Читать книгу Wie im Lewe - Hans Schimmel - Страница 8

Mei Hoor

Manche Männer hawwe Glick,

isch net, mir gehe d‘Hoor zurick.

Ganz langsam un recht unscheinbar,

werre wenischer die Haar.

Als wenn se wollte sisch verstecke,

bilde sisch Geheimratsecke.

Isch konnt des Ganze gar net glawe,

doch seh isch‘s jetzt mit eigne Age,

uff meim Haupt do isch en Fleck,

dort sin die Hoor ganz efach weg.

Vielleischt iss dess e Allergie,

isch guck noch mol genauer hi,

die Gewissheit glab isch kaum,

uff meim Kopp is nur noch Flaum.

An äänere spezielle Stell

do werd des Haupthaar plötzlich hell.

Panisch sterz isch aus dem Raum,

nei ins Auto, aus der Traum.

Meine Jugend is vorbei,

un isch verlier die Hoor debei.

Isch würd die Kahlheit net ertrage

und werd a jetzt de Dokter frage,

ob es net e Mittel gibt,

dess mei Hoor macht widder fit.

In de Praxis ogekumme

wurd isch a glei drogenumme,

denn kummscht du als Privatpatient,

in de Praxis jeder rennt.

Wenn beim Dokter Bargeld lacht,

dann werd a kään Termin gemacht.

Herr Dokter guck, isch muss ball sterwe,

un es freie sich mei Erwe,

denn mei Lewe iss zu End,

wenn sisch des net zum Gute wend.

Mei Hoor, die gehe mir verlore,

deswege bisch du auserkore,

misch vum Haarausfall zu heile,

un disch dobei zu beeile,

bevor noch Schlimmeres passiert

un misch gar nix mehr kuriert.

De Dokter guckt un lächelt leicht,

uff die Stell wo‘s Haupthaar weicht.

Mein guter Mann, die klääne Ecke

kann mer noch ganz gut verstecke.

Un in de Mitt, die freie Lücke

kennt mer ach noch üwwerbrücke.

Mit nem Kamm un Gel im Hoor,

legen die sisch do devor.

So, dass dann, mein guter Mann,

keen Mensch ihr Glatz mehr sehe kann.

Isch kann die Welt net mehr verstehe,

kann der denn mei Problem net sehe?

Herr Dokter, guck genauer hi,

aus meim Kopp do wächst e Knie.

Tja, do gäb‘s noch Implantate,

Perücke un a Imitate,

die so e Stellche kennt verdecke

un wenn isch wollt, det er mol cheke,

was fer misch gääignet wär.

Fer des Ganze wären ungefähr

so fünf- sechstausend Euro zu berappe.

Isch beginn nach Luft zu schnappe.

Denn bei dem genannte Preis,

werd mers jetzt grad rischtisch heiß.

Isch bin zwar eitel, doch net bleed

un wees, dass dess ach anerscht geht.

Ich bin dann in die Stadt gelaufe,

um mir dort e Kapp zu kaufe.

Drei Euro Fuffzisch war de Preis,

jetzt iss mer‘s nimmie ganz so heiß.

Die Kapp, die schützt vor Sonnestrahlung,

is efach in de Handhabung.

Un wenn ins Bett geh‘scht nimm‘scht se ab,

des is de Vorteil vun de Kapp.

Ich geh dehem die Hausdier nei

un mei Fraa is grad debei,

des Owendesse ozurichte,

als isch erzähl ihr die Geschichte.

Dass mei Hoor die Flucht ergreife,

trotz Shampoo un Hygieneseife.

Isch wees gar net, was du hosch,

setz disch hi un halt dei Gosch.

Dann werd isch dir jetzt mol sage,

was de Grund vun deiner Plage.

Wenn vum Kopp des Hoor sisch trennt,

dann is de Mann noch sehr potent.

Die Hormone sin in Schwung

un des is e Bereicherung,

fer dess eheliche Lewe,

so isses ewe.

Ich lächel glicklisch, guck se o,

du hoscht völlisch recht, mei Fro.

Was sin schun zwee drei Härcher wert,

schlimmer wär es umgekehrt.

Mei Fraa, die sacht, ach wescht, mein Schatz,

e schäänes G‘sischt, des braucht halt Platz.

* * *

Isch hab en Schbreißl – doppeldeutig. Entweder einen Holzsplitter im Finger oder einen dünnen Hungerhaken als Ehemann

du bringscht misch uffs Quetschebäämel – pass‘ ja auf, du machst mich nervös oder zornig.

Wörtliche Übersetzung: Du bringst mich dazu, auf einen Zwetschgenbaum = Pflaumenbaum zu steigen. Was wir dort wollen? Nicht fragen, sonst bringen Sie uns aufs Quetschebäämel.

Dischbediere - Eine Diskussion führen. Klappt besonders gut mit ein paar Bierchen im Wirtshaus.

Dreiedreisisch – 33- Pizza mit scharfer Salami, Pilzen und Knoblauch.