Читать книгу Bid vir jou ongebore baba - Janlu Kuyler - Страница 6

Met my vrou se eerste swangerskap het ek diep daarvan bewus geword dat God op ’n besonderse manier by die vorming van ons ongebore baba betrokke is. Terwyl ek die wetenskaplike feite gelees het oor hoe bevrugting plaasvind en hoe ons engeltjie elke dag groei, was ek volkome in verwondering oor God se grootsheid! Toe reeds is die saad vir hierdie boek gesaai.

Ek wou so graag elke dag inkyk op ons babatjie se ontwikkeling, saam met haar groei en gereed wees vir die nuwe lewe waarvoor God haar sou vorm. Die beste manier om dit te doen, het die Heilige Gees my geleer, was om eenvoudig saam met Hom op reis te gaan deur hierdie fantastiese avontuur wat swangerskap is. Ek en my pragtige vrou, Suzanne, het elke dag die ontwikkeling van ons ongebore baba gevolg en saam met inspirasie uit die Bybel die Here se seën op ons ongebore baba afgebid. Vandag is Zanné ’n gesonde en energieke dogtertjie wat ons oneindig baie plesier gee. Dié proses het hom herhaal toe ons met Ammike swanger was. Ook toe het die Heilige Gees ons gelei en geïnspireer om saam te bid vir dié wonderwerkie.

Toe ek later vir Marlena ontmoet, en haar passie vir haar werk as ginekoloog en verloskundige en haar sensitiwiteit vir God ervaar, het die Here vir my die bevestiging gegee vir ’n bundel soos dié. ’n Gids vir die biologiese naelstring van jou ongebore baba, maar ook ’n gids vir die geestelike naelstring wat reeds gevorm is.

Wat wil ons met hierdie produk bereik? het ons uitgewer gevra. Die antwoord was eenvoudig: Ons wil ouers in hierdie nege maande van swangerskap help om in te kyk op die wonderwerk van bevrugting en die wonderlike Godswerk wat elke dag met die ongebore baba gebeur. Om elke dag die wonder van God te sien en elke dag wanneer hulle in die baarmoeder “inkyk” God se grootsheid in hulle lyf en in hulle hart te voel. Hoe kan dit anders as dat so ’n proses jou sal voorberei vir jou taak as ouer? Wanneer jy elke dag volg hoe jou kind groei en terselfdertyd die Woord in sy of haar lewe inspreek, kan jy mos nie anders as om gereed te word vir jou taak as ouer nie.

Ons verwagting is daarom dat jy hierdie gids sal gebruik om elke dag vir jou ongebore baba te bid, maar jou terselfdertyd voor te berei vir ’n leeftyd se gesprekke oor God, vir vrae oor God se aanvaarding en liefde en vir ’n lewensuitkyk wat Jesus aan jou kind voorleef. Robert Ingersoll het reeds in die 1800’s geskryf: “The child is not likely to find a father in God unless he finds something of God in his father.”

Ons wil jou help om jou geestelike verantwoordelikheid tydens jou ouerskap te ontdek en te aanvaar. Ons wil jou help om ’n ouer te wees wat op ’n geestelike vlak inspreek in jou kind se lewe. Hierdie inspraak, het ek gevind, begin reeds vóór ’n kind se geboorte. Ons wêreld het baie ouers, maar min werklike ma’s en pa’s. Ons bede is dat hierdie boek jou sal help om jou posisie in te neem as ’n ouer wat werklik geestelike inspraak in jou kind se lewe sal hê. Om ook ’n geestelike pa en ma vir jou kind te wees. Dit is so ’n wonderlike voorreg om so vroeg moontlik reeds ’n geestelike pa of ma vir jou kind te wees.

Reed Markham het geskryf: “The thrill of being a great father is not seeing your children go on to become successful adults. The thrill of a great father, is the journey, experiencing your child’s successes along the pathway to their greatness.” Deur in te kyk op die ontwikkeling van jou ongebore baba is jy reeds deel van hierdie “journey” saam met jou kind. Mencius, die Chinese filosoof, het in die 4de eeu voor Christus geskryf: “The great man is he who does not lose his child’s heart.” Ons verwagting is dat hierdie bundel jou sal help om tydens die swangerskap reeds jou kind se hart vas te hou en jou daartoe te verbind om ’n geestelike ma of pa vir jou kind te wees, met die implikasie dat jy nooit jou kind se hart sal verloor nie. Bud Kelland, ’n Amerikaanse kortverhaalskrywer, het oor sy pa geskryf: “He didn’t tell me how to live … He lived, and let me watch him do it.” Dit is ons begeerte dat jy só aan jou kind verbind sal wees dat jou lewe ’n getuienis teenoor hom of haar sal wees en jy jou kind sal aanmoedig om te leef soos jy leef.

