Читать книгу Mmino Wa Ngwedi (Kgokagano Ya Madi) - Amy Blankenship, Amy Blankenship - Страница 3

Morago ga mengwaga ye 10 …

Mmino wa lešata o lla ka morethetho ka tlelapong, leswao la yona la neon le lephepole le legolo le fetoša mebala ka go latelelana le mošito. Lesedi le laetša go kganya ga go tšhoša moagong go seleganya mmila. Tlhakeng ya moago, monna yo mokopana, wa meriri ye mesehla ya go taga o eme ka leoto le tee le ithekgile mo murumong. A khunamela pele, ka seku se le go khurung ya gagwe yeo a e kobilego, mola a fola sekerete.

Kane Tripp a sekamiša hlogo ya gagwe gannyane gomme a sepetša seatla sa gagwe ka meriring ye mekopana ya go emela godimo. O hloile go e kota, go lahlegelwa ke botelele bja yona. O sa gopola go kwagala ga yona ga silica a phophola mokokotlo wa gagwe kua tlase. A emišetša sekerete dipounameng tša gagwe, a se gogela ka teng go tsenelela a tseba gore o lahlegetšwe ke dilo tše dintši, go swana le disekerete tšeo a bego a tlwaetše go di fola pele a bolokwa a phela gomme a tlogelwa bahung.

Mengwaga ye masomenne ye metelele o ile a swarwa ke Malachi a sa itebetše, moetapele wa sehlopha se sennyane sa mangau, gomme a latofatšwa ka go bolaya molekani wa mofetogi. Pele ga bošego bjo, Kane o be a na le kwano ye botse le mangau, le moetapele wa bona e be e le yo mongwe wa bagwera ba gagwe ba potego. Dipounama tša Kane di ile tša sesefala ka kgopolo yeo. Malachi o ile a mo sekiša, ahlola, le go mo otla ka lebaka la tlhohleletšo ya pefelo.

A diriša maleatlana a go tšwa pukung yeo Kane a bego a nagana gore o e utile ka tlhokomelo, Malachi o ile a mo kgoka ka thogako, a sa kgone go šikinyega goba go bolela… a sa kgone gape le go itšhireletša. Gomme a tloša lengina le leswika la madi leo le fago tokologo ya go sepela mosegare. Leswika la madi leo pele le bego e le la vamphaya ya mathomo, Syn.

Kane o kile a botšiša gore go tla bjang gore go be le ya mathomo gomme karabo ya mo makatša.

Syn o tlile lefaseng le a nnoši, a gobetše le go swarwa ke tlala. Lesogana la mo hwetša gomme ka lebaka la tlala, Syn a tšea madi a gagwe. Vamphaya ya lemoga ka pela gore batho ba lefase le ke dibopiwa tše bokoa, gomme semoya sa bona se a ba tlogela ge ba ka abelana ka madi, ka kholofelo ya go bopa lapa la mo planeteng ye. Efela ge meoya ya bona e tlogile, ga ba sa na mohola go yena gomme ba fetoga dintatauwane.

Mo bophelong bja gagwe bja go se fele, Syn o hweditše batho ba mohuta woo ba bararo bao ba šalago le semeoya sa bona… ya ba bana ba gagwe. Phapano ye tee fela ke gore ge ba fetošitšwe, letšatši le a ba tšhuma… la ba tlogela le bana ba bobona ba dintatauwane go khuta mahlaseding a mosegare. Ga senke go be le bothata planeteng ya Syn ka lebaka la leswika la madi.

Mapanta a letsogong a makoto ao Syn a bego a apare a tšwa lefaseng la gagwe gomme a dirilwe ka Leswika la Madi, Tšhipi ya karolo ya mapanta a letsogong, o ile a akanyetša ka palamonwaneng, pheteng, le lengineng le tee. Kane gape a fihlelela le go kgoma lengina leo a le aperego.

Mo leswika la madi le bego le mo fa bophelo bja tlwaelo bja magareng… e bile puku ya Syn ya maleatlana yeo e bilego phuhlamišo ya Kane. Syn o e tlogeletše bakgethiwa ba gagwe go le diriša ka bohlale mola a robetše. Ka gare ga yona go be go le maleatlana a go tšhoša, tsela ya go kokobetša bana ba go hloka meoya ge ba eba kotsi go batho.

Ge maleatlana a go tšhoša a dirišwa go yena, Kane o be a lebeletše ka mahlo a maso, a go se ponye ge mogwera wa gagwe wa kgale a mo tšhela ka garafo ya mabu godimo ga hlogo ya gagwe. Sa mafelelo seo a se gopolago ke lefaufau la go tlala dinaledi ka godimo ga lešoka la mehlare.

Leswiswi le be le mo tlaletše gomme go homotše kudu. Maleatlana a mo kgokile efela o be a kgona go kwa dilo ka lefaseng di redimoga ka godimo ga gagwe. Dibopiwa tše dinnyanennyane, tša go phela tšeo di bego di efoga goja letlalo la gagwe la go se hwe efela ka go se tsebe di tshwenya moya wa gagwe.

Ge nako e feta, o be a nagana gore ka nnete o a gafa, gomme a thoma go kwa mantšu kgafetšakgafetša… mantšu. A be a amogelega go yena ka kgolegong ya gagwe gomme o be a duma go kwa a mantši.

Ka dinako tše dingwe o be a ekwa malapa ka botlalo, gomme ka dinako tše dingwe a ekwa ba bagolo fela. Ka dinako tše dingwe o be a leka go lwantšha maleatlana, go nyaka thušo goba go ba le ba bangwe. Maleatlana a ile a mo swarelela, a mo dira gore a hloke maatla. O be a tseba maleatlana a… o be a diriša go dintatauwane. E be e le maleatlana a marangrang kudu ao a nyakago madi a yo o mo ratago go mo lokolla. Maleatlana a lerato a maatla ao molekani wa semoya wa motšwasehlabelo a ka robago.

Gantši a be a šoma go divamphaya tša go hloka semoya ka gobane o swanelwa ke go ba le semoya go bitša molekani wa semoya. O ile a diriša maleatlana go feta gatee go thuša lefase go fediša polao ye ya setemone ya bana ba motho bao ba sa tsebego selo efela tumo ya madi.

