Читать книгу Schmäh - Edwin Baumgartner - Страница 9

INTERMEZZO: IM MODEGESCHÄFT GEGENÜBER

Im kleinen Modegeschäft auf der anderen Seite der Straße, später Nachmittag.

- Griaß Sie, Frau Schuller.

- Griaß Sie, Frau Sladek. San S wieda gsund?

- Danke der Nachfrage, s woa jo nua a Schnupfn.

- God sei Daunk. Kaun i valleicht wos duan fia Sie?

- Schauma! Da Mantl, den S in da Auslag hom …

- Wöcha?

- Da graue min Bözgraugn – wos kost n dea?

- Regulea ochtfünf, owa fia Sie ocht, waun ma scho in gleichn Haus wohna.

- Des is ma aa zvüü. Fünfe?

- Na, do vadien I nix mea. Sie wissen eh: Außer Ihnan kriagt bei mia sunst kana an Rabatt. Owa fünfe kaun i wiaklech net mochn. Woatns, I hoe eana den Mauntl, dass amoe einaschlupfn kenna. So, no brobians amoe. Und jetzt schaun S in d n Spiagel. Sea fesch, sog i …!

- Eh. Und drogt si guat. Owa ocht is ma zvü.

- Da Graugn is a Oat Neaz! Haaßt Kolinski und kummt aus Russlaund.

- Schmähohne, von de Russn?

- Schmähohne. Griaß Sie, Frau Steputat.

- Grüß Sie, Frau Schuller. Ham Sie noch die Pelzjacke, die ich gestan probiat hab?

- An Momend, Frau Steputat, I bin glei bei eana. No, wos manan S, Frau Sladek?

- I waaß net. Fesch is a scho.

- Und ea steht Ihnan. I sogat’s net, wauns net woa warad. Grod, oes wa r a fia Sie gmocht.

- Ich bin ein bisserl in Eile, Frau Schuller …

- Glei, Frau Steputat. Dea foed guat. No, ka Wunda bei eanara Figua!

- Dank ihnan. Ea gfollad ma wiaklech guad.

- Schaun S eana de Vaoaweidung au. Sengen S, wia fein die Nähte san?

- Und dea is wiaklech aus Russlaund?

- Nua da Kragn. Da Rest is aus da eiganen Schneidarei.

- Drum …

- Ich hab noch ein paar Wege zu machen, könnten Sie mich vielleicht dazwischenschieben?

- An Momend, Frau Steputat, glei bin i bei eana!

- Die Jacke …

- An Momend, Frau Steputat.

- Fesch is a, sea sogoa. No jo … Wissen S wos? Lossen’s n herinn, i geh gschwind eikaufn und üwaleg dabei, ob i ma des leistn kau. Wiedaschaun, Frau Schuller.

- Wiederschaun, Frau Sladek. Gstopft wia r a Gansl, da Mau von ia, owa haundln wüü S. So, jetzt hol i de Jackn fia Sie, Frau Steputat.

- Aber neun is wirklich viel. Sieben, sonst kommen wir nicht ins Geschäft.

- So, da hamma de Jackn. Schlupfen S eine, Frau Steputat. Fesch san S, sea fesch! Achtfünf fia Sie, waun ma scho in söbn Haus wohnan. Außer Ihnan kriagt sunst kana an Rabatt bei mia.

- Schmähohne?

- Schmähohne.