Читать книгу Kindheit und Jugend ohne Computer und Handy - Günter Eder - Страница 6

Wia ih e d`Schue kema bih, da had da Schos, obwoe a zwoa Joah eyda wa oes wia ih, na ned e d`Schue geh deafa. D`Lehra hamd gsagt, der is na z`dumm dazua. Heid wo e de Sach mid andane Aung seg glauwe das des ganze blos a Sauarei gwen is, e dera wo a a boa Nachban ned ganz unschuede gwen hand. Oa Nachba had amoe zo mia gsagd, wenn a an sehan Buggl had, dann muaßa a bled sei.

Mia Meymeisla Kinda hama af Schdammham e d`Schue aufe miassn. De Buachna Kinda hand meisdns a af Schdammham e d`Schue ganga. A boa vo Buach drund hand awa af Julbach e d`Schue ae ganga. Af Schdammham aufe, da hand s fia mih oewei drei Kilomeda hie und a wieda zrugg zon geh gwen. En Summa is des ganz schee gwen, awa en Winda, da iß`s oft ganz ganz schee schwa woan, bsondas dann, wenn da Schnee rechd diaf gwen is.

Meisdns wa e bein aufe geh e d`Schue aloa, hoamzua wa ma awa efda a mehra, je nachdem wehane Schdreg das e grad geh ha meng. Wenn e af Diagn ae zua hoam ganga bih, da bih e meisdns mid n Franze und mid n Maxe ganga. De zweh hamd af Richdung Undadiagn weida geh miaßn. Da Maxe dea had z`Undadiagn drend gwond und da Franze, dea wa z`Aggadoe drauß dahoam. Mid de zweh ha e blos bis af Bruggmeyh ae midgeh kina, dot ha e dann af Meyhmeisl uma abiang miaßn. Wei s af Diagn ae zua indreßanda gwen is wia af deara Schdraß wo`s af Simbach ae gehd, bih e liawa mid n Maxe und midn Franze ganga.

E d`Richdung af Diagn ae da hads an Woed gem und a mehra Beag. Undahoe n Vogledabeag da is a gouße Bruggiwan iwa n Diagnbach ume. De Brugg is da Grenziwagang vo Niedabayan af Owabayan, uns Buam is des wuaschd gwen und had uns a ganed indreßiad. Da anda Weg da wos af Simbach ae zua gehd da ha e a ned weida ghad oes wiea iwa d`Bruggmey. Wenn e amoe af da andan Seidn, e de Richdung af Simbach ae zua hoamganga bih, da bih e efda a mid n Kare und mid n Robead bis zon Bazhuawa awa midganga. Dot ha e dann zo uns hoam lings uma abiang miaßn. Da Kare und da Robead, de hamd na a bissl weida ae geh miaßn. Da Robead dea had bein Brebek drend en Hard ei miaßn und da Kare dea had na bis da ae, wo s links af Buach ume und rechds en Hard ei gehd, awe miaßn.

Omoe en Winda, ih glaub da iß`s scha glei Friahjoah gwen, da bih e amoe mid n Kare und mid n Robead mid hoam ganga. Da ha ma af amoe zon schdreidn agfangd, ih woas heid nimma um wos daß s eigandle ganga is, oda wea agfangd had. Wiea ma af da niedaboareschn Seidn vo da Meyhmeislbrug gwen hand da hama zon raufa agfangd, warum des woase a nimma. Wei ih awa alloa gwen bih, ha e geng de zweh nix doa kina. Glei hinda da Brugg da hamd s me iwa den schdeiln Beag newa da Schdraß ae grennd und hand ma ae zua a na nahe groasd. Drudahoe da Brugg da hamd s me dann a na en Bach eine gschdeßn wiea e en Bach drin gleng bih hand de zweh davah grennd. Wei s na rechd koed gwen is, is da Diagnbach na Schdigglweis zuagfread gwen. Ih bih duachs Eis duahe es Wossa eigfoen, ih seg heid na de Wuazln unda n Wossa voa mia, e de wo a me eighoedn ha. Guad daß s`Eis ned digg wah, drum bih e a schney wieda außa kema, sunsd wah`e dasuffa.

Wiea e wieda aus n Bach herauß gwen bih, da ha e de zweh nima gseng, da hand s scha weg gwen und ih bih dann a glei oesa badschnaßa hoam grennd. D`Mudde had me glei auszong und had ma ebs druggas zon aziehang gem weis d de sunsd vokeydsd hads gsagd, und dann had s na gsagd das e s`nexde moe beßa aufbaßn soed. Wiea`s me schbeda gfragd had wiea des ganze baßiead is, ha e gsagd das e ausgrudschd bieh und dessweng es Wossa eigfoen bieh.

