Читать книгу Святой Сергий - Группа авторов - Страница 22

Но́вую благода́ть показа́ всех Творе́ц и Влады́ка тебе́, богому́дре Се́ргие: а́ще бо и у́мерл еси́ на земли́ пло́тию, но душе́ю в вы́шнем селе́нии всегда́ жив сый, мно́гая и пресла́вная чудеса́ в ми́ре живу́щим лю́дем де́йствуеши, и те́плым твои́м хода́тайством посо́бствуеши, вопию́щим к тебе́ такова́я:

Ра́дуйся, де́вственниче душе́ю и те́лом; ра́дуйся, ино́ком наста́вниче преди́вный.

Ра́дуйся, душ на́ших ра́дование; ра́дуйся, бы́строе ни́щим услы́шание.

Ра́дуйся, скорбя́щим прия́тное попече́ние; ра́дуйся, чистоты́ усе́рдный храни́телю.

Ра́дуйся, ненаде́жным наде́яние; ра́дуйся, всея́ Росси́и увеселе́ние.

Ра́дуйся, дре́во чудото́чное рая́ Иису́сова; ра́дуйся, кри́не ра́йскаго прозябе́ния.

Ра́дуйся, ми́ро Христо́ва благоуха́ния; ра́дуйся, я́ко тобо́ю приноси́тся ра́дование.

Ра́дуйся, Се́ргие, ско́рый помо́щниче и пресла́вный чудотво́рче.