Читать книгу Authors and Writers Associated with Morristown - Julia Keese Colles - Страница 31

I am far frae my hame, an' I'm weary afterwhiles,

For the langed-for hame-bringing an' my Father's welcome smiles;

I'll ne'er be fu' content, until mine een do see,

The shining gates o' heaven an' my ain countree.

The earth is fleck'd wi' flowers, mony tinted fresh and gay,

The birdies warble blithely, for my Father made them sae;

But these sights an' these soun's will as naething be to me,

When I hear the angels singing in my ain countree.

I've His gude word o' promise that some gladsome day, the King

To his ain royal palace His banished hame will bring;

Wi' een an' wi' hearts running owre, we shall see

The King in His beauty, in our ain countree;

My sins hae been mony, an' my sorrows hae been sair,

But there they'll never vex me, nor be remembered mair;

His bluid has made me white—His hand shall dry mine e'e,

When he brings me hame at last, to mine ain countree.

Sae little noo I ken, o' yon blessed, bonnie place,

I ainly ken its Hame, whaur we shall see His face;

It wud surely be eneuch forever mair to be

In the glory o' His presence in our ain countree.

Like a bairn to its mither, a wee birdie to its nest,

I wad fain be ganging noo, unto my Saviour's breast,

For he gathers in His bosom witless, worthless lambs like me,

An' carries them Himsel', to His ain countree.

He's faithfu' that has promised, He'll surely come again,

He'll keep his tryst wi' me, at what hour I dinna ken;

But he bids me still to wait, an' ready aye to be

To gang at ony moment to my ain countree.

So I'm watching aye, and singing o' my hame as I wait,

For the soun'ing o' His footfa' this side the gowden gate,

God gie His grace to ilk ane wha' listens noo to me,

That we a' may gang in gladness to our ain countree.