Читать книгу Les Amours pastorales de Daphnis et Chloé - Longus - Страница 3
ОглавлениеDE LONGUS.
ESTANT un jour à la chasse en l’isle de Mételin, dedans le parc qui est sacré aux Nymphes, j’y veis une des plus belles choses que je sçache jamais avoir veues; c’estoit une peincture d’une histoire d’amour. Le parc de soi-mesme estoit bien beau, aussi planté de force arbres, semé de fleurs, et arrousé d’une frai se l ie fonteine, qui nourrissoit et les arbres et les fleurs: mais la peincture estoit encore plus plaisante que tout le reste, tant pour la nouveauté du subject, dont l’adventure estoit merveilleuse, que pour l’artifice et l’excellence de la peincture amoureuse; tellement que plusieurs passants, qui en avoient ouï parler, alloi en t visiter le parc, non moins pour veoir ceste peincture, que pour faire priere aux Nymphes.
On y voyoit des femmes grosses qui accouchoient, et d’aultres qui enveloppoient de langes leurs enfants; de petits poupards en maillot exposés à la merci de Fortune, des bestes qui les nourrissoient; des pasteurs qui les enlevoient; une compaignie de jeunes gens qui s’alloient esbattre aux champs; des coursaires qui escumoient les costes de la mer; des ennemis qui couroient le pays; avec plusieurs aultres choses, et toutes amoureuses: lesquelles je regardai en si grand plaisir, et les treuvai si belles, qu’il me print envie de les coucher par escrit.
Si cherchai quelqu’un qui me les donnast à entendre par le menu. Et ayant le tout particulièrement entendu, en composai quatre livres, que maintenant je dédie comme une offrande à Amour, aux Nymphes, et à Pan; espérant que le conte en sera plaisant et agréable à plusieurs manieres de gens; pourcequ’il pourra servir à guérir le malade, consoler le dolent; remettra en mémoire de ses amours celui qui aura esté aultrefois amoureux, et instruira celui qui ne l’aura encore point esté: car il ne fut ni ne sera jamais homme qui du tout se puisse tenir d’aimer, tant qu’il y aura beauté au monde, et que les yeux auront puissance de regarder.
Mais Dieu veuille qu’en descrivant les amours des aultres je n’en sois moi-mesme travaillé!
