Читать книгу Пособие женам чадородящим. На русском и церковнославянском - Игорь Храмов-Тесёлкин - Страница 2
ПОСОБИЕ ЖЕНАМ ЧАДОНОСЯЩИМ, ЧАДОРОДЯЩИМ И ЧАДЦЕВ ПИТАЮЩИМ
ОглавлениеАкафист Божией Матери ради иконы Ея «Блаженное Чрево»
Внимание! Этот текст является окончательным – исправленным вариантом акафиста «Блаженное Чрево». Все остальные варианты этого текста являются его черновыми – подготовительными вариантами.
Кондак 1
Избранной от всех дщерей земли, Бога Слово во Блаженном Чреве Своем воплотившей на спасение наше, благодарственная восписуем Ти, Владычице нашей Богородице. Ты же, яко имущая державу непобедимую, от всяких нас бед свободи и радости вечной исполни, да зовем Ти:
Радуйся, Мати Блаженное Чрево, Радость всему миру родившая!
Икос 1
Ангел предстоятель послан бысть с небеси рещи Богородице: радуйся, Благодатная, Господь с Тобою и благословен Плод Чрева Твоего. Мы же, грешнии, воплощаема зря Господа, вместе с ним зовем к Ней таковая:
Радуйся, клеще святая, огнь Божества неопально Собою приемшая!
Радуйся, нам, земнородным, его на землю принесшая!
Радуйся, Земле благая, Клас Жизни во Чреве Своем возрастившая!
Радуйся, нам, земнородным, во освящение Его подарившая!
Радуйся, пеще огнезрачная, во Чреве Своем Небесный Хлеб Жизни испекшая!
Радуйся, нам, осужденным на вечныя муки, Его даровавшая!
Радуйся, Плод вечныя жизни на смерть осужденным Своим Рождеством подарившая!
Радуйся, Рожденным Тобой вся удивившая!
Радуйся, Рождеством Своим смерти державу избышая!
Радуйся, тленью причастным Нечаянной Радостью рай возвестившая!
Радуйся, Сыном Своим от рабства погибели нас свободившая!
Радуйся, Плодом Чрева Своего начальника смерти державы от нас отженившая!
Радуйся, Мати Блаженное Чрево, Радость всему миру родившая!
Кондак 2
Видящи Святая Себя в чистоте, глаголет Гавриилу дерзостно: преславное твоего гласа приветствие неудобовмещаемо разуму моему является: Девичья Утроба како Благодатным Небом соделается, рцы Ми, зовый:
Аллилуйя!
Икос 2
Разум недоразумеваемый разумети Дева ищущи, возопи к служащему: како будет сие, идеже мужа не знаю? К Ней же он рече со страхом: Дух Святый найдет на Тя, и Сила Вышнего осенит Тя: темже Раждаемое Свято наречется Сын Божий, обаче зовый сице:
Радуйся, Чрево Блаженное!
Радуйся, утробо благословенная!
Радуйся, Мати Неневестная и неискусобрачная!
Радуйся, Дево, всех Создателя рождшая!
Радуйся, всех матерей благословение!
Радуйся, всего мира радование!
Радуйся, во Чреве Своем вечную Радость носившая!
Радуйся, нам, земнородным, Ее подарившая!
Радуйся, Радость всему миру явившая!
Радуйся, Рождеством Своим мир освятившая!
Радуйся, Божию Премудрость и Силу родившая!
Радуйся, Божию милость всем нам известившая!
Радуйся, Мати Блаженное Чрево, Радость всему миру родившая!
Кондак 3
Сила Вышнего осени тогда к зачатию Браконеискусную, и Блаженное Чрево Ея – Дом, иже созда Себе Премудрость Божия, яко село показа сладкое, всем хотящим жати спасение, всегда пети сице:
Аллилуйя!
Икос 3
Имея Дева Блаженное Чрево, в немже упасся Создатель всея твари, идя в горняя, во град Иудов, и вниде в дом Захариин, и целова южику свою Елизавет. Егда же услыша Елизавет целование Мариино, взыграся младенец во чреве ея, Матерь Божию Ея познав. Сего ради исполнися Духа Свята Елизавет, и возопи гласом велим, и рече, зовый к Ней таковая:
Радуйся, Мати Божия!
Радуйся, Благословенная в женах!
Радуйся, яко благословен Плод Чрева Твоего!
Радуйся, яко отныне ублажат Тя вси роди!
