Читать книгу English and Scottish Ballads (Vol. 1-8) - Various Authors - Страница 125

"O wha will shoe my fair foot,

And wha will glove my han'?

And wha will lace my middle jimp

Wi' a new-made London ban'?

"Or wha will kemb my yellow hair5

Wi' a new-made silver kemb?

Or wha'll be father to my young bairn,

Till love Gregor come hame?"

"Your father'll shoe your fair foot,

Your mother glove your han';10

Your sister lace your middle jimp

Wi' a new-made London ban';

"Your brethren will kemb your yellow hair

Wi' a new-made silver kemb;

And the king o' Heaven will father your bairn,15

Till love Gregor come hame."

"O gin I had a bonny ship,

And men to sail wi' me,

It's I wad gang to my true love,

Sin he winna come to me!"20

Her father's gien her a bonny ship,

And sent her to the stran';

She's taen her young son in her arms,

And turn'd her back to the lan'.

She hadna been o' the sea sailin'25

About a month or more,

Till landed has she her bonny ship

Near her true-love's door.

The nicht was dark, and the wind blew cald,

And her love was fast asleep,30

And the bairn that was in her twa arms

Fu' sair began to greet.

Lang stood she at her true love's door,

And lang tirl'd at the pin;

At length up gat his fause mother,35

Says, "Wha's that wad be in?"

"O it is Annie of Lochroyan,

Your love, come o'er the sea,

But and your young son in her arms;

So open the door to me."40

"Awa, awa, ye ill woman,

You're nae come here for gude;

You're but a witch, or a vile warlock,

Or mermaid o' the flude."

"I'm nae a witch or vile warlock,45

Or mermaiden," said she;—

"I'm but your Annie of Lochroyan;—

O open the door to me!"

"O gin ye be Annie of Lochroyan,

As I trust not ye be,50

What taiken can ye gie that e'er

I kept your companie?"

"O dinna ye mind, love Gregor," she says,

"Whan we sat at the wine,

How we changed the napkins frae our necks?55

It's nae sae lang sinsyne.

"And yours was gude, and gude enough,

But nae sae gude as mine;

For yours was o' the cambrick clear,

But mine o' the silk sae fine.60

"And dinna ye mind, love Gregor," she says,

"As we twa sat at dine,

How we chang'd the rings frae our fingers,

And I can shew thee thine:

"And yours was gude, and gude enough,65

Yet nae sae gude as mine;

For yours was o' the gude red gold,

But mine o' the diamonds fine.

"Sae open the door, now, love Gregor,

And open it wi' speed;70

Or your young son, that is in my arms,

For cald will soon be dead."

"Awa, awa, ye ill woman,

Gae frae my door for shame;

For I hae gotten anither fair love,75

Sae ye may hie you hame."

"O hae ye gotten anither fair love,

For a' the oaths ye sware?

Then fare ye weel, now, fause Gregor;

For me ye's never see mair!"80

O hooly, hooly gaed she back,

As the day began to peep;

She set her foot on good ship board,

And sair, sair did she weep.

"Tak down, tak down the mast o' goud;85

Set up the mast o' tree;

Ill sets it a forsaken lady

To sail sae gallantlie.

"Tak down, tak down the sails o' silk;

Set up the sails o' skin;90

Ill sets the outside to be gay,

Whan there's sic grief within!"

Love Gregor started frae his sleep,

And to his mother did say,

"I dreamt a dream this night, mither,95

That maks my heart richt wae;

"I dreamt that Annie of Lochroyan,

The flower o' a' her kin,

Was standin' mournin' at my door,

But nane wad lat her in."100

"O there was a woman stood at the door,

Wi' a bairn intill her arms;

But I wadna let her within the bower,

For fear she had done you harm."

O quickly, quickly raise he up,105

And fast ran to the strand;

And there he saw her, fair Annie,

Was sailing frae the land.

And "heigh, Annie!" and "how, Annie!

O, Annie, winna ye bide?"110

But ay the louder that he cried "Annie,"

The higher rair'd the tide.

And "heigh, Annie!" and "how, Annie!

O, Annie, speak to me!"

But ay the louder that he cried "Annie,"115

The louder rair'd the sea.

The wind grew loud, and the sea grew rough,

And the ship was rent in twain;

And soon he saw her, fair Annie,

Come floating o'er the main.120

He saw his young son in her arms,

Baith toss'd aboon the tide;

He wrang his hands, and fast he ran,

And plunged in the sea sae wide.

He catch'd her by the yellow hair,125

And drew her to the strand;

But cald and stiff was every limb,

Before he reach'd the land.

O first he kist her cherry cheek,

And syne he kist her chin;130

And sair he kist her ruby lips,

But there was nae breath within.

O he has mourn'd o'er fair Annie,

Till the sun was ganging down;

Syne wi' a sich his heart it brast,135

And his saul to heaven has flown.