Читать книгу Schmäh - Edwin Baumgartner - Страница 7

INTERMEZZO: AUF DEM GANG IM STIEGENHAUS

Auf dem Gang im Stiegenhaus an der der Stelle, wo früher die Bassena⁴ war.

- Ham s scho ghört von Hean Watzek?

- Wos denn?

- No, von eam und da Schwesta Eani.

- Naa. Sogn s jo net …

- Doch.

- Na sowas. Deaf s denn des iwahaupt?

- Sowieso. Sie is ja ka Schwesta net.

- Ah, net?

- Doo, owa hoed ka Schwesta net, oiso ka richtige. A Kraunkenschwesta is in AKH⁵, owa ka Schwesta, oeso ka Geistliche, vastengan s mi? Sie deaf.

Von unten ertönt eine Männerstimme: Aufzug bitte!

- Des is a eh, da Hea Watzek.

- Woens net de Aufzugtia zuamochn?

- Naa, I foa jo glei weida! I muaß eana des nua dazöön.

- Daun gschwind, Frau Schuller, sunst wiad a grantich. No, sogn s: Wean s heiradn? I maan, is ea scho gschiedn?

- Ah, gschiedn is ea do scho laung. Sie is ledig, hod a ma dazööt. Owa ob s glei heiradn? Wea waaß …

- Miassen s jo a net. I vasteh nua net … I maan, sie is a fesche Beason, und ea … Wüvü is sie jinga?

Von unten ertönt abermals die Männerstimme: Aufzug bitte!

- (laut nach unten gerichtet:) Kummt glei! Wo woa ma?

- Wüvü sie jinga is. Wos wiadn Sie schätzn?

- Zehn Joa.

- Mea. Zwanzg!

- Naa, sicha net. Sie schaut nua so jung aus. Die is guat heagricht. Goa so jung is die nimma. A guade Paatie is jedenfoes.

- Oes Kraunknschwesta?

- Eanare Ötan san gstopft wia de Ganseln, da Vota Primaa in ana Privatglinich, und sie is des anziche Kind. Zumindest hod ea mia des so gsogt.

- Schmähohne?

- Schmähohne.

In diesem Moment erscheint Herr Watzek schnaufend auf der Stiege.

- Griaß Sie, Hea Watzek!

- Grüß Gott, Frau Schuller, griaß Sie, Herr Kocourek. Da Aufzug …

- Net bees sein, Hea Watzek. Mia haum nua wos zu dischkutian ghobt, da Hea Kocourek und I.

- Am End die Gschicht von Herrn Professor Waiglein, wissen S eh, den Neuen aus m ersten Stock.

- Ah, wos wissen denn Sie do, Hea Watzek?

- Ich bitte Sie, Herr Kocourek, de Gschicht mit dem gstohlenen Mantel? Sogoa a Anzeige hod a gmacht. Und dann taucht da Mantl auf einmal bei da Frau Lidl auf.

- Schmähohne?

- Schmähohne, Frau Schuller.

- Wissen s am End de gaunze Gschicht?

In diesem Moment ertönt von unten eine Frauenstimme: Aufzug bitte!

- Jo, glei!

- Jössas, des is de Steputat, die hod s wieda amoe gnedich. Gschwind, sunst wiads grantich.

- Oeso, des woa r a so …