De Schdraß Richdung Simbach ae zua, des wa de Bundesstraß zweyf, de is damoes af da owaboareschn Seidn bis zon Beag hie, da wos zo da Meyhmeisl Brugg ae gehd thead gwen, dann is s pflosdad weida ganga bis iwa Brugg ume und a Schdiggl weida af Simbach ae zua. Undahoen Brebeck da iß s dann blos na a Sandschdraß gwen. Schbeda da hamd ses dann a thead. Ih ka me na ganz guad dra erinnan wia e da drendn mid mein Ral mein eschdn Vakehasumfae ghad ha. Damoes bih e wia a narescha iwan Beag zo da Brugg aezua grennd und af de linge Seidn ume kema. Da bih e dann e an Schdraßnschdoa agrennd daß e grad a so gflong bih. Guad das e a Kabbe auf ghad ha sunsd hed a ma mein Belle ganz sauwa aufgrennd. A Zeidl had s scha na dauad bis e wieda aufschdeh ha kina, wei e doh ganz schee debbad wa, veleichd ha e a Gehianeaschiddarung ghad, wei e af n Kobf gfoen bih. „Bliem is ma fei nix“.

Zeaschd da ha e ned rechd gwissd wos lous gwen is, bis e mei kabud`s Ral gseng ha, da iß`s ma kema wos grad baßiead is und warum e mid mein kabuddn Ral af da Schdraß gleng bieh. Da ha e a Glick khad das af da Bundesschdraß zweyf na kam a Vakeha gwen is, sunsd hed me wahscheinle a Audo darennd. Wia e nach mein Umfae aufgschdandn bih, da is agrad a Audo vobei kema. Ih woas na das e meine Oam e d`Heh gregd ha, awa dea is ned schdeh blim, genau a so wiea s heid a wah.

Amoe had da Ongl midgriagd daß bei unsan Nachban drendn, bein Schmid, en Midwoch af d`Nachd oewei a so a lusdege Sendung en Radeo kema is, des wa de weiß blaue Drehoagl. Da Schmid had sein Radeo oewei ganz laud aufdrahd und had a na s`Fensda af d`Schdraß auße offad ghad. Mia seywa hama na koan Radeo ned khad, en Ongl hed awa doh hie und da ebs indreßiad wos da aso kema is. Da is a dann hie und da amoe a gloans Schdiggl af n Weg zon Schmid ume ganga und had da drend vo da Schdraß drauß zua ghead woß s oes brachd hamd. Des wos a da hie und da ghead had, des had eham scha oewei rechd guad gfoen. Wenn a dann hoam kema is hada uns oewei eazeyd woß s da oes lusdegs brachd hamd. Obwoe en Ongl des mid n Radeo gfoen had, had a se ned zon eirichdn von elegdreschn Schdrom endscheidn kina. Da Dreia dea had se damoes a scha des elegdresche Liachd eirichdn loßn, awa an Radeo hamds a na ned glei griagd.

Bein Schmid, des hand Flichdleng gwen, de hamd zeaschd af da Vogledaseidn, drendahoe n Diagnbach, drundahoen Beag a gloans Hoezheisl ghad. Des Heisl had ea da Diagnbach weg gschwoabd wia s neizehahundadvierafuchzge a ganz a grouß Houwossa gem had, des wa damoes scha ganz schee draureg. Da hamd s ehara Heisl na mid Schdrigg und Keddna aghengd, awa dann hamd se s doh nima reddn kina und zon hearichdn iß`s a nimma gwen. Des had scha ganz schee beß ausgschaud wia des gloa Heisl e de Keddna und e de Schdrigg iwahoe an Bach ghengd is. Undahoe n Heisl had s`Houwossa scha den ganzn Bon weggschwoabd ghad, da wa nix meha zon moha.

Wei da Schmid bein Weiß z`Bruggmey drend goawad had, had eahm dea an Grund vokaufd wo a se a neis Heisl hie bau had kina. Da Weiß, dea had oewei scha de Leid a bisl ghoefa wenn s eah ned rechd guad ganga is. Da Schmid had sei Heisl newa d`Schdraß, da wos zon Dreia zuare gehd hiebaud. Wia s Haus von Schmid fiade gwen is, da hamd sa se nadiale a glei s`elegdresche Liachd eirichdn lossn. Fia uns Nachbahkinda wa des a schee wei`s bein Schmied zo uns da uma kema hand, wei de zwoa Diandl ghad hamd, iadz ha ma s`Resal und ih nimma aloa schbeyn miaßn.