Kane o ile a sega ka kgegeo ka kgopolo yeo e mo šetšego morago ya go tseba gore go fedile ka yena… ka gobane ga a na molekani wa semoya. Efela, ga senke a kopana le motho wa mohuta wo. Gomme ge eba o na le yena, gona ga go kgonagalo ya gore a ka no tšwelela lebitleng la gagwe mola a etšwa madi. Malachi o be a kwele bohloko kudu… o be a rata mosadi wa gagwe kudu ka fao a nyaka Kane a tseba botebo bja lerato la mohuta woo le go le duma.

O be a tloga a le duma. Makga a mantši o be a rothiša meokgo, a kgopela sengwe le sengwe seo modimo a ka mo theeletšago, go mo tlišetša molekani wa gagwe wa semoya gore a lokologe. Ge eba o bolaile mosadi wa mogwera wa gagwe ka nnete, gona e be e tla ba kotlo ya toka. Efela o be a se na molato go bosenyi bjo.

Bošego bjo bongwe, ka morago ga lebaka le letelele a lahlegetšwe ke tshepo … a kwa seo. Modumo wa moswananoši wa go rora ga Malachi wa tšwelela go polelonoši ya ka gare ga gagwe, wa latelwa ke go goa ga sephoofolo go gongwe ka pefelo. Gomme ka makalo, a kwa lentšu la mosetsana yo monnyane ka godimo ga gagwe thwii a ba kgalema gore ba se bolaye mpšanyana ya gagwe.

Modumo wa lentšu la gagwe le lennyane, la go tšhoga la roba se sengwe ka gare ga gagwe, gwa mo dira gore a dume go lokologa, gore a kgone go mo šireletša go sebata bošegong.

‘Malachi a ka se gobatše mpšanyana ya gago ngwana o monnyane,’ Kane a hebahebetša ka monaganong.

E be e le nnete. Malachi a ka se gobatše motho ge feela ba ka mo senyetša kudu ka tsela ye nngwe… kudukudu ge e le ngwana. Ka go tseba gore mogwera wa gagwe o go gongwe ka godimo ga gagwe, Kane a kwa lehlasetšana la bophelo le boa go yena. O ile a befelwa kudu ge mosetsana a goeletša gape gomme a kwa se sengwe se wela mo fase ka maatla. Madi… a nkgelela madi a maswa a tšhologilego a nwelela ka gare ga mobu wo boleta a etla go yena.

E be ele sa go amogelega seo a ilego a kopana naso. Monkgo wa tsena monaganong wa gagwe gomme wa nyaka go mo romela go bogodimo bjo bogolo bja go gafa, a tseba gore a ka se fihlelele seo. O be a le bokoa kudu ka go fetša nako ye ntši a senke a nwe le lerothodi la meetse… a kgalega go hwa efela a se hwe. Ke mo a kwelego wo mongwe wa menwana ya gagwe o šikinyega.

Kane a lebiša šedi ye kgolo go seo gomme a beakanya seo se bego se šetše monaganong wa gagwe go leka go šikinyega. A kwa matšatši a feta, a bala ka phišo yeo a e kwago ka mabung ka godimo ga gagwe. Monkgo wa madi o mo dikologile bjale, o mo iša pele. Mafelelong, a kgona go diriša matsogo a gagwe ka go nanya gomme a thoma tshepedišo ya go nanya ya go ikepolla ka lebitleng la gagwe.

Matšatši a mantši a fetile gomme ge seatla sa gagwe se tšwelela ka bogodimong, o ile a lla ka meokgo ya lethabo ka nnete. A ikgogela ka ntle ga ditšhila, Kane a bula mahlo a gagwe gomme a lebelela godimo, a sega bjalo ka segaswi ge a bona lefaufau la go fifala le dinaledi ka godimo ga hlogo ya gagwe. Ge a lebelela fase mabung, a lemoga lerathana la lešela leo le nago le marothodi a madi a go oma godimo ga lona. A le topa, a le iša nkong ya gagwe a gogela monkgo wa madi ka teng ao a mo lokolotšego.

A swara segopotšo sa mophološi wa gagwe a se kgwahlišitše ka letsweleng la gagwe, o ile a gogela mmele wa gagwe ka moka ka ntle ga mabu. Malachi le mofetogi yo a bolailego mosadi wa lengau ka nnete o bolokilwe dikgatong tše mmalwa go tloga lebitleng la gagwe.

Ge a lebelela go ba feta go ya lešokeng, o be a tseba gore mosetsana ke kgale a sepetše efela Kane o ile a ba le bonnete bja gore ngwana yo ke molekani wa gagwe wa semoya. Ke mang yo a ka kgonago go roba maleatlana ao Malachi a beilego go yena?

Ka ge a be a sa fokola go ka tsoma mosetsana, Kane a abulela go Malachi, a nyaka go kgoma lerama la monna. Ge a retollela sefahlego sa gagwe go yena, mohemo wa Kane wa mo tlogela a gakanegile. Malachi o be a apere lengina la leswika la madi. Lengina la gagwe!

Ka pejana gape ka pefelo le ka mosepelo wa lebelo wa go se lemogege, Kane a emelela a swere lengina ka letsweleng la gagwe. A lebelela Nathaniel, monna yo a mo tsentšego kotsing. Kane a kgoboketša leswiswi go mo dikologa bjalo ka klouku gomme a timelela leswiswing.

Kane a ntšhetša moya ntle le go bogela mmuši o nyamelela moyeng, o dira manyokenyoke ka pele ga gagwe pele o timelela moyeng. O feditše mengwaga ye lesome a tloga nageng ye nngwe a eya go ye nngwe, kontinente ka kontinente, a ithuta tšohle tšeo di mo lahlegetšego ka lebaka la kotlo ya kgolego ya mengwageng ye masometharo ya gagwe.

O tla aga maatla a gagwe a go mo thuša, a thoma ka mpšanyana ye tšhweu ya seYorkie yeo a e hweditšego e thothomela ka gare ga mošoba wa mohlare ka lešokeng leo. E be e le seruiwaratwa sa motho yo mongwe gomme o be a ithogaka go dira selo se bjalo, efela nyakego ya go e fepa e be e le maatla go feta letswalo la gagwe ka nako ye.

Ka morago ga go e fepa a lemoga gore mpšanyana ke ya ngwana yola a mo lokolotšego. A kwa lehlasetšana la bophelo le sa le ka gare ga gagwe, a dira selo sa go makatša kudu. A loma lenakaila la gagwe, Kane a gapeletša marothodi a mmalwa go wela lelemeng la yona le lepinki gomme a robatša mpšanyana mabung a ipotšiša gore o be a dira eng. Seo se ka se tsoge se šomile… se ka šoma?