Радуйся, всех Создателя во Утробе Свой возрастившая!
Радуйся, естество человеческое с Богом соединившая!
Радуйся, из кровей Своих Плоть Богу Слову соткавшая!
Радуйся, нам во освящение Его даровавшая!
Радуйся, вечного жития приобщающая!
Радуйся, жизни трапезы бессмертныя нас насыщающая!
Радуйся, радость спасения нам даровавшая!
Радуйся, смерти державу поправшая!
Радуйся, Мати Блаженное Чрево, Радость всему миру родившая!
Кондак 4
Бурю внутрь имея помышлений сумнительных, целомудренный Иосиф в начале смятеся, бракоокрадованную Тя помышляя, Пренепорочная, тем же и сыны суетного маловерного века сего изумевают, како быть может сие, яко и Дева пребываеши, и родити возмогла еси, не разумея, яко праведный славный Иосиф, зачатия Твоего от Духа Свята, не ведуща с верными пети:
Аллилуйя!
Икос 4
Слышаша пастырие Ангелов поющих плотское Христово пришествие, текше к Тому яко Пастырю словесных овец, видят Сего яко агнца непорочна, во Блаженном Чреве Преславней и Пренепорочной Девы Марии, Радость всему миру родившей, чудесно упасшася. Сей же Ея радости ради и мы вместе с ними поюще реша:
Радуйся, Породителя жизни родившая!
Радуйся, Агнца Бессмертного в агнчих яслях Своею рукой положившая!
Радуйся, Духом Своим мир Создавшего дыханием Своим в зиму согревшая!
Радуйся, и нам помогати бездомным своим житием вразумляющая!
Радуйся, всех Создателя пеленами повившая!
Радуйся, страждущим всем и нас сострадати Своим Рождеством научившая!
Радуйся, Мати Блаженная, Плодом Чрева Своего мир освятившая!
Радуйся, во объятиях Своих Радость всего мира носившая!
Радуйся, породителя ада Своим Рождеством победившая!
Радуйся, Рождеством Своим к вечныя жизни всех нас возродившая!
Радуйся, Плодом Чрева Своего смерти родителя в бездну низвергшая!
Радуйся, древнего злобного змия во ад Своим Рождеством заключившая!
Радуйся, Мати Блаженное Чрево, Радость всему миру родившая!
Кондак 5
Боготечная Звезда всему миру явилася еси, Богородице, Солнце правды в мир сей вводяще, подвигающе нас в радости вопияти Тому:
Аллилуйя!
Икос 5
Видяща Тя, во Блаженном Чреве Своем упасшую Пастыря нашего Мати, радостью исполняемся и к чудному заступлению Твоему прибегаем, о Всесильная наша Владычице, потщашася славословиями ублажити Тя и возопити Благословенней:
Радуйся, Агнца за нас закланного и Пастыря нашего Мати!
Радуйся, нас, словесных овец, Рождеством Своим окормляющая!
Радуйся, Бога Слова плотию непреложно родившая!
Радуйся, всех верных Плоти Его приобщающая!
Радуйся, от смерти державы спасающая!
Радуйся, к вечныя Жизни всех нас возрождающая!
Радйся, матерям чадородящим всегда помогающая!
Радуйся, женам чадоносящим и нас сострадати всегда подвигающая!
Радуйся, чадородящим в родах болезнь облегчающая!
Радуйся, страсти душ и телес исцеляющая!
Радуйся, неисцельные недуги врачующая!
Радуйся, всеми отверженных во Свои матернии объятия приемлющая!
Радуйся, Мати Блаженное Чрево, Радость всему миру родившая!
Кондак 6
Проповедницы славнии быша вси улучившии от Тебя милости, Мати Дево, наипаче же жены, чада носящии и родящии, иже Тебя Милостивую В родах Помощницу имут, о Тебе поя Сыну Твоему:
Аллилуйя!
Икос 6
Возсия нам славное просвещение Истины Рождество Твое, о Владычице, от Тебя бо родися Солнце правды, Христос Бог наш, Иже от от Блаженного Чрева Твоего яви свет разума, непорочну Утробу Твою сохранив, сих ради Богородице вопием:
Радуйся, Всемилостивая Владычице, Блаженное Чрево!
Радуйся, Утробо во веки благословенная!
Радуйся, на небеса Рождеством Своим Путь указавшая!
Радуйся, Рождеством Своим Блаженное Чрево Твое Благодатное Небо явившая!
