Читать книгу Акафист Божией Матери пред иконой Ее, именуемой «Неупиваемая чаша» - Сборник - Страница 3

А́нгельстии чи́ни и пра́ведников со́нми непреста́нно сла́вят Тя, Цари́цу Богоро́дицу, Хода́таицу о многогре́шнем ро́де христиа́нстем, погря́зшем в беззако́ниих и пребыва́ющем во гресе́х, и́бо во утеше́ние и спасе́ние да́руеши ему́ ми́лость Свою́ чрез многоиме́нныя чудотво́рныя ико́ны Твоя́, и́хже, я́ко зве́зды небе́сныя, по всей земли́ на́шей зрим; к еди́ному же из сих о́бразов, «Неупива́емая Ча́ша» имену́емому, припа́дающе, из глубины́ се́рдца взыва́ем Ти:

Ра́дуйся, непристу́пнаго Божества́ селе́ние; ра́дуйся, непреста́нное люде́й удивле́ние.

Ра́дуйся, скорбьми́ грехи́ на́ша очища́ющая; ра́дуйся, печа́льми на́ша не́мощи врачу́ющая.

Ра́дуйся, ми́лость Свою́ чрез чудотво́рныя ико́ны Твоя́ нам свы́ше посыла́ющая; ра́дуйся, явле́нием их ско́рбная сердца́ на́ша возвеселя́ющая.

Ра́дуйся, пречу́дное всех с Бо́гом примире́ние; ра́дуйся, гее́нны ве́чныя избавле́ние.

Ра́дуйся, Влады́чице, Неупива́емая Ча́ше, духо́вную жа́жду на́шу утоля́ющая.