Читать книгу Спасибо, Родина моя. Сборник стихов / Четтирдим, мээң төрээн чуртум - - Страница 2

Өндүр-бедик, даглар ышкаш, сүзүктүг бис,

Өндүр-делгем, ховулар дег, сеткилдиг бис,

Өндүр-шыргай, тайгалар дег, бодалдыг бис,

Өндүр-түрлүг, шорааннар дег, соруктуг бис —

Тыныжывыс хостуг болгаш, боогдал билбес

Тывалар бис, уранхайлар уктуг чон бис.

Кем-Хемчик, Эрзин-Тес… дээр шапкын хемнер

Кеди-чолче агып бадып, хей-аът киирген,

Чазып-буспаан эртинелер үүжелерин

Салгалы дээш хайыралап кадагалаан,

Дыңнаксанчыг хөөмей ырын бараалгаткан

Тывалар бис, уранхайлар уктуг чон бис.

Оду өшпээн хонаштарның чүректери

Ортаа оран кезик-чамдыын чырыткылаан,

Ынак төрээн чуртувуска эргеленип,

Ырап деспейн, ээлери бооп артып калган,

Дываажаң-даа аазаар болза, солуп өлбес

Тывалар бис, уранхайлар уктуг чон бис.

Сүзүүвүстү, соруувусту херечилээн

Чүс-чүс бурун тураскаалдар ыдыкшыткан,

Чүден артык – Ада-Дээрге, Ие-черге

Чүдүлгезин сеткилинде хандыр шыгжаан,

Дылы-имин кезээ-мөңге уттуп кагбас

Тывалар бис, уранхайлар уктуг чон бис.

Делегейниң кайы-даа бол булуңунга

Сүрээденчиг, девиденчиг байдалдарда

Деткерилдир эзиннеп кээр чажыт күчү

Чүгле төрээн, чүгле ынак чуртундан кээр —

Тынын алыр чаңгыс дээди хоргадалдыг

Тывалар бис, уранхайлар уктуг чон бис.