Читать книгу La terrible et merveilleuse vie de Robert le Diable - Unknown - Страница 7

Et quaⁿd l'enfant duquel je parle fut né il estoit de horrible stature et lors sourdit une nuee / ainsi que dient les cronicques si obscure qu'il sembloit qu'il deust venir nuict et commença a tonner et esclairer tellement que il sembloit que le ciel fust ouvert & le feu p^army la maison. Les quatre vens aussi fureⁿt mis sus par telle maniere que la maison trembloit si fort que une partie to^mba par terre. Les seigneurs dames et Damoiselles qui la estoieⁿt pensoient bien alors prendre fin veu les terribles tempestes & vens que lors couroient. Ainsi que Dieu voulut le temps s'apaisa & fut serain et doulx: adoⁿc on porta baptiser l'enfant qui fut nommé Robert / car chascun qui l'enfant veoit s'esmerveilloit de ce que il estoit si graⁿd & si bien fourny: car a le veoir on eust juré q^u'il eust eu un an antier il estoit nourry quasi a demy et en portaⁿt & raportant ledit enfant a l'eglise il ne cessoit de plorer & tantost les dentz luy saillirent desq^uelles il mordoit les nourrices qui l'alaictoient tellement q^ue nulle femme ne le vouloit plus alaicter / et fut force que on luy baillast a boire par un Bubert qu'on luy mettoit en la bouche / et avaⁿt qu'il eust un an antier il alloit & parloit aussi bien que font les autres enfaⁿs a cinq ans: tant plus croissoit: tant plus se delectoit a mal faire: car depuis qu'il sceut aller tout seul il n'estoit ho^mme ne femme quil le peust tenir. Et quand il trouvoit les autres petis enfans il les batoit et frapoit et leur jettoit pierres et frapoit de gros bastons et quelque part qu'il fust il ne cessoit de mal faire. Il commença bien jeune a mener mauvaise vie: il rompoit les bras a l'un les jambes a l'autre. Les Barons qui ce veoient desoient que ce estoit jeu: et prenoient plaisir a ce que l'enfaⁿt faisoit: dont puis aprés en furent courroucez.