Читать книгу 'n Uur van lig - Nina Smit - Страница 88

20 Maart – Onverstaanbare swaarkry

20 MAART

Lees: Job 2:1–10

Onverstaanbare swaarkry

Die Here vra toe vir die Satan: “En my dienaar Job, het jy hom nou gesien? Sy gelyke kry jy nie op aarde nie: hy is vroom en opreg, hy dien My en vermy die kwaad. Hy het vroom gebly, al het jy My daartoe gebring om hom sonder rede te ruïneer.” – Job 2:3

God sê hier Self dat Job onberispelik geleef het; dat hy ten spyte van die ondenkbare rampe wat hom getref het, God nie een keer verwyt het nie. Dit gebeur baie keer dat kinders van God swaarkry, terwyl dit baie goed met mense gaan wat hulle nie aan God steur nie.

Net soos geloof in God ons nie van swaarkry gaan vrywaar nie, is dit ook nie ’n gegewe dat mense wat sonder God leef wel hul verdiende loon gaan kry nie. Oënskynlik gaan dit met die meeste van hulle heel goed! Tog is die boodskap van die boek Job juis dat swaarkry ons nie van God af mag laat wegdraai nie. Soms laat God juis swaarkry in ons lewe toe om ons weer van die feit bewus te maak dat ons nie sonder Hom kán leef nie. Die enigste troos vir ’n Christen in so ’n situasie is dat God ons nooit alleen laat met ons swaarkry nie, maar dat Hy ons hande vashou te midde van lyding. Jy het boonop die versekering dat jou onverstaanbare aardse swaarkry nie vir altyd sal aanhou nie, maar dat dit vir jou eendag op die hemel self gaan uitloop.

Here, ek kan my swaarkry van die oomblik nie verstaan of verwerk nie. Dit voel vir my so onregverdig. Vergewe my en leer my net weer dat U te midde van die swaarkry by my is en my vashou. Amen.