O mo phološitše gabedi gomme ga a tsebe seo. Kgopolo ya lentšu la go tšhoga le sa na le maatla a go mo phafoša borokong bjo bogolo. O duma gore nkabe a mmone… gannyane fela go sepelelana le lentšu leo le mo hlobaetšago.

A fihlelela ka mokotleng wa gagwe, a ntšha kholoro ye nnyane gomme a lebelela theke ya go bopega bjalo ka lerapo go yona. O tsebile sefane sa lapa efela aterese mo go yona e be e se sa šoma… ke ya mengwagangwaga. Mola mafelelong a ithutile go šoma ka khomputha, o ile a tsoma efela batswadi ba mosetsana ba be ba hlokofetše gomme ntlo e rekišitšwe. Morwedi, yo a nago le nnete ya gore ke yena a mo lokolotšego, o timeletše bjalo ka nalete bjanyeng.

Kane o ile a lahlela sekerete sa gagwe leotong la nngele gomme a se tima ka go se gata. Ge a boela Los Angeles, o ile a boela tlelapong yela Malachi a kilego a dula go yona le go e sepetša, efela a hwetša gore e rekišitšwe gomme bana ba gagwe ba hudugetše go aterese ye nngwe. Lefelo le leswa e be e se selo eupša e le ntlo ya bobolokelo ya go hlokomologwa, efela mangau a e mpshafaditše e se kgale le go e fetoša tlelapo ya bošego go swanela dinako. Bana ba Malachi gabjale ba sepetša lefelo leo.

O ile a šikinya hlogo a ipotšiša gore ke ka lebaka la eng Malachi a nyetše gape ka ge a tseba ka mo a bego a rata mosadi wa gagwe wa pele. E be e le molekani wa gagwe wa semoya le ge bafetogi ba tsebega ka go rata tša thobalano, ge ba ka kopana le molekani wa bona wa semoya go be go sa kgonege go rata yo mongwe.

Ge Kane a nyakišiša seo, a lemoga gore mosadi wa Malachi yo moswa o mmelegetše bana ba bane gomme a hlokofala ge a belega morwa wa bona o monnyane Nick.

Malachi o hwile bošego bjola a kwelego go rora ka tlase ga mabu, efela Kane o sa kwa nyakego ya tefeletšo e mo ja ka gare. Bontši bja divamphaya di belegwa go tšwa leswiswing gomme mogongwe Syn o be a phošitše ka ga yena ka ge a fapana le bana babo ba babe. Mogongwe ka go lahlegelwa ke monagano wa gagwe mengwaga ye masometharo ya tlaišego e mo sentše kudu gomme gabjale ga a fapane le bona. Monagano wa gagwe o sa le lefelong la go fifala mo Malachi a mmeilego.

Go ya ka mo Kane a lego, ke mangau ao a gogilego madi a gagwe pele. Bjalo o tlile go ba leboga ka tsela ye nngwe… go morafe ka moka wa bafetogi, go thoma ka bana ba Malachi. Joo, a ka se eme fao fela. Sa go latela e tla ba bana ba mofetogi wa go mo tsenya kotsing… Nathaniel Wilder.

Go bopa balatedi ba go mo abela madi go be go se bothata. Kane o sa makaditšwe ke tiragalo ya Goth ya ka tlase ga mabu ka gare ga motsesetoropo. Bontši bo lorile fela ba eba seo e lego sona, vamphaya wa nnete e sego sekamotho sa Goth.

Seo a ilego a se dira ke go fetoša o tee, gomme ka morago a tlogela tlhokego ya semoya e le ka tlase ga taolo ya gagwe. O kgethile yo mongwe wa kotsi kudu sehlopheng, yo a bonalago a šetše a lahlegetšwe ke semoya sa gagwe go ya leswiswing. Raven, wa sekebekwa, yo a bego a le kgauswi le go gafa bjalo ka motho. molahlwa wa Goth, yo a nago le takatšo ya madi le pele a eba le nyakego ya nnete ya ona.

Raven ke motho a nnoši yo Kane a ilego a mmotša ka go hlanamelwa ke bafetogi ba mo latofatša ka maaka gomme ba mmoloka a phela. Ga a tsebe gore ke ka lebaka la eng a boditše Raven... go jewa ke bodutu mogongwe.

Kane o ile a lokolla sekebekwa seo go ya motsesetoropong. Raven o be a befeletše lefase le pele a ka tswalwa leswa bjalo ka ngwana wa bošego gomme gabjale Kane o mo file mo a ka ntšhetšago pefelo ya gagwe gona. Raven o tšere seo a se rwala magetleng a gagwe go lefeletša ka leina la Kane gomme vamphaya yeo ya go hloka semoya ya diriša mabokgoni a yona a maswa ka mo a kgonago.

Ga senke a tshwenyege ka go leka go bolela le Raven go tlogela seo ka gore seo se be se swanela kudu maano a gagwe a go beakanyetša phuhlamo ya lapa la Malachi. Goreng a ka šireletša bafetogi go Raven? Se segolo se a se boditšego mošemane ke gore ga a ke a bolaya batho go iphepa, gape ga a ke a nyaka go dira tshenyo le gatee, ge a sa nyake go dira seo. Ga se molato wa gagwe gore Raven a kgethile go bolaya.

Lekga la mathomo leo Raven a bolailego ke nako e tee fela mo Kane a ilego a tsena gare, a swara mošemane pele a tlogela bahu ba robetše ka leswao la vamphaya leo batho ba ka le bonago gabonolo. Go swara sephiri sa mohuta woo go be go le ka gare ga pabalelo ya gagwe gomme o be a lebetše go abelana sephiri seo le Raven. Ka fao Kane a mo laetša ka fao a segago maswao a meno gomme a dira gore go bonale eke ke polao ya bosathane ye bonolo.

Raven o be a bea batšwasehlabelo ba gagwe kgauswi le Mmino wa Ngwedi gore ba taolo ba ba hwetše. E be e le peakanyo ya maleba. Bontši bja divamphaya e be e le ba babe ka gare ka fao Kane o feditše bontši bja bophelo bja gagwe bja go se hwe a le ka gare ga babolayi. Go bona mošemane yo a bolaya go be go bonala go le maleba go mohuta wa gagwe.

Ge Syn a be a ka tsoga go hlatsela tiragalo ye ya go bolaya, o be a ka thuša lefase go mahlomola a lona ka go bolaya Raven goba go mo kgokelela lebitleng. Bjale ka ge Kane a itemogetše kotlo yeo, a ka nyaka go kgetha lehu la ka pejana.

