Читать книгу Kindheit und Jugend ohne Computer und Handy - Günter Eder - Страница 5

Wia s`Resal e d`Schue kema is, de had oa Jahr voa mia afanga miaßn, da bih e dann efda mid n Schos alloa umanand und ha eam oes zoagd wo e mid n Resal iwaroe scha gwen bih. De Gengad e deara wo ma mia oewei umanand grend hand, des wa von Grombaua drund wegad, en Diagnbach endlang bis zo da Eisnbahnbrugg fiare, oda af de anda Seidn e d`Bruggmeyh ume und viare bis af Undadiagn. Vo dot aus bis zon Biana hindare und weida bis af Buach ae. Vo Buach da hama af da andan Seidn wieda bis zon Brebeck aufa. Vo dot hama dann zon Lindna fiare, bein Miaglhuwa und bein Keinzlschbeaga vobei und zon Diagnbach ae. Da drundn ham a dann unda da Eisnbahnbrugg duahe und iwas Lohbachbriggal driwa en Bach endlang bis zon Grombaua fire, hie und da amoe, da ha ma dann a zon Meyhmeisl aufe ganga.

A jedsmoe hama a ned de ganze Schdregg aglaufa, Des wah fia unsane kuazn Haxal scha a bißl zweid gwen. Af de anda Seidn von Diagnbach hama eigandle fasd iwahaubd nia ume ganga. Ih ka a ned so genau sang warum, veleichd a wei da drendn blos rechd vey Wiesn gwen hand und sunsd iwahaubd nix andas. Glei drendahoe da Eisnbahnbrugg, da is a gloana Bunga en Beag drin gwen. Da Ongl had gsagd daß s en Bunga baud hamd wei s en Grieag d`Eisnbahnbrugg schbrenga heddn meng, das de rußeschn und de amerekaneschn Soedadn mid n Zug ned iwan Diagnbach uma fahn heddn kina.

Da drundn, da is da Diagnbach de Grenz zwischn Owabayan und Niedabayan, damoes da had me des awa iwahaubd na ned indressiead. Heid da iß s a bisl andas oes wiea s damoes gwen is, heid vaschdeh e des ganze ja a a bißal beßa.

Da Lohbach der kimmd vo Daumbach eina und is bis af a boa Dimpfe meißdns drugga gwen. Bloß wenn s vey grengd had, dann is a a hie und da amoe ganz schee grouß woan. Da hand efda a Bam dahea gschwumma und hamd d`Brugg undahoe unsan Haus voschdopfd. Des is meisdns ganz schee gfeahle gwen wei da s`Wossa efda bis zon Haus aufa ganga is. Ofd hama goaned gwissd ob s veleicht es Haus eina kimmd oda ned. D`Lohbachbrugg de had zwoa Beng ghad, oa Bong is heyzan gwen und oana wa bedanniead. Des wa hibsch gfeale fia de groußn Lasdauddo und fian Weiß und fian Ewen seine Langhoezfuhaweaha. Wenn de da driwa gfahn hand hed dea heyza Bong leichd amoe zammbreha kina.

Schbeda hamds dann d`Hoezbrugg weg grißn und hamd den zwoadn Bruggbong a beddaniead. Unda de Bruggbeng da had da Ongl oewei seine Kutschn und en Heiwong undagschdeyd. Des wa a nia koa Broblem ned, wei s unda da Brugg e oewei drugga gwen is. Bloß wenn s a moe grengd had, dann had ma aufbaßn miaßn das ma de Wang fria gnua außa da had, sunsd heds veleichd da Lohbach davah grißn.

Da Ongl der had oewei mindasdns oa Roß ghad, efda hand s sogoa a zwoa gwen. Da wand a na de Hena und hie und da, da hama a na a Kuah oda a Goas ghad, da had se oewei wos griad bei uns dahoam. D`Mille de wo ma brauchd hamd, de hama wenn ma grad koa Kuah ned ghad hamd bein Dreia ghoed wei ih koa Goasmille ned meng ha. De Mille von Dreia, de ha e a rechd gean ghoed, wei e dann oewei bis d`Mille fide gwen is mid`n Resal na a bisl schbeyn ha kina.

