Читать книгу English and Scottish Ballads (Vol. 1-8) - Various Authors - Страница 49

It was intill a pleasant time,

Upon a simmer's day;

The noble Earl of Mar's daughter

Went forth to sport and play.

5 As thus she did amuse hersell,

Below a green aik tree,

There she saw a sprightly doo

Set on a tower sae hie.

"O Cow-me-doo, my love sae true,

10 If ye'll come down to me,

Ye'se hae a cage o' guid red gowd

Instead o' simple tree:

"I'll put gowd hingers roun' your cage,

And siller roun' your wa';

15 I'll gar ye shine as fair a bird

As ony o' them a'."

But she had nae these words well spoke,

Nor yet these words well said,

Till Cow-me-doo flew frae the tower,

20 And lighted on her head.

Then she has brought this pretty bird

Hame to her bowers and ha';

And made him shine as fair a bird

As ony o' them a'.

25 When day was gane, and night was come,

About the evening tide,

This lady spied a sprightly youth

Stand straight up by her side.

"From whence came ye, young man?" she said,

30 "That does surprise me sair;

My door was bolted right secure;

What way ha'e ye come here?"

"O had your tongue, ye lady fair,

Lat a' your folly be;

35 Mind ye not on your turtle doo

Last day ye brought wi' thee?"

"O tell me mair, young man," she said,

"This does surprise me now;

What country ha'e ye come frae?

40 What pedigree are you?"

"My mither lives on foreign isles,

She has nae mair but me;

She is a queen o' wealth and state,

And birth and high degree;

45 "Likewise well skill'd in magic spells,

As ye may plainly see;

And she transform'd me to yon shape,

To charm such maids as thee.

"I am a doo the live lang day,

50 A sprightly youth at night;

This aye gars me appear mair fair

In a fair maiden's sight.

"And it was but this verra day

That I came ower the sea;

55 Your lovely face did me enchant—

I'll live and dee wi' thee."

"O Cow-me-doo, my luve sae true,

Nae mair frae me ye'se gae."

"That's never my intent, my luve,

60 As ye said, it shall be sae."

"O Cow-me-doo, my luve sae true,

It's time to gae to bed."

"Wi' a' my heart, my dear marrow,

It's be as ye ha'e said."

65 Then he has staid in bower wi' her

For sax lang years and ane,

Till sax young sons to him she bare,

And the seventh she's brought hame.

But aye as ever a child was born,

70 He carried them away,

And brought them to his mither's care,

As fast as he cou'd fly.

Thus he has staid in bower wi' her

For twenty years and three;

75 There came a lord o' high renown

To court this fair ladie.

But still his proffer she refused,

And a' his presents too;

Says, "I'm content to live alane

80 Wi' my bird, Cow-me-doo."

Her father sware a solemn oath

Amang the nobles all,

"The morn, or ere I eat or drink,

This bird I will gar kill."

85 The bird was sitting in his cage,

And heard what they did say;

And when he found they were dismist,

Says, "Waes me for this day!

"Before that I do langer stay,

90 And thus to be forlorn,

I'll gang unto my mither's bower,

Where I was bred and born."

Then Cow-me-doo took flight and flew

Beyond the raging sea;

95 And lighted near his mither's castle

On a tower o' gowd sae hie.

As his mither was wauking out,

To see what she coud see,

And there she saw her little son

100 Set on the tower sae hie.

"Get dancer here to dance," she said,

"And minstrells for to play;

For here's my young son, Florentine,

Come here wi' me to stay."

105 "Get nae dancers to dance, mither,

Nor minstrells for to play;

For the mither o' my seven sons,

The morn's her wedding-day."

"O tell me, tell me, Florentine,

110 Tell me, and tell me true,

Tell me this day without a flaw,

What I will do for you."

"Instead of dancers to dance, mither,

Or minstrells for to play,

115 Turn four-and-twenty wall-wight men,

Like storks, in feathers gray;

"My seven sons in seven swans,

Aboon their heads to flee;

And I, mysell, a gay gos-hawk,

120 A bird o' high degree."

Then sichin' said the queen hersell,

"That thing's too high for me;"

But she applied to an auld woman,

Who had mair skill than she.

125 Instead o' dancers to dance a dance,

Or minstrells for to play,

Four-and-twenty wall-wight men

Turn'd birds o' feathers gray;

Her seven sons in seven swans,

130 Aboon their heads to flee;

And he, himsell, a gay gos-hawk,

A bird o' high degree.

This flock o' birds took flight and flew

Beyond the raging sea;

135 And landed near the Earl Mar's castle,

Took shelter in every tree.

They were a flock o' pretty birds,

Right comely to be seen;

The people view'd them wi' surprise,

140 As they danc'd on the green.

These birds ascended frae the tree,

And lighted on the ha';

And at the last wi' force did flee

Among the nobles a'.

145 The storks there seized some o' the men,

They cou'd neither fight nor flee;

The swans they bound the bride's best man,

Below a green aik tree.

They lighted next on maidens fair,

150 Then on the bride's own head;

And wi' the twinkling o' an e'e,

The bride and them were fled.

There's ancient men at weddings been,

For sixty years or more;

155 But sic a curious wedding-day

They never saw before.

For naething cou'd the companie do,

Nor naething cou'd they say;

But they saw a flock o' pretty birds

160 That took their bride away.

When that Earl Mar he came to know

Where his dochter did stay,

He sign'd a bond o' unity,

And visits now they pay.