Читать книгу Стив Жобс - Уолтер Айзексон - Страница 1

Олам яратмоқчи бўлган телбалар

алалоқибат ҳаётни ўзгартириб юборишади.

Apple’нинг “Ўзгача фикрла” реклама ролигидан, 1997 йил

Китобда тилга олинган шахслар

Клара Агопян-Жобс. Арман эмигрантларининг қизи. 1946 йилда Пол Жобсга турмушга чиққан. 1955 йили эр-хотин Стивни ўғил қилиб олган.

Жонатан “Жони” Айв. Apple’нинг етук дизайнери, Жобснинг ҳамкори ва ишончли вакили.

Роберт Айгер. 2005 йилдан бошлаб Disney раҳбари лавозимидаги Эйснер ўринбосари.

Гил Амелио. 1996 йилда Apple’нинг ижро этувчи директори бўлган, NeXT’ни сотиб олиб, Жобсга қайтарган.

Билл Аткинсон. Apple’нинг илк ходимларидан бири, Macintosh учун график дастурлар ишлаб чиққан.

Крисэнн Бреннан. Хоумстед мактабида Жобснинг севган қизи, Лиза исмли қизининг онаси.

Лиза Бреннан-Жобс. Жобс ва Крисэнн Бреннаннинг қизи. 1978 йилда туғилган. Бошида Жобс уни ўз қизи деб тан олмаган.

Нолан Бушнелл. Atari компаниясининг асосчиси. Жобс ўзи учун намуна деб ҳисоблаган бизнесмен.

Жеймс Винсент. Apple реклама агентлигида Ли Клоу ва Дункан Милнернинг кичик ҳамкори. Буюк Британияда туғилган. Мусиқа ишқибози.

Стивен Возняк. Хоумстед мактабини битирган. Гик (ашаддий шинаванда) ва компьютер даҳоси. Жобс унинг ноёб монтаж схемаларини қандай қилиб намойиш этиш ва сотишни ўйлаб топган.

Жан-Луи Гассе. Apple’нинг Франциядаги раҳбари. 1985 йилда Жобс бўшатилганидан кейин Macintosh бўлинмасига раҳбарлик қилган.

Билл Гейтс. Яна бир компьютер вундеркинди. 1955 йилда туғилган.

Абдулфаттоҳ “Жон” Жандалий. Стив Жобс ва Мона Симпсоннинг биологик отаси. Сурияда туғилган, Висконсин университетини тугатган. Кейинчалик Ренога яқин жойдаги Boomtown Resort & Casino’да озиқ-овқат хизматини бошқарган.

Ив Жобс. Стив Жобс ва Лорен Пауэллнинг кичик қизи. Серғайрат, ҳаракатчан, шўх.

Патти Жобс. Клара ва Пол Жобснинг асранди қизи. Стив Жобс ўғил қилиб олингандан кейин икки йил ўтиб асраб олинган.

Пол Рейнголд Жобс. Стив Жобсни асраб олган отаси. Висконсинда туғилган. Қирғоқ мудофаасида хизмат қилган.

Рид Жобс. Стив Жобс ва Лорен Пауэллнинг катта ўғли. Отасидан ёқимтой ташқи кўринишни, онасидан меҳрибонликни мерос қилиб олган.

Эрин Жобс. Стив Жобс ва Лорен Пауэллнинг ўртанча қизи. Мулойим, беозор, жиддий.

Рон Жонсон. Apple дўконларини юргизиш учун 2000 йилда Жобс томонидан ёлланган.

Андреа “Энди” Каннингем. Режис Маккенн компаниясида реклама агенти. Илк Macintosh компьютерлари пайдо бўлганда Жобс билан ҳамкорлик қилган.

Жеффри Катценберг. Disney Studios раҳбари. 1994 йилда Эйснер билан жанжаллашиб қолган, ишдан кетган ва Dream Works SKG таъсисчиларидан бири бўлган.

Ли Клоу. Қўпол реклама даҳоси, Apple “1984” компанияси муаллифи. Жобс билан 30 йил бирга ишлаган.

Дэниел Коттке. Рид университетидаги Жобснинг энг яқин дўсти, у билан Ҳиндистон бўйлаб саёҳат қилган, Apple’нинг илк ходимларидан бири.

Дебора “Деби” Коулман. Mac’нинг илк жамоаси менежери. Кейинчалик Apple’да ишлаб чиқариш учун жавоб берган.

Тим Кук. Apple’нинг бош операцион директори (2011 йил 25 августдан бошлаб бош директори). Ишончли ва мулойим киши. 1998 йилда Жобс томонидан ишга қабул қилинган.

Эдди Кью. Apple’ интернет-бўлинмасининг раҳбари ва компания вице-президенти. Контент етказиб берувчи компаниялар билан ҳамкорлик қилиш масаласида Жобснинг ўнг қўли.

Билл Кэмпбелл. Жобс Apple’да ишлаган илк даврда маркетинг бўлими бошлиғи. 1997 йил қайтганидан кейин директорлар кенгаши аъзоси ва Жобснинг ишончли вакили.