Hie und da wenn e af d`Nachd amoe zon Mille hoen zon Dreia ume ganga bih, da had s a scha amoe a bißl lenga dauad, da is ma a efda scha d`Mudde z`geng kema und had gschimpfd wei e so lang braucht ha. Z`Meyhmaisl da iß`s ma eigndle ga nia langweile gwen, da hads fia mih oewei ebs neis oda ebs andas indressands zon doa gem.

Oamoe ha a ma bein Pfeifal schniazln e d`Hend an Schiefan eizong, des had ganz schee weh da und e da Hend hae dann an ganz an dign Bingl griagd, eigndle iß`s a Blodan gwen de wo schbeda dann ganz blau und grea woan is. De Blodan is oewei digga woan und had a oewei mehra weh da. Da Ongl und d`Mudde hamd gsagd das des ganz beschdimmd a Bluadvagifdung sei muaß. Das e a Bludvagifdung ghad ha, des had ma gseng, wei vo meina Hend a bis iwan Eybong hindare und fasd bis zo da Oxl aufe a rouda Stroaf kema is. Af d`Nachd da had se dann d`Mudde unda da Bedroleumlambm oes genau agschaud und had s a en Ongl zoagd. Wiea dea des gseng had had a gsagd, des muasd aufmoha sunsd schdiabd a da. D`Mudde had dann a Nodl koed und had en Bingl ei gschdoha. Aus n Bingl is dann a so a ganz a geywe Bria außa gruna. Wia e des gseng ha, da is ma schlechd woan und ih bih umgfoen. Danach wia e wieda wach gwen bih had ma gseng das da roude Stroaf oewei weida zrugg ganga is. En nexdn Dag da is des ganze dann a scha wieda ganz guad gwen.

Heid dad ma mid ebs sehan zon Dogda geh, awa damoes wa des ned ganz so eimfach, da hed ma zeaschd s`Ros eischbanna miaßn und dann hed ma a na zon Dogda af Dann auße fahn miassn. Audo hads damoes a naned so vey gem, da oanzege dea wo a Audo ghad had, des wah da Weiß e da Bruggmeyh. Damoes hamd se d`Leid mehra seywa ghoefa wenn eha ebs basiad is. En Dogda aruafa had ma a ned so eimfach kina wei kam oana e da Nah gwen is dea wo an Telefon khad had.

Z`Hoslbach da is ma a amoe so ebs bled`s bassiad, da bih e vo da Odldruga awa gfoen. Des is bein Wofal drom gwen, da had da Wofal Bebal mid de Roß en Odl afs Feyd auße gfoahn ih ha bein Bebal ganz hou drom af n Odlwong sitzn deafa wiea da Bebal zo de Roß viare gschrian had „wiah“ da hamd d`Roß glei richde azong. Wei i ned aufbassd ha bih e vo da Odldruga awa gfoen. Ih woas na das e drund grad na schney meine Fiaß af d`Zeidn drahd ha, sunsd heds me dabresld. Wia e herund gleng bih, da bih e zeaschd amoe a bisl debbad gwen. Heid da dad ma wascheinle zo ebs sehan sang, dea is bewusdlos gwen. Wia de Leid de wo dabei gwen hand gseng hamd wos baßiead is, da hand s olle schney zo mia hea grend und hamd gschaud ob ma ebs feid. Ih bih awa aufgschdandn wei ma nix gfeid had. D`Frau Ellenga had me dann af d`Oam gnumma und had me zon Oba und zo da Oma ae drang. D`Oma de had ma dann glei en Kobf gwoschn, da had s easchd gmeagd das e en Kobf drom a ganz a scheens Loch ghad ha.

