Читать книгу The Oxford Book of English Verse - Various Authors - Страница 8

c. 1300

ICHOT a burde in boure bryht,

That fully semly is on syht,

Menskful maiden of myht;

Feir ant fre to fonde;

In al this wurhliche won

A burde of blod ant of bon

Never yete y nuste non

Lussomore in londe.

Blou northerne wynd!

Send thou me my suetyng!

Blou northerne wynd! blou, blou, blou!

With lokkes lefliche ant longe,

With frount ant face feir to fonge,

With murthes monie mote heo monge,

That brid so breme in boure.

WITH lossom eye grete ant gode,

With browen blysfol under hode,

He that reste him on the Rode,

That leflych lyf honoure.

Blou northerne wynd, etc.

Hire lure lumes liht,

Ase a launterne a nyht,

Hire bleo blykyeth so bryht,

So feyr heo is ant fyn.

A suetly swyre heo hath to holde.

With armes shuldre ase mon wolde,

Ant fingres feyre forte folde,

God wolde hue were myn!

Blou northerne wynd, etc.

Heo is coral of godnesse,

Heo is rubie of ryhtfulnesse,

Heo is cristal of clannesse,

Ant baner of bealtè.

Heo is lilie of largesse,

Heo is parvenke of prouesse,

Heo is solsecle of suetnesse,

Ant lady of lealtè.

For hire love y carke ant care,

For hire love y droupne ant dare,

For hire love my blisse is bare

Ant al ich waxe won,

FOR hire love in slep y slake,

For hire love al nyht ich wake,

For hire love mournynge y make

More then eny mon.

Blou northerne wynd!

Send thou me my suetyng!

Blou northerne wynd! blou, blou, blou!

4. Ichot] I know. burde] maiden. menskful] worshipful. feir] fair. fonde] take, prove. wurhliche] noble. won] multitude. y nuste] I knew not. lussomore in londe] lovelier on earth. suetyng] sweetheart. lefliche] lovely. fonge] take between hands. murthes] mirths, joys. mote heo monge] may she mingle. brid] bird. breme] full of life.

Rode] the Cross. lure] face. lumes] beams. bleo] colour. suetly swyre] darling neck. forte] for to. hue, heo] she. clannesse] cleanness, purity. parvenke] periwinkle. solsecle] sunflower. won] wan.