Читать книгу Что за люди. Рассказы / Мыйсяма йöз - Алексей Попов - Страница 24

Нёль-ö-вит мужичöй пукалöны öшинь улын, варовитöны. Помасьö гожöм, ывла вылын ыркыд нин. Сэзьдöдöм енэжыс оз вермы кутны шоныдсö, кыскö сiйöс кытчöкö вывлань. Мужичöйяс казьтылöны, кодi кыдзи шойччис отпуск кадас.

– Лунвылад добра! – кылö, ошйысис öти. – Чеччан, сёйыштан и саридз дорö. Ваыс шоныд, вир-яйтö малалö. А нывбабаясыс!..

– Ми со гöтыркöд Волга кузя шлывъялiм. Став карсö ас синмöн аддзылi, – шуö мöд. – Локтан гожöмö мöвпыштiм Прибалтикаö тöвзьывны.

– Ме ас сиктын вöлi, – чöвтiс коймöд. – Мам дорö кайлi. Керка вевтсö, пöтшвасö вежыштi. Сьöлöм вылын öнi сэтшöм кокни. Быттьö пывсьöм бöрын. Татшöм бурасö некор на эг шойччыв.

Мукöдыслöн чужöм вывсьыс воши шуда нюмыс. Синъясыс жугыльтчисны. Быдöн мыйкö ассьыс кутiс мöвпавны.