Читать книгу Kindheit und Jugend ohne Computer und Handy - Günter Eder - Страница 7

Obwoe damoes e deara Zeid iwahaubd a na ned vey Auddo gfahn hand, had s e da Meyhmeislkuavan drend oewei wieda ganz schee schware Umfälle gem. Zwischn an Brebeg und an Hofbaua, da had amoe a Lasdwong dea wo voe Oedeisn glond gwen is umgschmißn und is iwan Bugl aegfoen. A Beasonen Audo des wo eham grad zgeng kema is des had a mid ae grißn und is a na drauf gfoen. Da had ma nimma seng kina wos des fia ra Audo gwen is, en Fahra den had s dodal dabatzd khad. E da andan Kuavn bein Lindna voan da hand s a oewei wieda vo da Kuavn auße gflong und hand en Lindna sein Gmieasgoadn ei grennd. Oamoe da is sogoa a hibsch a groußa Lasdwong e ehran Goadn ae gflong. A bissl komesch iß`s awa scha gwen das de meisdn Audo, de wo da e da Meyhmaislkuavn drend vaunglickt hand vo Minga drom gwen hand.

D`Meyhmeisla hamd gsagd das de Mingara Audofahra oewei a so renand. Ih glaub das des mid den zammghengd is wei s z`Minga drom mehra Audo gem had wiea bei uns hearund. Desweng hand d`Mingara des schney Fahn a ned a so gwähd gwen oes wiea de Leid vo uns z`Niedabayan herundn. E da Meyhmaislkuavn drend da is d`Schdraß a na pflosdad gwen und wenn s naß wa, da wa s na a bissl gfealega oes wiea sunsd oesa druggane.

Voa ra na lengan Zeid scha, da hamd s da drund a ganz a neie Schdraß fasd wiea a Audobahn baud da gehd s nua na gradaus. Af deara Schdraß kimmd ma a nimma d`Schdammham vobei wema vo Minga af Simbach ae fahn muaß.

E de easchdn zwoa Schuejoah da bieh e fast oewei mid de Diagna Buam, mid n Maxe und mid n Franze hoam ganga. Dea anda Weg af den wo da Robead und da Kare geh hamd miaßn, dea had ma ned a so gfoen. Da wa bloß da Diagnbach iwa den wo ma driwa miaßn had, sunsd wa da drent iwahaubd nix Indressands lous. Oa Sach af da Digna Schdregg drend had s scha gem de had ma ganed gfoen, des hand de Imbmheisl bein Kobla drom gwen. De Imbmheisl hand rechds und lings newa da Schdraß gschdandn und agrad da ha e duahe geh miaßn. Wenn e vo da Schue hoam bih hamd me de Mistviecha efda amoe iwafoen und hamd me iwaroe gschdoha wo s grad ganga is. E da Fria da is ma des nia bassiad blos oewei middag wenn e vo da Schue hoam bih. Ih woas na ganz guad das e damoes ofd a greas Hiadl, da wo a Gamsbard drah gwen is aufghad ha. Da hand ma de Misdviecha a na eine grabbed und hamd me en Kobf gschdoha.

D`Oma vo Hoslbach, de had se ofd es Imbmheisl eigsitzd und had d`Imbm geagad und had drauf gwoad daß se s schdehand. D`Oma had gsagd das des geng s Reimaddesch guad is. Friera is ma a ned a jedsmoe wenn a bissl ebs gwen is glei owei zon Dogda hie grennd. Wenn`s iagndwiea ganga is hamd se d`Leid meisdns seywa ghoefa. Ih ka me na guad drah erinnan wiea da Ongl amoe a Zeidl umanand grennd is und gjammad had das eham a Zahn weh duad. D`Mudde had zo eham gsagd ea soed zon Zahnazd af Simbach ae fahn, awa da Ongl dea had niea zon Dogda oda zon Zahnazd geh meng. D`Mudde had zon Ongl gsagd ea soed a bißl an Glousdafrau Melißngeisd nehma, des had da Ongl dann a dah. Nach an Zeidl da is a dann wieda dahea kema und had glochd und had gsagd daß`s eahm iadz bessa gehd. Af oamoe had d`Mudde gsagd, du bisd a bsuffa, hasd leichd de ganz Flaschn ausdrunga? Da had da Ongl glochd und had ja gsagd, a bißl schbeda da had a awa doh wieda Zahnweh ghad.

En nexdn Dag ganz boed e da Fria, da had af amoe d`Hausdiea ganz laud gschewad und da Ongl had au gschriean. Schbeda dann, wiea ma aufgschdandn hand, da is af n Disch a Schnial mid an groußn Zahn wo s Zahnfleisch na drah gwen is dodn gleng. Iatz hama gwißd warum de Hausdia a so zuagschlong is. Da Ongl dea is en Hof drauß auf und a glaufa und had se s`Gsichd ghoedn und had oewei ach ach gjammad. En nexdn Dag da had man awa nimma jamman ghead, wahscheinle had eham des Zahnreißn midn Schnial doh ghoefa.

