Читать книгу Гунилгэн хохтолин - Группа авторов - Страница 4

Урикӣчилвун

Минӈӣл тэгэ̄лви эгдэ̄ндӯ3 ӣндерэ. Анӈанӣтыкин нуӈартын эгдэ̄ндулӣ нулгиктэдевкӣл. Мунӈӣл энты̄лдӯвун тадӯ кэтэ урикӣчилтын бихи. Неӈне эктэӈкирэдӯ, тура̄ндӯ, со̄нка̄ндӯ-да бе̄галдӯ бирадӯ Тунгурчадӯ, урикӣттӯ Неӈнекӣт гэрбичӣдӯ илгимадявкӣл4. Тала̄, каникулил о̄рактын, мунэвэ, куӈака̄рва, энты̄лвун бикӣттук орорди эмувувкӣл. Тадук мучӯн бе̄гадӯ ге̄ла̄ урикӣттулэ̄ нулгиӈнэрэв. Тар урикӣт гэрбин Устье-Коӈку, тадӯ бӯ нямӣлва уиӈнэрэв, бирала̄ элбэснэ̄ӈнэрэв, олломина̄ӈнарав. Тадук илӣ урикӣттулэ̄, Тунгурча гэрбичӣлэ̄, нулгиӈнэрэв. Тар урикӣттӯ со̄ ая! Хэгды бира Тунгурча эе̄ндерэн. Аяпчу инэӈӣдӯ бӯ инэӈӣвэ элбэ̄счэӈнэрэв, тар бирадӯ со̄ кэтэ оллол бихи.

Тадук бӯ дыгӣ урикӣттулэ̄, Амнӯннака̄н гэрбичӣлэ̄, нулгиӈнэрэв. Тадӯ со̄ хэгды ая амнӯнна. Урикӣтъевэр урэдӯ иливуӈнарав.

Тунӈӣ урикӣт гэрбин Коӈку, тадӯ хэгды куре̄ бихин. Бира Коӈку эе̄ндерэн, тадӯ хэгдыл майгӯл бивкӣл. Коӈкудӯ бӯ диктэлвэ тэвлэӈнэрэв. Тар урикӣттӯ горово эӈнэрэв урӣнэ.

Тадук амаргӯ бикӣттулэ̄, Болокӣт гэрбичӣлэ̄, нулгиӈнэрэв. Тадӯ бӯ няӈталва, дэвунӈэктэлвэ тавдяӈнарав. Эр урикӣттӯ орордӯ ая бивкӣ. Эр урикӣттук энты̄лвун упкат куӈака̄рва таткӣттула̄ орорди сурувувкӣл, дю̄р инэӈӣлӣ бӯ тала̄ ихиӈнарав.

Тыкэ̄н бӯ дюга эгдэ̄ндӯ энты̄лнунмэр биӈнэрэв!

Дукуран Сабрина Абрамова, 13 анӈанӣчӣ,
городтӯ Нируӈнадӯ Саха Республикадӯ бидерӣ,
8 класстӯ общеобразовательнай
школадӯ «Арктика» алагӯвдярӣ

3

Иеӈнэдӯ бидерӣл эвэнкӣл агӣва, тайгава эгдэ̄н, гуннэл, гэрбивкӣл.

4

Илгимадямӣ – делать стоянку.

Подняться наверх