Verder is ons verwagting dat hierdie boek jou sal help om met God in ’n vennootskap te gaan oor die vorming van ’n nuwe generasie. God doen die werk, ons sien dit raak en verwonder ons daaroor, tree in vir ons kinders, spreek die Woord oor hulle en raak só vennote in die vorming van ’n nuwe generasie. Sodat hierdie nuwe generasie van kindsbeen af – van voor hulle geboorte reeds – aan God toegewy kan wees, aan God verbind kan wees, sensitief vir God kan wees. Wat ’n groot voorreg om só saam met God te werk, só deel te wees van waarmee Hy besig is, en só die toekoms deur ons onafgebroke en intense gebede te beïnvloed.

Ons verwagting is daarom ook dat hierdie boek jou sal bemagtig om met gesag in te tree vir die ontwikkeling van jou kind terwyl God besig is om jou ongebore baba aanmekaar te weef. Ons wil jou bemagtig om nou al, voor die geboorte van jou kosbare kleintjie, in te tree vir en in te spreek in sy of haar lewe. Om die Bybelse waarhede en beloftes oor jou kind uit te spreek en dit as waarheid vir sy of haar lewe te erken. Só word jy bemagtig in jou rol as ouer soos God dit van jou verwag.

As jy hierdie boek lees, is jy óf ’n swanger mamma óf ’n pappa wat so pas gehoor het jou vrou is swanger. Baie geluk! Jy sweef op wolke oor die wete dat jy oor ’n paar maande ’n ma of pa gaan wees.

Mamma, dalk voel jy naar of omgekrap. Dalk is jy onseker oor watter toertjies jou lyf alles in die volgende nege maande gaan uithaal. Dit is natuurlik om aan die begin van jou swangerskap senuweeagtig te wees. Die wonder is dat God jou lyf juis só ontwerp het dat jy die lewe in jou met gemak kan dra. Stef Bos het hieroor so ’n mooi gedig geskryf:

Sy is mooier as ooit, stiller, ronder.

Alleen en twee tegelyk, sy het ’n bestemming gevind.

Sy dra die lewe in haar, sy dra dit voor haar uit …

(“Zwanger”, uit: Stef Bos, Gebroken zinne, 2004, Lannoo.)

Inderdaad het jy ’n bestemming gevind. Jy ervaar iets van vrouwees waarvan jou man waarskynlik niks sal verstaan nie, maar wat vir jou in die volgende nege maande rigting en betekenis sal gee. Dit is ’n tyd waarin jy sal ervaar hoe jou ongebore baba elke dag saam met jou beweeg. Die band wat tussen baba en ma ontwikkel, is een wat geen ander mens ooit sal kan verbreek nie. Dit is ’n Godgegewe band wat niemand ooit van jou sal kan wegneem nie. Nege maande lank sal jy ’n intimiteit met jou baba ervaar voordat jy hom of haar ontmoet. Dit is die voorbereidingstyd van moederskap waartoe God jou geroep het, waarvoor Hy jou geskep het. Dit is jou bestemming.

Pappa, jy is seker opgewonde, maar terselfdertyd bang. As jou vrou nog nie vreemd begin optree het asof sy skielik van ’n totaal ander planeet kom nie, moet jy jou maar staal. Dit kom beslis! Een van die dae gaan sy nukkerig wees, dalk onredelik teenoor jou optree en – hou maar die snesies byderhand – baie emosioneel reageer. Dit alles maak die wete dat jy oor nege maande ’n babatjie gaan vashou soveel meer werklik. As jy enigsins soos ek is, spring jy nou op en af van vreugde, en wil jy vir elke denkbare mens vertel jy gaan pa word. Jy wil sommer ’n blou én ’n pienk babygrow gaan koop. Well done! Dis al wat ek kan sê. Jy sal vinnig agterkom daar is ’n baie spesiale liefde tussen ’n man en sy swanger vrou. Julle sal gou besef julle is nou in ’n “ons”-situasie. Niemand anders het tot dié situasie bygedra nie, net jy en jou bruid. Die wete dat daar oor nege maande ’n nuwe lewe gebore gaan word, is oorweldigend, om die minste te sê.