Wia me d`Oma fidae gwoschn ghad had, had`s ma an Aneka auf n Kobf aufe da und a Bindn uma bundn. Z`Hoslbach drin iß s a na ned fey andas gwen wia z`Meyhmeisl herend, da hads a na fasd koa Audo ned gem und a nua ganz seydn an Telefon. Da glauwe, das da Hanasnbaua da oanzege gwen is, dea wo a Audo und a an Telefon ghad had. Zon Dogda da, hed ma bis af Grafenau eine fahn miassn, des glauwe des hand a a soa nei Kilomedda gwen, awa i bih a a so wieda ganz schney gsund woan.

Damoes da hamd vey Leid af n Land draußdn a na koa elegdresch Liachd ned ghad, drum hamd s a kam an Telefon und a koan Radeo na ned ghad. Z`Hoslbach, des woas e na guad, da hads bein Wiad drund an Telefon gem da hamd olle telefoniean defa wenn s es brauchd had. We ma aruafa had miaßn, da had ma dera Frau de wo dot goawad had zeasch amoe d`Telefon Nummara sang miaßn. De Frau de had dann a boa Kawe e a so a Kasdl eigschdegd, dann had`s a boa moe e a na Kuawe, de wo e den Telefonkasdl dra gwen is umdraht. Da had se dann e den Telefon af da andan Seidn eba gmeyd, den had de Frau de Nummara gsagd und dann had ma telefonian kina. Da hamd d`Leid dazua gsagd, se loßn se iadz vobindn.

Wia da Max vo da Gfangaschafd hoam kema is, da hamd se boed drauf da Oba und d`Oma a s`elegdresche Liachd eirichdn loßn. Des wa ganz brima, wie s dann a an Radeo griagd hamd. Der Radeo had ma rechd guad gfoen, da is voan dra a so a greas Augn gwen des wo oewei a so gleichd had. E den Augn da had ma seng kina wia guad das dea Senda herganga is den wo ma grad eigschdeyd ghad had, des had ma da Max gsagd. Wenn da Empfang ned so guad gwen is had ma an an Ral drah miassn dann iß`s bessa woan.

Z`Hoslbach da iß`s vo deara Zeid a, wia da Max wieda vo da Gfangaschafd dahoam gwen is oewei rechd indressand gwen. Da Max dea had oewei wieda ebs neis gfundn des wo ma doa had kina. Oamoe da had d`Oma gsagd da Max soed a Hehn aschlachdn weiß`s heid a Hehnasubbm moha mehad. Da Max had dann mih gfragd owe mid eham en Henaschdoe hindare geh mehad zon Hena fanga. Da Max dea had oa Hehn gfangd, de hama dann hindan Schupfa hidare drang da had s da Max dann af n Haggschdog hieglegd und had iah mid an Hagge en Kopf aghaud. Wia ra deara Hehn en Kobf a khaud khad had, had as ausloßn. De Hehn, de is ohne Kobf na a ganz a scheens Schdiggl grennd, dann iß`s umgfoen und is doud gwen, dann had da Max d`Hehn zo da Oma e d`Schdum eidrang. D`Oma had s dann e a Schaffe eiglegd da wo a hoaß Wossa drin gwen is und had iah olle Fedan ausgrupfd. Zon Middagessn da hads dann a Hehnasubbm mid vey Fleisch drin gem.

Hie und da hamds z`Hoslbach drin a amoe a Sau gschlachd, da had dann da Oba oewei gsagd das e da ned dabei sei deaf wei des fia mih nix is. Wenn s zon Schlachdn gwen is, da hand oewei mehra Mana zammkema, de hamd dann a olle aufbassd das e ja ned z`weid zo eah zuare kim. Zo mia hamd s dann na oewei gsagd das e ja neamd sang deaf daß`s a Sau gschlachd hamd, wei sunsd Bolezei kimmd.