Pele a ka rakwa, o ile a ba mogwera le vamphaya ye nngwe… Michael. Ba bile mmogo lebaka le letelele go ka gopola goba ge ba nyaka go gopola. Bobedi ba hweditše mpho ya leswika la madi ka gobane ba swere semeoya sa bona… bona le buti wa Michael Demon.

Michael e be e le monna wa go loka… o be a sa le ka lehlakoreng la barongwa ge ba bolela, le ge e le gore o kwele ka tshebi ya dira gore Demon o na le lehlakore le lebe gomme o be a le diriša go buti wa gagwe. Mogongwe a ka etela Demon ge a feditše fa gomme a mo ruta mekgwanyana. Kane o ile a ipotšiša ka ntwa ya ka pejana ya bana ba thari ka gobane Michael o be a rata buti wa gagwe efela di na le go fetoga ka mehla.

Kane o be a sa nyake Michael a tseba ka bobe bjo lebitla le bo tlogetšego bo abula ka gare ga gagwe. O feditše nakonyana mo dibekeng tše mmalwa tša go feta a lebeletše Michael a le kgole. O be a tseba gore Michael le morwa wa lengau yo mogolo, Warren, ke bagwera gabjale… go no swana le ka mo yena le Malachi ba bego ba le ka gona.

Bafetogi ke baradia gomme Michael o sa tlile go hwetša nnete yeo. Go ka tloša bafetogi tseleng, o tla be a thuša Michael la mafelelo… go lefeletša tša kgale.

Kane a fihlelela, le go kgoma lengina leo le swerego leswika la madi ka tsebo ya gore ka mehla le mo ganetša go bolaya batho. Ge eba semoya sa gagwe ke se sebe ka nnete, gona maleatlana a ka gare ga leswika la madi a ka se mo šomele. Ka mehla o ipotšiša gore ke ka lebaka la eng Malachi a hlokomologile ntlha yeo e bonolo… bohlatse bja gore ga a na molato bo be bo le pele ga gagwe.

Le ge go le bjalo… o feditše mengwaga ye masometharo ka kgolegong ya gagwe ka selo seo a sa se dirago. “Tefelo ya morago e tla ba ye mpe bagwera.”

*****

“Mogala wa go maketa?” Chad a botšiša, ge a leka go uta myemyelo ya gagwe, mola sesi wa gagwe a betha mogala kudu go o dira gore o we lebotong. O ile wa wela fase wa pšhatlega lebatong.

Envy o ile a raga mogala ka holong a itira o kare o raga hlogo ya mogwera wa gagwe wa mošemane pele a retologela go buti wa gagwe. “Naa le dimpša ka moka, goba ke fela bao ke intšhago le bona?”

Chad a emišetša diatla tša gagwe godimo a itira o kare o a ineela, “Ka kgopolo ya ka, basetsana le bona ke ba babe. Bjale iša matswalo fase gomme o botše buti wa gago gore go hlagile eng.”

Envy o beile hlogo ya gagwe go tonyeng ga leboto. A ganetša le keledi e tee gore e rothe. Ga a rate Trevor kudu gore a ka mo llela gomme o be a šetše a lapišwa ke bašemane ka moka ka go hloka se goba sela. “Jason o nteleditše mogala gore o nyaka go tšwa le nna. O be a nagana gore ga ke na motho gape ka ge a kopane le Trevor mo tlelapng ya mmino ye mpsha. O be a šetše a ratana le mosetsana yo mongwe gomme a bina le yena lebatong la go bina.”

Chad a šikinya hlogo ya gagwe. A ka se kwele Trevor bohloko ge sesi wa gagwe a mmeya diatla. “Go bjang ge re ka ya tlelapong mmogo?” a emiša ntšhi ya gagwe ya leihlo a sa nyake go lahlegelwa ke se le gatee.

Envy a myemyela, a kgahlwa ke kakanyo, “Mphe metsotso ye lesome ke tla be ke lokile.”

Chad a dumela ka hlogo gomme a dula morumong wa sofa gomme a kgotla remote go bogela ditaba, le ge a be a sa di šetše. O be a sa rate ge a intšha le Trevor le gatee. O be a tseba lesogana leo gore le itira o kare ke moAmerika, o humile, gore bohle ba mo tsebe a le bjalo, gomme seo ga se dire gore a botše Envy maaka ka seo a lego sona. Ge eba Trevor o nyaka go robala le yena, gona o swanetše go tseba nnete gore o robala le mang.

Go thoma kamano ka maaka ga se tsela ya maleba. Ge o ile go bolela maaka, gona ga se wa swanelwa ke go tsenela kamano le gatee. O ile a itebanya le Trevor la mafelelo ge a kopana le yena setišing gomme a botša etšente ya go iphihla go botša Envy nnete ka seo a se dirago goba a ikamologanye le yena. Ga se phošo ya gagwe ge Trevor a sa theeletše motho ge e se fela yena mong.

Seo se dira gore a befelwe ka ge a nagana gore Trevor a ka be a diriša Envy go dira mošomo wa gagwe wa go iphihla ka tiragalong ya ka pareng. Ka ge yena e le mohlomedi wa para ditlelapong tše dintši, seo se file Trevor lebaka la go mo šala morago mo meagong pele ba bula le go dula go fihlela ka morago ga ge ba tswalela. Go ba fao ntle le mašaba go dumelela Trevor go dira dinyakišišo tše di ntši gomme Envy a sa tsebe.

Chad o ganne go iphihla, le ge e le gore sehlopha sa Maphodisa a Kgethegilego ke lebakanyana ba be ba leka go mo gogela fao gabjale. Se a se dirago go fihla gabjale, ke go ba lesogana la mmamoratwa leo ba ka le bitšago ge e le nako ya go raga mabati le go golega batho. Gomme seo se be se mo loketše. A ka upše a rage marago a lesogana le lebe, go feta go khukhuna le go ba bolediša gape a phetlolla dipampiri, a leka go hwetša molato go o mongwe.

Bjale mogwera wa bona Jason, ka lehlakoreng le lengwe, a ka ba molekani wa Envy o mokaone. O tsene sekolo le Jason, efela ke seo e lego bothata. Jason ke kgale a mo rata ka nako ye ba bego ba tsena sekolo se phagamego gomme ba dula mmogo ka ntlong go fihlela ge Envy a mmona bjalo ka buti... e sego lesogana.