Радуйся, Творца Вселенныя Своими сосцами кормившая!
Радуйся, помощь в воспитании детей подающая!
Радуйся, всех взыскующих Истины милостивно окормляющая!
Радуйся, верными разум Христов в мире сем утверждающая!
Радуйся, вечного мрака и тьмы избегати всем нам помогающая!
Радуйся, верным в скорбях земных небесную жизнь созидающая!
Радуйся, прелести смерти державу Своим Рождеством упразднившая!
Радуйся, вечного праздника жизни Своим Рождеством известившая!
Радуйся, Мати Блаженное Чрево, Радость всему миру родившая!
Кондак 7
Хотяй всем человекам спастися и в разум Истины прийти Христос истинный Бог наш нам Тя Матерь Свою дарова, Блаженное Чрево Твое Благодатным Небом соделав, да вси чадородящии и к заступлению Твоему прибегающии вопиют Сыну Твоему:
Аллилуйя!
Икос 7
Новую Тобою показа милость всех Творец и Создатель Господь, нам от Него бывшим, из бессеменныя прозяб утробы, и сохранив Ю, яко же бе, нетленну, разруши древнюю данную Еве клятву: ўмножaя ўмножу печали твоя и воздыханія твоя: въ болезнехъ родиши чада, (умножая умножу скорбь твою в беременности твоей, и в болезни будешь рожать детей) (Быт 3—16), да чудо видяще, вси вернии, наипаче же жены чадородящии к помощи Твоея прибегают, в песнях вопиюще:
Радуйся, древния евины клятвы всемилостивое разрешение!
Радуйся, падшего рода людского с Творцом примирение!
Радуйся, печали всех жен избавление!
Радуйся, женских скорбей утоление!
Радуйся, В скорбях и печалях известное нам Утешение!
Радуйся, рода человеческого радование!
Радуйся, Земле Благая, проклятой за человека земле благословение Божие родившая!
Радуйся, всех Владыку Младенца Создателя нам воскормившая!
Радуйся, в Благодатное Небо вертеп Своим Рождеством обратившая!
Радуйся, Плод Чрева Своего верным в трапезу отдавшая!
Радуйся, страшную смерти ехидну Своим Рождеством поразившая!
Радуйся, смрадный дух смерти ея Своим Рождеством истребившая!
Радуйся, Мати Блаженное Чрево, Радость всему миру родившая!
Кондак 8
Странно есть суетным и маловерным сынам века сего Рождество Твое, Мати Дево: как и Дева пребываеши, и родити возмогла еси, Девство и Рождество, Небо и землю, Человека и Божество чудно в Себе сочета, подвизая верных вопияти:
Аллилуйя!
Икос 8
Весь бо в нижних приступный всем Человек, но и вышних никакоже возможе отступити неописанное Божественное Слово, снисхождением бо к Тебе Божественным нам Себя Тобой дарова, да слышаши сия:
Радуйся, Мати Льва из колена Давидова, главу дракона поправшего!
Радуйся, кузнице славная, меч против левиафана сковавшая!
Радуйся, грешную землю в небесный эдем обратившая!
Радуйся, верным Владыку Царя подарившая!
Радуйся, Создателя всех Своим млеком кормившая!
Радуйся, матерям чадокормящим всегда помогающая!
Радуйся, устроение наших детей управляющая!
Радуйся, всех к Тебе прибегающих никакоже
отвергающая!
Радуйся, терпящим скорби житейские в радость небесную их обращающая!
Радуйся, и в земном житии утешения нас не лишающая!
Радуйся, наше домостроение созидающая!
Радуйся, к Царству Небесному уготовляющая!
Радуйся, Мати Блаженное Чрево, Радость всему миру родившая!
Кондак 9
Всякое естество ангельское удивися Твоему вочеловечения делу: како неприступный Бог явися приступный всем человек, Блаженное Чрево Твое воистину Благодатным Небом соделав, всем верным, наипаче же матерям чадородящим в заступление Тя даровав, сего ради слышаща же от всех:
Аллилуйя!
Икос 9
Ветия многовещанныя суетного и самонадеянного рода сего недоумеют о Тебе, Богородице, како вси вернии, наипаче же матери в печалях сердец своих к покровительству Твоему прибегая, от всех скорбей и печалей избавление, всех скорбей на радость преложение и совершенную Нечаянную Радость всех благ исполнения Тобой обретая, верно вопиют:
