Читать книгу Kindheit und Jugend ohne Computer und Handy - Günter Eder - Страница 4

Ih hoaß Ginda Eda und bih z`Minga drom en siebzehndn June neinzeahundaddreiaviazage um viare e da Fria auf d`Weyd kema drum bih e a a echda Mingara, da bih e a schdoez drauf.

Z Minga, da bih e a na daufd woan. Des wah eigandle a goa koa Broblem ned gwen. Des Schlimme bei dera Sach, des wah bloß, das e fasd an Nam griagd hed, dea wo ma beschdimd iwahaubd ned gfoen hed, da bih a ma heid oewei na ganz siha.

Mei Daufpadden des is d`Tande Ane gwen, des wa p`Frau von Ongl Badl, de woed umbedigt das me d`Mudde Ginda Xeaxes daufa loßn soed. Gott sei Dank had se d`Mudde duachgsezd drum hoas e iadz Ginda Odma. Den Nam Odma den ha e a blos desweng griagd wei mei echda Vadda a Odma ghoaßn had. Mia seywa mia gfoed dea Nam Odma a ned dea is awa oewei na bessa oes wia Xeaxes. Oes a gloans Kind kahsd nix dageng doa wos da d`Eydan fia ran Nam gemd und schbeda nidz ds da a nix meha wenn sd de beschweasd, da is hoed nix z moha. Kinz enk es viaschdeyn das ih oes echda Baya, Ginda Xeaxes hoaßad, des kannd a ga koa Mensch ned aushoedn.

Des mid mein Gebuadsdag, des is a ganz a bsundane Gschichd

Gwen. Dea Dag is e de fuchzga Jahr zon Dag da Deitschn Einheid eagläad woan. Des wa zwengs da Osdzone, wei da drend d`Leid gega d`Rußn aufgschdandn hand. Des wa nadiale a riesn Gligg fia mih, wei e da oewei Schuefrei und schbeda dann a na oawatsfrei ghad ha. Des is scha schee we ma an sein Gebuatsdag an Feiadag had. Awa iagnd oana had ma des ned vagund, wei s den Dag schbeda leida wieda agschaffd und af n driddn Ogdowa valegd hamd. Des is damoes nach da deidschn Wiedavaeinegung gwen, da is d`Osdzone af Wesddeidschland wieda zrugg kema. Voan zwoadn Weydgrieag da had des a oes zamm ghead, neinaachzge is s dann a wieda ra so woan wia s friaras gwen is.

Neizehahundadneinaachzge, da hand z`Dresdn oewei wenn s finsda woan is, ganz vey Leid mid Kiatzn af d`Schdraß auße ganga und hamd demostriead wei s eah iwahaubd nimma basd had wos bei eah e da DDR drend de Bolidega oes a so driem hamd und wiea s da zuaganga is.

De Leid de wo da drendn gwond hamd, de hamd iwahaubd koa richdege Freiheid ned khad. De hamd a ned iwaroe da hie fahn deafa wos meng heddn. De hamd bloß da hie fahn defa wo s Bolidiga ealaubd hamd. Zo uns hamd s scha glei ganed uma deafa. Wenn des oana brawiead had, da ha da a Glick ham miaßn daß sn ned glei eigschbiad oda daschoßn hamd.

Ih ka me na ganz guad dra erinnan, wiea ma mei Frau und ih neizeahhundadfümfaachzge z`Ungan en Ualaub drund gwen hand, da hama zwoa Familien kena gleand. Des hand ganz nedde Leid gwen, de hamd uns fia s nexde Jahr soga zo eah af Karl-Marx-Schdad ume eiglond. Mia hama ja sunsd na niea da drend gwen weis uns a ga ned ei loßn heddn. Wiea ma da drend gwen hand, da hama easchd amoe richde gseng wos da drend eigandle oes a so lous gwen is. Ganz vey Heisa und a de meisdn Schdraßn hand kabudd gwen, des wa scha draure.

Fia de meisdn Leid da is de Wiedavaeinegung scha a rechd a grouße Freid gwen. Da hamd olle rußeschn Soedadn wieda af Rußland ae hoam miaßn und de Leid vo da Osdzone drend, de hamd a wieda iwaroe hie fahn deafa, wo s grad hie woedn. Fia mih wa de Wiedavaeinegung a a riesn Freid, awa daß s den Feiadag, dea wo mei Gebuadsdag gwen is valegd hamd des wa scha rechd schad. Da kasd hoed iwahaubd nix moha gega de groußn da drom. Iadz bih e awa ganz schee weid fiare kema e da Zeid, awa mei, de Bolidega, de hamd ma mein peasönlechn Feiadag eimfach gschdrieha. An Feiadag ha e iadz nimma, awa wenexdns hoase Ginda und ned Xeaxes.

