Читать книгу The Political Songs of England: From the Reign of John to That of Edward II - Various - Страница 8
SONG ON THE BISHOPS.
Оглавление[Flacius Illyricus, p. 161.]
Planctus super Episcopis.
Complange tui, Anglia,
Melos suspendens organi;
Et maxime tu, Cantia,
De mora tui Stephani.
Thomam habes sed alterum,
Secundum habes iterum
Stephanum, qui trans hominem
Induens fortitudinem
Signa facit in populo.
Dolos dolens metropolis
Quos subdoli parturiunt,
Orbata tuis incolis,
Dolose quos ejiciunt,
Largos emittis gemitus,
Patre privata penitus.
Sed cum habebis Stephanum,
Assumes tibi tympanum,
Chelym tangens sub modulo.
Ubi es, quæso, Moyses,
Per quem cedat confractio?
Ubi legem zelans Phinees,
Per quem cesset quassatio?
Quis natum David arguens?
Quis Thaü signum statuens
In limine et postibus,
Ut sic confusis hostibus
Liberetur Israel?
Abraham, pater gentium
Multarum, surge, domine,
Agar expelle filium,
Saræ ancillæ dominæ;
Nam post subducet aliam.
Jam adversus ecclesiam
Prævalent portæ Tartari:
Jam ludo ludunt impari
Isaac et Ismael.
Balthasar bibit iterum
De vasis templi Domini:
Vasa rapit vas scelerum
Dei dicata nomini.
Scribentem cerno digitum,
Et literis implicitum
Scriptis, “Mane, Tecchel, Phares;”
Quid sibi velit ea res,
Rei probabit exitus.
Jam patet in prætorio,
Et infimis et arduis,
Quod regni jam divisio
Et finis est in januis.
Crescit malorum cumulus,
Est sacerdos ut populus,
Currunt ad illicitum,
Uterque juxta libitum
Audax et imperterritus.
Plebs in Ægypti cophino
Servit, et sudat anxia
Sub Pharaone domino:
Edicta currunt varia:
Exactor opus exigit,
Israel lutum colligit.
Non est qui eum eruat,
Vel Pharaonis subruat
Equos cum ascensoribus.
Spargit Assur ac dejicit
Lapides Sanctuarii.
Quare? quia non objicit
Se lapis adjutorii.
Imo qui se objicere
Deberent, et effundere
Sanguinem pro justitia,
Tractant de avaritia,
Quos his noto apicibus.
Si præsuli Bathoniæ
Fiat quandoque quæstio,
Quot marcæ bursæ regiæ
Accedant in scaccario:
Respondet voce libera,
Mille, centum, et cætera,
Ad bursam regis colligo,
Doctus in hoc decalogo,
Cæcus in forma canonis.
Tu, Norwicensis bestia,
Audi quid dicat veritas:
Qui non intrat per ostia
Fur est. An de hoc dubitas?
Heu! cecidisti gravius
Quam Cato quondam tertius:
Cum præsumpta electio
Justo ruat judicio,
Empta per dolum Simonis.
Wintoniensis armiger
Præsidet ad Scaccarium,
Ad computandum impiger,
Piger ad Evangelium,
Regis revolvens rotulum;
Sic lucrum Lucam superat,
Marco marcam præponderat,
Et libræ librum subjicit.
Hi Belphegor prænunciant,
Et sedem Baal subjiciunt;
Ut melius proficiant,
Baal sibi præficiunt,
Complectuntur pro niveis
Nigra, stercus pro croceis.
Hi tres insatiabiles,
Sanguisugis persimiles,
“Affer,” dicunt, “non sufficit.”
Tres tribus his appositi
Sunt, sed longe dissimiles,
Virtutum flore præditi,
Morum vigore nobiles,
Noe, David, et Daniel,
Quos depingit Ezechiel.
Justitiam hi sitiunt,
Ob hæc sese objiciunt
Murum pro domo Domini.
Joannes nostri temporis
Surgit Decanus Angliæ,
Canus mente, vi roboris
Stratam vadit justiciæ,
Canit laudum præco nia
Qui jure de Ecclesia
Mariæ nomen accipit,
Dum conflictum hunc suscipit
Sacræ devotus Virgini.
Heliensis progreditur,
Huïc datur discrimini,
Heli ut ensis dicitur,
Parcens paucis, vel nemini.
Helia, ensem exere,
Et impios tres contere,
Ac Babylonis principem
Hujus doli participem
Ictu prosterne simplici.
Tu, Wolstani subambule,
Es in conflictu tertius,
Robustus insta sedule
Triumphi veri conscius.
Hæres Wolstani diceris,
Si vere sit, tu videris:
Prius resigna baculum,
Et ephod et annulum,
Quam Baal velis subjici.
De Roffensi episcopo
Nil scio mali dicere.
Mentior et rem syncopo:
Hic est, et hic a latere
Est pauper Sarisburiæ,
Qui dormit usque hodie,
Ignem et aquam bajulat,
Nec causatur, nec ejulat
Pro desolata vinea.
I Romam, liber parvule,
Nec remeare differas,
Saluta quosque sedule,
Et Papæ salve differas.
Dic quid de tribus sentiam.
Ipse promat sententiam,
Utrum suo judicio
Sint liberi a vitio;
Et michi detur venia.