Damoes da hamd na olle Kinda de wo e de eschde und e de zwoade Glass ganga hand, a Schueschbeisung griagd. Da had a jeda an Leffe und a Hafal dabei ham miaßn, da wos uns dann z`Middag s`Essn eidoa hamd kina. Da hads an jedn Dag ebs andas gem, hie und da wa a a bissl ebs Siaß dabei, awa des is seydna gwen. Des had oewei rechd lusde ausgschaud, wenn a Schuediandl oda a Schuebua dahea kema is, wei a jeda a Hafal oda a Bixn en Schueranzn drah ghengd ghad had. De meisdn hamd a agschnine Konseavndosn mid an Drahdhengl drah heagnuma, des wa am bragdeschan wei ebs andas, bsondas bei de Buam wenn s graufd hamd, e kabud ganga wah. Af da oana Seidn von Schueranzn is meisdns e an Schnial a Schwamm zon Dofe ausleschn außaghengd, af da andan Seidn da is de Bixn fia d`Schueschbeisung drah ghengd.

Damoes da hamd d`Kinda e da easchdn und e da zwoadn Glaß nua mid n Griffe af d`Dofe schreim deafa. Easch vo da driddn Glaß weg, ha ma mid da Dindn und mid n Fedahoeda e a Hefd ei schreim deafa. Des mid n Schreim af d`Dofe is zwa rechd bragdesch gwen, awa wenn d`Buam afn Schueweg efda amoe a bißl graufd hamd, da is a ganz ofd Dofe broha. Da had ma dann dahoam wieda gschimpfd griagd wei d`Eydan wieda a neie Dofe kaufa hamd miaßn. Mia is bein raufa af n Hoamweg amoe Dofe, Zählmaschin und da Setzkasdn kabudd ganga. Wiea e dann hoam kema bih, ha e vo da Mudde ganz schee gschimpfd grieagd, wei ma nix meha richdn had kina und weis ma oese nei kaufa had miaßn.

D`Schue, des wa ned umbedingd mei Sach, da bih e ned oewei so gean hie ganga. E da easchdn und e da zwoadn Glass da is s`Freilein Hohenleitna unsa Lehraren gwen, mei liawa de wa ganz schee schdreng. Bei dera hama oft singa miasn und sie had mid da Geing dazua gschbeyd. Wenn s zon Singa gwen is, da ha e mid n Freilein Hohenleidna oewei mei Broblem ghad. Mia Buama, mia hama oana nachn andan singa miaßn, da wa e ned grad rechd guad, wenn ih drah kema bih, da hads goa ned lang dauad da hae a scha en Geingschdegga en Gsichd drin ghad ha, des had oewei ganz schee brennd.

We ma amoe Fella bein Schreim gmochd hamd, da ha ma mia Buam oewei fia an jedn Fella oa Dazn grieagd. Des mid de Dadzn, des is iwahaubd ned gschpaße gwen. So weid a me erinnan ka, hamd d`Diandl nia Dazn griagd, obwoe s es a efda vadead heddn. Mia hama e da Schue d`Schdammham bis zo da viadn Glass oewei oa Diandl und oa Bua nemanand sidzn miassn. E da zwoadn Glass had me d`Lehraren newa d`Gugge hie gsidzd, des is a rechd a frechs Luada gwen. De had me oewei e d`Aschbaggan eizwiggd, da bih e dann oewei hie und hea gruggd. Wenn des d`Lehararen gseng had, hads me gfragd warum e des dua, da hae gsagd das me Gugge zwiggd had. Dann had s Gugge gfragd ob des schdimmd, de had dann oewei glong und had zo da Lehraren gsagd, na des schdimmd ned. Ih ha dann von Freilein Hoenleidna oewei glei rechds und links a Scheyn griagd. Ih glaub das me s`Freilein Hoenleidna iwahaubd ned rechd gean meng had.

E da driddn Glass da ha ma s`Freilen Schumnik oes Lehraren griagd. S`Freielein Schumnik de is rechd guad zo uns gwen. Awa bei dera hama unda da Schue ganz ofd beddn miasn, des hedd ma a ned umbedingd oewei doa meng. Dazn wia mas von Freilein Hohenleitna grieagd hamd, had`s bei n Freilein Schumnick a koa meha gem. Efda amoe hads uns mid n Lineal mid da Kandn auf Pfinga aufe ghaud, des wa a ned rechd schee, awa des is a ned so ofd bassiad. Mid da Schumben, a so ha mas gnennd, da ha ma oft wenn s`Weda schee gwen is, unda da Schuezeid spazian geh deafa. Meisdns ha ma dann e d`Innauan awe ganga, da drund had s uns dann ebs iwa d`Natur gleand. S`Freilein Schumnik de had uns zoagd woß s da draußn oes fia Bleame und fia Vegl und a na vey andane Viecha gibd. Des wa ganz indreßand und rechd lusde iß`s a gwen, wei s da a nia so schdreng zuaganga is oes wia sunsd unda da Schuezeid.

Mid de andan Lehra, da hama nua ganz seydn schbaziean geh deafa, hexdns amoe wenn s rechd hoaß gwen is.We ma gmoad hamd daß`s amoe z`hoaß is fia d`Schue, da hama uns zeaschd undahoedn ob ma zon Lehra ebs sang soedn, dann ham a olle midanand an Schbruch aufgsagd.