Wei e hoed scha amoe da gwen bih und z`Minga z`wengsdn Griag des Lem a ned recht gsund gwen is, had me Mudde zon Dragna af Weilheim e Pflege ei bracht. Des wand recht brave Leid, ih woas nimma genau wia lang das e bei de dot gwen bih. Ih glaub des miaßadn a soa oa, oanahoeb Joah gwen sei, wei a me dunkl dra erinnan ka das e damoes scha laufa ha kina, sunsd hede en Dragna ned oewei, wenn a vo da Oawad hoam kema is, d`Bandoffe bringa kina, da dra ha a me oes gloana Bua schbeda oewei na erinnan kina. D`Mudde had ma gsagd das e scha mid oan Joah laufa ha kina, dem nach wa des ganze dann scha um a`ra neizehahundadvieraviazge umanand. Wia e d`Mudde amoe gfragd ha wo des mid de Bandoffe gwen sei kannd, da had s ma gsagd das des bein Dragna z`Weilheim drin gwen is, sunsd dad e des vo seywa heid a ganimma wißn.

En Friajoah neinzeahundadfümfaviazge, da is ds`Deidschland na Griag gwen, des had ma d`Mudde schbeda amoe vozeyd da had s me vo Weilheim a`ghoed und is mid mia zeaschd amoe af Minga e d Hoenzollanschdraß zo da Tande Ane eine gfahn.

Hie und da had me Tande Ane oda d`Mudde af a moe baggd, da hand s dann mid mia von fimdn Schdog, da wo Tande Ane gwond had, iwa Drebbm en Kella ae grennd. Da hand dann scha oewei mehra Leid drund gwen zo de hama uns dann a na ei druggd. Da had dann Tande Ane ofd amoe laud gschimpfd, geds hoed a bissl af Zeidn, segd s leichd ned das ma mia an gloan Buam dabei hamd. En Kella hama oewei dann ae miaßn wenn ma z`Siarenen ghead had, des had khoaßn das wieda amoe p`Fliaga mid ehrane Bombm dahea kemand und daß s wieda ra moe saugfeale wiead.

Iagndwan amoe, wia ma von Kella wieda e d`Wohnung aufe kema hand is oese kabud gwen. Des Haus e den wo ma bei da Tande Ane gwohnd hamd, des had a Bombm droffa, a so daß bein Dach eina grengd had und Mewe wand a olle kabud.

Wei Tande Ane en Haus ganz om gwohnd had und des ganze Dach hie gwen is, had ma vo iharana Wohnung aus en Himme aufe schau kina. Da had d`Tande Anne gsagd, iatz miaß ma hoam foan, da kima iadz nimma bleim. Da ha ma dann olle midanand glei mid n Zug af Hoslbach en Boareschn Woed ei gfoahn. D`Tande Ane, de is a z`Hoslbach dahoam gwen, des wa d`Dochda von Oba und vo da Oma.

Z`Hoslbach da is d`Mudde af d`Weyd kema, drum hamd dodn a na oewei Vowande vo iha glebd. En Boareschn Woed, da bih e schbeda a na recht gean drin gwen. Da wa e fasd oewei bein Ongl und bei da Tande vo da Mudde. Ih glaub d`Oma is d`Schwesda vo da Mudde iharana Muada gwen. Fia mih hand des schbeda dann oewei da Oba und d`Oma gwen. A so had d`Mudde ja a koa Vawande nima khad. Es ka a sei daß sa se volaungd oda a gschamd hamd wei s mih scha oesa junge oes ledegs Kind griagd had. Mei Vadda dea is z`Rußland en Griag gwen, da had ma dann af oamoe iwahaubd nix mehr vo eahm ghead. D`Mudde had gsagd, der is vomißd, drum hand s a nimma zon heiradn zamm kema. D`Mudde had mein Vadda na ganz lang iwa s Roude Greiz suaha lossn, awa oewei hads ghoaßn, dea is z`Rußland vomißd und is ned zon finden.

