Читать книгу Молитвы. Избранное - Сборник - Страница 3

Моляйся о себе нужду исполняет,

моляйся о ближних любовь изъявляет.

Аще хощеши Бога умолити,

сия в молитве тщися сохранити:

Буди во стане его благодати

и не престани в Бозе уповати.

Да приложиши к тому смирение

и сохраниши долготерпение.

Внемли прилежно, да благо просиши,

сия храня вся, Бога умолиши.

От плоти и духа человек сложися,

убо ты душею и телом молися.

Еже ум внутрь себе мыслми начинает,

то тело уст гласом к Богу да глашает.

Душа имать нужду грехов прощения,

благодати, света и прославления.

Плоть – здравия, пищи и управления,

а обою убо да суть моления.

Благо умом в тайне молитися Богу,

но и уст молитва имать пользу многу,

Ибо в самом уме теплость возбуждает,

разумну со Богом беседу делает.

Моляйя Богу сбеседник бывает,

что благо просит, то все получает.

Утро молитву к Богу воссылати

требе, да дела наши управляти

Сам благоволит. В вечер же молити

должно, да грехи изволит простити,

Яже в поприще дневном сотворихом

словом и делом, ли зле помыслихом,

И да нощь даст нам в здравии прежити,

не искушенным от демона быти.

Не много во молитве требе глаголати,

но много воздыхати, стенати, плакати.

Кто всяк день от молитвы жити начинает,

благо основание делом полагает,

На нем же дом дел благих зиждется высоко,

на нь же любезно смотрит божественно око.

Егда кого узриши молитв не любяща,

хвалу Богу даяти в церковь не ходяща,

Вежд, яко Дух Господень в нем не почивает,

Иже леность изгонит, к молбам возбуждает,

Но дух тамо лукавый сон гнусный наводит,

из матери лености души гибель родит.

В саде древо требует напоенно быти,

да бы благия ему плоды приносити.

Иначе благих плодов древо не рождает,

за ненапоение само иссыхает.

Тако в Церкви человек имать нужду многу

проливать молитвы ко Господу Богу.

Тогда душа, яко водою, поится,

егда ум со слезами теплыми молится.

От того поения преплодна бывает,

всякия благостыни обильно рождает.

Кроме же молитв сущи, неплодна творится,

праведно же изреку: конечно мертвится.

Молитва тогда во грех ко Богу бывает,

егда кто возбраненных от Него желает,

А кто злых вещей просит, хулы отригает,

ибо злых виновника Бога содевает.

Благо богомыслием ум наш упражняти,

купно же и ко трудом руки прилагати.

Марфа бо с Мариею купно пребываше,

богомыслие сия, ова труд являше.

Единою Мария труда удалися,

егда слушати слово Христа приложися.

Абие сестра Мария на ню скорбна бяше,

и Христу Спасителю ту оглаголаше.

И преобщая притча обыче вещати,

молися и трудися, Господь готов дати.

Рахиль и Лия сестры себе бяху,

с единым мужем спряжены живяху.

Видение же Рахиль знаменает,

трудящуюся Лия изъявляет.

Красна бе Рахиль, Лия – паки плодна,

и та, и ова мужу бе угодна.

Богомыслие чрез Рахиль непщуйте

красно, чрез Лию труд плоден умствуйте.

И обе сестре во вас сочетайте,

в богомыслии и трудех бывайте.

Тако Христове угодни будете,

в чертозе его вечно пребудете.