Эчэппит буруйгар!

Махсыым сүүһүн аннынан көрдө, иһиттэн нэһиилэ ыган таһаарда:

– Мин эчэппэтим ээ, бэйэтэ дии… Хабыынаҕа икки эмээхсиннээхпин…

Дьон саҥата хойунна да, хайыахтарай, кырдьаҕастары үөһэ таһаарыахтара дуо. Биэрискэ икки эдэрси дьахтары кытта, үс хаптаһыны икки кылгас маска тоһоҕолоон оҥоһуллубут намыһах ыскаамыйаҕа олорсон, сэттэ билээгэ быыһыгар Чуурайга аан маҥнайгытын барыста. Төһө да тыа сиригэр олордор, Биэрискэ төрөөбүт дойдута оройуон киинэ. Ийэтинээн тыаҕа билэр ыалларыгар хоно-өрүү, сир астыы биирдэ эмэ тахсааччылар. Оттон Чуурайга саҥа тахсар, буолаары буолан, соҕотоҕун. Ийэтэ билэр дьонунан төлөпүөннэтэн, кыыһа түһүөхтээх ыалын була охсубута, онон Биэрискэ тиийэр сирэ чопчу.

Самасыбаалга дьон үөһэ олороро көҥүллэммэт. Оттон Чуурайга тахсыан баҕалаах дьон өрүү баар буолар. Массыына үөрүйэҕинэн, тыа саҕатынан саһан айанныыр бадарааннаах суолу батан, Чуурайдыыр аартыкка тахсан кэллэ. Чуурай оройуон кииниттэн аһары ырааҕа суох эрээри, суола мөлтөх. Син балайда сахсыллан, түөрэ-лаҥкы түһэн айаннаан тиийэҕин. Быйыл кураан күн-дьыл сатыылаан, суол алдьамматах, бадараана суох. Атын дьылга күһүн-саас суол букатын да сабыллан хаалааччы. Оттон быйыл кыһыл көмүскэ сууланан күһүн налыйан турар. Сып-сырдык. Мас-от – сап-саһархай. Күн аайы кыырпах да былыт суох, халлаан – күп-күөх. Күөх дьэҥкир иһитинэн хаппахтаабыт курдук: халлаан саҕаҕа – сырдык күөх, оройо – иһит түгэҕэ – хойуу күөх… Оннук хас даҕаны улахан-кыра алаастары быһа көтөн ааһаҕын. Ходуһалар оттонон, хомуллан, маанымсыйа тараанан, налыйан сыталлар. Алаас аайы саамай аччаабыта иккилии оттоох. Оттор бэрт кичэллээхтик кэбиһиллэн, бүтэйдэнэн-күрүөлэнэн, түстэрэ ыраахтан төгүрүһэн чөмчөһөн көстөллөр.

Чуурай чугаһыгар Кубалаах диэн алааска тиийбиттэригэр, Биэрискэ сүрэҕэ мөҕүл гынна. Урут айылҕаны хаһан да сэҥээрэн көрбөт бэйэтэ, бэл ойон турда, массыына кузовын кытыытыттан тутуста. Кубалаах эбэ барахсан кэрэ көстүүтэ, киэҥ нэлэмэн налыйар иэнэ, уу нуурал күөнүгэр мэндэл халлааны түһэрэн күлүмүрдэтэ оонньоппут көмүс күөлэ кыыс өйүгэр-санаатыгар соһуччу киирдэ. Кыһыл көмүс дьураалаах чаҕылхай күөх былааты санныгар быраҕынан, Кубалаах эбэ сиппит-хоппут дьахтар буолан, наскылдьыйа хааман, ааһан иһэн кэннин хайыһан, биллэ-биллибэттик мичээрдээн ылла быһыылаах, саҥа кэлбит кыыһы сөбүлүү көрдө.

Биэрискэни Үрүҥнэр диэн эдэр ыалга түһэрбиттэрэ. Урут икки Ньукулайтан биирдэһэ хара бараан киһи үһү, иккиһэ сырдык хааннаах, кубаҕай сирэйдээх үһү. Ол Үрүҥ Ньукулай сыдьааннара билигин кэлэн, төһө да маҥан сирэйдэрэ суоҕун иһин, син биир Үрүҥнэр диэн ааттаахтар. Үрүҥ Кирииччэ ойоҕунаан Марыыскалыын икки кыыс оҕолоохтор, биирэ быйыл маҥнайгы кылааска үөрэнэ киириэхтээх, улахана – үһүскэ. Саҥатык тутуулаах биэс хостоох дьиэлээхтэр. Биэрискэҕэ иһиттэн-таһыттан кыракый тордуохтарынан олуйан кэбиһэр ааннаах биир туспа хоһу анаабыттар.

Ыал ийэтэ Марыыска, кыһаллыбыт-мүһэллибит көрүҥнээх хара сирэйдээх, төгүрүк хара харахтаах, орто уҥуохтаах хатыҥыр дьахтар, маннааҕы оҕо саадыгар ньээҥкэһит эбит. Ыал аҕата Кирииччэ кыһыл сирэйдээх, тутта-хапта сылдьардыын киинэҕэ индеецтэри оонньуур Гойко Митич курдук көрүҥнээх, кэтит сарыннаах, синньигэс бииллээх киһи эбит. Сымнаҕастык дугунан тыаһа суох хаамар. Дьиэтин муостатын сахсайбыт хаптаһыннара кыычырҕаабаттара буоллар, киһи кэллэ диэн биллэриэ суох эбит.

Аҕалара баарыгар дьахтар аймах, оҕолуун-ийэлиин хабахха тыыналлар, оннук эрдэттэн олохсуйан хаалбыт. Аҕалара ыраата бардаҕына, дьэ, «һуу» гыналлар, күө-дьаа буола түһээхтииллэр. Туора киһи, Биэрискэ кытта, сүр баттатар, Кирииччэ ыарахан тыына көхсүтүн дьөлө үрэргэ дылы буолааччы. Хата, оройуон киинигэр ханна эрэ суукканан үлэлиир уонна баар кэмигэр тыаҕа тахсан бултаан киирэр буолан, дьиэҕэ уһаабат, кыһыҥҥы бытарҕаҥҥа кытары матасыыкылын эһэн, кэлэр-барар.

Чуурай оҕото аҕыйах, оскуолата оҕо саадын кытта холбоһон, биир дириэктэрдээх үлэлиир эбит. «Биһиэхэ, оскуола-саадка, үлэһит оҕотооҕор элбэх, уулуссаҕа ыт киһитээҕэр элбэх», – диэн олохтоохтор күлэллэр. Кырдьыга даҕаны, ыал аайы иккилии-үстүү ыттаахтар. Оскуола-саадка биир оҕоҕо балтараа үлэһит тиксэр.

Дириэктэр, бэйэтин муҥутуур хотун курдук санаммыт сааһырбыт дьахтар, Розалия Тимофеевна саҥа каадыры хаҕыс соҕустук көрүстэ. Эдэрдэр тоҕо эрэ манна уһаан үлэлээбэттэр эбит. «Мин даҕаны уһаабатым буолуо, биир сылы хайдах эмэ тулуйа сатаабыт киһи. Ол эрээри мантан бардахпына, эмиэ ханна эрэ түбэһэбин… Киин оскуолаҕа миэстэ суох… Эмиэ хомунаалынай, вытрезвитель курдук бороҥ үлэ, буолар-буолбат кумааҕы бэрэкэйэ», – соччото суох санаа Биэрискэ сүрэҕин хам тутта, ийэтин сылаас хоонньугар хорҕойуох баҕата сытыытык тэһэ кэйдэ.

Биэрискэ икки эрэ оҕолоох маҥнайгы кылааһы тутта. Оскуолаҕа буолбакка, ыал олороругар ананан тутуллубут арболит дьиэ кыракый хоһугар үс саҥатык остуолу симпиттэр, учуутал остуолун киирэр аан таһыгар туруорбуттар. Саҥа суруйар дуоска, кыра оҕо суруйарыгар анаан, аҥаара усталыы сурааһыннаах, аҥаара ахсааны суоттуурга килиэккэлээх эбит.

Биэрискэ чоҕулуччу көрбүт уоллаах кыыһы кытта билистэ. Кырачаан дьонтон салла санаабыта ааһан, аа-дьуо үөрэҕин саҕалаан барда. Кырачааннар инники дьылҕалара хайдах-туох буолуохтааҕын, олохторун оҥкулун оҥорооччу кини – Биэрискэ! Оттон кырачааннар олохторун суолун аартыга арыллыбытын, кэлэр кэм, кэтэһэр дьылҕа ыллыгын омоонугар маҥнайгы хардыыны оҥорбуттарын билбэттэр. Субу түгэнинэн олорор дьон мэниктииллэрэ, ыһыллаллара баһаам буоллаҕа. Ситинник аа-дьуо, биллэрбэккэ, быһаарыылаах уларыйыы барыбыт олохпутугар киирэр. Кинилэр дьоллоругар, маҥнайгы учууталлара Вера Петровна – кыһамньылаах киһи. Сороҕор остуоруйалаан, сороҕор бэйэлэрин тэҥнээҕэ оҕо буолан, оонньоһон, сороҕор хаастарын түрдэһиннэрэн, дьиппинийэн, миннэрин билсэн, оннуларын булан бардылар. Үлэ-хамнас саҕаланна.

Быйыл кыһын Биэрискэ муҥха диэн баарын биллэ. Муус ылыытыгар сылдьыста, сыарҕалаах акка олоруста, кыракый кулууп дьиэҕэ маннааҕы эдэрдэри кытта киэһэ аайы оонньоото. Сопхуос туттарар этигэр барар сүөһүлэрин өлөрүүтүгэр сылдьан, сөхтө-соһуйда! Оройуон киинин таас чоҕунан оттуллар оһохторун хара турбаларыттан тунуйар, курунньук сыттаах салгыныттан букатын атын, чэбдик, ыраас салгынынан тыынан сырытта. Оройуоҥҥа ыйга биир эрэ киилэ эт киһиэхэ тиксэр, лааппыттан нуорманан ылаллар. Биэрискэлээххэ ол бэйэлээхтэрэ наар моой өттө состоруулаах буолар. Онтуларын ыйга хайдах эмэ уһатан-тардан аһыыр эбит буоллахтарына, Биэрискэ манна эти күн аайы сиир. Маннааҕылар эттэрэ эмиһэ, минньигэһэ бөҕө. Буойунаҕа уотунан оҕустарыллан өлбүт сүөһүттэн уратыта үһү.

