Читать книгу Қылмыстық процесте бизнесті қорғау - Тайыр Күзекұлы Назханов - Страница 2

Құрметті оқырмандар, сіздердің назарларыңызға адвокат, LLM, Алматы қалалық адвокаттар алқасы президиумының мүшесі, «Назханов және Серіктестер» адвокаттық кеңсесінің басқарушы серіктесі – Тайыр Күзекұлы Назхановтың еңбегі мен экономикалық қылмыстар бойынша қылмыстық істерге қатысудағы көп жылдық адвокаттық тәжірибесінің нәтижесі ұсынылған.

Қазақстандық бизнесті қылмыстық процесс шеңберіне негізсіз тартудан қорғау, өкінішке орай, біздің шындығымызда өзекті мәселе болып қалуда. Ұзақ мерзімді практикамен қалыптасқан сот-тергеу жүйесінің айыптау бағытын, оның ішінде экономикалық қылмыстық құқық бұзушылықтар бойынша, сондай-ақ меншікке қарсы қылмыстық құқық бұзушылықтар аясындағы істерді өзгерту қиын. Автордың пікірінше, экономикалық және мүліктік қылмыстар бойынша істерге қатысуға маманданған адвокаттың орасан зор тәжірибесі қалың оқырман үшін қолжетімсіз болып келеді. Қоғамдық құқықтық сана деңгейін арттыруда қазақстандық адвокатураның рөлін асыра бағалау қиын, алайда бұл мамандық өкілдерінің еңбектерін кітап дүкендерінің сөрелерінен және еліміздің кітапханаларынан табу іс жүзінде мүмкін емес. Экономикалық қылмысқа қарсы күрес саласындағы әдістемелік ұсынымдар, ғылыми құралдар негізінен мамандандырылған ведомстволық жоғары оқу орындарында ғана бар, бірақ қарапайым оқырман оларға қолжеткізе алмайды. Айта кету керек, бұл қылмыстық қудалау органдарының өкілдері қызметінің нәтижесі, ал адвокатураның билігінде көптеген себептерге байланысты ғылыми орталықтар, жоғары оқу орындары жоқ. Бұл кітап бизнес

өкілдеріне, жаңа бастаған заңгерлер мен тәжірибелі адвокаттарға арналған авторлық кітаптар сериясының жалғасы болуы керек. Бұған дейін аталмыш автордың «Заң кеңестері» (2009), «Адвокатпен сұхбат» (2020), «Кибербуллингтен құқықтық қорғау түрлері» (2021) сынды кітаптары жарық көрген болатын.

Осы басылым оқырмандарға экономика саласындағы қылмыстық істерге басқа қырынан қарауға мүмкіндік береді және тергеудің әуре-сарсаңына жол бермеу үшін компаниялар мен кәсіпкерлерді құқық қорғау органдары тарапынан негізсіз қудалаудан қорғау, сондай-ақ жәбірленушілердің мүдделерін білдіру жөніндегі істерде автордың нақты және баға жетпес тәжірибесін пайдаланудың маңыздылығын түсінуге көмектеседі.

Кітапта автор қылмыстық процестің әрбір жеке сатысы үшін экономикалық қылмыстардағы қорғаныстың жалпы ерекшеліктеріне тоқталып, экономикалық қылмыстарға қорғаушы ретінде де, жәбірленушінің өкілі ретінде де қатысудағы жеке тәжірибесін ұсынады. Адвокаттың алаяқтық, иемдену, жымқыру сияқты ұрлау нысандары туралы істер бойынша қорғау әдістемесі тұрғысынан ең күрделі көзқарасы ашылады. Салық қылмыстары бойынша автор өзінің кәсіби қызметіндегі нақты фактілерге сілтеме жасай отырып, қорғаудың тактикалық ерекшеліктерін ашу тараулардың бірін алады. Қасақана банкроттыққа, сондай-ақ осындай қылмыстық істер аясында мүдделерді қалай қорғауға болатынына да назар аударылған. Жеке бір тарау адвокаттың жәбірленушінің өкілі ретіндегі жұмысына және тәжірибеші адвокаттардың осы процедуралық мәртебеде қандай проблемаларға тап болатынына арналған.

Бірлескен автор – адвокат Дүйсембеков Дархан Мейрамұлымен бірге нормативтік-құқықтық база ірікте алына отырып, ҚР ҚПК, ҚР ҚК нақты баптары мен ережелеріне, Қазақстан Республикасының заңдарына, ҚР Жоғарғы Сотының нормативтік қаулыларына, заңға тәуелді актілерге сілтемелер көрсетілді, бұл өз кезегінде осы басылымның маңызды артықшылығы болып табылады. Сонымен қатар адвокаттар нақты қылмыстық істер бойынша жасалған іс жүргізу құжаттарының үлгілері мысал ретінде келтірілді.