Читать книгу La terrible et merveilleuse vie de Robert le Diable - Unknown - Страница 9

Nous trouvoⁿs q^ue le maistre voulut corriger robert pour le retraire des maux que il faisoit: mais Robert tira son cousteau duquel il frapa son maistre tel coup par le ventre que il luy fist yssir les boyaux tellement qu'il en mourut: puis dit Robert a son maistre en luy jettaⁿt soⁿ livre par despit. Voila vostre scieⁿce jamais prebstre ne clerc ne sera mon maistre / je le vous ay bien fait a cognoistre: & onc depuis ne fut maistre si hardy qui osast entreprendre de l'instruire & chastier: mais il fut force de le laisser tel que il estoit / a tout mal faire se deduisoit & de bien faire ne luy chaloit il desprisoit Dieu et nostre mere saincte eglise / en luy n'avoit raison ne mesure: et estoit enclin a tous vice / car quaⁿd il alloit a l'eglise & il veoit que les prebstres et clercz vouloient chanter il avoit des cendres / pouldres et autres ordures que il jectoit en leur bouche par grand trahison et derision de Dieu: il s'appliquoit a tout mal faire / quaⁿd il veoit aucun a l'eglise Dieu prier il le frapoit par derriere / chascun le maudissoit pour les horribles maulx qu'il faisoit / & le duc voyant son filz estre mauvais & si mal moriginé il en estoit si courroucé q^u'il eust voulu qu'il eust esté mort: et la Duchesse aussi en estoit si angoisseuse que c'estoit merveilles / et un jour elle dit au duc / l'eⁿfant a ja beaucoup de te^mps et est graⁿd et bien fourny / il me semble qu'il seroit bon de le faire chevalier et par ainsi il pourra chaⁿger ses coⁿditions. Le Duc dit a la duchesse qu'il en estoit content: & si n'avoit Robert que dixsept ans.