Читать книгу Cenodoxus - Jakob Bidermann - Страница 13

Dama der Laggey

Cenodoxus der Doctor.

Mariscus der Schmarotzer.

Labeo vnd Naso zween Diener.

Dropax, Smilax zween Steckenknecht.

Dama der Laggey erzehlt dem Doctor mit gelegenheit / es hab Mariscum den Schmarotzer ein wütiger Hund gebissen / vnder dessen kombt Mariscus zornig vnd wütig daher / will den Laggey tod haben / weil er jhne also in April geschickt / der Doctor aber vermaint / er sey [22] von einem Hundsbiß so wütig / läst jhn zu den Vnsinnigen führen.

575Dam. Ist nit mein Herr an disem Orth?

Doct. Hör Dama. Dam. Halt wer rüfft mir dort?

Es ist mein Herr: Ist eben gut.

Der Handel sich fein schicken thut.

Doct. Was ist es / Jung? Sag was man will?

580Dam. Beym Thor warten der Leut gar vil /

Die all begeren nur allein

Bey Ewer Gnaden selbst zuseyn /

Doct. Waistu auch Dama von wesswegen?

Dam. Es wolten etlich gern raths pflegen /

585Etlich vmb hilff vnd steüer bitten /

Auch andere / nach löblich Sitten /

Bringen Verehrung vnd Geschenck /

Darbey jhr Gnad auch jhrer denck /

Da warten sie beständigklich /

590Kainr will abweisen lassen sich /

Vnd geben für sie können nit

Von dannen weichen einen tritt /

[31]Biß sie vernemme ewer Gnad

Vnd jhnen gebe hilff vnd rath.

595Doct. Seynd vnter jhn auch fürnemb Leut?

Dam. Ja gwißlich. Cen. Wie ich sagt erst heut /

Also ist jhme: Früe vnd spat

Laufft man mich an vmb hülff vnd rath /

Man consuliert / man fragt / man bitt /

600Meiner kan man entrathen nit.

Geh hin vnd sag ich komb alßbald.

Dam. Auß jhnen einer sagt was gstalt

[23]Ein Casus vnserem bekanten

Dem Marisco sey zugestanden /

605Den ich zum Tisch für Ewer Gnad

Hab außgesucht die gantze Statt /

Vnd jhn doch nirgends habe könden

Weder oben noch vnden finden.

Doct. Ist jhm was gutes widerfahrn?

610Dam. Ach nit vil guts dem frommen Narrn.

Ein winniger vergiffter Hund

Hat jhn gebissen vor zwo Stund.

Doct. Für diß ist bald ein hilff gemacht /

Dam. Er hat es aber nit geacht /

615Vnd hat zu lang nit helffen lassen /

Darauff er dann erschrockner massen

Zu wüten / toben gfangen an

Gleich eim zerritten bsessnen Mann /

Den Marcktplatz auff vnd abgeloffen /

620Vnd wen er nur hat angetroffen

Mit gschrey vnd wüet zu boden gschlagen /

Das thue ich drumb Jhr Gnaden sagen

Damit sie könne hüten sich

Vor dem vnsinnign Wütterich.

625Es ist kein Mensch halt ich darfür /

[32]Ja wilder dann ein wildes Thier.

Doct. Fürwar es ist mir laid für jhn /

Dam. Dort kombt er her. Wo wil er hin?

Wie schwitzt / wie tobt / wie schnauffet er?

630Vnd wendt die Augen hin vnd her?

Mar. Ich will / ich will / ich will / ich will.

Dam. Hört Jhr Gnaden was für ein Spil?

[24]Mar. Ich wil den Buebn / ich wil den Strick.

Dam. Ach Herr / wie reit jhns Vngelick?

635Doct. Ich förcht mir / rueff die Diener her.

Mar. Zu tausend stucken vnd noch mehr

Wil ich zerreissen den Bößwicht /

Der mir diß Spil hat zugericht /

Den losen Bueben / so bald ich

640Jhn nur antriff / dann er hat mich:

Dam. Herauß jhr Knecht was jmmer kan;

Nas. Lab. Was will man vns? da seyn wir schon.

Doct. Er kehrt sich wider von vns weck.

Dam. Er kombt. Doct. Jhr Diener seyd nur keck /

645Vnd thut jhm dapfer widerston /

Dam. Ach jaget jhn beyzeit daruon /

Das er nit her zu nahend gehe /

Wie wüet er / wie gschicht jhm so wehe.

Mar. Bue / Bue der Hoplitodromus

650Megaloperphronesteros,

In Piropolitoxia

Mueß dir dein Leben nemmen da.

Dam. Secht wie er redt so seltzam Wort?

Mar. Hebt mich nur nit / vnd last mich fort /

655Hin vber disen Bueben gschwind /

Der mich also: Dam. Ich glaub er künd

Vor lauter Schmertzen reden nicht /

Mar. Ich wil schon reden du Bößwicht /

[33]Du wirst es noch erfahren bald

660Mit deinem schaden. Nas. Halt halt halt.