Jason o tsenetše Marentšara a Lešoka la Bosetšhaba la Angels ge a etšwa sekolong thwii gomme o sa swere mošomo wo go tloga gona fao. Envy o sa rata go ba le Jason. Gantši o na le go yo bona mogwera wa gagwe wa potego Tabatha, ka ge Tabatha e le karolo ya yuniti ya Jason ya marentšara.

Chad a emelela sofeng gomme ema ka ntle ga lebati la phapoši ya borabalelo ya Envy. Ba be ba dula mmogo go ka lekana mengwaga ya go feta ye mene, go tloga mola batswadi ba bona ba hlokofalago ka kotsi ya sefatanaga, gomme ba be ba kwana kudu. E be e le lephodisa la ka mo gare ga motsesetoropo.

Lebaka la gore a se bolele selo ka go hwetša mošomo wa “nnete” ke gore mašego a mantši o dira tšhelete ye ntši go feta yena. Seo se dira gore dilo di be kaone ka gobane ge nako ya go lefela rente e fihla, Envy ke yena yo a e lefelago gantši, mola yena a hlokomela tšohle.

“Ke tlelapo efe?” a botšiša ka ntle ga lebati.

“Yela ye mpsha ya go bitšwa Mmino wa Ngwedi,” Envy o ile a sopela moriri wa gagwe wa stroperi o motelele godimo a o dira bjalo ka mosela wa pere, a tlogela ye mengwe e lekeletše mokokotlong wa gagwe ka dileyara tše ditelele. “Ke tla swanelwa ke go dira kgopelo ya go ba mohlokomedi wa para ge re le fao.”

Chad a šinyalala. “Ke yona yela e lego go ya mafelelong a toropo, ga go bjalo?” O ile a boela morago phapošing ya gagwe ntle le go emela karabo ya gagwe. E se kgale, dilo gona kua mafelelong a toropo di thomile go ba kotsi. Go timilela ke kotsi yeo e lego gona bjale gape le ditopo tše mmalwa di hweditšwe gona kua polokong ya motsesetoropong wa tlelapo yeo.

Go fihla gabjale ga go selo seo se kgokaganyago thwii le Mmino wa Ngwedi, ntle le gore batšwasehlabelo ba kgetho ke bao ba yago tlelapong yeo ka moka. Ke yona nako yeo Chad le batho ba bangwe ba bantši ba gononwago seo. Go bile le dipotšišo tša gore mogongwe go na le mmolai wa batho ba bantši yo a dulago mo pareng. Batšwasehlabelo ba mmalwa ba bonwe ba le telapong yeo e se kgale. Bjale ka mohlankedi wa maphodisa, a ka se hlokomologe kgonagalo ya gore go na le kgokagano.

Ka ge petšhe le sethunya sa gagwe di šetše di le ka koloing, Chad a tšea teisara ye nnyane gomme a e tsenya ka lepanteng la letheka la borokgo bja gagwe. Ka lebaka la dilo tše di diregago kua tlase, o be a nyaka gore Envy a e sware ge go ka hlaga sengwe sa phošo ge ba le kua tlelapong.

Ge a etšwa ka phapošing ya gagwe, a lebelela phasetšeng gomme a ema ka bjako ge a bona sesi wa gagwe. Sekete sa letlalo se seso le leise e hlodimetše mo fase e mo khupeditše go fihla maotong gwa latela hempe ye ntsho ya leise ya go ba ka godimo ga dimpa. Go be go na le petšhe tša letlalo mo go hlokagalago… tša go lekana go uta matswele a gagwe le go laetša mpa ya gagwe ya go ota le mokhubu.

O be a apere diputsu tša letlalo tše diso tšeo di fihlago ka godimo ga dikhuru tša ditšhaene tše dibotse tša go di kgoka go dikologa kgokgoilane. Le pheta yeo mmagwe a mo filego mengwageng ya go feta e botsefaditše molala wa gagwe le karolwana ye botse ya khwatse ya amethyst e lekeletše go yona. Bontši bja meriri ya gagwe ye mehubedu e bofeletšwe godimo bjalo ka mosela wa pere gomme ye mengwe e wela magetleng a

Dibotsefatši di tloditšwe gabotse le sethalamahlo se seso le sebalafatši gape le setloladipou sa mmala wa go fifala. O be a bogega bjalo ka lekgarebe la go tšea taolo.

“Ijoo, re ile go nyaka madi fa ga go bjalo?” Chad a emiša ntšhi ya leihlo, a mo lebelela gabedi gararo. O be a na le monagano wa go 02tlogela go ya fao gomme a mo dire gore a boele phapošing ya gagwe ka mabaka a polokego.

“Gabotse, ke akantše,” Envy a emiša ntšhi ya leihlo, “Ka morago ga ge ke šomane le Trevor, ke ile go ipshina! Go tloga gabjale, ke a gana go tšwa le lesogana le tee fela. ga ke sa nyaka molekani… ke nyaka ba BANTŠI! Ka tsela yeo ge ke itshwere hlephi, go ka se be le taba ka gobane ke tla ba le ba bangwe bao tla thabelago go mo raga maragong.”

“Ee, ke gopola seo gabotse ge seo se ile sa sepela gabotse kua sekolong se phagamego.” Chad a šikinya hlogo, a tseba sesi wa gagwe gabotse gore ga se a loke go feta ka mo a itirago, “A re sepele ka koloi ya ka gore ge ba setišing ba ka mpitša ke be gona.”

“Ge fela nka bapala ka mabone a matalalerata,” Envy a myemyela, a tseba gore o tla mo dumelela.

Chad a gogela moya teng gomme a leba koloing. “Ke a ikana gore o feta le ngwana ka lebenkeleng la dibapadišwa a pinyeletša phoofolo ye nngwe le ye nngwe yeo e kititšwego le go dira lešata a gafiša batho ka moka ka lebenkeleng.”

“Eng?” a sega. “Ke rata mabone a matalalerata. Batho ba re šutelela ge ke a thumaša.”

“Go swana le ge o ile wa dira mola re feletšwe ke kofi?” a botšiša. “Ga o tsebe gore seo ke tshenyo ya tšhelete ya balefalekgetho, ga go bjalo?”

“Ge o sa homole ke ile go otlela. Gona wena o tla šomana le mabone a mahubedu le saerene,” a mo lemoša ka go tšutšubana fela a bapala.