Үүт, сүөгэй, суорат – төһөнү кыайаргынан! Ынах арыыта минньигэс да буолар эбитин Биэрискэ Чуурайга кэлэн биллэ. Сайын үтүөтүн, күөҕүн иҥэриммит араҕас арыыны Марыыска бэйэтэ таптайан хаһаанар эбит. Эчи минньигэһин, сүөгэй амтаннаах дьиҥнээх арыы! Оттон оройуоҥҥа арыы син биир нуорма, өрүү ахтаах биитэр туустаах буолааччы. Биэрискэ күөлтэн субу таһаарыллыбыт өрө мөхсө сылдьар собону хатырыктыы үөрэннэ. Кинилэргэ балык биирдэ эмэ тиксэр этэ, ону да ким эмэ бэристэҕинэ. Алҕаска биир эмэ собо мөҕүл гыннаҕына, Аана часкыйа түһээт, балыгын ыһыктан кэбиһэрэ уонна хамсаабатын диэн, өлөрөөрү, быһаҕын өнчөҕүнэн төбөҕө сынньара.

Кус, куобах, мас көтөрө кыһыннары-сайыннары мэлдьи баар. Кирииччэ байанайдаах булчуттартан ордуктара быһыылаах, тайҕаттан хаһан даҕаны тутуура суох кэлбэт. Быйыл күһүн байтаһын тайаҕы үс буолан охторбуттара. Эмис тайах этэ сырдык буолар эбит уонна сыата дьэҥкэрэр, эт – сыа, эт – ыа дьапталланан, ол курдук дьиктитик уойар эбит, миинэ да минньигэһэ бөҕө! Аны ким эрэ тыатааҕы этин бэрсэн, суор курдук «хуух» диэн баран сиэбиттэрэ. «Эн эккин мин сиэбэппин, суор сиир диэн биллэрэр үһүгүн» диэн Марыыска быһаарбыта. Ити быйаҥтан Биэрискэ бэйэтэ аһыырын таһынан, ийэтигэр кытта кэһиилээн ыыталлара. Тыатааҕы этин Аана отой сиэбэтэҕэ, сиэппэт диэн ааттыыр. Тииҥи эмиэ сиэбэт этэ – киһи курдук үһү. Кырдьык, сүлүллүбүт тииҥ, илиилэрин өрө ууммут кып-кыра киһиэхэ майгынныыра… Итинник бу кыһын биллибэккэ ааста.

Биэрискэ, быйыл Чуурайга маҥнайгы сааһын көрсөөрү, сааскы каникул күннэригэр оройуоҥҥа дьиэтигэр сытан баран, сопхуос массыынатынан тахсыһан иһэр. Массыынаны Махсыым илдьэ сылдьар, самасыбаал буолбатах, сынтаҕар иннилээх, кыра мас хопполоох саҥа «УАЗ» массыынанан сыыгынатан иһэллэр. Хабыына биир эрэ киһи олорсор миэстэлээх, онно куруук айаннаһар Араайа эмээхсин сиэнинээн олорор. Биэрискэ син биир үөһэ барарын билэн, халыҥнык таҥныбыта, отой тоҥмото, массыына биир кэм сыыгыныыр тыаһыгар бигэнэн, утуйан хаалбыт. Үөһэ дьон элбэх, киинтэн икки бэтэринээр сүөһүгэ туох эрэ укуолун оҥоро тахсыһан иһэллэр уонна чуурайдартан хас да киһи баар. Массыына тохтообутугар Биэрискэ уһуктан кэллэ. Суоппар хабыынатын иһиттэн Екатерина уонна Алексей Егоровтар сырдыгынан сыдьаайар ырыалара иһиллэр. Туруу сирдэригэр чугаһаабыттар эбит, Кубалаахтан чугас сытар Хаас Саарбыт алааска тураллар.

– Чээнии, барахсаны-ы, соторутааҕыта төрөөбүт дии!

– Көлөттүбүт дуу, хайдах, дэлби мөхсүбүт!

Дьон үөһэттэн ыстаҥалаһан түстүлэр. Биэрискэ эмиэ. Массыына ыраатан баран тохтообут. Суолтан чугас хаарга саҥа төрөөбүт кулунчук сытар. Аттыгар эдэр тураҕас биэ, субу үргүөх курдук, түөрт атахтарын дьирэччи тэбинэн турар.

– Тохтооҥ-тохтооҥ! Ийэтэ үргүө, эдэр биэ сороҕор оҕотун быраҕан кэбиһээччи!

– Оччоҕо маннык таах туран хаалабыт дуо?

Ол икки ардыгар кулунчук, тура сатаан мөҕүстэ да, кыаммата, сэниэтэ эстэн, сытынан кэбистэ.

– Сыппыта ырааппыт быһыылаах, чаалыйыа аны!

– Чэ-чэ, бара сылдьыаҕыҥ!

Дьон кулунчуктаах биэ диэки хаамтылар. Биэрискэ эмиэ кинилэри батыста. Махсыым массыынатын таһыгар хаалла, сиэбиттэн сигэриэтэ хаатын хостоото. Дьон иһэрин көрөн, биэ кистии-кистии, таба курдук, тамайа сүүрдэ. Кистиир саҥата ойуур диэки ыраата турда.

– Оо, ити баар дии, оҕотун бырахта быһыылаах…

Кулунчукка тиийбиттэрэ, оҥхой сиргэ түбэһэн, көлөттө сытар эбит.

– Уу, чээн, биһигинэ суох кыайан туруо суох эбит, сөпкө кэлбиппит!

Кулунчугу өрө тартылар. Түөрт атаҕар нэһиилэ уйуттар, байааттаҥныыр. Аны эмиэ сууллан түһүө диэн, дьон кулунчуктарын өйөөн-убаан, суол чигдитигэр таһаардылар. Көмүрүө хаар мууһура сыстыбытын ыраастаатылар, тэбээтилэр.

Ол турдахтарына, чараас ойуурунан быысаһан чугас сытар Хорбочукаан алаастан сылгылар сүүрэн иһэр тыастара иһилиннэ. Бэйэтэ көстүбэт эрээри, эрчимнээхтик мөҕүрүүр саҥа иһилиннэ, кини кэнниттэн эдэр биэ кистээн дьырылатар. Ол кэннэ син ыраах соҕус, алаас саҕатыгар арбайбыт хара сиэллээх атыыр ойон таҕыста. Дьон баар эбит диэн толлубата, таныыта бу тартайан, уордайбыт уоттаах харахтара умайан, көтүтэн аҕай иһэр. Кэнниттэн били биэбит, үҥсэргиир курдук, синньигэстик эйээрдэн кистиир, тамайа сиэлэр. Туйахтарын анныттан чигди хаара ыһыллаҥныыр, чабырҕыы тыаһыыр. Сир ньиргийэргэ дылы гынар!

– Оо, куһаҕан буолаары гынна!

Кулунчуктарын хаалларан, дьон абырыахтаах-быыһыахтаах массыыналарын диэки сырыстылар. Кулунчук, хантан эрчимирбитэ буолла, кэннилэриттэн батыһан барда. Ыксал тирээтэ. Атыыр субу сабырыйан иһэр. Махсыым, уобан турбут сигэриэтэтин силлээт, массыынатыгар ойон киирдэ. Массыына улгумнук эстэн абыраата.

– Туох-туох буолла, тоойуом? – Хабыынаҕа сиэнин көтөҕөн олорор эмээхсин сураста.

– Атыыр!

– Атыыр даа?! Оо, үлүгэр! Дьону тэпсэрэ буолуо, былыр хаһан эрэ…

Махсыым эмээхсини истибэт, массыынатын кэннилэтэн, куотан иһэр дьоҥҥо чугаһаан биэрдэ. Эмээхсин тугу эрэ кэпсиир… «Саһарҕам суһумнуура эн чэбдик иэдэскэр… Саһарҕам суһумнуура эн чэбдик иэдэскэр!» Егоровтар туох буолан эрэрин хантан билиэхтэрэй, сырдык ырыалара кустук өҥүн курдук кутуллар. Махсыым аанын арыйан, быган олорон, өссө кэннилээтэ. Атыыр кулунчукка чугаһаабыт диэн тиийдэ. Кулунчук тохтообот, сүүрэ сатаан бэдьэйэр, саһархай туйахчааннара дьэҥкэрэллэр.

Дьон бары халыҥ таҥастаах, сорохторо баата ыстааннаахтар, сүүрэр икки, хаамар икки ардынан кыаһыламмыттыы кыпсыҥныыллар. Сэниэ эстэрэ чугаһаата! Сатаатар, сылгыттан куотан иһэллэрэ дьиибэтэ сүрдээх быһыылаах, күлсүү бөҕөтө, тиистэрэ эрэ килбэҥнэһэллэр. Эр-биир массыына хоппотугар ыстаҥалаһан таҕыстылар. Учуутал кыыс саамай бүтэһик, сүүрэ сатаан сахсаҥныыр. Түүлээх халыҥ бэргэһэтэ эһиллэн, суолга түспүтүн ылаары, хайыһан көрдө даҕаны, салынна. Кугастыҥы өҥнөөх уһун баттаҕа ыһыллан хаалбыт, сааскы сырдык халлаантан саҕылла сандаара истэ. Ол тухары күлэн мичилийэ сылдьар.

Махсыым массыынатыттан ыстанан түстэ, массыына хоппотугар кыайан тахсыбакка, хатаастан хачымахтаһа сатыыр кыыһы хаардаах хаатыҥкатын тилэҕиттэн тутан, часкыппытынан, дьон үрдүгэр умсары анньан кэбистэ. Бэйэтин баайыы бэргэһэтин эһэ охсон ылан, кыыс көхсүгэр бырахта. Массыына барылыы түһээт, субу битигирэйэн кэлбит атыыртан куота турда. Атыыр, уордайбыт уоҕар сырсан көрдө да, сиппэтин билэн, бэрт имигэстик эргиллэн, биэлээх кулунчугар төнүннэ. Үһүөн халлаантан суккуллар сандал салгын анныгар, кулунчуктарыттан «хайа, хайдаххыный?» диэн ыйыппыттыы, санньыһан туран хааллылар. Атыыр массыына диэки өссө да суоһурҕаммыттыы хайыһан турда, кэтит түөһүн быччыҥнара быыппаста күүрбүттэр, хап-хара хойуу сиэлэ тараабыт курдук, хаҥас өттүгэр санньылыйбыт. Кыайбыт-хоппут быһыынан, түөрт модьу-таҕа атахтарыгар чиҥник тирэннэ…

Дьиэҕэ Үрүҥнэрэ бары бааллар эбит. Биэрискэ хоһугар ааста. Онтон тахсан, Марыыскаҕа айаҕын уонна куортамын харчытын алта уон солкуобайы уунна. Кирииччэ кыһыл арыгыны сөбүлүүрүн билэр буолан, киирдэҕин-таҕыстаҕын аайы биир кыһыллаах кэлээччи. Бу сырыыга подунуоска купсууну өрө туппутунан, кэннин хайыһан, эргиллэн турар болгар дьахтара ойуулаах арыгыны уонна оҕолорго анаан ол-бу минньигэс ас аҕалла.

