Читать книгу Молитвенный венец Богородицы. Лучшие молитвы для женщин - Группа авторов - Страница 5

Иеромонах Никон (в миру Николай Прихудалов, в схиме – Нил) возродил почти заброшенную Нило-Сорскую пустынь и тем прославил свое имя в летах. Начало восстановлению обители было положено в 1837 году, и всего за пять лет Никон сумел совершить очень многое – в том числе заложить в пу́стыни первый каменный храм во имя Тихвинской иконы Божией Матери. Строительство собора окончилось в 1854 году, вскоре после этого в обители возвели церковь Покрова Пресвятой Богородицы, а в 1870-х годах был завершен весь каменный ансамбль.

Молитва в понедельник

От скверных моих уст приими моление, о нескверная, чтомая и Пречистая Дево Богородице! И не возгнушайся моих словес, о радосте моя! Но призри мя и помилуй мя, о Мати Зиждителя моего! Во время жития моего не остави мене: веси бо, Владычице, яко на Тя всю мою надежду возлагаю и все упование мое о Тебе есть. Тем и во время смерти моея предстани ми, Помощнице моя, радосте и утешение мое: не остави мене тогда, Надеждо моя, не посрами мене тогда. Вем бо, вем, Дево, яко о многих гресех повинен есмь окаянный, и трепещу, помышляя час оный: но Радосте моя, яви ми тогда лице Твое, удиви на мне милость Твою, Ходатаице спасения моего, изыми мя, Владычице, от лютости бесовския и страшнаго и грознаго испытания воздушных духов: и от злобы их избави, и всю скорбь дне того на радость преложи Твоим посещением, и сподоби безбедно прейти ми от начал и властей тьмы и достигнути поклонятися на Престоле славы седящем Христу и Богу нашему, со Безначальным Его Отцем и Пресвятым Духом, во веки веков. Аминь.

Молитва во вторник

Пресвятая Владычице моя Богородице, Ангелов и Архангелов, Херувимов и Серафимов Пречестнейшая, всех святых Пресвятейшая, Дево Мати Божия! Спаси мя, смиреннаго и грешнаго раба Твоего: Ты бо веси, Всемилостивая Госпоже, яко вся мою надежду по Бозе на Тя возлагаю, и несть ми инаго прибежища спасительнаго, токмо Ты, Всеблагая, Ты моя крепость, Владычице, Ты моя сила, Ты мое Радование в скорбех, Ты мое Пристанище в искушениих, Ты мое Исправление в падениих, Ты и спасение мое всенадежное, о Мати Зиждителя и Господа моего! Помози ми, плавающему в пучине жития сего, лютее обуреваемому и бедствующему от потопления греховнаго. Даждь ми руку помощи, Помощнице моя, и избави мя от тимения глубины, да не погрязну в бездне отчаяния: буря бо грехов и страстей возста на мя, и волны беззаконий погружают мя. Но Ты, милосердная Мати, в пристанище безстрастия настави и спаси мя, безнадежных Надеждо и Ходатаице спасения моего. Аминь.

Молитва в среду

Богородице, Ты еси упование мое, Ты ми еси стена и благонадежное пристанище и спасительное прибежище, утомляемому страстей нахождение. Спаси мя от всех враг моих, гонящих душу мою и ловящих ю различными искушении: на пути бо сем, по нему же хожду, многия сети скрыша ми; многия соблазны, многия неудобства, многия прелести, многия немощи, душевныя и телесныя, уловляют мя в падения греховныя. И уже аз, окаянный, впадох в сети вражия, и связан, и держим есмь ими: и что сотворю, отчаянный аз, недоумею. Аще бо восхощу покаятися, нечувствием и ожесточением одержим есмь; аще же плакати понуждаюся, не имам сокрушения сердечнаго и слез ни поне единыя капли. Увы окаянству моему! Увы бедности моея! Увы лишению моему! К кому убо прибегну прочее, повинный аз? Токмо к Тебе, благоутробная Мати Господа и Спаса нашего, ненадежных надеждо, стено и покрове к Тебе притекающих! Не отрини убо мене блуднаго, не возгнушайся мене сквернаго: Тебе бо едину в жизни моей стяжах утеху, Дево Марие Богородице, и к Тебе единей во всякой нужде прибегаю со дерзновением: не остави убо мене в жизни сей и во время смерти моея, предстани в помощь, Помощнице моя, да узрят Ти вси врази мои и постыдятся, Тобою побежденнии, Владычице, Ходатаице спасения моего. Аминь.

