Читать книгу The Best of the World's Classics (All 10 Volumes) - Henry Cabot Lodge - Страница 130
ОглавлениеTHE BAPTISM OF CHRIST[15]
1. The bigynnynge of the gospel of Jhesu Crist, the sone of God.
2. As it is writun in Ysaie, the prophete, Lo! I send myn angel bifore thi face, that schal make thi weye redy before thee.
3. The voyce of oon cryinge in desert. Make ye redy the weye of the Lord, make ye his pathis rihtful.
4. Jhon was in desert baptisynge, and prechinge the baptym of penaunce, into remiscioun of synnes.
5. And alle men of Jerusalem wenten out to him, and al the cuntree of Judee; and weren baptisid of him in the flood of Jordan, knowlechinge her synnes.
6. And John was clothid with heeris of camelis, and a girdil of skyn abowte his leendis; and he eet locusts, and hony of the wode, and prechide, seyinge:
7. A strengere than I schal come aftir me, of whom I knelinge am not worthi for to vndo, or vnbynde, the thwong of his schoon.
8. I have baptisid you in water; forsothe he shal baptise you in the Holy Goost.
9. And it is don in thoo dayes, Jhesus came fro Nazareth of Galilee, and was baptisid of Joon in Jordan.
10. And anoon he styinge vp of the water, sayth heuenes openyd, and the Holy Goost cummynge doun as a culuere, and dwellynge in hym.
11. And a voys is maad fro heuenes, thou art my sone loued, in thee I haue plesid.
12. And anon the Spirit puttide hym in to desert.
13. And he was in desert fourty dayes and fourty nightis, and was temptid of Sathanas, and was with beestis and angelis mynstriden to hym.
14. Forsothe aftir that Joon was taken, Jhesus came in to Galilee, prechinge the gospel of the kyngdam of God,
15. And seiynge, For tyme is fulfillid, and the kyngdam of God shal come niy; forthinke yee, or do yee penaunce, and bileue yee to the gospel.
16. And he passynge bisidis the see of Galilee, say Symont, and Andrew, his brother, sendynge nettis into the see; sothely thei weren fishers.
17. And Jhesus seide to hem, Come yee after me; I shal make you to be maad fishers of men.
18. And anoon the nettis forsaken, thei sueden hym.
19. And he gon forth thennes a litil, say James of Zebede, and Joon, his brother, and hem in the boot makynge nettis.
20. And anoon he clepide him; and Zebede, her fadir, left in the boot with hirid seruantis, their sueden hym.
21. And thei wenten forth in to Cafarnaum, and anoon in the sabotis he gon yn into the synagoge, taughte them.
22. And thei wondreden on his techynge; sothely he was techynge hem, as hauynge power, and not as scribis.
23. And in the synagoge of hem was a man in an vnclene spirit, and he cried,
24. Seyinge, What to vs and to thee, thou Jhesu of Nazareth? haste thou cummen bifore the tyme for to destroie vs? Y woot thot thou art the holy of God.
25. And Jhesus thretenyde to hym, seyinge, Wexe dowmb, and go out of the man.
26. And the vnclene goost debrekynge hym, and cryinge with grete vois, wente awey fro hym.
27. And alle men wondriden, so that thei soughten togidre among hem, seyinge, What is this thinge? what is this newe techyng? for in power he comaundith to vnclene spirits, and thei obeyen to hym.
28. And the tale, or tything, of hym wente forth anoon in to al the cuntree of Galilee.
FOOTNOTES:
[15] Part of Chapter I of the Gospel of St. Mark, as translated by Wyclif. It will be noted that Wyclif's orthography is irregular, the same word being often spelled differently on the same page. This selection is printed in the original as a specimen of the English of Wyclif's time.
