Читать книгу Молитвы за детей - Сборник - Страница 5

А́нгел предста́тель по́слан бысть к вам от Бо́га, святи́и и пра́веднии Богоотцы́ Иоаки́ме и А́нно, егда́ о безпло́дии свое́м ов у́бо в пусты́ни, о́ва же в саду́ свое́м се́товасте, к Бо́гу моли́тву вознося́ще; и та́ко благове́стие ра́достное принесе́ безпло́тный, я́ко роди́ти и́мате Дщерь Преблагослове́нную, о Нейже возблагослови́тся весь род челове́ческий, с ни́мже и мы вам ра́достное прино́сим хвале́ние:

Ра́дуйтеся, ко́рене Дави́дова святопроцве́тшия ро́зги виногра́да живо́тнаго;

Ра́дуйтеся, ро́ждшии Дщерь, от всех родо́в Преблагослове́нную.

Ра́дуйтеся, вопло́щшагося Сы́на Бо́жия прароди́телие всечестни́и;

Ра́дуйтеся, та́инства, от ве́ка утае́ннаго, прояви́телие всеизря́днии.

Ра́дуйтеся, уте́хи Изра́илевы ближа́йшии по пло́ти сро́дницы;

Ра́дуйтеся, обетова́ннаго ми́ру Спаси́теля единокро́внии ю́жицы.

Ра́дуйтеся, святи́и и пра́веднии Богоотцы́ Иоаки́ме и А́нно.