Schbeda wiea e scha a bißl eyd gwen bih had ma d`Mudde dann eagläad, das ma dahoam koa Sau schlachdn deafa had wei des schdreng vobodn gwen is und daß`s de Sau schwoaz gschlachd hamd. Wenn`s aufkema wa daß`s schwaz gschlachd hamd, da heddn s olle midanand a sauwane Schdraff griagd.

Wiea s wieda amoe a Sau gschlachd ghad hamd, had d`Oma zo da Mudde gsagd daß`s oa Hax zo da Tande Ane af Minga aufe bringa soed, wei de beschdimmd a ebs zon essn brauchd. Tande Ane de is scha wieda e ihrana Wohnung z`Minga drom gwen wei ses wieda hearichdn had miaßn. D`Oma had zo da Mudde gsagd daß`s mih midnehma soed wei des ganze dann ned so gfeahle is. Da hamds dann a ganz a grouße Hax vo da Sau und na mehra andane Sahan dazua e an Rucksag eibagd und dann ha ma d`Mudde und ih mid den Rucksag af Minga aufe gfoahn. Zeaschd da hama mid an Onebus af Deggndoaf ume fahn miaßn. Vo dot weg hama dann mid n Dampfzug af Minga zo da Tande Ane aufe gfahn. D`Mude had ma schbeda amoe vozeyhd daß`s en Zug weng mia boed a grouß Broblem grieagd hed. Wei ih gwißd ha wos e da Mudde ihran Rucksag drin is woedde des de Leid de wo a mid`n Zug midgfoahn hand eazeyhn. D`Mudde had ma gsagd das e zo de Leid gsagd ha das e ihran Rucksag a ganz a groußa Fleischfuaß drin is. Des hed damoes ganz schee gfeahle wean kina wei des wos d`Mudde da dah had a Schwoazhandl gwen wah und des is ganz schdreng vabodn gwen.

Z`Meyhmaisl da hama a na koan Radeo ne khad, wei ma a na koan elegdreschn Strom ned khad hamd. Da Ongl had oewei gsagd, des modeane Glumb des kimmd ma ned eina so lang wia ih leb. Wenn e gschdoam bieh dann kinnz es enk eirichdn lossn. Da Ongl is achzeahhundadsegsaachzge geboan, dea wa scha hibsch oed, drum had a a olle de neia Sahan ned a so draud, fia den hand olle neia Sahan gfeale gwen.

Olle unsane Nachban de wo a na koa elekdresch Liachd na ned khad hamd, de hamd se s olle nachanand eirichdn lossn. Zeaschd da had se da Dreia s`Elegdresche eirichdn lossn, de hamd bis da hie a wia mia nua a Bedroleumliachd khad. Bein Meyhmeisl da hamd s e da Wohnung drin und a en Schdoe draußn oewei a Kabidlambm hegnuma. D`Kabidlambma de hamd bloß a ganz a gloans Flammel khad, drum hand s a ned ganz so hell gwen oes wiea s Bedroleumliachd. Iagndwann, da ha ma mia z`Meyhmaisl na de oanzenga gwen de wo na koa elegdresch Liacht ned ghad hamd.

Neizeahhundadzwoarasechzge, da ha e scha a Zeidl z`Minga gawad, da is da Ongl gschdoam. Oa Jahr schbeda, en Summa, da wa e scha bein Barras, da ha e a Diandl kena gleand. Wiea es amoe mid hoam gnuma ha, das es da Mudde vieaschdeyn ha kina. Wiea des Diandl bei uns des Bedroleumliachd gseng had, had s zo mia gsagd daß`s des ganz romandesch find. En Jahr drauf da had se d`Mudde dann a s`Elegdresche eirichdn loßn. Des Diandl vo damoes is iadz scha glei seid fasd fuchzg Jahr mei Frau.

Wenn ma mia friara af d`Nachd dahoam e da Schdum beinand gsitzt hand hama uns oewei undahoedn und iwa oes des gred des wo undan Dag und a a`so bassiad is. Da Ongl had a ofd von easchdn Weydgriag vozeyd wia ra z`Frangreich drend gwen is und das a dot oes Soedad Pfeadeweada gwen is.