– Хайа, «Эһэлэрин хаана» бүтэн хаалбыт дуу? – Кирииччэ бытыылкатын эргим-ургум тутар.

– Билбэтим ээ, ийэм ылан кэлээччи.

Урукумуонньук тылын тылыгыратан, Биэрискэ илиитин, сирэйин суунна, хоһугар төттөрү киирдэ. Хоһун аанын аттыгар куурката ыйанан турар. Ол үрдүнэн суоппар уол баайыы бэргэһэтэ. Биэрискэ туох эрэ сөбө суоҕу оҥорон эрэр курдук, аан диэки хайыһан көрдө. Уол бэргэһэтин ылан, эр киһи көлөһүнүн сытын түөһүн муҥунан дириҥник эҕирийдэ. Бэргэһэ сыта наһаа минньигэстик киирдэ, сүрэҕэ нүөлүйдэ, харахтара симириктээтилэр. Бэргэһэни кууспутунан, ороҥҥо сытта. Сотору киэһээҥҥи аһылыкка ыҥырдылар. Бэргэһэ сыттыкка хараара хаалла.

Биэрискэ төбөтүн хамсаттаҕына, муннугар уол бэргэһэтин сыта кэлэр. Салгыны хамсата оонньоон, илгистэ олорон аһаата. Санаатыгар, дьонугар биллэрбэккэ буола сатаабыта даҕаны, Кирииччэлээх туох эрэ атын иэйиини таайдылар быһыылаах, бэйэ-бэйэлэрин көрсөн кэбистилэр.

Аһаан бүтэн эрдэхтэринэ, массыына тыаһа сыыгынаан кэллэ, салгыы барбата, кинилэргэ тохтоото. Кирииччэ аан дьиэҕэ тахсан, киирбит киһилиин тугу эрэ кэпсэтэн бүтүгүрэстилэр. Киһи тахсан барда. Кирииччэ соһуйбуттуу туттан, маарыын суолга хаалбыт Биэрискэ кырса бэргэһэтин тутан киирдэ.

– Бу… Махсыым аҕалла дии…

– Барда дуо? – диэн ыйытта Биэрискэ Махсыым бэргэһэтин төнүннэриэн санаан.

– Барда дии… Дьээбэ-дьээбэ… – Кирииччэ уоһун иһигэр мүчүк гынна.

Ити күн кэннэ уоллаах кыыс көрсүһэ түһэллэрэ элбээн барда. Махсыым урут оонньууга соччо сылдьыбат бэйэтэ, кулууп дьиэтиттэн арахпат буолла. Чуурай ыччата уонча эрэ буолан мустабыт диэбэттэр, эргэ кулуубу өрө сүгэн кэбиһэллэр. Бобиналаах магнитофон музыкатыгар үҥкүүлүүллэр, онтон араастаан оонньууллар. Оонньуур оонньуулара үксүн: «Тииҥнэр уонна эриэхэлэр», «Алдьаммыт төлөпүөн», «Биһилэх кутуута». Махсыым Биэрискэ туһуттан кулууптан арахпат буолбута биллибитэ эрээри, кыыска чугаһыы илик. Оонньууга да оонньоспот, бэл, үҥкүүгэ ыҥырыа дуо. Биэрискэлиин билсээри, оройуонтан да, сопхуос киин уһаайбатыгар да үлэлиир уолаттар хам-хаадьаа анаан тахсаллар. Кыыс кинилэрдиин хаһан билсэ охсубута буолла, уруккуттан доҕордуу курдук туттан, күлэр-үөрэр. Биир эмэ уол, кыыс санныгар илиитин ууран ыллаҕына, Махсыым күнүүлээн, хараҕа уоттана түһэр эрээри, тугу да гыныан булбакка, таһырдьа ойон хаалар.

Биир күн Үрүҥнэр ийэлэрэ Марыыска оройуонтан соҕотоҕун тахсыста. Суолу быһа саҥата суох олорсон кэлэн баран, дьиэтигэр чугаһаан иһэн, эттэ:

– Махсыым, эйигин биһиэхэ олорор Биэрискэни эккирэтэр дииллэр дии…

Махсыым тугу да хардарбат, истибэтэх курдук, уруулун эрийэ олордо.

– Дьэ, нохоо, эппэтэҕэ диэйэҕин, итинник саҥата суох сылдьан хааллаххына, куоттарарыҥ буолуо! Биэрискэ барахсан кэрэ сэбэрэтинэн эрэ буолбакка, хайа да өттүнэн үчүгэй кыыс. Уолаттар иҥээҥнээн бөҕө, оттон кини эйигин сөбүлүүр курдук көрөбүн… Төһө даҕаны сөбүлээбитин иһин, хайа муҥун күүтүөй, ким эрэ аралдьытыа буоллаҕа! Кытаат, дьолгун мүччү тутума, хайдах эмэ саҥара сатаа!

Дьахтар диэки хайыһан көрбөтөр да, Махсыым, кулгаахтаах киһи, син иһиттэҕэ дии. Марыыска дьиэтин таһыгар түстэ, массыына бидиргэҕи бырдаҥалатан, бырылата турда. Ити киэһэ Махсыым кыыһы бытаан үҥкүүгэ ыҥыран, мустубут ыччаты барыларын сөхтөрдө. Аан бастаан таарыйсан, чугаһаспыт уоллаах кыыстан оҕолор дьээбэлээхтик имнэнсэр харахтара арахпата. Арай Махсыымнаахха тулаларыгар ким да суох курдуга… Оонньуу кэнниттэн Махсыым кыыһы дьиэтигэр диэри атаарда. Биэрискэ мичээрэ уоһуттан сүппэккэ, биллэр-биллибэт сэгэйэ, мичийэ истэ.

– Бэргэһэҕин билиҥҥэ диэри биэрэ иликпин дии… Таһаарабын дуо?

Махсыым төбөтүн илгиһиннэ. Саҥата суох турбахтаатылар.

– Чэ, пока… мин киирдим.

Махсыым тугу эрэ этиэн баҕаран, салгыны өрө эҕирийдэ. Биэрискэ күүтэн турда.

– Вера…

– Тугуй, Махсыым?

– Биэрискэ, мин… мин эйигин наһаа таптыыбын!.. – Махсыым, хата, эттим дии санаата эрээри, саҥата иһин түгэҕиттэн нэһиилэ сибигинэйэрэ иһилиннэ.

– Оо, сэгэрбиэн!.. – Биэрискэ кэтэспит түгэнэ дьэ үүннэ уонна саҥата суох кытар гыммыт сирэйин уол түөһүгэр кистээтэ.

Урут Махсыым биир да кыыһы, кууһуохтааҕар буолуох, тарбаҕынан да таарыйа илигэ. Бөҕүөстүбүт илиилэр кыыһы иилии куустулар. Минньигэс, сылаас долгун саба биэрдэ! Уол биллэр-биллибэттик титирэстиир, уолугунан ойон тахсыах курдук сүрэҕин тэбэр тыаһа таска иһиллэргэ дылы. Уоһа кыыс хараҕын булан уураата, онтон сымнаҕас уоһугар тигистэ… Өөр да өр турдулар.

– Суох! Эйигинэ суох олох сатаммат эбиппин… Өрүү бииргэ буолуох… Ыал буолуох… – сибигинэйдэ Махсыым.

Кыыс тугу да саҥарбата, төбөтүн кэҕиҥнэттэ. Махсыым кыыһы эмискэ көтөҕөн ылан эргиттэ: «Һуу!» – диэн улаханнык саҥа таһааран уһуутаата. Иккиэн дьоллоро-үөрүүлэрэ түөстэрин иһигэр баппакка, утары көрсөн күлсэ турдулар, өссө ыбылы куустустулар. Үрүҥнэр дьиэлэрин түннүгүн сабыыта ибир гынна…

Сарсыҥҥы күнү аһарбакка, Махсыым ийэтэ, Татыйыына, кинилэртэн үс дьиэ нөҥүө олорор Сахаараптартан тиэргэннэригэр кураанах турар бып-быыкаайык дьиэлэрин кэпсэттэ. Саҥарбат Саабатынаан кутугунайан, тоҥ дьиэни оттон, ыал бөҕүн дьаһайан, сууйан-сотон кэбистилэр. Кыһаллыбыт-мүһэллибит көрүҥнээхтэр, төттөрү-таары суксуруҥнаһан тоҥхороҥностулар. Сырдаабыт сирэйдэрин дьонтон кистээбэттэр, Татыйыына үөрүүтүн ыһа-тоҕо кэпсиир киһи буолла. Аҕыйах хонон баран, Чуурайга саҥа ыал олоҕо түстэннэ.

Биэрискэ Үрүҥнэриттэн көстө. Марыыскалыын үөрэ-көтө сылластылар, куустустулар, кыыс кыра суумочкатын тутан баран, күүлэҕэ таҕыста. Утары Кирииччэ киирэн эрэрэ баара да, эмискэ кыыһы күүлэ эркинигэр сыһыары аста, илиитинэн эркиҥҥэ тирэннэ. Соһуйан, тылыттан матан хаалбыт кыыс, Кирииччэ сирэйин куттаммыттыы утары көрдө. Киһитэ дьиппинирбит көрүҥнэммит, уостара кыбыс-кытаанахтык ыпсыбыттар, сурааһын эрэ курдук көстөллөр. Кыараан хаалбыт харахтара кыыһы сып-сытыытык дьөлө көрөллөр! Дьиэ аана кыыкырдаан арылынна. Марыыска мичээрдээбитинэн тахсан иһэн, төттөрү түһэн хаалла. Биэрискэ Кирииччэ илиитин аннынан сылыпыс гынан, таска куотта. Махсыым массыынатыгар Биэрискэ суумкаларын дьаһайа олороро…

Ийэм таптыыр уолбун сөбүлээбэтэ буолуо дии санаабыта, сэрэйбит сэрэх, Аана Сэмиэнэбинэ күтүөтүн көрөөт, сирэн кэбиспитэ.

