Читать книгу Молитвы православным святым - Группа авторов - Страница 16

Егда узреша идольстии чтители многолетна разслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо, нещадно за Христа стружему и опаляему бывшу, со yмилением зовем:

Радуйся, наслаждения земная презревый;

радуйся, благ вещественных превысший.

Радуйся, яко вся красная мира сего ни во что же вменил еси;

радуйся, яко славу скоротекущую с себе отрясл еси.

Радуйся, неуловим пребывый ловлении Велиара;

радуйся, победивый мучителей коварства.

Радуйся, не пощадивый за Христа жизни своея;

радуйся, враг явивыйся враждебныя плоти.

Радуйся, многобожия широту утеснивый;

радуйся, Божественною силою идолы поправый.

Радуйся, острейшая стрело, язвящая враги;

радуйся, предстателю, заступаяй верующия.

Радуйся, великомучениче и целителю Пантелеимоне.