Читать книгу Hundstage - Gabriele Rökl - Страница 4

da kurtl sogt zu seina frau:

"kumm oide, foa ma in´d lobau.

durt hau ma uns glei ausm gwaund

bozn uns nockat aufn saund.

de zechn hoidn ma tiaf ins wossa

den oasch ind sunn, weu der is blossa

ois wia da rest."

de mitzi pockt de schnitzln ei,

erdäpfel und an doppler wei.

zwa sechserblech und d´ luftmatrozzn

druckt se dem kurtl in de protzn.

haut in de toschn brün und krimi

de bodetiachln - und de mimi.

des is da hund.

de mitzi suacht an plotz im schodn

der kurtl und da hund gehen bodn.

der hund kummt zruck. es föht da kurt

"warum is der scho wieder furt?",

frogt si de mimi bei an bier.

daun kletzelts grantig des papier

vom schnitzel.

noch ana zeit erscheint da kurt,

dafia is jetzt des hundsviech furt

da mitzi is jetzt ollas wuascht.

sie braucht a vierdl gegan durscht,

daun hatschns bis zur obern bruckn.

durt wo de nochboan imma huckn

und tarockiern.

de mitzi ziagt des beichal ei,

se wü jo schee fian kurti sei

owa da kurtl frisst zum bia

drei schnitzln - oder sogoa via!

daun schnoachta zfriedn in da sun.

noch ana stund draht sie erm um,

weu er sunst aubrennt.

Se huckn laung no ummadum,

leicht ausdiarrt vo da summasunn.

aufd nocht ziagn sa se wieda aun,

pockn de gaunzn´ restln zaum.

da hund keift aus da bodetoschn

de mitzi sogt: "jetzt hoit de goschn",

zum kurt.

im bus bleibt dea daun liawa steh

des sitzn tatert erm vü z´weh.

daham find sie ihrn krimi nimma,

dem hund is schlecht, er speibt ins zimma,

da kurt is blau, de mitzi miad

ihr busn brennt , sei hintern gliat.

daun gengans schlofn.