Молитва в четверг

Кто Тебе по достоянию ублажати можете, Пресвятая Дево; какия уста воспети Твое величие, всяк смысл превосходящее, возмогут; вся Преславная о Тебе соделанная таинства, Богородице, выше смысла и слова суть! Красоте девства Твоего и пресветлей чистоте Твоей удивишася Херувими и ужасошася Серафими: чудесе же Рождества Твоего нетленнаго ни человеческий, ни ангельский язык изрещи не может. От Тебе бо безлетный Единородный Сыне Божий, Бог Слово, неизреченно воплощся, родиса и с человеки поживе, и Тя, яко Матерь Свою, зело возвеличи. Царицу Тя вся твари показа, нам же известное спасения пристанище. Тем вси, под кров Твой притекающи, различными скорбями и болезнями одержимыя, богатое утешение и исцеление приемлют и Тобою от бед спасаются; Ты бо еси воистину Мати всех скорбящих и обремененных, печальных радость, вольных целительница, юных хранительница, старости жезл, праведных похвала, грешных спасения надежда и к покаянию путеводительница: всем бо всегда предстательством Твоим помогаешь Ты, и мне помози, отчаянному, деяний моих ради. Заступнице усердная рода христианского, заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати живота: не остави убо мене и не презри мя, но, имиже сама веси судьбами, спаси мя, яко благословенна еси во веки веков. Аминь.

Молитва в пятницу

Тебе предаю в защищение живот мой и по Бозе всю надежду спасения моего на Тя возлагаю, Владычице Дево Богородице. Молю же Тя, раб Твой: не презри мя, многия грехи сотворшего, но виждь скорбь мою о сем и недоумение и подаждь ми ослабу и утешение, да не до конца погибну, окаянный. Простри десницу Твою, Чистая, изыми мя от тимения дел моих, и постави на чистую пажить Заповедей Христа, Царя и Бога моего, да творю я присно, Тобою укрепляем, от грехов моих лютых изыми мя, Владычице, и покаяние спасительное мне низпосли, ко Твоему Сыну и Богу Матерним Твоим ходатайством. Свет неизреченный возсиявшая, просвети мою тьму душевную, от грехов ей прибывшую. Радосте моя, избави мя от обышедших мя невидимых врагов: греси бо мои нози и тяжцы суть, врази мои люти зело, смерть близ, совесть моя мя обличает, геенна огненная устрашает, червь неусыпаемый, скрежет зубовный, тартара тьма кромешная в трепет мя приводит, ибо ожидают мя прияти злых дел моих ради. Увы мне! Что сотворю тогда и к кому прибегну, да спасена будет душа моя. К Тебе единей, сладкая Марие Богородице, горесть смерти уповающим на Тя услаждающая и взыскающих к Тебе от лютыя геенны избавляющая. Ты и мне помози, Всеблагая, не имущему иныя помощи, токмо Тебе, всепетая. Спаси мя от ужасов смертнаго часа, и от лютости бесовския избави мя: спаси мя от властей духов злобных на мытарствах воздушных по смерти; яви, молюся Ти, яви ми тогда пресветлое лицо Твое, Владычице, и не остави мя безпомощнаго. О Милосердия Мати!

Преклонися на милость ко мне, лишенному милости от дел рук моих, и умоли, Егоже родила еси плотию, Христа, Спасителя и Бога нашего, нас ради на кресте пречистую кровь Свою излившаго, да и аз причастник буду заслуг Его крестных пред Отцем Его Богом, и их ради получу грехов прощение и вечное спасение, и прославлю неизреченное милосердие Твое, Богородице, и Твое милостивое предстательство в безконечныя веки. Аминь.