„Der Himmel ist heiter, das Wetter ist schön, wir bitten den Lehrer spatzieren zu gehen“.

En Winda, da ka a me na ganz guad dra erinnan, da ha ma amoe mid`n Freilein Schumnik auf n Hiawebeag drom bein Schliddnfahn gwen. Da had da Augustin Konrad wiea ra mid sein Schliddn iwan Beag ae gfahn is und umgschmißn had, gladd en Fuaß abbrocha, des is veleicht a Gaude gwen. En Konrad den hama dann mia Kinda mid n Schliddn wieda zo da Schue ae gfahn. S`Freilein Schumnik had a richdege Angsd ghad wei des en Konrad agrad bei iha bassiead is. Wos dann danach na gwen is des woas e ned wei ma mia dann olle hoam geh hamd deafa. Damoes da wa oes na ned so einfach wia heid, da had a fast neamd an Telefon ghad, hexdns a Gschefd oda reiche Leid oda d`Bosd. Heid da had a jeda a Handy, da ka ma jedsmoe glei wenn ebs bassiead is en Sanga oda a en Dogda aruafa.

E dera Zeid da is a amoe bei uns dahoam a ebs bassiead. Da had s af d`Nachd e da Brugg hiedan af amoe rechd gschewad. Da Ongl is dann auße grennd und had nachgschaud wos lous gwen is, ea had awa nix gseng wei s a scha rechd finsda gwen is. Da had a se dann en Schdoe drauß d`Schdoelodean ghoed und is na amoe dane und had gsuachd owa ebs find. Af oamoe had a da Mudde gschrian, geh a moe schney außa, da liegd oana unda da a Brugg drund. Da Ongl had dann d`Mudde zon Dreia ume gschigd daß sn uma hoen soed. De zweh, da Dreia und da Ongl, de hamd dann midanand den Mah dea wo da unda da Brugg drund gleng is zo uns aufa und e d`Schdum eina drang, da hamd s n dann af n Bon hie glegd. Da had ma dann easchd gseng wea des gwen is, da Ongl had gsagd, des is ja da Niggl.

Da Niggl des is a Baua von Hard drend gwen dea wo, wenn s en Summa zon dreschn gwen is oewei en Dreschwong brachd had. Da Dreia, dea is dann zon Weiß e Brugmey ume grennd, da hamd s dann en Dogda z`Dann agruafa und hamd gsagd das a umbedingd eina kema muaß. Da Weiß is dann a glei mid zo uns uma kema. Da Niggl, des is a scha a bissl a eydana Mah gwen, der is hoed hie und da bein Wiad gwen und had dodn a bissl a Bia drunga. Des moe hada wahscheinle a bissl zvey dawischd. Wia da Niggl da eda Finsdan mid sein Ral ohne Liachd hoam gfahn is, is a hoed ed a Brugg hiedan iwan Beag en Lobach ae gfoen.

Damoes da hamd de meisdn Leid a na koan Dinamo en Ral dra ghad, drum hamd s a koa gscheids Liachd ned khad. Ofd oa hamd a blos a Kabidlambm en Ral drah ghad, awa de wa a ned rechd hell. Da had ma ned so guad gseng bei da Nachd und had ganz leichd an Umfae ham kina. Bis da Dogda vo Dann eina kema is, da had des a na a ganz a guade Zeid dauad, obwoe da Dogda a scha a Audo ghad had. Damoes da wa a de Schdraß vo Dann eina na a Sandschdraß, da had ma a ned so schney fahn kina wiea af ana Theaschdraß.

E dera Zeid bis da Dogda kema is, da wand scha a ganza haufa Leid bei uns e da Schdum beinand. Da Weiß is mid na a boa andane Mana af n Kanabee gsitzd, da is af oamoe s`Kanabee zambroha. Da hand s dann olle af n Bon drund ghoggd und hamd glochd. Es is awa koan wos bassiad dabei, sunsd heddns a ned olle glochd. Da Ongl dea had scha a bissl bled gschaud wei s`Kanabee hie gwen is. Da Weiß, dea had awa zon Ongl gsagd das a eahm des Kanabee zoed, des had en Ongl dann scha gfreid.

Wia des oes vobei gwen is, da is dann a da Dogda kema und had en Niggl genau agschaud, dann had a gsagd das an es Grangnhaus mid nehma muaß wei a oewei na bewusdlos dagleng is. De Mana de hamd dann en Niggl auße drang und hamd n en Dogda sei Audo eiglegd, dea had n dann af Dann es Grangnhaus mid auße gnumma. Andas hed ma s a damoes na ganed moha kina wei s damoes na koan sehan Sanka ned gem had oes wia heid.

Da Niggl is awa drotzdem rechd boed wieda gsund gwen, des hama gseng wei a glei wiea ra wieda dahoam gwen is en Ongl a Rangal Gseychds oes Dangschee brachd had. Da Ongl dea had oewei gsagd, de Oedn de hand hoed na a bissl zaga oes wia de Junga heid.