Читать книгу Bayrisch durchs Jahr - Helmut Zöpfl - Страница 18

Vom Jahr is Halbzeit jetzat scho,

net allzuvui bleibt zruck,

s’liegn höchstens wia im Fundbüro

vom Gestern a paar Stuck.

Vom Januar der g’frorne Zeh’,

der wo jetzt oiwei juckt,

vom Frühjahrsmarsch rund um an See,

a Hühneraug, des druckt.

A falsche Nummer von mein Flirt

beim Ball im Haus der Kunst,

wo se nur d’Zeitansage rührt,

a Rheuma, des mi hundst.

… As Sonnwendfeier lustig brennt

in der Johannisnacht.

Ma hupft und halt se bei de Händ,

singt Liader, tanzt und lacht.

De Flamma brennt in Himme nei

und leucht grad, weils verbrennt.

Was sei wui, muaß Vergeh oiwei,

D’Zeit is grad Zeit, weils rennt.