Da Ongl had vo so Schrabney eazeyd mid de wo de Franzosn oewei zo eah uma gschossn hamd, desweng hamds dann an Schizngrom bau miaßn, wo s dann ei ghupfd hand, a so daß`s koa Kugln vo de Franzosn drendn ned dreffa hamd kina. De Soedadn de hand olle mid`n Gwea drauß gwen und heddnd de französeschn Soedadn daschiaßn miaßn. Da Ongl had gsagd das a des awa ned doa had meng, drum had a hie und da oewei wieda a Hend voe Badronen hinda ran Bam hindare gschmißn wenn grad koana heagschaud had.

Fia mih wa oes des wos da Ongl da eazeyd had ganz schee abndeieale, awa da Ongl had zo mia gsagd das des iwahaubd goaned schee gwen is. Drum is a a rechd fraoh gwen das`a en zwoadn Weydgriag nimma eirugga had miaßn, wei a da dafia scha z`oed gwen is, had`a gsagd. Wei a ned en Griag auße miaßn had, hed a awa zon Voegsschduam hie geh miaßn, awa da had a a ned hie geh meng. Da Buagamoasda had zon Ongl gsagd daß a da umbedingd hie geh muaß.

Da Ongl had zon Buagamoasda gsagd das a zwengs de Naze ned hie geh mag. Da had da Buagamoasda zo eahm gsagd, wenn`sd ned hieh gehsd dann kimmsd af Dahau aufe, da zoang ds das dann scha wos des Richdege is. Da Ongl had uns erzeyd, das d`Ame wiea s nach n Griag kema hand, en Buaga- moasda e an Banza voan es Kanonareal hie ghengd hamd, a so hamd sn dann zon Bahnhof af Buach ae brachd. Wahscheinle had eba en Buagamoasda bei de Ame hieghengd und had eah eazeyd wos a fia ra Naze gwen is und das a e da Nazezeid a richdega gscheada Dreghame gwen is.

Damoes da is da Ongl fasd e an jedn Samsdag mid n Ral zon eikaufa af Simbach ae gfoan. Da had a dann oewei de Bassaua Neie Bresse, des is de Zeidung fia de Gengad da drund gwen, midbrachd. Bei uns herom da had`s koa Zeidung naned gem. Dahoam da had uns da Ongl dann oewei fiaglesn woß s oes Neis gem had und wos sunsd na oes af da Weyd bassiead is. Hie und da, da had a dann wia da Deife gschimpfd, iwa de Bolidegga oda a iwa ebs andas, bsondas wenn a ebs glesn had des wo da Kapfenga gschriem ghad had. Wenn da Ongl mid n Zeidunglesn fiade gwen is, da ha e scha oewei drauf gwoad, dann ha s ih griagd. Ih ha dann oewei glei de Gschichd`n von Beze, Belle und Bingo glesn. Des is a Beydlgschichd gwen, da wo se de drei a Schiffal baud hamd.

Manchmoe ha e a mid da Mudde zon Grama af Undadiaggn ume zon Eikaufa midgeh deafa, d`Mudde, de had dann oewei a so a grawe Koadn midnehma miaßn. Vo deara Koadn da had se dann Grama Nane, wenn s zon Zoen gwen is, oewei a boa Maggal mid ana Schah awa gschnien. D`Mudde had ma gsagd das des Lemsmiddlkadn hand, de muas ma ham, sunsd ka ma se nix zon essn kaufa. Des Geyd is damoes a ganz andas gwen oes wia heid. Da had s na a fawegs, babiearas Gloageyd gem.

S`Gloageyd had s awa a in Münzn gem, blos vo de Zwanzgal da had s koa Münzn gem. D`Pfeneng, p`Fimfal und Zehnal de hand grab gwen und d`Fuchzgal wand aus Alamineum. Das d`Mack aus Babiea gwen hand des woase na, des grouße Geyd des glauwe wa oes aus Babiea, awa des woase a ned so genau, des ha e a ned a so gseng, vo den hama waschscheinle a ned so vey khad, drum ha e s a ned kend.