Chad a homola ka bjako ka gore la mafelelo seo ge se hlaga, o ile a šalela mošomong gomme o be a lwala kudu go ka otlela ka fao a dula ka setulong sa monamedi a robala. Molaodi wa bona o sa mo gopotša ka seo.

*****

Envy o ile tima mabone a matalalerata ge ba le kgauswi le poloko e tee go tloga tlelapong ya bošego gomme a lebelela mabone a bošego ge a bina go selaganya lefaufau leo le apešitšwego ke maru. A bogela ge moago wa mabato a mabedi o tšwelela.

Moraganyana o be a šoma kudu gomme ga senke a be le nako ya go lekola Mmino wa Ngwedi, efela bareki ba bangwe ba gagwe ba boletše kudu ka yona. Ka ntle e be e sa kgahliše. E be e bonala eke ke ntlo ya bobolokelo ya ditena le mafasetere a mmalwa gape le leswao la neon le lephepole le legolo kua godimo ka pele ga leboto.

Batho ba be ba eme ka mothaladi mo gare go selaganya lefelo la go phaka le legolo ba apere gabotse diaparo tše dibotse tša bona tša tlelapo ba boledišana ka go hlaba lešata. Nnete ke gore go be go sa na le mothaladi le ka morago ga iri ya lesome bošego gomme seo se ra gore go šoma fa go tla ba kaone kudu.

“Ee, ke ile go tsenya kgopela ya ka ka nnete,” a myemyela ka kukamo yeo.

“Gabjale o kare mothaladi o ya mafelelong,” Chad a bolela ka kgegeo, a sa nyake go emela go bona Trevor a hwetša seo sesi wa gagwe a mo swaretšego.

O ile a phaka kua mafelelong mo go fifetšego kgauswi le koloi ya Trevor. Pele Envy a ka bula lebati, Chad a mo obelela a mo swara ka letsogo. “Tšea,” a bea theisara ye nnyane ka seatleng sa gagwe bjale, ntle le go bolela selo, a bula lebati la gagwe a tšwa.

Envy a bea menwana ya gagwe go dikologa sedirišwa seo ka myemyelo. Buti wa gagwe o mo rutile go itšhireletša mo e lego gore o kgona le go wiša bontši bja maphodisa ao a šomago le ona ntle le go tšwa kudumela. Efela ka mehla Chad o be a re, ‘Goreng o elwa, mola se o ka se dirago e le go kgotla konopi?’

O ile a tsenya theisara ka mokotleng wa ka thoko wa sekete sa letlalo go bapela le ID ya gagwe. O ile go kgotla konopi ya Trevor bošego ka moka. O tla thakgalela go kgotla konopi ya elebeitha ya go ya heleng go mmona a le ka gare gabjale. Ga go yo a tla bapalago ka Envy Sexton gomme a phomelela.

Ba leba mothalading ba sepela ba lebane gomme Envy o be a thabile kudu ge mothaladi o thoma go sepela ka lebelo gomme gwa ba tšea metsotso ye mmalwa go tsena ka gare.

Moletakgoro o be a apere borokgo bja Armani bjo bobotse le paki ya go bo swanela. Hempe ka gare e be e mo lekana gabotse gomme e laetša kgara ya gagwe ye botse. Moriri wa gagwe o motsotho o wela ka mahlakoreng a sefahlego sa gagwe ka maphoto. Ditedunyna di gona sefahlegong sa gagwe gape o na le mahlo a maso a go hlaba ao o ka rego a phadima mo leboneng la neon.

Chad o lefile gomme a ba laetša diID tša bona pele gomme monna a ba kiba ka seatleng le go klipolla thapo ye hubedu ya belebete ya go ba dumelela go tsena. Ba tsene ka mabati a magolo gomme ba sepela ka holong ye kopana go ya go lebati le lengwe leo le bulegilego ge ba batamela. Ba ile ba ba ema ka bobedi ge ba tsena ka phapošing ye kgolo gomme ba bogela. Go be go bonala eke o tsena lefaseng le lengwe.

Ka mo lefelo la go phaka le tletšego ka gona, o tla nagana gore batho ba tla be ba eme ka maboto ka gare efela ga go bjalo. Dipounama tša Envy tša bulega ge a sepela go selaganya lebato go ya mošobeng o phuntšwego o mogolo mo gare ga phapoši.

Ge ba batamela reile, a lebelela tlase lebatong la go bina. Ka lehlakoreng le lengwe ke tsejana yeo e katološitšwego go selaganya lebato la para ye telele ye otlologetšego kua pele. Para ka boyona e bonala bjalo ka galase ye gašitšwego ka mohlaba ka mabone a neon a go se kganye kudu a logagane go yona ka moka.

Disete tše pedi tša ditepisi di ya fase go tloga ka nngeleng ya gagwe le ka magojeng gomme tša kopana gare pele di fologela go lebato la go bina la nnete kua tlase. Lebato la go bina le be le kganya ka mabone a boleta, go no kgantšha go lekana maoto a bona ka mohuta wa lebone le leso. Tšeo ka moka di tlaleletša mathaithai ao hlotšwego ke lebone la go panyapanya la kua godimo le mabone a bošego a mebala ao a sepelago gohle ntle le go lebana thwii le babini.

Ka tsela yeo e beakantšwego, o kgona go bona babini go tloga dikhurung go ya tlase, efela go feta fao, mebele ya bona e fifetše.

Envy o ile a ithekga ka reile, a lebelela go bona ge eba go na le dipara tše dingwe lebatong la ka tlase efela go be go se selo ge e se lebato la go bina. E be e mo gopotša ka molete ka tsela ye nngwe. Ge o ka fologa ditepisi tšela, o tla ba ka gare ga mogau wa leswiswi leo le fifatšago babini ka sephiring.

“Naa go na le mabato a mararo?” a botšiša, a lebeletše siling ye tiilego kua godimo ga bona. A balela le lebato la ka tlase, leo e tla bago lebato la boraro gomme a ipotšiša gore ke karolo ya tlelapo naa goba ga go tsenwe.

Go thakgala le go hlaba mašata gwa dira gore a lebelele morago kua lebatong la go bina, A bogela ka makalo ge lebone la bošego le letalalerata ya aese le hlaba kheitše mo gare ga molete. O ile a gogwa šedi ke monna wa ka morago ga dipara ka bjako.