Miskien bekommer jy jou oor geld en hoe jy finansieel vir hierdie kind gaan voorsien. Jy kan altyd na ’n adviseur toe gaan en julle kan saam ’n plan maak. Miskien bekommer jy jou oor watter soort pa jy gaan wees en wat jy vir jou kind kan bied. Gaan kuier by ’n vriend wat reeds ’n pa is en kyk hoe natuurlik dinge gebeur. Ontspan! Dit is ’n wonderlike tyd in jou lewe. Die wete dat jy ’n pa gaan wees, behoort jou net opgewonde te maak.

Ek moet jou waarsku dat jy dalk in die simptome van jou vrou se swangerskap kan deel. Hulle noem dit die Couvade-sindroom, of simpatie-swangerskap. Sommige mans vereenselwig hulle so intens met hulle swanger vrou dat hulle ook naar en slaperig raak, beenkrampe kry of selfs ’n boepie ontwikkel. Ek onthou hoe ek met albei ons swangerskappe elke middag twaalfuur geweldig moeg geraak en byna elke aand met erge sooibrand gaan slaap het. Dit is ongelooflik watter sterk band ’n man met sy swanger vrou kan hê.

Die indeling van hierdie bundel volg die wetenskaplike ontwikkeling van jou kind. Daar is drie trimesters, en ons sal elke week die biologiese ontwikkeling van jou kind volg. Hiermee saam begelei ons jou met Bybelgedeeltes wat jy oor jou kind kan afsmeek en oor sy of haar lewe kan spreek. Die doel hiermee is dat jy, namate jy sien waarmee God besig is, kan bid vir hierdie grootse skeppingswerk en God se beloftes oor jou kind kan uitspreek. Ek het in my lewe gesien hoe baie dit vir my beteken het om só in die lewe van my ongebore kind in te spreek.

My raad aan jou is om ’n joernaal te koop en die Bybelgedeeltes daarin neer te skryf. Jy kan ook aantekeninge maak van die gedagtes wat die Here vanuit hierdie gedeeltes vir jou oopbreek. Skryf in jou joernaal oor jou ervarings vanuit die Bybel. Kry ook vir jou ’n spesiale Bybel, onderstreep die gedeeltes wat jy op jou kind afbid en skryf die datum langsaan neer. Hierdie twee kosbare dokumente lê en wag vir die dag wat ek dit vir Zanné en Ammike kan gee as ’n teken dat hulle pa lank voor hulle geboorte reeds God se goedheid en beloftes oor hulle lewe afgebid het.

Geniet hierdie avontuur. Laat toe dat God jou elke dag in verwondering laat staan. Groei in jou geloof. Leer ken God as die getroue Vader wat nou reeds jou kind met goedheid en genade omvou. Leer ken die Skrif as God se Woord vir jou én jou kind. Groei saam met jou baba. Laat die Heilige Gees jou geloof vorm sodat jy die pa kan wees wat God in jou sien.

Een persoonlike opmerking voordat ons begin. Omdat ek vir my twee dogtertjies gebid het terwyl hulle in hulle ma se liggaam gevorm is, is ek baie gemaklik daarmee om in die vroulike vorm te skryf. Ek probeer egter die manlike en vroulike vorm in hierdie boek afwissel. Pas asseblief die geslag by jou kind se geslag aan wanneer jy vir hom of haar bid.

Die inspirasie vir hierdie bundel het gespruit uit my vrou se swangerskappe met ons twee pragtige dogters. Die Bybelgedeeltes wat in hierdie boek opgeneem is, is gedeeltes wat ek self op my dogters afgebid het. Daar is natuurlik ’n magdom ander Bybelgedeeltes wat jy ook kan bid. Ons moedig jou daarom aan om in jou joernaal nog gedeeltes neer te skryf wat jy op jou ongebore kind wil afbid. Vra die Gees van God om jou te lei in die keuse van tekste wat jy wil bid.

Ons wil spesiaal dankie sê vir die lesers van Baba & Kleuter wat hulle ware verhale van praktiese gebed op Baba & Kleuter se Facebook-blad met ons gedeel het. Alle eer aan die Here vir julle kosbare kinders!

Nou begin jou journey. Geniet dit!

JANLU EN MARLENA