Читать книгу Heeltyd by God - Milanie Vosloo - Страница 11

Tiener-tantrums

Ek wens U het ’n boekie,

How to raise your child,

saam met my bondeltjies vreugde gestuur,

want, Here, ’n ma se posbeskrywing

is soms baie duister!

Toe hulle klein was, het ek hulle groot gewens

wanneer hul speelgoed ná slapenstyd rondlê.

Nou weet ek nie hoe om die stukke van hul lewens

aanmekaar te hou nie.

Gee tog wysheid om hul grootwordstryd te verstaan,

te bloei in hul pyn, te glimlag in hul vreugde

(al is dit ook deur my trane).

Ek het ’n groot porsie begrip nodig

om hul groepsdrukvrees te verstaan;

te aanvaar hulle sal eers ééndag weer van my hou.

En wanneer hulle in hul voortvarendheid verdwaal,

gee my ’n sagte hand in die koershou

sodat ons nog vriende is ná hul wie’s-ek-stoeityd.

Hemelse Vader, laat hulle op hierdie

ontdekkingsreis U werklik vind.