Читать книгу Speurhond Willem in Australië - Elizabeth Wasserman - Страница 9

My pa kook!

Ek sit nog so, toe hoor ek hoe die mense hande klap.

’n Paar fluit selfs.

Ek kyk op – almal staan nader om beter te kan sien.

Ek glip tussen hulle bene deur.

Daar is my pa: my ma se blommetjiesvoorskoot swierig om sy middel gebind, en hy kook!

Ek weet nie waar dit vandaan kom nie, maar my pa verander net daar en dan in ’n superster. Sy brillense stoom toe, sy hare staan regop, maar hy klits en roer met windmakerige styl. Hy leun selfs oor na die tannie langs hom en flip haar pannekoek tot hoog teen die dak.

Die mense is mal oor hom!

Twintig minute van pure kookstyl (hy bou ’n slaai van babaspinasieblare en aarbeie, hy roer ’n heuningsous met net ’n tikkie suurlemoen – lepels en spane dans in sy hande!) en my pa sleep ’n veerligte brokkoli-soufflé uit sy oond.

Ek ruik dit tot waar ek staan – dis verruklik.

Die mense raak mal.

Hy is vir seker ’n kampioen.

Kameras flits toe hy aan die einde van die aand op die verhoog verskyn. Hy glimlag breed en ontvang die beker met ’n kniebuiging. Hy dra nog steeds die voorskoot, en as ek toevallig daar verbygestap het, sou ek hom glad nie kon herken nie. Wat het geword van die man met die ligblou werkshemp en die netjiese das? Waar bêre hy nou al die syfers en grafieke waarmee hy heeldag ander ouens se finansies in toom hou?

“Is hy nie wonderlik nie?” sug iemand in my nek. Dis my ma. Haar linkerarm, toegedraai in dik verbande, pryk soos ’n babamummie aan haar sy.

Haar oë blink. Is dit pynverdowers of sommer net pure liefde?

Die burgemeester maak ’n afkondiging: “Ek is trots om, namens die inwoners van die Wes-Kaap en die hele Suid-Afrika, hierdie prys aan ons wenner te oorhandig. Twee vliegkaartjies na Australië en ’n inskrywing vir die Suidelike Halfrond se kookkampioenskapreeks in Australië – met die finaal in Sydney!”

Die mense klap weer woes hande, die fluiters raas opnuut, en ’n paar tannies gooi hulle voorskote neer.

“Ons gaan Australië toe,” sug my ma bly, en pink ’n traan uit die hoek van haar oog.

Ek wonder wat hoofkommissaris Servin beplan. Hulle twee gaan nou wel Australië toe.

Maar wat baat dit my?