D`Mudde is a scha a ledegs Kind gwen. Ihara Muada, de wo mei Oma gwen wah, de had se wia d`Mudde easchd segs Joah oed gwen is umbrachd. Desweng is d`Mudde a scha mid ara achzea Joah af Minga aufe. Z`Hoslbach da hamd iha vey Leid s`Lem ganz schee schwa gmochd wei sie a ledegs Kind gwen is. Frira wa des bsondas bei de Leid af n Land drauß a grouße Schand wenn a ledege Frau a Kind griagd had. Damoes hamd D`Leid olle recht scheinheile und bigodesch da und hand e d`Kiaha hie grennd, awa sunsd wand s lang ned so brav wiea s ausschau hed soen. Heid, da iß s ja a efda na a so, da brauch ma uns iwahaubd nix via moha.

Vo damoes hae na lang oewei a boa so Beydl en Kopf drin ghad, des is a scha ganz schee lang hea und ih bih a damoes na ganz gloa gwen. Z`Hoslbach drin, da hamd iagndwan amoe olle Leid aus eharane Heisa und von Doaf außa miaßn und hamd se iagndwo voschdegga miaßn. D`Leid hand olle grennd und hamd duachanand gschrian. D`Mudde had mih auf d`Oam gnuma und is mid mia dava glaufa, d`Tande Anne, de had mei Kindawagl gschom, da hamd s fia mih a Bedzeig eidah khad. D`Oma und da Oba und a na mehra andane Leid hand damoes olle aus n Doaf außa und af n Hoslbeag aufe grennd.

Igndwo en Hoslbeag drom, zwischn de Feyda hand so Boschn und Bam gschdandn und dazwischn da hand so ganz grouße Schdoana gleng, da ha ma dann blim. D`Mudde und d`Tande Anne hamd de Bedda de wo en Kindawagl drin gwen hand af n Bon hie glegd und ih hed da drin dann schlofa soen. Des is awa ned ganga wei vey Leid da gwen hand de wo de ganze Zeid midanand gred hamd. A boa so Mana e anana Unefoam hand a da gwen, ih ha gmoad das des Feiawehamana hand. Schbeda wia e scha a bißl eyda gwen bih ha e d`Mudde amoe gfragd wos damoes z`Hoslbach drin lous gwen is, da had s ma dann oese vozeyhd.

Da had s af amoe an Alarm mid Siarenen gem, genau a so wiea s z`Minga drom gwen is. Z`wengs den Alarm hand olle Leid von Doaf aus eharane Heisa dava grennd und woednd se iagndwo voschdegga. Es hed ganz leichd sei kina, daß s genau a so wia z`Minga drom, a z`Hoslbach veleichd a Bombm awa schmeißn woeddn. D`Mudde had ma ezeyd das d`Leid von Doaf voahea scha ausgmochd hamd wos s doand wenn s an Bombmalarm gibd. D`Mudde had gsagd das des oese baßiead is wiea da Griag scha fasd aus gwen is. Wei de amerekaneschn Soedadn af Grafenau und af Schembeag kema hand, hand olle deidschn Soedadn af Bassa aezua dava glaufa.

Oa so a ganz a damescha, fanadescha, deidscha Soedad had damoes z`Haus drom na amoe af Schemberg zo de Amerekana ume gschossn. Des hamd se awa d`Ame de wo d`Schembeag drom gwen hand ned gfoen lossn und hamd mid eahrane Kanonen af Hoslbach und af Haus eina, zrugg gschoßn.

Des Ganze wa a da Grund warum olle Leid aus n Doaf außa und en Schdoabruch en Hoslbeag aufe dava rena hamd miaßn. De Mana, wo e damoes gmoad ha daß s vo da Feiaweha hand, des hand Soedadn gwen, de wo grad en Ualaub dahoam gwen hand. Sunsd is nix bassiad had ma d`Mudde gsagd, koa Leid hand a ned ums Lem kema und kabud is damoes a ned fey ganga, bei aon Bauan da is blos s`Dach a bißl kabudd gwen. D`Frau vo oan Bauan, de is ned mid eham und mid de andan Leid en Schdoabruch auße dava grennd. De had se damoes e deara Zeid wo de andan ned da gwen hand umbrachd. De had se mid an Messa seywa Guagl agschnin.