– Пахайбын даҕаны! Уол баранан, бу айылаах дөйө сытыйбыт киһини булуннуҥ дуо?! Саатар мантан атын киһи суох этэ дуо? Тириини хайа соппут курдук харахтардаах буола-буола, унньуйа дөйбүт «замухрышканы» хомуйан кэлбиккин! Айыккабын ньии! Биһиэнэ биһиэнин курдук! Туох үөрэхтээҕий, сатаатар?

Биэрискэ Махсыымын «дөйбүт киһи», «замухрышка» диэбиттэриттэн өһүргэнэн, тугу да саҥарбата. Ол икки ардыгар Махсыым таһырдьаттан киирэн кэллэ. Хаһаайкаттан ыраах, оһох иннигэр кыра олоппоско олорунан кэбистэ, дьыалата хаахтыйан эрэрин тутатына таайда.

– Тоойуом! Кыратык таска тахса түс эрэ, мин бу кыыстыын кэпсэтиэм этэ! – Аана долгуйан, саҥата тыҥаабыт. Махсыым тыастаахтык ойон туран, ааны «лип» гына быраҕан, тахсан барда.

– Маама-а! – ийэтин диэки куһаҕаннык көрөөт, Биэрискэ эрин сырыста. – Махсыым! Максиимка-а!

Уол УАЗ-игар кирэн олороотун кытта, Биэрискэ сүүрэн кэлэн хабыынаҕа хатааһынна, массыына аанын тыаһа «лап» гынна. Уол саҥата суох ыйытардыы көрөн ылла. Кыыс ахсарбатахтыы ийэтин дьиэтин диэки сапсыйан кэбистэ. Массыына эстэр тыаһа кыыкынаата уонна бадараана бэлиэр кууран эрэр уулусса устун бырылыы турда – билсэн-көрсөн бүттэхпит ол…

Оҕолор соччото суох сирэйдэриттэн дьоно аах туох буолбутун тута сэрэйдилэр. Били, ыһыах кэнниттэн, от саҕаланыан иннинэ, уруу ыһыаҕа тэрийэн, киэҥник-куоҥнук малааһынныах буолбут былааннара ыһыллан, букатын мунан хааллыллар. Махсыым иннинэ икки кыыс оҕолоох, соҕотох уоллаах ыал уруу тэрийэн көрө иликтэрэ. Кыра кыыстара кэргэннэммэккэ сылдьар, улаханнара уруута суох ыал буолан, хоту баран олорор. Оттон Биэрэ соҕотох оҕо, бииргэ төрөөбүттэрэ суох. Онон уруурҕаһар үөрүүлээх, бэлиэ түгэннээх буолуо этэ да… Оҕолор урууттан кыккыраччы аккаастаннылар.

– Эс! Хайдах ыт-кус курдук холбоһон хаалаары гынаҕыт? Биһиги бэйэбит да аймахтарбытын ыҥыран, билсиһии малааһына оҕотун баҕас тэрийээ инибит! – диэн Татыйыына кыыһырда.

Эдэрдэр ыгдаҥнаһан кэбистилэр. Малааһыннарын күһүҥҥүгэ анаатылар.

Аана бииргэ төрөөбүттэрэ суох, кыыһын булумньунан, эрэ суох төрөөбүт аҥаардас дьахтар. Өрөбүл күн күүлэтин иннигэр сылабаарын күөдьүтүнэ сырыттаҕына, тастыҥ эдьиийэ Сөдүөрэ тиийэн кэллэ.

– Хайа, туох сонун? – Сөдүөрэ кыыкынас-сааҕынас саҥалаах. Моҕохтоох модьу моонньун килиэккэ ойуулаах от күөх ноһобуойунан сотунна. Онтунан кып-кыра көлөһүн таммахтара бычыгыраан тахсыбыт муннун, сүүһүн сотунна, уонча оҕо тиирэ тэппит иһин көннөрүнэн, үрүҥ кырааскалаах, өйөнөрдөөх ыскаамыйаҕа олохтоохтук оҥостон, ханна да ыксаабат киһи быһыытынан, өтөрүнэн хоҥнон туруо суох айылаахтык сыстан, олорунан кэбистэ.

– Күүлэҕэр көспүккүн дуу? Арыыйда эрдэ диэммин мин көһө иликпин.

Буолары-буолбаты, дьиэ иһинээҕини сэһэргэһэн баран, Сөдүөрэ кэлбит соругун быһаарсаары туоһуласта:

– Хотуой, Аана, кыыһыҥ чуурайдар Саҥарбаттарын уолугар эргэ тахсан барбыт үһү буолбаат, ону тоҕо кистээтиҥ, хаһан иһиллиэ суоҕун?

– Ээ, миигин «остуолланан» хобугунаһан эрдэххит! Сирэйэ-хараҕа хайдах эбит диэн көрө кэллиҥ дуо?!

– Эс! Эн бу хайдах буоллуҥ?! – Сөдүөрэ соһуйа иһиттэ. – «Остуолланан» буола-буола! Үөрүүлээх сураҕы истэн, ол-бу тэрээһиҥҥэ көх-нэм буолуохха баар эбит диэн сүбэлэстэхпит дии, ол ону тиэрдэ кэллим! Хайыах курдуккунуй, уруу тэрийэҕин дуо?

– Уруу ээ! Һы!

– «Һы» даа?!

– Миэнэ барыта наар аанньа!

– Тугу эттиҥ ити?

– Киһи санаатын иһинэн күтүөттэниэм дуо мин… Этэбин дии, наар аанньа!

– Тугуҥ кэмэлдьитэй, баҕаҥ хаһан да хаммат, хайдах буолбут дьахтаргыный? Тугуй ол, сирдиҥ дуу, хайаатыҥ дуу, Саҥарбаттар уолларын? Кимнээҕэр да үчүгэй ыал, кимнээҕэр да үчүгэй оҕо! Махсыым киһи сирбэт уола! Испэт-аһаабат, көрсүө-сэмэй, туруу үлэһит уонна эйиэхэ туох наада? Биэрискэ маладьыас эбит, дьолун мүччү туппатах!

– «Испэт-аһаабат»… эйиэхэ ол эрэ наада! Оттон мин хаатырга курдук үлэбэр эбинэ сатаан, эрэйинэн-муҥунан, муоста сууйааччынан кытары үлэлээн, суос-соҕотоҕун иитэн таһаарбыт оҕобор итиннээҕэр ордук олоҕу баҕарбытым. Ол ааҕыллыбат дуо?! – Аана ытамньыйыах курдук буолла.

– «Хаатырга?!» Эн суот туорааҕын тачыгыраппытыҥ «хаатырга» үһү! Билбэт буоллаҕыҥ тугун, хаатырга диэни! Уончака оҕону төрүү-төрүү колхуос-сопхуос сүөһүтүн сааҕар умса түс эрэ! Итирик-кутурук, аанньа үлэлээбэт, бардам эргин үйэҥ тухары моойгор олорт эрэ! Анараа дойдулаабыты мөҕүттэр сатаммат буолан баран, туһугар эмиэ абытай хаатырга этэ!

Сөдүөрэ иэдэс биэрэн, элээр-мэлээр көрүтэлээтэ, кистээн хараҕын уутун сотунна. Аана алҕаһы саҥардым диэн, иһигэр билиммитин да иһин, саҥарбата.

– Киһи-киһи туһунан хаатыргалаах. Харчы эрэ туһа диэн, хараҥа хонтуораҕа быыкаа хамнаска хачыгырайан, үйэбэр биирдэ соҕуруу баран сынньанным дуо? Эн ыарахан үлэлээх да буолларгын, хамнаһыҥ ботуччу, соҕуруу иккитэ баран кэллиҥ, босхо! Оо, мин биир эмэ баҕа санаам табылыннын диэн, оҕом үөрэхтэниэ этэ диэн, булбуппун барытын дьаптайан, хотунан-соҕуруунан хааччаҕа суох сырытыннарбытым, халтайга хаалан хааллаҕа… Баһа бата сатаан, булан-булан үөрэммит да үөрэҕэ баар, кыра кылаас учуутала! Орто үөрэх! Харчыны бараабакка, онно баҕас эрдэттэн бата сатыа этэ буоллаҕа! Сатаатар күтүөт үөрэхтээх буолуон сөп этэ! Эн оҕолоруҥ бары үрдүк үөрэхтэннилэр дии, үрдүк үөрэхтээх күтүөт-кийиит бөҕөтө! Миэхэ тоҕо сатаныа суохтааҕый?!

– Ол ону Үрдүк Таҥара бэйэтэ көрөн олордоҕо, туох да диир кыаҕым суох… Мин даҕаны отучча сыл ыарахан үлэҕэ эриллэн баран, бу арыыйда налыйан олоробун. Тугу да диир кыаҕым суох…

– Үрдүк Таҥаралара тугум иһин миигин накаастыырый? Ити кыыһы эҥинэ бэйэлээх үтүө уол бөҕөтө эккирэппиттэрэ, ханна баалларый? Дөйө бүгүйбүт баҕайыны булан олорор! Биир да үөрэҕэ суоҕу!

– Аньыы, хотуой! Накаастаабатаҕа буолуо, дьол тосхойбута буолуо. Кыыһыҥ иннин быһа саҥаран кэбиһээйэҕин! Өссө да эдэрдэр, көстөн иһиэ. Үөрэниэхтэрэ буоллаҕа дии, тугуҥ тылай бу дьахтар! Сирдэҕинэ, бэйэтэ араҕыа, эн онно орооһума! Олох орун оннун булларан иһиэ. Соҕотох кыыскын, ыл, киһилии тэрийиэх! Саата да бэрт!

Эдьиийэ Сөдүөрэ олохтоох, ыллыктаах намыын саҥатыттан Аана кэҥии түстэ. Кырдьык даҕаны, баҕар, букатыннаахтык эргэ тахсыа суоҕа, өйүн тутар ини! Бэйэ күнүн-чааһын кэтэһэ таарыйа, урууну тэрийиэххэ сөп эбит диэн санааҕа кэллэ. Сөдүөрэ киэҥ дьиэтигэр малааһынныах буоллулар.