Молитва в субботу

Радуйся, Дево Богородице, Предстательство и пристанище убогия души моея, Надеждо сладкая спасения моего. Радуйся, всех Зиждителя во Твоих ложеснах носившая. Радуйся, Бога плотию рождшая, миру же Спасителя. Радуйся, в рождестве девство нетленно сохранившая. Радуйся, от волхвов дары приемшая, и поклонение их от Тебе рождшемуся видевшая, и пастырей преславныя о Нем словеса слышавшая. слышавшая и в сердце Твоем слагавшая! Радуйся, Отрока Иисуса, Сына Твоего и Бога, во храме среди законоучителей, обретшая радостно! Радуйся, болезни лютыя во страдании крестном, распятии и смерти Сына Твоего, пресладкаго Иисуса, испытавшая, воскресением же Его тридневным обрадованная светло! Радуйся, вознесение Сына Твоего и Бога со ученики Его во славе небесней видевшая! Радуйся, от Него низпосланнаго Духа Святаго, в горнице Сионстей в виде огненных языков низшедшаго, со ученики Господними приемшая. Радуйся, чистотою и святынею вся ангельския чины и всех святых лики превзошедшая. Радуйся, возвеличенная славою, пришествием к Тебе Сына Твоего и Бога! Радуйся, Того святым рукам душу Твою радостно предавшая. Радуйся, славно превознесенная с телом Твоим на небеса взошедшими! Радуйся, по преставлении Твоем боговидцем апостолом в третий день явившаяся. Радуйся, на небесех от Отца и Сына и Духа Святаго диадемою вечнаго царствия увенчанная. Радуйся, от всех небесных сил приснопеваемая. Радуйся, близ Престола Пресвятыя Троицы на престоле славы возседящая. Радуйся, Бога и человеков примирения виновнице! Радуйся, над всем небесным и земным Царице господствующая! Радуйся, яко ничтоже невозможно есть Твоему ходатайству. Радуйся, яко вси верно к Тебе притекающие спасаются. Радуйся, яко Тобою скорбящие утешение, болящие исцеление, бедствующие благовременную помощь получают. Молю убо Тя, обрадованная Владычице, потреби во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но приими милостиво сия гласы радостныя, мною убогим Тебе приносимыя, и предстань ми в помощь во время безпомощия тела моего в час страшный оный, егда настанет срок душе моея от окаяннаго тела моего разлучитися; тогда, молю, предстани ми в помощь и избави мя, повиннаго во гресех, от наказания за них вечнаго, да не явлюся ни бесам в радование, ни пищей геенне огненной. Ей, Владычице моя, не попусти узрети души моей страшнаго и грознаго прещения и истязания демонскаго, грешником уготованнаго, но предвари и спаси мя, раба Твоего, в час оный ужасный, да славлю Тя во веки, едина Надеждо моя и Ходатаице спасения моего. Аминь.

Молитва в воскресенье

Всемилостивая Дево Богородице, Мати щедрот и человеколюбия, прелюбезная надеждо и упование мое! О, Мати пресладкаго, превожделеннаго и всяку любы превосходящаго Спасителя Иисуса Христа, человеколюбца и Бога моего, Свете помраченныя души моея! К Тебе аз многогрешный и безнадежный припадаю, Тебе молюся, Источнице милосердия, Дево Марие, яже бездну милосердия и пучину щедрот и человеколюбия рождшая; помилуй мя, помилуй мя, вопию ти болезненно, помилуй всего уязвленнаго, в лютыя разбойники впадшаго, и от одежды, в ню же облече мя Отец, увы мне, обнаженнаго, тем и лежу наг всякаго благотворения, возсмердеша и согниша раны моя от лица безумия моего. Владычице моя, Богородице, молю Тя смиренно, воззри на мя милостивым оком Твоим и не возгнушайся мене, всего помраченнаго, всего оскверненнаго, всего в тину сластей погруженнаго, люте падшаго и возстати не могущаго. Умилосердися убо на мя и даждь ми руку помощи, воздвигни мя из глубины греховныя, о Радосте моя! Избави мя от обышедших мя; просвети лице Твое на раба Твоего, спаси погибающаго, очисти оскверненнаго, возстави падшаго люте: можеши бо вся, яко сущи Мати Бога всемогущаго. Излей на мя елей милосердия Твоего, и вино умиления точити ми подаждь, Тебе бо воистину едину надежду стяжах в животе моем: не отрини убо мене, к Тебе притекающаго, но виждь скорбь мою, Дево, и души желание, и сие приими и спаси мя, Ходатаице спасения моего. Аминь.