Tebelelo ya Chad ya ema kheitšeng le yona. E be e bonala eke ke sele ya kgolegong. Ka gare go be go le monna le mosadi ba dikologana. Le ge a le kgole, a kgona go kwa phišo ya mesepelo ya bona. Manakaila a gagwe a fetoga a mašweu ge a kgwahlišetša banistara ge lesogana la ka kheitšeng le kgoromeletša mmini ka yena kgahlanong le dipara gomme yena a efoga seo ka tlase ga letsogo la gagwe ge a leka go mo gatelela kgahlanong le tšona.

Ge a retologa, lesogana la ngaparela seatla sa gagwe gomme a mmušetša morago bjalo ka legadima go yena pele a hlahla diatla tša gagwe go ya dipareng tša ka pele ga gagwe. A mo dira gore a itshwareletše ka dipara, a forohla mmele wa gagwe mo mmeleng wa mosetsana wo o sa aparago go felelela go fihlela hlogo ya gagwe e wela ka santhago kgareng ya gagwe o kare o ipshina ka tiragalo yeo.

E be e le mokgwa wa sephoofolo, o nyakile go swana le mmino wa thobalano wa sekgale wa mohuta o mongwe. Chad le Envy ba ikhwetša ba gogilwe šedi ke pontšho yeo, taetšo e ba amile bobedi ka ditsela tša go fapana.

Chad a ba bogela metsotso ye mmalwa ka setu ge bobedi bjo bo fofa gomme bo ahlologana gore monna yo a swareletše ka boemo bja go fapana. Phišo ya mesepelo ya bona e dirile gore ditšene tša gagwe di thatafale ge letheka la monna le eya godimo kgahlanong le marago a mosetsana. A tloša tebelelo ya gagwe ka kgakanego, Chad o ile a ikgapeletša go lebelela dikgabišo lebotong la ka godimo tšeo a kgonago go di bona go tšwa lehlakoreng la gagwe.

E be e le mabone a go panyapanya ka mabone a maso a go iketla kgauswi ga sethalwa sa setaele sa mebele ya go phadima ya mangau, tše dingwe di elwa gomme go na le dibata di tsoma. Diphoofolo tša kotsi di bonala di na le bophelo bja tšona. Sethalwa sa go se šikenyege se bonala eke se sepela le mabone, se efa kakanyo ya gore diphoofolo tšeo di a phela gomme di bogetše.

O be a tloga a dumela gore hlogotaba ke ya moswananoši efela e a šoma. Mahlo a gagwe a latela mosepelo wa mabone go selaganya maboto gomme a lemoga diketwane di fegilwe magareng ga diswantšho, tše dingwe ka dikholoro tša mebetlwa le difepi tša letlalo tše diso.

O ile a lebelela morago kheitšeng le go hwetša Jason ge a bona Trevor lebatong la go bina kgauswi le mabone a bošego. Setlaela seo se be se le magareng ga basetsana ba babedi gomme a bonala a ipshina kudu. Ge a lebelela Envy, Chad a tseba gore ga a swanela go bolela selo ge a lemoga gore o be a lebeletše thwii go boraro bjo.

Envy o ile a retollela hlogo ya gagwe ka thoko go leka go lebeledišiša Trevor o kare ga a mo tsebe. O ile a ipotšiša gore ke ka lebaka la eng a ile a intšha le yena sa mathomo.

O swanetše go dumela gore o botse ge o mo lebelela. O botse kudu e tla ba sekafoko se sekaone. O lebelelega bjalo ka mosesi wa California ka morri wa go fofa wa bosehla bja mohlaba, letlalo la gauta le mahlo a matalalerata le bosehla. O be a ratega kudu gomme a ipshina kudu.

Efela ge o tloša dipopo tša gagwe tše dibotse, ga go se sekaone seo se ka kgahlago mosetsana. Seo se šetšego ka moka ke lešilo la mafelelo la kholetšeng yo a belegwego a na le lepola la silibera ka ganong. Ge a le gona, o na le tlhokomelo ye kgolo, efela o tla timelela bjalo ka nalete ka bjanyeng, ka dinako tše dingwe matšatši a go latelelana.

Se sengwe se sebotse seo a ka se naganago ka yena ke gore o be a thabiša ka mapaing, gomme o mo file a mangwe a mabaka a mabotse bophelong bja gagwe.

Ge a gopola, o be a kgolwa gore o a mo rata ka nnete… a mo rata go feta tekanyo. Seo se bontšha gore ke eng seo a se tsebago ka banna. Go bolela nnete, o šetše a lapišwa ke go ba noši… efela bjale, seo ga se lebaka la gore a intšhe le lesogana.

A goga moya ka tlhologelo ge a mmogetše a swara lerago la mosetsana yo a mo gomaretšego, a lemoga gore ga a na mona le gatee. Ge eba o be a le maratong le yena, na o be a ka se befelwe kudu gabjale ntle le go no kwa bohloko fela? Seo se mo tshwenyago kudu ke gore o mmoditše maaka a gore o nyaka yena fela.

Jason ke kgale a lebeletše Envy gore o tla tla ka tlelapong setulong sa gagwe sa para kgauswi le lebati. O tsebile gore o tla tla gomme ga se a makatšwe ke go bona Chad le yena. Ka morago ga go ba fa metsotso ye mmalwa go lebelela gohle, o ile a myemyela ka kgotsofalo ge a lemoga kgatelelo yeo e lego magetleng a Envy gomme a tseba gore o bone molekani wa gagwe a ipshina lebatong la go bina.

O ile a leka go uta mona wa gagwe mo dikgweding tše mmalwa tša go feta gomme a sa nyake go mo kweša bohloko, efela ge eba se ke seo se nyakegago go mo tloša go Trevor, gona se mo loketše.

Ge a retologela go Kat, mohlokomedi wa para yo mobotsana yo a bego a bolela le yena, Jason a myemyela, “Ke go boditše gore ba tla tla.” O ile a dumela ka hlogo a lebeletše ka lehlakoreng la Envy le Chad.

Ke kgale a le mo iri ka moka, efela ka morago ga go hlatsela Trevor a sa tshepagalele Envy, o be a se na maikutlo a go tsena ka lešabeng. O feleleditše a ikwa a tenegile gomme a thoma go bolela le Kat go fetiša nako. O ile a mmotša gape ka ga Trevor ge a sa tshepagalele Envy.

“Ka fao yola ke mogwera wa gago wa potego le sesi wa gagwe?” Kat a lebelela bobedi bjo efela kgahlego ya gagwe e le go lephodisa. Ge Jason a sa ka a mmotša gore Chad ke lephodisa, o be a ka se tsoge a tsebile seo. O be a le botse kudu.

