Читать книгу Спасибо, Родина моя. Сборник стихов / Четтирдим, мээң төрээн чуртум - - Страница 6

Четтирдим, мээң тѳрээн чуртум, четтирдим дээйн.

Чериң кырын базып чоруур эргелиим дээш,

Ак-кѳк хемнер агымының шапкыны дээш,

Ажай-буурул тайгаларың кадыры дээш,

Эзимнериң шургуттунмас шыргайы дээш,

Эзир ушкан бедик дээриң аязы дээш,

Кавайым сээң чүрээм билген чаражың дээш,

Хайыралың кѳрүп чоруур ѳѳрүшкүм дээш,

Четтирдим, мээң тѳрээн чуртум, четтирдим дээйн.

Ажылчынның, тараажының ижи-биле

Аян кирген шырай-арның чалыызы дээш,

Ѳске черден мени кый дээр тѳрээниң дээш,

Йѳрээл ырым чүгле сеңээ эргимиң дээш,

Ѳлү бергеш, довурааңга холужа бээр,

Ѳскээр читпес, кезээң болуп артарым дээш,

Ѳпей ырың тыва дылга хѳңнүм чайгап,

Ѳгбелерим сѳзүн билип чоруурум дээш,

Сеткилимни чазап чаартыр мергениң дээш,

Четтирдим, мээң тѳрээн чуртум, четтирдим дээйн.