Читать книгу Sombra roja - Rodrigo Castillo - Страница 29

Ni guicaa T. S. Elliot

Ndaani’ batanaya’ gule jmá guie’ naxiñá’ rini

ziula’ ne sicarú,

qui zanda gusiaanda’ dxiibi guxhanécabe naa guirá ni gule niá’.

Guzaya’ xadxí ne batanaya’

bitiide’ guidilade’ ra dxá’ beñe

ne ndaani’ guielua’ bidxá yuxi nuí.

Gula’quicabe láya’ Mudubina

purti’ gule’ luguiá nisa.

Guriá yaachi naxí gudó yaa’ ti beenda’ cayacaxiiñi’ naa

ne guca’ Tiresias biníte’ guielua’,

qui niquiiñe’ guni’xhí’ ora guzaya’ stube ndaani’ ca dxí ma gusi.

¿Guná nga ni bisanané binniguenda laanu?, ¿xí yuxi guie

bisaananécabe laanu?

Ca xiiñe’ zutiipica’ diidxa’ guní’ jñiaaca’ne zazarendaca’

sica ti mani’ ripapa ndaani’ guí’xhi’, ne guiruti zanna tu laaca’.

Guirá beeu nuá’ neza guete’

balaaga riza lú nisa cá tini, ni rini’ xcaanda’ guielua’ pe’pe’ yaase’.

Zabigueta’ zigucaaxiee xquidxe’,

ziguyaa xtube xa’na’ ti baca’nda’ ziña,

chupa bladu’ guendaró ziaa’ zitagua’.

Zadide’ laaga’ neza luguiaa, ni bi yooxho’ qui zucueeza naa, zindaaya’ ra nuu jñiaa biida’ ante guiruche guirá beleguí.

Zaca’ xti bieque xa badudxaapa’ huiini’

ni riba’quicabe guie’ bacuá íque laga,

xa ba’du’ ruuna niidxi sti guie’

zabigueta’ xquidxe’ ziaa’ si gusianda’ guie lúa’.