A ka ba dikgato tše tshela ka letlalo la go atlwa ke letšatši, moriri o motsotho mo dintlheng o na le go taga ga gauta, E be o le o motelele go feta ka mo wa maphodisa o tlwaelegilego gomme o bonala eke o foketše ke phefo wa ya ka thoko, wa mo tlogela ka sebopego sa go tšhošanyana. O ikhweditše a mmapetša le Quinn, gomme a panyapanya mahlo ge a lemoga gore o dirile seo gape. O ile a lebelela Jason gape gore ba swanetše go itebatša ka tša kgale goba ba tla ba kotsing ya go kgopišwa kgafetšakgafetša.

“Ga a bonale bjalo ka lephodisa,” Kat a realo, a lebelela Chad gomme a ipotšiša gore o intšha le mang. Jason ga se a bolele seo le gatee.

“Ee gabotse,” Jason a ngota molomo ge a lemoga ka tsela yeo a bego a lebeletše Chad. A šikinya hlogo ya gagwe, “Ke tla boa ka morago ga metsotso ye mmalwa.”

Ge a fetša go nwa sota ya gagwe ya tlelapo, a tloga setulong gomme a leba go bagwera ba gagwe. Ge a batamela kgauswi le bona, a bea seatla sa gagwe legetleng la Envy. A iša hlogo ya gagwe fase kgauswi le thinana ya tsebe ya gagwe gomme a hebahebatša a re, “O nyaka go bina?”

Envy a myemyela ntle le go retologa. “Joo, nka rata seo!” a realo, gomme bjale a fologa ditepisi tša kgauswi, a tlogela Jason a eme fao le Chad ka seatla sa gagwe se sa le legetlemg la boikgopolelo. O ile a panyapanya ge a ekwa Chad a sega.

“Akgaa,” Jason a goga moya ge a mmona a fologa.

Chad a mo phaphatha legetla ka kwelobohloko ge a mo eta pele go boela ka pareng gomme a ithekga fao, “O se dire gore seo se go tshwenye. Ke nagana gore Envy o na le kgopolo e tee gabjale gomme e amana le boitefeletšo.”

A lebelela mosetsana ka morago ga para gomme, ka motsotswana, a lebala le gore Jason o gona. O be a le botse ka letlalo le leporontshe le meriri ye meso ye metelele kudu e tatagane magetleng a gagwe gape e lebile tlase kua lethekeng la gagwe. Mahlo a gagwe a be a fapana, a matalalerata ya go taga ka tlhaka ya nthokolo ye ntsho go dikologa mmala wa go taga.

Ke dipounama tša go tlala tšeo di gogilego tebelelo ya gagwe ge a re, “Sota fela hle.”

“Ga o nwe bošegong bjo?” Jason a botšiša, gomme a leka go se lebelele mogweta ge mahlo a Chad a le go Kat, ge a araba. Goreng ge basetsana ka moka ba rata maphodisa?

“Aowa, ke na le maikutlo a gore ke se nwe gabjale. Ga ke rate Trevor ka fao ke file Envy theisara ya ka go raloka ka yona.” Chad a tloša mahlo go mosetsana motsotswana go myemyelela Jason. “Gape ke otlela koloi ya maphodisa.” O tseba gore Jason o tla kwešiša.

Jason o ile a tloga pareng ka potlako a lebalela mogwera wa gagwe wa go ba makenete wa mosetsana. “Jo nna joo, ga go ka tsela yeo nka se bonego se!” O ile a kitimela reileng, ge lesego la Chad le mo felegetša.

“Gabotse, ke batho ba babedi bao ke ba thabišitšego bošegong bjo,” Chad a ponyetša Kat leihlo a tseba gore o theeleditše, gomme a lefela seno sa gagwe. Go kaone go yo bona gore Envy o dira eng.

Kat a dumela ka hlogo ge Chad a mo fa masome a mabedi gomme a mmotša gore a sware tšhentšhi pele a tloga go ba le Jason. Banna ba le ba babedi ba ka ba kotsi go dihomone tša mosetsana. Jason o na le meriri ye metsotho ya mohlaba le sefahlego le mmele wa motlelara wa Bay Watch.

O bone bontši bja basetsana ge ba feta ba leka gore a ba lebelele, Jason o be a sa lemoge ofe goba ofe wa bona gomme a bonala a lahlegile ka dikgopolong tša gagwe… go fihlela ge a thoma go mmotša ka bagwera ba gagwe ba potego. Chad, le mosetsana yo bobedi ba mo šireletšago gakaalo.

Ga se a bone seo go motho yo mongwe ntle le go bobuti ba gagwe ba go mo šireletša gakaalo. O ile a panyapanya ka go nanya a gapeletša seswantšho sa Quinn go tšwa ka hlogong ya gagwe gomme a nepiša go bothata bjo bo lego gona gabjale.

Ke tshwayotshwayo ya theisara yeo e thušitšego go tloša monagano wa gagwe go Quinn. Kat o ile a akanya go lemoša bobuti ba gagwe ka boithabišo bjo bo boswa bjo bo tlilego go thoma. Ba bile le bothata bja go šomana le dipolao tše dintši tša go dikologa tlelapo. Sa mafelelo se ba se tsomago ke go ba gogela šedi ye mpe ye nngwe.

Chad o ile a khunama gannyane reileng a nyakana le Envy. A leboga modimo ge babini ba kheitše ba be ba sa diriša lebone la bošego gomme gwa nolofatša go mmona. Ka go kwa go ngunanguna gannyane go etšwa go Jason, a latela tebelelo ya Jason go fihlela a mmona a bina gare ga masogana a mmalwa, kgauswi le go kganya ga lebone la bošego la go kganya ka boleta mo kheitšeng. O ile a nyenyebala, a sesefatša mahlo gomme a ipotšiša gore o ikemišeditše eng.

Go kaone ka ge a lebeletše Trevor. Akere, ke leboga mogala wa gago,” a bolela ka lentšu le tibilego. “Ke be ke emetše sa go swana le se gore se hlage.”

Jason a emiša magetla, “E be e se tša ka. Ke tša gagwe. O swanelwa ke tše kaone go feta yena.” A leka go myemyela, ge a bogetše, a tseba gore o tla ba noši gabjale. Efela pono ya masogana a mangwe ka moka ba goga šedi ya gagwe ya dira gore myemyelo ya gagwe ye nnyane e fetoge manyami.