Vo da weg is z`Hoslbach a nix mea bassiad wos mid n Griag z`doa khad hed. Bloß da Ongl Max, den wo e easchd oamoe bein Oba und bei da Oma gseng ghad ha, des wa ehra Bua, der is von Griag na ned da gwen und is a na lenga ned kema. Da Max, dea is en Griag z`Afreka gwen. Da hamd s gsagd, daß n da drund d`Englenda gfangd hamd. Schbeda hamd s dann gsagd, das da Ongl Max z`Amerika drend e da Gfangaschafd is. Damoes da hae na ned gwißd wos des bedeid. Nach a boa Joah, da is dann da Ongl Max wieda hoam kema, z`Hoslbach hamd se olle Leid rechd gfreid das da Max wieda da gwen is.

En Ongl Max, den ha e rechd gean meng wei a oewei rechd vey mid mia da had. Ih woaß heid oewei na ganz guad wiea ra me mid an so an gloana Schachdal dradzd had, da hada gsagd das da a gloana Radeo drin is. Wenn e amoe a bißl greßa bih had da Max gsagd, dann griage den Radeo.

Schbeda da ha e oes wieda vogeßn, den Radeo, den ha e bis heid na ned vo eham griagd. Hie und da is a amoe d`Tande Rosa kema, de is mid n Ongl Heine voheirad gwen und had z`Neischdad an da Waldnab e da Owapfaez drom gwohnd.

D`Tande Rosa und d`Tande Ane und da Ongl Max, des wand drei Gschwisda und hand de Kinda von Oba und vo da Oma gwen. Wia da Ongl Max dann vo da Gfangaschafd wieda da gwen is, da had a e ana Mehy z`Grafenau goawad, dot hama n dann d`Mudde und ih amoe bsuachd. Da hama dann d`Mudde und ih mid`n Max mid an Aufzug den wo ma mid an Schdrieg seywa ganz schee hou aufe ziang had kina, mid aufe foahn deafa. Dea Aufzug wa eigndle zon Droadsegg aufe ziang da. Wei awa ih a dabei gwen bih, had se da Ongl exdra mid uns zwoa aufe zong.

Da Oba, dea had scha ganz lang e da ADEX z`Esndae drin oes Maschinisd goawad, dea had oewei e an groußn Ofa a Hoez eihoazn miaßn, sunsd daddnd olle Maschinen schdeh bleim had a gsagd. Schbeda dann had a da Ongl Max z`Esndae drin bei da ADEX oes Feanfahra s`oawadn agfangd. Da hada ofd hibsch weid fud foan miaßn, da is da Max sogar bis zon Weiß af Bruggmehy uma kema und had von Sägeweag a Hoez hoen miaßn. Des wand meisdns Schwaddleng und Hoezresda de wo s en Sägeweag nima brauchd hamd. Aus den oedn Hoez da hamd s dann e da ADEX z`Esndae so dinne Hardfasabladdn gmochd. De Bladdna, de hand so brau gwen, af oana Seidn wands ganz gladd und af da andan Seidn da hands rauh gwen, des wand dann de fiadenga Adex-Bladdn. En Afang da had s oewei nua braune Bladdna gem, schbeda da hamds dann a na oa mid ana fawegn Blasdigfolie, roude, greane und vey andane gmochd, a sehane de wo ausgschaud hamd oes wiea Badfliesn. Aus de Adex-Bladdna hamd andane Fabriggn wieda ganz neie Kichnmewe und na mehra andane Sahan gmochd.

Oamoe had da Ongl Max zo da Mudde gsagd das a moang af Weidn e d`Owapfaez aufe foad und had s gfragd ob s mid mia zo da Tande Rosa af Neischdad an da Waldnab mid aufe foahn mehad. D`Mudde had gsagd daß s scha ganz gean midfoahn dad. En nexdn Dag da is da Ongl Max scha ganz boed eda Fria mid sein Lasdwong, des is a Saddlzug, had da Max gsagd, af Hoslbach hea kema und had uns z`Hoslbach voan Doaf drauß akhoed. Da Max had gsagd das a ned es Doaf eina foahn kah, wei a sunsd nimma auße kimmd. Bein Max da is na a Mah dabei gwen, des wa sei Beifahra, dea had mid dabei sei miaßn wei de zweh Mana efda a moe e den Ofa, dea wo eda Seidn hindan Fihrahaus drah gwen is, a Hoez eihoazn hamd miaßn, oana hed des alloa ned doa kina. Da Max had gsagd das dea Lasdwong a Hoezgasa is, Bei an sehan Audo brauchd ma koa Benzin ned tangn. Damoes ha e na ned gwißd wos des bedeid.