Итинник сүбэлэһэн баран, дьахталлар куукула дьиэтин курдук мааны, барыта орун-оннугар ууруллубут дьип-дьап оҥоһуулаах, сырдык, аһары баран, сиэри таһынан ыраас дьиэҕэ киирэн, күндү фарфор чааскыттан сылабаар чэйин сыпсырыйдылар. Килбэйэр иһит ыскаабыттан хурустаал таас үрүүмкэлэр хостоннулар, үрүҥ көмүс биилкэлэнэн, быһахтанан-ньуоскаланан кыһыл көмүс дьураалаах иһиттэртэн саха аһын аһаатылар…

Биэрискэ сайын саамай куйаас күннэригэр үйэтигэр аан маҥнайгытын мас кыраабыл тутан, от оттуур диэни биллэ. Бастаан кыайан ылсыбакка, иннинэн-кэннинэн айаннаан, дьон күлүүтүгэр киирдэ. Ытыһа хабыллан хаалла, үөн-көйүүр кинини эрэ булан сиир курдук. Саллан хаалан, икки-үс күн сөрүүн дьиэҕэ сытта. Чуурайга ыт охсор киһи суох. Оҕолуун-улаханныын бары кураан күннэри тутуу былдьаһан, ходуһаҕа сылдьаллар. Кэтэх оттуур сир диэн суох буолан, хаалбыт ырыысканы, өтөхтөрү оҕонньоттор-эмээхситтэр ыраастыыллар. Дьэдьэн буста, хаптаҕас кыыста, дьон оттоон иһэн, таарыйа хомуйан кэлэллэр.

Икки күнү супту ардаата. От мунньааччылар өрөбүллэрэ лаппа уһаата. Сааба былырыын биэнсийэҕэ тахсыбыта, сопхуос отугар быйыл кыттыспакка сылдьар. Кэтэҕэр бөһүөлэктэн чугас, икки алаас ыккардыгар сытар, сир ахсааныгар киирсибэт өтөҕү оттуур. Куораттан кыра кыыһа Ньургуйаана оттоһо кэлэ сылдьар. Кини куорат кыахтаах тэрилтэтигэр экэнэмииһинэн үлэлиир үһү. Тэрилтэтэ таас кыбартыыра биэрбит, онно соҕотоҕун олорор. Эрдэнэр, оҕолонор сааһа ааһаары гыммыт да, Ньургуу ыксаабат быһыылаах.

– Эн тоҕо соҕуруу сынньана барбакка, манна кэлэн от оттоон эрэйдэнэ сылдьаҕын? – дьиибэргиир Биэрискэ.

– Оо, мин дойдубар кэлэн кумаарга-кырдаайыга сиэтэн, буһан-хатан, окко сылдьыбатахпына, сайыны биллим ээ да дии санаабаппын! Өссө ыраах, звеноҕа сылдьан оттуурбун сөбүлээччибин. Балааккаҕа, үүтээҥҥэ, отууга сытан. Оо, от сыта барахсан! Дьэдьэн, моонньоҕон сыта!

Оттууру хайдах итинник таптыахха сөбүн Биэрискэ өйдөөбөтө. Ньургуу кийиитин санныттан кууста уонна сыллаан ылла.

– Чэ, дьиктиргээмэ, манна сылдьа түһэн баран, Италияҕа бараары сылдьабын, путевканан. Сыл аайы онно-манна барабын, адьас ыарыы курдук буолла. Быйыл оҕолорбор Италияттан туох эмэ сувениры аҕалар инибин.

Сарсыныгар Ньургуу «үлэ элбэх, мунньулуннаҕа аҕай, баран көмөлөһөөр» диэбитин быһа гыммакка, Биэрискэ барыста.

Өтөхтөрө чугас соҕус, ойууру ортотунан сүүрбэччэ мүнүүтэ хааман тиийэҕин. Онтон хаһан эрэ халыҥ хаар баттаан, төбөлөрүн суол иһин диэки иэҕиппит, лабаалара бэйэ-бэйэлэригэр иилистэн, холлороон аллея буолбут, анаан олордуу курдук үүммүт хатыҥнары ааһаҕын. Сөрүүн күлүктээх, кытаанах үктэллээх суолунан бара түһэҕин уонна эмискэ арылыс гынар кыракый ырааһыйа саҕатыгар биирдэ баар буола түһэҕин.

Биэрискэ Чуурайга тахсан баран, айылҕа кэрэ көстүүтүн олоҕугар иккис төгүлүн сөхтө. От саба үүммүт синньигэс хоруу уҥуор хаптаҕас уга үөһэттэн алларааҥҥа диэри бүүс-бүтүннүү кып-кыһыл отоннорунан кыыһар, хантан эрэ кэмпиэт сытын курдук минньигэс сыт дыргыйан ааһар. Охсуллубут от сыта хойуутук кэлэр.

Сааба отун охсон ыраатыннарбыт. Кыргыттара кэлбиттэригэр хотуурун от сүүмэҕинэн сотон баран, угун сиргэ батары аста. Пионер оҕо хаалтыһыныы моонньугар баана сылдьар, уруккута маҥан эбит былаатын уһугунан моонньун, сирэйин сотто-сотто, отууга таҕыста. Кыыһыныын ону-маны ботур-итир тыл быраҕыстылар уонна саҥата суох олордулар. Сиккиэр хатыҥ сэбирдэхтэрин силигирэтэн ылар. Икки-үс кумаар дыыгыныыр, хантан эрэ сахсырҕа сааҕынаан ааста.

Бу түгэҥҥэ ханна эрэ куорат ньиргийэр олоҕо сирилии, ньирилии турара буолуо… Таас дьиэлэр эркиннэриттэн тэйэн, күн сыралыйар итиититтэн кытара буспут кыһалҕалаах дьон төттөрү-таары аалыҥнаһаллар, тобус-толору оптуобустарга ньимиччи симиллэн, ханна эрэ сөтүөлүү бараллар. Оттон манна уу чуумпу, киһи нухарыйан барыах чуумпута…

– Аһары бэрт буолбат дуо, тоойуом? – Сааба эмискэ саҥарбытыгар көһүппэккэ олорбут Биэрискэ соһуйан, ходьох гынна. Өйүгэр оҥорбут итииттэн ууллан эрэр куорат мэлис гынна. Ньургуу күлэн лыҥкынатта. Биэрискэ саҥата суох кэҕиҥнээтэ уонна оҕолуу мичээрдээбитигэр тииһэ кэчигирэһэн көһүннэ.

Сойбут саахардаах хара чэйи киллиргэтээт, кыргыттар нэлэйэн тэлгэнэ сытар ходуһаларын диэки хааман, хаппыт оту тэпсэн, сурдурҕаһа турдулар. Сааба таптыыр хараҕынан имэрийэ көрөн оҕолорун атаара хаалла, астыммыттыы мичээрдээн мүчүк гынна, уоһун үрдүн саба үүммүт бытыгын имэриннэ.

Ньургуу оту бэрт түргэнник харбыыр, кыраабыла кылбаҥнаан олорор. Куурбут от бэйэтэ чөмөхтөнөн иһэргэ дылы, кини үлэлиирин туораттан киһи эрэ көрөн туруох курдук. Оттон Биэрискэ кыраабыла, ама, кинини истиэ дуу? Ньургуу үлэтин үтүктэ, сырса сатаан, итиннэ иҥиннэрэн, манна сыһан-соһон, дьэ үөрэниэхчэ буолла быһыылаах. Халыҥ субурҕаны аһара уһаппакка харбаата. Киэһэриэр диэри хайа баҕарар өттүнэн тэҥҥэ харбыыр буолла. Ытыһа хабыллыбатын диэн, Татыйыына чараас үтүлүк биэрэн ыыппыта туһалаата. Сааба кэлэн көмөлөһөн, бугул бөҕөтүн бычыгыраттылар. Ити күнтэн ыла Биэрискэ от үлэтиттэн наһаа саллыбат. Ааһа баран, Ньургуу курдук от үлэтиттэн үөрэр, сүргэтэ көтөҕүллэр, этэ-сиинэ арыллан, чэпчииргэ дылы гынар.

Ити сайын Биэрискэ Махсыымыныын аҕыйахтык көрсүбүттэрэ. Көрүстэхтэринэ, Махсыым, уруккута бэл дьиэтигэр аҕыйахта саҥарар бэйэтэ, ойоҕун кытта Саабалаах тиэргэннэрин бүтэйин нөҥүө уулуссаҕа сытар бэрэбинэлэргэ сэргэстэһэ олорон, тугу эрэ уһуннук кэпсиир. Ойоҕунуун холууп курдук куллугураһаллар, туохтан эрэ күлсэн ыгдаҥалаһаллар. Сороҕор ойон туран тугу эрэ былдьасыһан, оҕо курдук ыстаҥалаһаллар. Киирэн эрэр сайыҥҥы күн Биэрискэ уһун суһуоҕар көмүс уотунан сандаара оонньуур. Ардыгар Махсыым бүтэй сүллүгэһигэр тахсан, сохсоллон олорор буолар. Аттыгар Биэрискэ атаҕын хатыйа үктээн турар, тугу эрэ кэпсиир, хаҥас саннынан бүтэйгэ өйөммүт, илиитинэн салгыҥҥа тугу эрэ суруйар. «Киириҥ!» диэхтэригэр диэри, сырыы аайы бэрэбинэлэриттэн ырааппакка, биирдэ эмэ көрсүһэр киэһэлэригэр ахтылҕаннарын таһаараллар. Аһаат, Махсыым сарсыарда эрдэлиирин иһин, ыга куустуһан, дьиэлэрин диэки бара тураллар.

Атын күннэргэ Махсыым, улахан сопхуос хаһан да бүппэт үлэтигэр сылдьан, дьиэтигэр көстүбэт: звеноҕа да оттоһон ылар, кээһии биригээдэтигэр кыдамаһыттыыр, ыраах отчуттарга ыһыктарын тиэрдэр, сороҕор агитбиригээдэҕэ кыттыһан отчуттары барыларын кэрийэллэр. Биитэр, дьиэлээн иһэн, массыыната бадарааҥҥа батыллан, отчут уолаттары ыҥыран, төһүүлээн-хайаан хостууллар, Биэрискэҕэ тиксиэхтээх бириэмэтин бараан кэбиһэр.