Эдвин Кэтмалл. Pixar асосчиларидан бири. Кейинчалик Disney раҳбари.

Жон Лассетер. Pixar асосчиларидан ва бош креативчиларидан бири.

Дэниел Левин. Маркетинг бўйича директор, Жобс билан дастлаб Apple’да, сўнгра NeXT’да ишлаган.

Режис Маккенна. Реклама устаси, илк босқичда Жобсга жиддий таъсир кўрсатган ва унинг учун устозлигича қолган.

Майк Марккула. Биринчи йирик инвестор ва Apple директорлар кенгашининг раиси. Жобс учун шубҳасиз обрўли киши.

Майк Мюррей. Macintosh’нинг маркетинг бўйича илк директорларидан бири.

Пол Отеллини. Intel компанияси раҳбари. Macintosh’ни Intel процессорларига ўтказишда ёрдам берган, бироқ iPhone билан боғлиқ шартнома тузмаган.

Лорен Пауэлл. Пенсильвания университети битирувчиси. Goldman Sachs банкида ва Стэнфордда ишлаган. 1991 йилда Стив Жобсга турмушга чиққан. Доно ва меҳрибон аёл.

Артур Рок. Apple’нинг афсонавий инвестори ва директорлар кенгашининг илк аъзоларидан бири. Жобс учун шубҳасиз муҳим одам.

Жонатан “Руби” Рубинштейн. Жобснинг NeXT’даги ҳамкасби. 1997 йилда Apple аппаратлари бош ишлаб чиқарувчиси бўлган.

Мона Симпсон. Жобснинг туғишган синглиси. Улар қариндош эканлигини 1986 йилда билган ва шу вақтдан бери яқин алоқада бўлиб келган. Ёзувчи. “Фақат бу ерда эмас” романида онаси билан муносабатларини, “Оддий йигит” романида эса Жобс ва унинг қизи Лизани, “Йўқотилган ота” асарида эса отаси Абдулфаттоҳ Жандалийни тасвирлаган.

Жон Скалли. Pepsi раҳбари. 1983 йилда Жобс уни Apple бош директори лавозимига олган. Жобс билан келиша олмай қолиб, 1985 йилда унинг ишдан бўшатилишида катта роль ўйнаган.

Майк Скотт. 1977 йилда Марккула уни Apple президенти ва Жобснинг раҳбари этиб тайинлаган.

Баррелл Смит. Mac’нинг биринчи жамоаси дастурчиси. Юксак ақлга ва фаришта қиёфасига эга. Тинмай ишлайдиган жонсарак одам. 90-йилларда шизофренияга дучор бўлган.

Элви Рэй Смит. Pixar асосчиларидан бири. Жобс билан келиша олмаган.

Авадис “Эви” Теванян. NeXT’да Жобс ва Рубинштейн билан бирга ишлаган. 1997 йилда Apple дастурий таъминотининг асосий ишлаб чиқарувчиси бўлган.

Рон Уэйн. Atari’да Жобс билан танишган. Жобс ва Возняк каби Apple яралишида қатнашган, бироқ ўзининг акциялар пакетидан калтабинлик билан воз кечган.

Тони Фаделл. Муҳандис, 2001 йилда iPod’ни ишлаб чиқиш учун Apple’га қабул қилинган.

Скотт Форсталл. Apple’нинг iOS бўйича вице-президенти.

Роберт Фридланд. Рид университети битирувчиси, олма фермасида бошқарувчи бўлган, Шарқ фалсафаси ихлосманди. Жобсга катта таъсир кўрсатган. Ҳозирги вақтда кон қазиш компанияси эгаси.

Энди Херцфельд. Дастурий таъминот ишлаб чиқувчиси, Mac’нинг илк жамоасида Жобснинг дўсти. Самимий ва қувноқ инсон.

Элизабет Холмс. Рид университетида Дэниел Коттке севган қиз, Apple’нинг илк ходимларидан бири.

Род Холт. Apple II устида ишлаш учун 1976 йилда Жобс томонидан ёлланган муҳандис-электрик. Ўтакетган кашанда. Марксист.

Жоанна Хоффман. Mac’нинг илк жамоаси аъзоси. Жобс билан жанжаллашишга журъат қилган.

Кобун Чино Отогава. Калифорниялик сото-дзен устаси, Жобснинг маънавий мураббийи.

Жоан Шибле Жандалий Симпсон. Стив Жобснинг биологик онаси. Висконсинлик. Ўғлини ўгай ота-онага берган. Жобснинг синглиси Мона Симпсонни катта қилган.

Майкл Эйснер. Disney корпорацияси раҳбари. Қўрс ва талабчан инсон. Pixar билан битим тузган, шундан сўнг Жобс билан келиша олмай қолган.

Эл Элкорн. Atari компаниясининг бош муҳандиси. Pong компьютер ўйинини яратган ва Жобсни ишга олган.

Ларри Эллисон. Oracle компанияси раҳбари, Жобснинг яқин дўсти.