Читать книгу The Political Songs of England: From the Reign of John to That of Edward II - Various - Страница 22
THE SONG OF THE BARONS.
Оглавление[A roll of parchment, of the 13th cent. in a private library.]
* * * *
Mès de Warenne ly bon quens,
Que tant ad richesses et biens,
Si ad apris de guere,
En Norfolk en cel pens[is]
Vint conquerrant ses enemis,
Mès ore ne ad que fere.
Sire Jon Giffard deit bien nomé,
Que n’out gueres un pem ... é
En cele chivauchée;
E si fu touz jors à devant,
Prus e sages et pernant,
E de grant renomée.
Et Sire Jon D’Ayvile,
Que onques ni aima treyson ne gile,
Fu en lur conpanie;
Et sire Peres de Montfort,
Si tint bien à lur acord,
Si out grant seignurie.
Et de Cliffort ly bon Roger
Se contint cum noble ber,
Si fu de grant justice;
Ne suffri pas petit ne grant,
Ne arère ne par devant,
Fere nul mesprise.
Et Sire Roger de Leyburne,
Que sà et là sovent se torne,
Mout ala conquerrant;
Assez mist paine de gainer,
Pur ses pertes restorer,
Que Sire Edward le fist avant.
Mout furent bons les barons;
Mès touz ne sai nomer lur nons,
Tant est grant la some:
Pur ce revenk al quens Simon,
Pur dire interpretison,
Coment hom le nome.
Il est apelé de Monfort,
Il est el mond et si est fort,
Si ad grant chevalerie;
Ce voir, et je m’acort,
Il eime dreit, et het le tort,
Si avera la mestrie.
El mond est veréement;
Là ou la comun à ly concent,
De la terre loée;
C’est ly quens de Leycestre,
Que baut et joius se puet estre
De cele renomée.
Ly eveske de Herefort
Sout bien que ly quens fu fort,
Kant il prist l’affère:
Devant ce esteit mult fer,
Les Engleis quida touz manger,
Mès ore ne set que fere.
Et ly pastors de Norwis,
Qui devoure ses berbis,
Assez sout de ce conte;
Mout en perdi de ses biens,
Mal ert que ly lessa riens,
Ke trop en saveit de honte.
Et Sire Jon de Langelé,
Soune chose fu gainé,
Deheiz eit que l’en pleine!
Tot le soen en fist porter
De Cliffort mi Sire Roger,
Ne vout que rien remeine.
Ne à Sire Mathi de Besile
Ne lesserent une bile,
En champ u en vile.
Tot le soen fu besilé,
E cointement fu detrussé
Par un treget sanz gile.
Mès mi Sire Jon de Gray
Vint à Lundres, si ne sai quoi,
Que must une destance
Par entre Lundres et ly,
Que tot son hernois en perdi,
Ce fu sa meschance.
Et Sire Willem le Latimer
Vint à Lundres pur juer,
* * * *