Биир сарсыарда турбуттара, Сахаараптар кыракый дьиэлэрин түннүгүн өҥөйө үүммүт баараҕай тиит лабааларын устун кытыгырас таммахтар куоталаһа, сүүрэкэлэһэ, күндү таас кэриэтэ мутукчаҕа ыйаастыбыт дьэҥкир оҕуруолар кэнчээригэ түһэн, сүтэн-иҥэн хаала тоһуйдулар. Сиппэрэҥ, силбик халлаан буолбут. Махсыым, оронугар олорон, түннүк нөҥүө бороҥ хартыынаны көрөөт, хомойон, сууллар мастыы лах гына сытынан кэбистэ.

– Оо! – аны Биэрискэ өҥдөҥнөөтө.

Куустуһан, сыппахтыы түстүлэр да, хайыахтарай, күннээҕи түбүктэрин санаан ойон турдулар. Арыы киириэхтээх, бэҕэһээҥҥиттэн тиэллэн бэлэм турар. Ньургуу оройуоҥҥа барыахтаах, Италиялыыр кэмэ субу ыган кэллэ. Биэрискэ ийэбэр сылдьарым буолуо диэн бэҕэһээ киилэлээх кырыыҥкаҕа сүөгэй сүүртэрэн ылбыта, киис тиҥилэҕэ кэһиитин бэлэмнээбитэ. Татыйыына ынахтарын ыан, үс киилэлээх култаҕар кырыыҥкаҕа субу сарсыарда ыаммыт үүтү хоппуруон хаппаҕынан хаппахтаан, ыраас маарыланан бөҕөргөтө баайан, бэлэмнээн туруорар буолуохтаах. Сааба кийиитэ ийэтигэр, күөлтэн хостоммутунан, лаһыгырас соболоох киирдин диэн илимин көрөн кэлбитэ буолуо. Атын күн эбитэ буоллар, үөрүө эбиттэр, оттон бүгүн хайаан да киириэххэ наада. Алдьаммыт суолунан өссө төһөҕө тиийиэхтэрэ биллибэт…

Хата, киирсэр киһи суох эбит. Биэрискэ сынтаҕар УАЗ-ик мотуорун хопуотугар оройунан массыына үрдүн анньан олордо. Ньургуу олбоххо – соҕотох. Килэрийбит, ньылбырыйбыт эрээри, суол уһун кураан кэннэ улаханнык хотторботох, тиийиэхтээх сирдэрин син бэркэ буллулар.

Биэрискэ ийэтэ дьиэҕэ баар эбит. Массыына киниэхэ тохтообут тыаһын истэн, күүлэтин түннүгүн түүлүн сэгэтэн, таһырдьаны өҥөҥнөөтө. «Үүрдэҕинэ, ханна эмэ булан хонор инибит» диэн эрэх-турах сананан, кыһалҕата суох курдук туттан, кынталдьыйан тиийэн, Биэрискэ төрөөбүт дьиэтин күүлэтин аанын арыйда. Махсыым бэйэтин наадаларыгар сылдьаары массыынатын бирилэппитинэн бара турда.

Кини киэһэлик кэлиитигэр ардах син биир түһэр-түспэт ибиирэр этэ. Аана оһоҕун кыратык оттубут, дьиэ сылааһынан, ас минньигэс сытынан саба биэрдэ. Дьиэлээхтэр сүргэлэрэ көтөҕүллүбүт, Махсыымы үөрэ көрүстүлэр. Аана бэйэтинэн күтүөтүгэр сабыс-саҥа таапачыка аҕалан биэрдэ. Дьиэ иһэ боруҥуй курдуга да, уоту холбообуттарыгар дууһа кытта чэпчээбиккэ, сандаарыйбыкка дылы буолла, хурустаал таас люстра күлүмүрдээн көһүннэ. Иллээх дьиэ кэргэн быһыытынан, толору астаах остуол тула олордулар. Эт, хаппыыста, хортуоска бэрэскилэрэ тус-туһунан өрөһөлөммүттэр. Оҕуруот аһыттан салаат, Махсыым урут хаһан да амсайбатах лечо диэн аһа, барыанньа арааһа кыра-кыра хурустаал иһиттэргэ ууруллубуттар, кыһыл көмүс дуйдаах ньуоскалар, биилкэлэр, хаптаҕай быһахтар хостоммуттар. Дьэрэкээн ойуулаах нэлэгэр тэриэлкэ үрдүгэр, эмиэ ол ханыыта буолан баран, хончоҕор иһит турар, онно Аана бэлимиэннээх миин кутан биэрдэ. Аһа барыта минньигэһин! Атын аһы ол нэлэгэр тэриэлкэҕэ ууран сиэниллэр эбит.

Дьахталлар ытаспыттар быһыылаах, харахтарын халтаһата хайдах эрэ испит курдук. Аана кыыһын сотору-сотору сыллаан ыларыттан сылыктаатахха, оҕотун ахтыбыт. Эдэр ыал хоноһолору хоннорор дьыбааҥҥа салгын сыттаах, кырахымааллаах, хачыгырас-суугунас, мап-маҥан өтүүктэммит таҥаска утуйдулар. Урут Биэрискэ ийэтинээн бииргэ икки киһи утуйар кэтит оронугар хоонньоһон сытар этэ. Махсыым, сылайбыт-аччыктаабыт киһи, тотон, сылааска сууланан, начаас буккураан хаалла. Биэрискэ биир хос чараас араамалаах түннүк нөҥүө иһиллэр түүҥҥү ардах тыаһыгар бигэнэн утуйда.

Түүн ардахтаах былыт баран хаалбыт. Сайыҥҥы эрдэһит күн уота куруһуба түүл, түннүккэ турар сибэккилэр быыстарынан киирэн, көстүүнэй хос сырдык эркинигэр кылбаарыччы анньыллыбыт мас саһархай сааһын килэбэчитэ оонньоото. Онтон уунан саба ыһыллыбыт курдук, килэгир кырааскалаах муостаттан тэйэн, хос иһин көмүс суһумунан сандаарытта.

Тугу эрэ гынан, сурдурҕаан-сырдырҕаан баран, утуйар хоһуттан Аана таҕыста, муоста биир хаптаһына иһиллэр-иһиллибэттик хаачыр гынна. Оҕолор дьыбааннарын таһыгар утуйа сытааччылары одуулаан турда. Дьиибэ дии, субу соторутааҕыга диэри бэйэтэ бас билэринэн дьаһайа сылдьыбыт кыыһа, бэйэлээх бэйэтин эт сорҕото, бэйэтиттэн хаһан даҕаны туспа санаан көрбөтөх оҕото, туора эр киһи хоонньугар сытар!

– Аа-айыкабын ньии! – саҥата улахан баҕайытык иһиллибититтэн бэйэтэ да соһуйда, куукунатыгар ааста. Утуйа сытааччылар ымыр да гымматылар, истибэтэҕэ буолан хаалбыттара эбитэ дуу…

Аана сып-сылаас индийскэй куоптатын кэтэн, күүлэ ойоҕоһун эркинин сырыһыннара туруоруллубут муус маҥан ыскамыайкатыгар олорон, сарсыардааҥҥы сигэриэтэтин иккини утуу-субуу тарта. Массыына эргэ шинатыттан тэлиллибит уонна араҕас кыраасканан дьэрэкээнник сотуллубут кулуумбаларыгар араас сибэккилэри олордуталаабытын, бөлүүҥҥү ардах сууйан-тараан сотон ааспыт, кылабачыһан, сэргэхсийэн тураллар. Билигин күн манна тыга илик эрээри, субу сотору күүлэ муннугуттан күлүмнээбитинэн тахсан кэлиэ. Табаҕын минньигэс буруотун салгыҥҥа үрэ-үрэ, Аана хас эмэ хонуктааҕыта түһээбит түүлүн саныы олордо.

…Төрөппүттэрин алааһа. Балаҕан халҕана аһаҕас, туруорбах эркиҥҥэ тиэрэ сытар. Киирбитэ – ийэлээх аҕата иккиэн бааллар, оһохторун иннигэр олороллор. Аҕата саҥата суох кыыһыгар сапсыйан аһаҕас аан диэки көр диэн ыйда. Аана аһаҕас аанынан көрбүтэ, арай балаҕан иннигэр күтүөтэ уонна кыыһа сүрдээх үрдүк, уһун да уһун, эмиэ да кэтит, күп-күөх оту кээһэ сылдьаллар. Кыыһа күлэр саҥата иһиллэр. «Хаһан да көрбөтөх сиэннэрин хантан билэллэрий» дии саныыр. Аҕата тугу эрэ кэпсиир, мөҕөр курдук. Ийэтэ эмиэ тугу эрэ эттэ да, Аана уһуктаат, умнан кэбистэ. Субу күҥҥэ диэри саныы сатыыр да, букатын өйдөөбөт…

Күтүөт тахсан үргүлдьү тиэргэн таһыгар турар мас- сыынатыгар ааста, Биэрискэтэ күн уотугар сандаарыйар сахсархай баттаҕын ытыһынан баттыы-баттыы, кэтэҕигэр чөмөхтөөн, туттара сатыы турар эбит. Күҥҥэ сирэйин тоһуйан турарын көрөн, Аана сүрэҕин сылаас долгун хамсатта: «Ии, тытааҕым оото!» – диэн кыыһа хаһан да дьиэтиттэн тахсан барбатаҕын курдук хаамыталыы сылдьарыттан манньыйа сылаанньыйда.

