Читать книгу Гунилгэн хохтолин - Группа авторов - Страница 3

Минӈӣ тэгэ̄в – эвэнкӣл

Нонон эвэнкӣл, булта̄дянал, ӣндеӈкитын. Эвэнкӣ аяткӯ гиркин – тар орон. Эвэнкӣл агӣдук мэ̄ндӯвэр упкатъя гавкӣл. Бэйӈэ̄л ирэ̄ксэлдуктын дю̄ва дасивувкӣл, тэткэ̄евэр, унталъявар-да улливкӣл. Мо̄лдук бэрилэвэр, бэю̄мэкӣт, олломокӣт-та идэгэлэн о̄дяӈкитын. Аямат эвэнкӣл агӣ бэйӈэ̄лвэр са̄рэ. Куӈака̄ндуквар омолгича̄р ургэпчу хава̄дӯ – бэю̄мэкӣттӯ – алагӯвдявкӣл. О̄н бэю̄дэ̄, олломӣда̄ нуӈарватын амты̄лтын алагӯӈкитын. Бэйӈэ̄лвэ гэлэ̄ктэденэл, эвэнкӣл орорди урэлӣ1 нулгиктэдеӈкитын.

Упкачил бэйӈэ̄л удялватын аят са̄ӈкитын. Нуӈартын мэ̄нӈӣвэр хоктовор аят са̄ӈкитын: ӣдӯ, э̄куды̄ бирака̄н, урэкэ̄н – упкатва дылдӯвар дявӯчадяӈкитын, ӈӣдӯ-кэт эрӯе энэл о̄ра, мэ̄нмэ̄рнунмэр боритма̄тчэнэл. Иты̄лвар, одё̄лвор энэл омӈоро, бидеӈкитын. Эхиткэ̄н-дэ ха̄дыл эвэнкӣл тыкэ̄н-дэ̄т ӣндевкӣл. Эхиткэ̄н эвэнкӣл хутэлтын таткӣчилдӯ, институтылдӯ татчара.

Бӯ эвэды̄лвэ иты̄лва, одё̄лво эӈнэрэв омӈоро. Урокилдӯвар эвӣкэ̄рвэ, тагивка̄лва, гунмэ̄килвэ са̄лиӈнарав.

Анӈанӣтыкин дюга бӣ эгдэ̄ндулэ̄2 ӈэнэктэӈнэм. Тадӯ минӈӣл амты̄лви ӣндерэ. Мунӈӣ урикӣтвун бира Коӈку гэрбичӣ дагадӯн илитчаран. Бирадӯ бӯ элбэскэ̄тчэрэв, оллолво олломӣдярав. Урикӣттӯ кэтэ хава̄ бивкӣ. Аха̄л инэӈӣтыкин дэвгэ̄лвэ ирӣдевкӣл, ирэ̄ксэлвэ монӈӣдявкӣл, тэткэ̄лвэ уллидевкӣл.

Тэгэлтэнэ, акнӣлви ама̄нун орорво, гиркунал, оно̄вкӣл. Нуӈартын нэ̄мэлвэр гавкӣл, орор удялдулӣтын оно̄вкӣл. Орорво бакакса̄л, угучакилвар гэлэ̄ктэвкӣл. Угучакилдула̄вар угикса̄л, нуӈартын орорво урикӣттулэ̄ илбэвкӣл.

Бӯ-кэ, куӈака̄р, урикӣттӯ самӈӣрва илаӈнарав, ирэ̄ктэ тэкэндӯн турукэвэ уӈкуӈнэрэв. Орор турукэвэ чивда̄вар ая̄вувкӣл. Орор, хуктынэл, эмэвкӣл, бӯ тарилва куре̄лэ̄ ӣвувкэ̄ниӈнэрэв. Нямӣлва куре̄лэ̄ илбэӈнэрэв, эӈнэкэ̄рвэ дяваты̄ӈнарав, головколо уйты̄ӈнэрэв. А̄хилтана энӣ экӣннунмэр нямӣлва сириливкӣл. Укумнӣ эдэ̄н идарилла ла̄лбука̄ до̄дӯн нэ̄вкӣл, оёлӣн ня̄н ла̄лбука̄т дасивкӣл. Депиксэ̄л, бӯ эвӣӈнэрэв, амака̄ адылва, сиргалва о̄ливкӣ, акнилви ля̄мпилва тугэнӣлэ̄ итыгаливкӣл.

Тыкэ̄н дюга бӯ урэдӯ биӈнэрэв. Урэдӯ со̄ ая!

Дукуран Кирилл Абрамов, 12 анӈанӣчӣ,
бикӣттӯ Усть-Нюкжадӯ Тындинскай райондӯ
Амурскай областьтӯ бидерӣ,
6 класстӯ Усть-Нюкжинскай
общеобразовательнай
школадӯ алагӯвдяри

1

Эвенки села Усть-Нюкжа Амурской области часто слово урэ гора употребляют также в значении тайга, лес.

2

Эгдэн – тар агӣ.

Подняться наверх