We ma dahoam af d`Nachd e da Schdum drin ofd olle a so beinand gsitzd hand, da had da Ongl dann ofd gschimpfd wei des Geyd drodz da Währung iwahaubd nix is. Ih ha des ned vaschdandn wos a damid gmoand had. Da had a dann a ofd vo da Imflazeon gred und had wieda gschimpfd iwa de Bazen da drom. Da had a uns a na vozeyhd das a zweng s de Bazen sei ganz Geyd valoan had.

Da Ongl had gsagd das a friara an groußn Bauanhof ghad had. Wei a awa oewei scha a bissl a Handla und a Heisaschmusa gwen is, woed eham oana z`Neiedeng drom zwoa Wohnheisa vokaufa. Des had en Ongl scha rechd gschdiggd, wei a awa ned so vey Geyd ghad had, woed`a sein Bauanhof vokaufa. Mid den Geyd vo sein Bauanhof da hed a de zwoa Heisa z`Neiedeng drom zoen kina. Fia den Bauanhof had da Ongl so fey Geyd griagd das eham dea Mah, dea wo en Bauanhof kaufd had ned oes af oamoe gem had kina. Da Ongl had dann na an Dag woadn miassn bis a des ganze Geyd ghad had, ea had gsagd, des hand zweh Schuckan voe Geyd gwen. Wia da Ongl des ganze Geyd fia n Bauanhof beinand ghad had, isa af Neiedeng aufe und woed de zwoa Heisa zoen. Da had da anda Mah gsagd, des Geyd, des glangd da heid nimma fia de zwoa Heisa, iadz kosd ns scha wieda mehra, des Geyd des is iatz nix meha wead. Iadz had da Ongl koan Bauanhof nimma ghad und de Heisa z´Neiedeng drom de had a a ned griagd. Nach deara bledn Gschichd, da had da Ongl dann blos na des gloa Heisl z`Meyhmaisl kaufa kina, e den wo ma iatz drin wohnand. Des oede Geyd von Bauanhof vokaufa, des had da Ongl oewei na e drei Schublon en Komodkosdn en Schlofzimma drom ghad.

Hie und da, da had da Ongl uns Buam a bissl a so a Geyd zon schbeyn gem, ea had eh na oewei an ganzn Haufa dava ghad. Schbeda da ha e hie und da a Baggal vo den Geyd e d`Schue midgnuma und ha s meine Schuefreind zon schbeyn gem. Des oede Geyd des is rechd indressand gwen, des hand oes lauda ganz grouße Scheine gwen, Dausnda und Milleonen Scheine. Ofd amoe da is a af an sehan Schein a Schdembe drauf gwen, da hamd s dann aus an Dausnda a Milleon oda a a Millearde und a na greßane gmochd. Da Ongl had gsagd das des Geyd vo oan Dag af n andan so schney vareggd is, daßs mid n moha nimma nahe kema hand, drum had eham a dea Mah dea wo sein Bauanhof kaufd had s Geyd ned af oamoe gem kina.

Unsa Haus is friaras, so umara neizeahhundad umanand e ana groußn Kiesgruam drin gschdandn. Da hamd s den Kies außa da, den wo s fia d`Eisnbahnbrugg iwan Diagnbach ume, af da owaboareschn und af da niedaboareschn Seidn zon aufschiddn von Bahndamm brauchd hamd. Damoes is s`Haus d`Kandine fia de Awada gwen, de wo d`Eisnbahn vo Simbach af Minga aufe zua baud hamd. Da Ongl had gsagd das af den Haus na s`Schankrechd drauf is und ea kannd da jedazeid a Wiadshaus aufmoha, da is a oewei rechd schdoedz gwen drauf.