Читать книгу Спасибо, Родина моя. Сборник стихов / Четтирдим, мээң төрээн чуртум - - Страница 4

Кылаң дамдың дөгерези – дамырымда,

Кый деп чыдар саарыгларың төрээн ыры

Шүлүктерим аяны бооп, сырыны бооп,

Чүрээм биле ханым сенде тудуш, хемим.

Анай чаштан амым болуп агып чыткан

Адырларың адын адааш, дирли бээр мен:

Шаалааш, Боскан, Ак-Тал, Чоза, Кадыгбайлар

Шалырашкан агымнары – өпейим-дир!

«Торгалыг!» деп хунук ырлап чанган куштар

Дооза чыгыы чазын дедир ужуп келир —

Оглуң мен-не ортаа оран каггаш баргаш,

Олчаан сени эргип көөрүм кандыг ирги?!

Катап база чаяаттынар салым турза,

Кагый берген эриннерим сагынганын

Чидирер дээш, сээң ногаан эрииңге-ле

Чиңге хаак бооп чайганзымза – аксым кежии.

Оо, өршээ, Деңгер-дээрлер хайырлаза,

Оолчугаш бооп бодарап кээр арга турза,

Үнүп чыдар бажыңдыва ам бир четсе —

Үнүм хөнүп, чаа шүлүүм эгелезе!

Ужарлыг хем, амырак хем Торгалыымда

Уран-шевер, мөге-шыырак угу-дөзүм

Салгалынга келир үе өршээлдиг бооп,

Саарыгларың ыдык ыры үзүлбезин!