Читать книгу The Oxford Book of Latin Verse - Various Authors - Страница 62

56. Marius

HIC Iouis altisoni subito pinnata satelles

arboris e trunco serpentis saucia morsu

subrigit, ipsa feris transfigens unguibus, anguem

semianimum et uaria grauiter ceruice micantem;

quem se intorquentem lanians rostroque cruentans,

iam satiata animo, iam duros ulta dolores,

abicit ecflantem et laceratum adfligit in undas,

seque obitu a solis nitidos conuertit ad ortus.

hanc ubi praepetibus pinnis lapsuque uolantem

conspexit Marius, diuini numinis augur,

faustaque signa suae laudis reditusque notauit,

partibus intonuit caeli pater ipse sinistris:

sic aquilae clarum firmauit Iuppiter omen.