E deara Zeid, da hand grad de Hullahub Reifn so ganz gouß e d`Mode kema. Iwaroe wo ma hiegschaud had, da hamd a boa Kinda mid eharane Hullahubreifn gschbeyd, de zwoa Diandl von Schmid, de hamd des a ganz guad kina, de heddnd oewei brawiad daß`s ih a leana soed, awa ih ha s ums varegga ned kabiead, a schbeda ned, ih ha me oewei vey zbled agschdeyd bei deara Sach.

Damoes neizehahundadvierafuchzge da hads iwaroe a ganz a schdoags Houwossa khad. Da Inn, dea had damoes a ganz vey Wossa khad. We ma vo Schdammham zon Deichschdedda ae gschaud had, da had ma gseng das ehra Haus bis hoewad aufe en Wossa gschdandn is. D`Fähre de is a weg gwen, da had ma de Bleddn und des Seil wos drahgengd is a nimma gseng. Da Ongl dea had damoes e da Bassaua neie Bresse glesn, daß`s z`Bassa drund a a ganz a schdoags Haowossa ghad hamd.

Z`Bassa da kemand af oamoe glei drei Flüsse zamm. Da greßa Fluß bei uns z`Bayan des is d`Donau, vo unsana Seidn aus da kimmd da Inn dazua und von boareschn Woed hea, da kimd d`Eyz außa. Da ka ma se scha vieaschdeyn woß`s da drundn fia ra sauwas Houwossa gem kah. Iadz hama grad von Dadum hea Midde June Zwoadausnd und dreizeah. E de ledzdn boa Wohan, da is a grad wieda a rießn Houwossa z`Bassa drund gwen, ned nua da drund, sondan a iwaroe z`Deidschland und a z`Esdreich und z`Ungan. D`Zeidung had gschriem, das des Houwossa soga na greßa wa is oes olle andan e da Zeid davoa.

Des Houwossa neizehahundadvierafuchzge had`s wahscheinle gem wei s en Winda davoa an ganzn Haufa Schnee ghad had. Da had s bei uns da a an sehan Haufa Schnee hea ghaud, das oes zua gwahed wah, wos a bißl dieafa gleng is. De Schdraß de wo vo da Bruggmeyh uma bei uns vobei zon Brebeg ume und dann af Deindoaf und af Seiwaschdoaf ei gehd, de is herowahoen Meyhmeisl dodal zuagwahed gwen. Dazwischn da hand a na de Bahngleisa via n Zug, dea wo vo Minga awa af Bassa ae ganga is, da is a oes dodal zua gwahed gwen.

Mehra Mana hamd damoes a boa Dag lang herendahoe und drendahoe de Bahngleisa, den ganzn Schnee wegad gschaufed. Wenn`s de Schneegwana ned weggschaufed heddnd, dann hed koana meha zon Brebegg ume geh kina. Fia uns Buam is des oes a Schbaß gwen. Voa unsan Haus is a a Schneegwan gwen, de is von Beag hiedan bis fasd zon Haus zuara ganga. E de Schneegwan, da hama uns mia Buam Leha eigmochd wo ma eingrabben hamd kina. D`Mudde had gschimpfd, wie s Angsd ghad had das da Schnee awa kimd und daß`s uns voschidd und dabadzd. Heid woaß e nadieale daß`s rechd khad had, awa damoes da ha e des iwahaubd ned glaum kina. So vey Schnee wiea damoes had`s schbeda a kam na amoe gem glauwe.

Das ma mia bei uns dahoam na koa elegdresch Liachd und a koan Radeo na ned ghad hamd, des had mia iwahaubd nia nix ausgmochd, a wenn es bei andane Leid efda gseng ha, i ha s a ned andas kennd. D`Mudde de hed awa scha oewei gean des elegdresche Liachd meng. Schbeda amoe, da had sa se dann von Gusdaf Schiggedanz an Simonetta Koffaradeo schigga lossn. En Schiggedanz den gibd s scha lang nimma, schbeda had a Quelle ghoaßn, de gibd s awa iadz a scha lenga nimma. E den Radeo had ma blos a boa Baddarieen ei doa miaßn dann had a a scha gschbeyd, da dazua had ma a ga koan elegdreschn Schdrom ned brauchd. Dea Koffaradeo den wo se d`Mudde da kaufd ghad had, dea had en Ongl scha oewei rechd guad gfoen, da had a dann a meisdns ganz genau zuaghead wenn s d`Nachrichdn brachd hamd und a wenn dann en Midicha oewei s`Wunschkonzead af n Mingara Senda kema is.