Үгүс элбэх саҥата суох сарсыардааҥҥыларын чэйдээтилэр. Аана бэйэтэ бэлэмнээбит оҕуруотун аһын арааһыттан улахан-кыра кырыыҥкалары суумкаҕа ыгыччы хаалаата. Туспа суумкаҕа бэрэскилэри укта, кыыһын сыллаан ылла, оҕолор тахсан бардылар. Сибилигин дьонунан туолан сэргэхсийбит дьиэ эмиэ кураанахсыйан, кэҥээн хаалла. Эр киһи сыта урут иҥмэтэх дьиэтигэр, саҥа олохтоох баар буолбутун туоһулаан, таҥас ыйыыр ыскаап таһыгар эр киһи суппуун таапачыката сытан хаалла. Соҕотохсуйбутун тулуйбата. Аана төлөпүөннээн, ыаллыы олорор эмиэ аҥаардас дьүөгэтин ыҥырда. Халадыынньыгыттан ханньаах бытыылкатын ойутан таһаарда, сүүтүк саҕа көмүс үрүүмкэҕэ толору куттан, «кылк» гыннаран кэбистэ…

Үөрэх дьыла ортолоон эрэр. Биэрискэ Розалия Тимофеевналыын сыһыаннара тупса илик, эбии сэтэрииргэ дылы. Розалия уруу малааһыныгар ыҥырбата диирэ дуу. Эдэрдэр сыбаайбалаабаппыт диэбиттэрин үрдүнэн, икки өттүттэн уруулар көрсөн-булсан, бэйэлэрэ сүүрэн-көтөн, тэрийэн кэбиспиттэр этэ. Эдэрдэр бэйэлэрэ ыҥырыылаах ыалдьыт курдук буолар күнүгэр эрэ тиийбиттэрэ, доҕотторун-атастарын да ыҥырымына хаалбыттара, аҕыйах киһиэхэ тылынан эппиттэрин, син истиһэн кэлбиттэр этэ. Сэбиэккэ саахсаланааттарын кытта, кырдьык-хордьук, саарыктардаах массыынаҕа тоһуйан, кэтэһэн турар бэлэм остуолга олордубуттара.

Уруу киэһэтэ уһаабыта, ааһа баран, олус табыллыбыта. Ас арааһа, эгэлгэтэ элбэҕэ, эппиккэ дылы, чыычаах эрэ үүтэ суоҕа. Көрдөөх Көстөкүүнү тамадаалаппыттар, дьону быардара быстыар диэри күллэртээбитэ, кэлин Көстөкүүн сөмүйэтин көрдөрдөҕүнэ кытта ньиргиһэ түһэр буолбуттара. Хайа да өттүттэн аймахтарга ырыаһыттар бааллара киэһэни наһаа киэргэппитэ. Дьиэҕэ-уокка наадалаах бэлэх бөҕөтүн биэрбиттэрэ, Махсыым дьоно ыанар ынаҕы кытары бэлэхтиибит диэбиттэрэ. Онуоха Аана, дьиэ іґүітүн үрүҥүнэн-харанан көрө-көрө, дьон истэрин курдук, саҥа таһааран үөһэ тыыммытыгар аттыгар олорор Сөдүөрэ ойоҕоско тоҥолохтоото. Орто холуочук Аана омуннаахтык соһуйбута буолла.

Дьон үксэ итириэ эбит да, өйдөөх Сөдүөрэ арыгыны элбэхтик ылларбатаҕа. Олох да арыгыта суох «сухуой» гыныаҕын, бары аймахтар ким кыратык, ким элбэхтик иһэллэр этэ. Арыгылара оруобуна сөпкө бүтэн хаалбыта, итирик-кутурук суоҕа, сүргэ көтөҕүллэрин эрэ курдук испиттэрэ. Чэ, туох да диэбиттэрин иһин, бэртээхэй малааһын ааспыта. Бары астыммыттара. Биэрискэ таах суолталаабакка, дьон курдук саҥа маҥан былаачыйа кэппэтэҕим хомолтолоох эбит дии санаабыта.

Розалия Тимофеевна, уруккута борокуруор ойоҕо, бэйэтэ үөрэх салаатыгар хотун этэ. Эрэ бүөр ыарыһах буолан, саастарын ситэ бииргэ олорботохторо. Кырдьар сааһыгар сынньалаҥнык сылдьаары, төрөөбүт дойдутугар, Чуурайга тахсан олорбута ырааппыт этэ. Улахан кыыһа быраас, күтүөтэ райсэбиэккэ кыра тойон. Уола эмиэ туох эрэ тойон, куоракка олорор. Кыра кыыһа соҕуруу юрист үөрэҕин бүтэрэн, хотугу улууска кэпсэтиинэн судьуйалыы барбыт кэмэ этэ.

Үйэтигэр хотумсуйа үөрэммит, өрүү салайар үлэҕэ сылдьыбыт сааһырбыт дьахтары эмээхсин диэҕи, киһи тыла тахсыбат. Розалия билигин да толуу-мааны көрүҥнээх, уостара-иэдэстэрэ уола илик, харахтарын өҥө кубарыйбыт курдук эрээрилэр, сытыы уоттаахтар. Бэл, баттаҕын кырааскалана илик, маҥхайан эрэр сүүмэхтэр онон-манан кыратык көстөллөр. Кини Биэрискэ уруутугар ыҥырбытын да иһин сылдьыбат. Төһө да Чуурай буолбуттарын иһин, уруккута сопхуос суоппара дөйбүт курдук саҥата суох Сааба кини эргимтэтэ буолбатах. Розалия колхуостааһын саҕана кулаахтаммыт Чуурай сис баайын сиэнэ. Оччотооҕуга кистэнэн хаалбыт сундууктар билигин да ампаарга тураллар, былыргы таҥас-сап, көмүс иһит, тэллэх саҕа Экэтириинэ кумааҕы эбилигээссийэлэрэ, сахалыы кутуу симэхтэр билигин да симиллэн сыталлар…

Арай Саабалаах кийииттэрэ кыыс… Вера аҕатын аата төһө да Петровна буолбутун иһин, хараҕа, төбөтүн кыҥначчы туттан олороро, сахсархай баттаҕа кытары, кини кыра кыыһыгар наһаа даҕаны майгынныыр. Күнүү уонна кини арахсыспат ханыыта – абааһы көрүү, ыарахан уртуут халкыҥныырын курдук, дууһа иһигэр үөскүүр сиикэй бааһы дьалкыҥнаатаҕын аайы кэҥэттэр кэҥэтэн иһэр, дууһаны харааччы сиир, хаҕын эрэ хаалларар…

Ити кыыһы Розалия төрөөбүт Чуурайыттан хайдах да үтэйбэт буолла. Саатар, Сэмэнэптэр сүөһүлэрин-сылгыларын барытын эһэн туран, Аммаҕа улахан кыыстарыгар көстүлэр. Кинилэр саҥатык тутуу дьиэлэрин Саабалаах уолларыгар ылан биэрдилэр. Үлэтиттэн үүрдэриэ эбит да, кыыс туох да киһи баайсыах айылаах дьиэгэ суох, саамай үчүгэй ахсааҥҥа киирсэр учуутал. Ол иһин сыппах быһаҕынан сыарҕа быатын аалан, кыыһы ахсарбатаҕа, кини диэки көрбөтөҕө буола сатыыр.

Айаҕалыы сатаан, кыра сылтах булан, Розалия Тимофеевна кыыс ийэтигэр тиийэ сырытта. Киирээт, сүрэҕэ мөҕүл гынна. Мап-маҥан испиэскэлээх улахан оһох оттуллан, ураата күүскэ тардан сирилэтэ турара. Маннык сылаас, киһи эрэ кута-сүрэ тохтуох ыраас, мааны, минньигэс сыттаах дьиэҕэ кини эрэ буолуохсут аараан, сынньанан ааспыт буолуон сөрү-сөп эбит. Оччотооҕуга Розалия, салайар үлэ үөһүгэр сылдьар дьахтар, хайдах барытын саба тутуоҕай – дьиэтин иһэ күөрэ-лаҥкы, кир-хох этэ. Эрэ «кэп дьэбэргин» диэтэҕинэ, «дьыалабыай бэспэрээдэк» диэн куотунааччы. Оҕолорун ыһыытаан-хаһыытаан, син кэмиттэн кэмигэр дьиэни хомуйтарар этэ. Билигин даҕаны, сынньалаҥнык да олордор, үөрүйэҕинэн, боруҥуй дьиэтигэр болҕомтотун уурбат, түннүктэрэ быыллаах халыҥ сабыынан өрүү саба тардыллан тураллар, ыалдьыт киниэхэ уруккуттан мустубат. Кинини төрдүттэн билэр, бииргэ улааппыт дьүөгэлэрэ биирдэ эмэ үктэнэллэр. Ас хооруммут хобордооҕун бастаан дьиэҕэ сытар тэллэх ытыгар салатан баран сууйарын, иһит сууйбут уутунан муостатын кытта сотон ыларын туһунан бэйэ ыккардыгар дьүөгэлэрэ хобугунаһаллар.

Оттон бу маннык куукула дьиэтэ дьиэлээх, тугу да быһаарбат, хадьардаспат акаары дьахтарга кини эрэ төһөлөөх таалалаата, кутун-сүрүн сымнатта буолла! Эр дьоҥҥо маннык наада эбээт! Ханна эрэ эркиҥҥэ, баҕар, хаартыската сыстан турара буолуо диэн, дьиэни бүтүннүү кэрийэн, тиҥсирийэ сатаата, тугу да булбата. Акаары дьахтар саатар таҥараҕа үҥэр эбит, утуйар хоһун муннугар уоттаах-күөстээх таҥара долбуура турар… «Оо… тугун бэрдэй дьиэҥ! Дьиҥнээх дьахтар эбиккин» эҥин диэн ньылбаарыҥнаан баран:

– Кыыһыҥ аҕата кимий? – диэн кэмэ кэллэ дии санаатаҕа, соругун туоһуласта.

Аана кыыһа үлэлиир оскуолатын дириэктэрэ, эмээхсин диэҕи, аһары кырдьыбыта биллибэт дьахтар, туох наадалаах кэлбитин дьэ таайда.

– Ээ, ол иһин даҕаны, киһини соһуттуҥ, дьиэбин түгэҕиттэн өрө сүргэйдиҥ дии. Суох-суох, эн эргин иирдибэтэҕим, оҕом аҕата атын киһи!

– Хантан биллиҥ, мин киммин уонна эрим кимин? – Розалия итэҕэйбэтэ.

– Хайдах билиэм суоҕай, оройуонум баар-суох тойотторун-хотуттарын?

– Эт, оччоҕуна, оҕоҥ аҕата кимин уонна хаартыскатын көрдөр!

Маныаха Аана өһүргэннэ.

– Өс-сөө! Көр да маны, сэнээбитин! Эн эриҥ буолбатах диэтим дии!

Розалия Тимофеевна дьиҥнээх сирэйин, дьэ, көрдөрдө:

– Кыыскын мин дойдубуттан хомуй! Иккиэн өрө барар буоллаххытына, бэйэҕиттэн хоргутаайаҕын! Куһаҕан буолуо!

