Читать книгу Hoop in tye van nood - Benescke Janse van Rensburg - Страница 11

6. Vind jou identiteit in God

Psalm 139

1Vir die koorleier. Van Dawid. ’n Psalm. Here, U sien dwarsdeur my, U ken my. 2Of ek sit en of ek opstaan, U weet dit, U ken my gedagtes nog voordat hulle by my opkom. 3Of ek reis en of ek oorbly, U bepaal dit, U is met al my paaie goed bekend. 4Daar is nog nie ’n woord op my tong nie of U, Here, weet wat dit gaan wees. 5U omsluit my van alle kante, U neem my in besit. 6Dié wete oorweldig my, dit is te hoog vir my begrip. 7Waarheen sou ek gaan om u Gees te ontvlug? Waarheen sou ek vlug om aan u teenwoordigheid te ontkom? 8Klim ek op na die hemel, is U daar, gaan lê ek in die doderyk, is U ook daar. 9Vlieg ek na die ooste, of gaan woon ek in die verre weste, 10ook daar lei u hand my, hou u regterhand my vas. 11Ek sou die duisternis kon vra om my weg te steek, of die lig rondom my om in nag te verander, 12maar vir U is selfs die duisternis nie donker nie en die nag so lig soos die dag, duisternis so goed soos lig. 13U het my gevorm, my aanmekaargeweef in die skoot van my moeder. 14Ek wil U loof, want U het my op ’n wonderbaarlike wyse geskep. Wat U gedoen het, vervul my met verwondering. Dit weet ek seker: 15geen been van my was vir U verborge toe ek gevorm is waar niemand dit kon sien nie, toe ek aanmekaargeweef is diep in die moederskoot. 16U het my al gesien toe ek nog ongebore was, al my lewensdae was in u boek opgeskrywe nog voordat ek gebore is. 17Hoe wonderlik is u gedagtes vir my, o God, hoe magtig hulle almal! 18As ek hulle sou wou opnoem – hulle is meer as wat daar sand is, en as ek daarmee klaar is, sou ek nog steeds met U te doen hê. 19As U tog maar die goddelose uit die weg wou ruim, o God! Gaan weg van my af, julle moordenaars! 20Dit is hulle wat bose planne teen U smee, wat so vals teen U optree. 21Moet ek u haters dan nie haat nie, Here, moet ek nie ’n weersin hê in mense wat teen U in opstand is nie? 22Ek haat hulle met ’n uiterste haat, want hulle is ook my vyande. 23Deurgrond my, o God, deurgrond my hart, ondersoek my, sien tog my onrus raak. 24Kyk of ek nie op die verkeerde pad is nie en lei my op die beproefde pad!

Die meeste jong kinders ontgroei mettertyd die betowering wat die fiktiewe superheld, Superman, vir hulle inhou. Dít was egter nie die geval met die 35-jarige modeontwerper, Herbert Chavez van die Filippyne, nie. Sedert hy as kind in die 1980’s die eerste keer die rolprent, Superman, met die akteur Christopher Reeve in die hoofrol gesien het, het Herbert memorabilia van dié karakter begin versamel.

Herbert het egter sy obsessie met Superman tot ’n volgende vlak geneem toe hy in 1995 die eerste keer intensiewe plastiese chirurgie ondergaan het om soos sy kindertydheld te lyk. Hy het oor die jare onder meer snywerk aan sy neus en ken laat doen en inspuitings gekry om sy vel te bleik. Hy het ook silikoon-inspuitings gekry om sy lippe voller te maak en dy-inplantings laat doen om meer gespierd te lyk.

Herbert stap in Calamba, sy tuisdorp in die Filippyne, met ’n Supermanpak rond wat hy vir homself gemaak het. Die dorp se inwoners sê hy pla hulle nie. Hy bied hulle eerder ’n goeie geleentheid om hul kinders te leer om nie soos iemand anders te probeer wees nie, maar liewer hul eie uniekheid uit te leef.

Hierdie storie klink dalk absurd, maar hoeveel keer het jy nie ook al (dalk onbewustelik) jouself met iemand anders vergelyk wat mooier of ryker as jy is of met ’n kollega wat gewilder as jy by die werk is? Of selfs met iemand wie se kinders beter op skool of op sportgebied as joune vaar? En hoeveel keer het jy nie al jou eie uniekheid ingeboet om meer soos “daardie” persoon te probeer wees nie?

Luister weer na die woorde van Psalm 139:16–18: “U het my al gesien toe ek nog ongebore was, al my lewensdae was in u boek opgeskrywe nog voordat ek gebore is. Hoe wonderlik is u gedagtes vir my, o God, hoe magtig hulle almal! As ek hulle sou wou opnoem – hulle is meer as wat daar sand is, en as ek daarmee klaar is, sou ek nog steeds met U te doen hê.”

Wanneer ons ons eie uniekheid prysgee om meer soos iemand anders te probeer wees, stap ons weg van die unieke plan wat God spesifiek vir elkeen van ons se lewe het. Voordat jy dus weer minderwaardig begin voel wanneer jy jou mooi vriendin, ryk vriend, gewilde kollega of vriende met slim, sportiewe kinders raakloop, herinner jouself daaraan dat hulle nooit oor die potensiaal kan beskik wat God spesifiek vir jóú gegee het om ’n verskil aan die wêreld te maak nie.

Kom ons gryp dus vandag en elke dag van hierdie jaar elke kans aan om God op ons trots te maak deur die potensiaal wat Hy ons geskenk het ten volle uit te leef. Onthou, ’n tweedehandse weergawe van iemand anders was nog nooit so aantreklik soos ’n unieke weergawe van jouself nie!

Gebed

Vader God, baie dankie dat U my uniek geskape het. Help my om myself nie met ander te vergelyk en mis te kyk wat U spesifiek vir my beplan het nie. Ek vra dit in die Naam van Jesus Christus. Amen.

Besprekingsvrae

1. Is daar areas in jou lewe waar jy jouself met ander mense vergelyk? Hoe kan jy verhoed dat die vyand jou op hierdie gebied aanval?

2. Lees Psalm 139:1–4. Wat beteken dit vir jou dat God elke beweging in jou lewe ken en raaksien? Hoe kan jy jouself teen verkeerde gedagtes beskerm?

3. Lees Psalm 139:5–12. Watter berusting bring dit vir jou dat God ons van alle kante omsluit en ons nie van Hom kan wegvlug nie?

4. Lees Psalm 139:13–15. Wat sê die teksverse van ons elkeen se uniekheid?

5. Lees Psalm 139:16. Wie bepaal hoe lank jy gaan lewe?

6. Lees Psalm 139:17–18. Hoeveel gedagtes het God oor jou?

7. Lees Psalm 139:23–24. Waarom is ’n rein hart vir God geweldig belangrik?