Damoes e derara Zeid, da had d`Mudde amoe zo mia gsagd, daß s iadz wieda a Schdellung oes Haushoedaren grieagd und das des ganz weid weg is vo Hoslbach. Ih ha zeschd amoe bei da Oma und bein Obba z`Hoslbach da bleim deafa. D`Mudde had gsagd, wenn oese guad gehd dann hoe a de nahe. Schbeda da had ma d`Mudde dann gsagd, daß s e deara Zeid wo e ned bei iha gwen bih, ganz schee Zeidlang nach mia ghad had. Wia e a so a guade drei Joah oed gwen bih, da had me d`Mudde da hie wo s iatz gwen is, nahe ghoed. Dot had s bei an Mah, den wo grad sei Frau gschdoam is, oes Haushoedaren goawad. Des had Meyhmeisl khoaßn und is a z`Niedabayan drundn gwen, awa scha diearegd e da Owaboareschn Grenz. D`Mudde de is dann af Hoslbach en Boareschn Woed eine kema und had me aghoed. Vo Hoslbach weg da hama zeaschd amoe mid n Bosdaudo af Bassa ei gfoahn, vo Bassa weg hama dann mid`n Dampfzug iwa Boggeng und Maecheng und duach Simbach duahe bis af Buch aufe gfoan.

Ih ka me na guad dra erinnan wia ma mid n Zug en Bahnhof z`Buach akema hand, da had dann a scha a Mah, den wo e na nia gseng ghad ha af d`Mudde und af mih gwoad. Dea Mah, dea had uns mid an Zwoaralawagl mid an Roß von Bahnhof aghoed. Wiea ma unsane Sahan es Wagl eibagd khad hamd, da is s a scha lousganga. Bis da hie, da bieh e na nia mid an sehan Wagl und mid an Roß midgfoan. A so ham a dann ganz schee schney iwa d`Feyda und iwa d`Wiesn zo an Haus hie kema, da wo e voahea a na nia gwen bih.

D`Mudde had gsagd das e vo iaz a da dahoam bieh und bei den Mah und bei ihr bleim deaf. Dea Mah had gsagd, i bih da Ongl Schos, iadz bleibst bei uns da. Da Ongl Schos had a na an gloana Buam ghad dea wo a Schos ghoaßn had, dea is a ungefäha so grouß gwen wia ih. Schbeda wia e a bißl eyda gwen bih, da hamd s ma gsagd das d`Muada von Schos bein Ewen z`Deindoaf drin a Bauandian gwen is, und daß s wia da Schos af d`Weyd kema is, gschdoam is.

Da Schos, dea is wia ra na ganz gloa gwen is, oes Kosdkind zon Ongl und zo seina Frau hie kema. Boed danach is en Ongl sei Frau awa a gschdoam, drum hada a Haushoedaren brauchd.

Da Schos und ih, mia hama midanand aufgwoxn wia Briada. Mia hama a hie und da zankt und grauft, wia s hoed unda Gschwisdara a so is. Wenn s zweyd woan is had uns d`Mudde scha hie und da amoe unsane Kepf zammgrennd. Sunsd hama uns awa meisdns scha ganz guad voschdandn. Da Schos dea had an Bugl ghad, des is awa mia oes Kind ganed aufgfoen. Schbeda wia me d`Nachban oewei wieda ra moe gfragd hamd wann da Schos wieda vo uns fuad muaß, hae d`Mudde gfragd wos d`Nachban da damid moanan. Da hads ma dann des gsagd das da Schos a Kosdkind is und daß se d`Leid hoed en Buggl von Schos en Schnowe weznd und weis sunsd a nix andas ned zon ren hamd oes wiea s Leidausrichdn.

De bigoddeschn Nachban, de wo e an jedn Sonndag e d`Kiaha grennd hand, des wand de schlimmsdn. De hamd wascheinle a en Onkl de fimf Mack, de wo a olle Manad vo da Fiasoage fian Schos griagt had ned vogund hamd. Oewei efda is dann a a Frau vo da Fiasoage kema und had gsagd das iadz da Schos boed amoe e a Heim ei muas wei a bei uns da ned gsund wean kah und sei Bugl vogehd bei uns da a ned. De Frau had gsagd daß s bei uns da koan Dogda ned gibd der wo en Schos heyfa kannd. Ih mechad heid na ned wissen wos de Leid rundum deara Frau vo da Fiasoage na oes eazeyd hamd, daß s en Schos endle vo uns weg doa soednd.