– Атаҕастаабытын-сэнээбитин көр! Тохтууруҥ буолуо! Буруйа суох оҕоҕо өс-саас туппут буола-буола! Үтүөлээх учуутал! Оҕолору туохха үөрэтэҕин! Тугуй, ити дуо, үтүөҥ?

– Эппэтэҕэ диэйэҕин! С-сэрэн! – тииһин быыһынан сыыгынаары, уоһун ырдьах гыммытыгар, адьырҕа араҕас анаҕаһа килбэйэргэ дылы гынна… Мутук үүтүн курдук туран хаалбыт харахтара дьөлө көрдүлэр. Сирэйин тириитэ мырчыһынна, муннун аннын ньуолах түүлэрэ ибигирэстилэр.

Аана лаппа салынна. Суоһар ыалдьыта тахсан бараатын, ойон туран, бордууһунатын бүөтүн тоҕо тарта, таһырдьаттан ахсынньы аам-даам тумана будулуйда, аанын балайда өр арыйан турда. Талах миинньигинэн салгыны сууралаата, онтон дьиэтин хоһун түгэҕиттэн саҕалаан сиппийэн, сылдьыбыт киһи суолун аан айаҕар аҕалла, бөх баһары ылан кус кынатынан харбаан ылан, уулуссаҕа таһааран тэбээтэ. Утуйар хоһугар өр соҕус буолан баран таҕыста, нуучча таҥаратыгар үҥкпүтүттэн астыммата быһыылаах, аны оһоҕун хаппаҕын арыйан, ботугуруу-ботугуруу, эһэкээнигэр арыылаах ас кээстэ. Оһоҕун чоҕун сылааһыгар угуттанан, кыракый олоппоско олорон сыламнаан ылла. Ойон туран, сытырҕыы-сытырҕыы дьиэтин кэрийдэ. Киирэн тахсыбыт мааны дьахтар биллэ-биллибэт ыыспа сыттаах этэ, онуоха эбии хоп-хойуу духуу – хата салгылаабыт. Биллибэт!

Сээн дэтэн, Биэрискэлээх ийэлэригэр сотору-сотору кэлэллэр-бараллар. Уруу малааһынын кэннэ, Махсыым соҕотоҕун да киирдэҕинэ, сылдьан, маанылатан ааһар буолла. Аана, оһох оттуллар кэмэ аастаҕына, сайын Чуурайга бара сылдьыахтаах. Оҕолор сырыттахтарын аайы кини сиэргэ-туомҥа такайар идэлэннэ. «Итинник гыныҥ, маннык туттуҥ» диир буолла.

Кыһыл көмүс сыапачкалаах туох эрэ мөһөөччүгү кыыһыгар биэрбитэ. Биэрискэ дьиэтигэр тиийэн арыйан көрбүтэ, иһигэр баара-суоҕа кыһыл сабынан холбуу баайыллыбыт, туох эрэ көтөр түүлэрэ куобах тириитин лоскуйугар испиниэгинэн хам туттарыллан сылдьара. Хайаан даҕаны, эккиттэн араарбакка моонньугар кэтээр диэбитэ да, кыыс мөһөөччүгүн оройуоҥҥа киирэригэр кэтэрэ маҥнай, онтон олох да умнууга хаалан, сүтэрэн кэбиспитэ.

Аана урууга киирбит мал-сал дьиэ харысхала буолар диирэ.

– Онон, истэҕит дуо, хайаан даҕаны, хаһан даҕаны мээнэ быраҕымаҥ, дьоҥҥо биэримэҥ, уларсымаҥ, дьоҥҥо хос бэлэхтээмэҥ! Уопсайынан, бэлэҕи-туһаҕы билбэт киһигититтэн ылымаҥ, оһуоба оскуолаттан бадаарагы ылбат буол! Дьон мээнэҕэ бэлэҕи туһах диэн эбэн эппэт, билэн диир. Ким эмэ тыл этэн баран бэлэхтээбитин хантан билиэххитий? Бэлэх ылан эрэр киһи үөрэн, сэгэйэн биэрэр, көмүскэлэ ыһыллар.

– Оччоҕуна быраҕан кэбиһэбит дуо, арай наһаа үчүгэй бэлэх буоллун? – Биэрискэ ийэтин саҥатын үрдүнэн-аннынан истэр.

– Бастаан бэлэҕи суутун сүөрбэккэ, хаатын арыйбакка, мээнэ туппахтаабакка эрэ чүмэчини уматан баран, бэлэх үрдүнэн тутан көрөҕүн. Чүмэчиҥ уота тыһыргыыр, хоруонан буруолуур буоллаҕына, куһаҕан бэлэх! Сүүрүктээх ууга илдьэн, быраҕан кэбис! Ордук түүлээх бэлэх сэрэхтээх, түүлээх оонньуур, ыт-куоска, ол-бу кыыл.

– Оо, дьэ, маамаа! Тугуй, куоска муҥнааҕы эмиэ ууга быраҕабыт дуо? Эчи сүрүн!

– Ийэҥ тылын иһит! Эйиэхэ уонна ким даҕаны итинник сүбэлиэ суоҕа!

Махсыым дьоно аах бэлэхтээбит ынахтарын Биэрискэлээх ылбаппыт диир кыахтара суоҕа… Биир үтүө күн, сайын саҕаланыыта, Татыйыына тарбыйахтаах, кугас эриэн эдэр ынаҕы сиэтэн аҕалан, тиэргэн иһигэр уган кэбиспитэ. Кийиитин төгүрүйбүт харахтарын аахайбатаҕа буолан, мичээрдээтэ:

– Махсыым, бу хотонуҥ иһигэр туох эмэ ититэри холбоон, сылыппыта буолан, уораанын таһаар уонна сүөһүлэргин киллэрэн баайан хоннороор! Сарсыарда кэлэн ыаҕым!

Сарсыарда аҕыс саҕана, саамай минньигэс ууларын утуйа сыттахтарына, Татыйыына, дэриэбинэ биир баһыттан кэлэн, күүлэлэрин аанын тоҥсуйан лыбыгыратта. Махсыым сурдурҕаан тахсан арыйда. Татыйыына оронуттан тура да илик кийиитигэр тиийэн, сирэйин өҥөйдө:

– Чэ, Биэрискэ, улахан баайдаах хотун, утуйбута буола сытыаҥ дуо, тур! Тахсан, ынахпыт барахсаны ыахха! – уонна куукунаҕа тиийэн, ынах ыырга сөптөөх иһити көрдөөн, тыаһаата-ууһаата.

Биэрискэ бэйэтин ийэтэ эбитэ буоллар, «Маамаа, ама хайаан, арах!» диэ эбитэ буолуо. Оттон билигин уһукта илик харахтарын аалынна, төттөрү сытан хаалбыт эригэр атаахтыырдыы үҥсэргээн көрдө, кыһыытыгар тап гыннарда. Хайыай, быстыа-ойдуо дуо, тахсан барда. Махсыым кэнниттэн «һы-һык» диэн күлэ хаалла, оҥосто-оҥосто утуйбута буолла.

Биэрискэ сайыҥҥы сарапаанын таһынан халаат булан кэттэ. Хотоҥҥо тиийбитэ, Татыйыына ынаҕын бөлүүҥҥү сааҕын Сэмиэнэптэртэн хаалбыт, урукку лааҕа хоҥнубут, эргэ улахан тааска чохчолообут. «Улахан баайа» атын киһиэхэ баай буоллум диэн билбэт быһыылаах, саҥа иччитин диэки көрбөтө даҕаны, ыаһы ыстыыр курдук, кэбинэн ньэлбэҥниир.

– Тоойуом, бу маны Махсыымҥар дьаһайтараар. Киһигин сытыарыма, көмөлөһүннэрэн, хамсатан ис! Ол эрээри хотон ис үлэтин барытын сэлээннээмэ, хотоҥҥо киллэрбэккэ буола сатаа. Эр киһи чуукур хотоҥҥо киирэн хааллаҕына, аһааҕырар, ыалдьар. Хотон сытын тулуйбат, эр киһиэхэ сөбө суох. Кыайбат, ыарахан үлэҕин үлэлэтээр. Урут ынах ыы сылдьыбыттааҕыҥ дуо?

Биэрискэ төбөтүн быһа илгиһиннэ. Түүҥҥү түүл дуу диэх курдук санаан, туораттан көрөн турда. Татыйыына «кэл» диэбитигэр соһуйда даҕаны.

– Мин ынахтан хаһыытыы-хаһыытыы куота сылдьааччыбын ээ! Наһаа куттанабын!

– Хайа, куттаммаккаҕын! Киһи эрэ маҥнай куттанар, ол сөп. Начаас үөрэниэҥ, сүөһү барахсаны сыллыы сылдьар буолуоҥ.

– Мин?!

– Эн, тоойуом, эн. Чэ, кэл, олоруох. Хаһан эмэ саҕалыахтаах буоллаҕыҥ… Сүөһүттэн сиргэнимэ да, куттаныма да, тоойуом. Сахаҕа сүөһүтэ диэн улуу баайа! Билигин аанньа ахтыллыбатаҕын иннигэр, оннук диир кэмнэрэ кэлиэҕэ. Ким барыта, бэл кумааҕылаах-хаалтыстаах даҕаны киһи, аһыыр айахтаах. Аны, оҥойор айаҕар минньигэс, дьиҥнээх айылҕа аһын сиэн баҕарар. Өссө да кэлиэ-э кэм… Онон, тыытааҕым окоото, сыста сатаа, сүөһү диэн аанньал, хайдах эмэ сыста сатаа… – Татыйыына саҥара олорон биэдэрэтин ортотугар диэри ыан күөгэҥнэттэ. – Бу… Бу!.. Маннык тутан ыыгын. Маннык эмиэ ыыгын, хайата сатанарынан! Чэ, аны эн!

Биэрискэ Татыйыына таһыгар олорон, баччааҥҥа диэри олорбут үйэтигэр аан бастаан ынах эмиийин тардан көрдө. Соһуйуон иһин, ынах эмиийиттэн эмискэ үүт өрө тыган таҕыста! Мээнэ тардыбыт буолан, үүтэ ханна эрэ туора халыйда.

– Күүскэ, күүскэ тутан тарт!

– Ыалдьыа суоҕа дуо?

– Суох, сыллыый, ыалдьыбат. Солууруҥ диэки туһаай.

Биэрискэ Татыйыына хамсанарын үтүктэн, икки илиитинэн туппахтаан, кырдьык-хордьук ыан барда.