Читать книгу Harper's New Monthly Magazine, Vol. V, No. XXV, June, 1852 - Various - Страница 2

When the sheep are in the fauld, when the cows come hame,

When a' the weary warld to quiet rest are gane;

The woes of my heart fa' in showers frae my ee,

Unken'd by my gudeman, who soundly sleeps by me.

Young Jamie loo'd me weel, and sought me for his bride;

But saving ae crown piece, he'd naething else beside,

To make the crown a pound, my Jamie gaed to sea;

And the crown and the pound, O they were baith for me!

Before he had been gane a twelvemonth and a day,

My father brak his arm, our cow was stown away;

My mother she fell sick – my Jamie was at sea —

And Auld Robin Gray, oh! he came a-courting me.

My father cou'dna work – my mother cou'dna spin;

I toil'd day and night, but their bread I cou'dna win;

Auld Rob maintain'd them baith, and, wi' tears in his ee,

Said, "Jenny, oh! for their sakes, will you marry me?"

My heart it said na, and I looked for Jamie back;

But hard blew the winds, and his ship was a wrack:

His ship it was a wrack! Why didna Jamie dee?

Or, wherefore am I spar'd to cry out, Woe is me!

My father argued sair – my mother didna speak,

But she look'd in my face till my heart was like to break;

They gied him my hand, but my heart was in the sea;

And so Auld Robin Gray, he was gudeman to me.

I hadna been his wife, a week but only four,

When mournfu' as I sat on the stane at my door,

I saw my Jamie's ghaist – I cou'dna think it he,

Till he said, "I'm come hame, my love, to marry thee!"

O sair, sair did we greet, and mickle say of a';

Ae kiss we took, nae mair – I bad him gang awa.

I wish that I were dead, but I'm no like to dee;

For O, I am but young to cry out, Woe is me!

I gang like a ghaist, and I carena much to spin,

I darena think o' Jamie, for that wad be a sin.

But I will do my best a gude wife aye to be,

For Auld Robin Gray, oh! he is sae kind to me,

The wintry days grew lang, my tears they were a' spent;

May be it was despair I fancied was content.

They said my cheek was wan; I cou'dna look to see —

For, oh! the wee bit glass, my Jamie gaed it me.

My father he was sad, my mother dull and wae;

But that which griev'd me maist, it was Auld Robin Gray;

Though ne'er a word he said, his cheek said mair than a',

It wasted like a brae o'er which the torrents fa'.

He gaed into his bed – nae physic wad he take;

And oft he moan'd and said, "It's better for her sake."

At length he look'd upon me, and call'd me his "ain dear,"

And beckon'd round the neighbors, as if his hour drew near.

"I've wrong'd her sair," he said, "but ken't the truth o'er late;

It's grief for that alone that hastens now my date;

But a' is for the best, since death will shortly free

A young and faithful heart that was ill matched wi' me.

"I loo'd, and sought to win her for mony a lang day;

I had her parents' favor, but still she said me nay;

I knew na Jamie's luve; and oh! it's sair to tell —

To force her to be mine, I steal'd her cow mysel!

"O what cared I for Crummie! I thought of naught but thee,

I thought it was the cow stood 'twixt my luve and me.

While she maintain'd ye a' was you not heard to say,

That you would never marry wi' Auld Robin Gray?

"But sickness in the house, and hunger at the door,

My bairn gied me her hand, although her heart was sore.

I saw her heart was sore – why did I take her hand?

That was a sinfu' deed! to blast a bonnie land.

"It was na very lang ere a' did come to light;

For Jamie he came back, and Jenny's cheek grew white.

My spouse's cheek grew white, but true she was to me;

Jenny! I saw it a' – and oh, I'm glad to dee!

"Is Jamie come?" he said, and Jamie by us stood —

"Ye loo each other weel – oh, let me do some good!

I gie you a', young man – my houses, cattle, kine,

And the dear wife hersel, that ne'er should hae been mine."

We kiss'd his clay-cold hands – a smile came o'er his face;

"He's pardon'd," Jamie said, "before the throne o' grace.

Oh, Jenny! see that smile – forgi'en I'm sure is he,

Wha could withstand temptation when hoping to win thee?"

The days at first were dowie; but what was sad and sair,

While tears were in my ee, I kent mysel nae mair;

For, oh! my heart was light as ony bird that flew,

And, wae as a' thing was, it had a kindly hue.

But sweeter shines the sun than e'er he shone before,

For now I'm Jamie's wife, and what need I say more?

We hae a wee bit bairn – the auld folks by the fire —

And Jamie, oh! he loo's me up to my heart's desire.