Ih woaß a na ganz guad wia ma, da Schos und ih, z`Ousdan oewei midanand zon Moos suaha en Woed auße ganga hand. Meisdns hama en Hard ei ganga, wei s da drin mehra Moos gem had oes wiea en Brugmeynabeag drom. Des Moos hama ausgrupfd und mid hoam gnuma wei ma s zon Bau fia unsane Ousdanesda brauchd hamd. Unsane Nesda de ham a z Ousdan en Goadn drund es Gras ei zon Friaepfebam zuare baud. Wenn dann da Ousdahos kema is, da ha da oewei gfabde Osdaoa und a na so gloane foawege Guadloa e unsane Nesda ein glegd. Da Schos und ih, mia woedma gean oewei en Ousdahos seng, awa obwoe ma oewei ganz guad aufbassd hamd, hama n nia dawischd, blos d`Mudde had n efda gsegn.

Z`Weinachdn iß s fast oewei genau a so gwen wia z`Ousdan, bloß das ma da koa Nesd ned bau hamd miaßn. D`Mudde de had uns zweh en Heilenga Abnd af d`Nachd wia sunsd a oewei es Bedd gschiggd. Schbeda hama dann a Gleggal leidn ghead, da is dann a scha d`Mudde dahea kema und had gsagd, schney Buam schdeds auf, s`Griskindl is grad kema. Da ha ma dann ganz schney von Bedd ausa und zon Fensda hie grennd und hamd auße gschaud, awa s`Griskindl ha ma iwahaubd nia, a ned oanzegs moe zon seng griagd.

Wenn uns d`Mudde gsagd had daß s`Griskindl da gwen is, da hama schney iwa d`Schdieang ae e d`Schdum ei grend, da is dann a scha oewei a scheena Grisbam da gschdandn. Undan Grisbam hand dann fia uns Gschenga gleng, Woehandschua oda Soggal, oda amoe a Schal. Oamoe hama a a boa gloane Blechaudo griagd. Meisdns had s`Griskindl koa Schbeyzeig ned brachd, mia hama uns iwa de anan Sahan de wo ma olle von Griskindl griagd hamd a oewei rechd gfreid. Mia Buam mia hama iwahaubd nia ebs vomißd. Schbeyn hama iwaroe kina und da dazua ha ma a ned exdra ebs bsundas brauchd.

De ganze Zeid ha e a ned dahoam mid n Schos gschbeyd, ih bih scha a ofd eda Gengad umanand und ha a andane Leid kena gleand. De meisdn hamd e scha gwißd wea eh bih. Hie und da had me oana vo de Nachban gfragd wo ma ih und d`Mude, oda wo da Schos und da Ongl schlofand. Ih ha dann oewei gsagd das ma d`Mudde und ih e den gloan Zimma drund, nem da Schdum schlofand. D`Mudde had gsagd das e des sang soed wenn me eba fragd. Ih ha ma ned viaschdayn kina warum de Leid des oes wissen woeddnd, ih ha ma a nix dabei dengd wenn s me um sehane Sahan gfragd hamd.

Ned weid vo uns weg da had s`Resal gwond, de is oa Joa eyda gwen oes wia ih, mid n Resal da bieh e ganz ofd zon schbeyn beinand gwen. Hie und da hama bei ea dahoam, oda a bei uns herend gschbeyd. Bei uns da is s ned so indressant gwen wia bein Resal drend, de hamd an Bauanhof ghad, da had ma scha vey mehra doa kina oes wia bei uns. Hie und da amoe hama mia zwoa vo da Lobachbrugg ae um d`Wedd bisld, da hama brawiad wer vo uns am weidan kimmd. Meisdns is s`Resal weida kema wiea ih, wahscheinle is des da dava kema, wei sie koan so an Fritze ned kad had wia ih. S`Resal is oewei scha z`Meyhmaisl gwen wei`s da geboan is, drum had sa se a eda Gengad vey bessa auskennd wia ih.

Mid`n Resal ha e a ganz vey vo Meyhmeisl kena gleand. Af da lingn Seidn vo uns, a Schdiggl weida ume, da is da Meyhmeisl Hof gwen. Undahoe n Beag da wa da Grombaua, da bih e awa mid n Resal seydna ae kema. Bein Grombaua da hamds mehra Kinda ghad, oa Diandl had Maral koaßn, de wa geau so oed wiea ih. S`Maral, de is awa nua ganz seydn bei uns zon Schbeyn herom gwen. Wiea e schbeda e d`Schue kema bih, da wa ma s`Maral und ih, e da gleichn Glass.