Mar. Der du mich also hin vnd her /

Jetzt auff / jetzt ab / so weit vnd ferr /

[25]Jetzt ein / jetzt auß / vnd hin vnd wider /

Hindersich / fürsich / auff vnd nider /

665Dam. Es reimbt sich nichts nit vberall:

Wie ist Tobsucht so vbler fall!

Mar. Durch enge Weeg / durch weitte Strassen /

Durch Bogen / Thuren / Marckt vnd Gassen

Mich vmbgetriben. Dam. Lieber Gott /

670Der Hundsbiß bringt jhn in die noth /

Diß vbel hat jhm mein gestalt

Starck eingebildt vnd fürgemalt /

Es war jhm als ob ich jhn jag /

Vnd etwann mit der Rueten schlag;

675Ist jhm für vbelzhalten nicht /

Wie Sinnberaubten offt geschicht.

Doct. Es ist zuglauben. Haltt jhn wol /

Villeicht er sonst außreissen soll.

Mar. Last mich an / was hab ich verschuldt?

680Herr Doctor ich rueff an dein huld.

Doct. Seht an in seiner furi hoch

So kan er doch mich nennen noch /

Was thut nit dLieb? Dam. Vor laid kan ich

Deß wainens kaum enthalten mich /

685Wann ich gedenck das gestern spet

Er sein Verstandt gar gut noch het /

Vnd jetzt so gähling ist verwendt.

Mar. Wer ist verwendt / du Element /

Ich wil dir klopfen deinen Grindt /

690So bald ich mich nur frey befindt.

Dam. Ach haltet jhn mit gutem fleiß /

[34]Damit er euch nur nit aufreiß.

[26]Doct. Last jhn ins Ketterl führen hin /

Damit er niemand schaden kün.

695Mar. Ach Doctor bist vnsinnig auch?

Dam. Gnad Herr / es ist der Kranckheit brauch.

Ach wie er grißgrambt. Mar. Ich bitt doch

Last mich ein kleines reden noch:

Ey soll ich dann vnsinnig seyn?

700Der alles kan erzehlen fein

Der Ordnung nach gantz wolgestelt /

Was du mir alles hast erzehlt.

Dam. Was ist es dann? Sag an wies kert;

Mar. Der Koch sey gfallen vor dem Herdt /

705Vnd vrblitzling gestorben drauff.

Lab. Der Koch war niemal besser auff.

Dam. Secht wie vor lauter schmertzen er

So gar hab kein Memori mehr?

Was noch? Mar. Der Sterb regier im Hauß.

710Doct. Nichts. Mar. Vnd hab euch all vertriben drauß.

Doct. Nichts. Mar. Du Doctor seyest in den Garten

Vnd thust mein mit dem Essen warten.

Doct. Nichts. Mar. Nix / Nix / nix nix / Ich wirs ja wissen.

Doct. Freylich hat jhn ein Hund gebissen.

715Wie hat der Tropf so seltzam Traum /

Wann ichs nit säh ich glaubt es kaum.

Was er sagt in der furi hie

Ist deren keins geschehen nie.

Nas. Er ist zerrütt man sicht es wol.

[27]Mar. Jhr Lappen ich glaub jhr seyd doll

721Ja gar vnsinnig vnd nit ich.

Dam. Ach wie tobt er so schröckenlich.

Doct. Wie ichs befohlen führt jhn hin.

[35]Ich wil gehn sehen wer darin

725Zu mir beger. Du geh auch mit.

Mar. Jhr Burger hilfft mir niemand nit?

Nas. Brauchstu nit alle Kräfften dein /

So wird er vns zu starck noch seyn.

Lab. Ey Naso halt du nur wol an /

730Nit leicht er mir außreissen kan /

Wann er noch so vnsinnig wer.

Mar. Jhr Burgersleut kombt doch allher

Vnd helfft da der Vnschuldigkeit.

Nas. Solst sagen der Vnsinnigkeit

735Drop. Was für ein Zanck erhebt hie sich?

Mar. Für ein Vnsinnign helt man mich /

Der ichs doch nie gehabt im Sinn /

Auch nie vnsinnig gwesen bin /

Mein sagt mir doch was duncket euch

740Sih ich dann eim Vnsinnign gleich?

Smil. Ja warlich schier. Lab. Er ist nit gsund /

Ist bissen von eim winnign Hund.

Mar. Wer ich? Lab. Ja du. Mar. So hab ich je

Drey Tag kein Hund angrühret nie /

745Drop. Wann nur dich der Hund angrührt hat.

Smil. Man sicht es gnugsamb an der stat

Das ist er wüettig / bleckt die Zähn.

Mar. Ich bin nit wüettig / lasts mich gehn.

Nas. Hüet Dropax / das er dich nit trifft /

[28]Dann solche Biß die seynd vergifft.

751Drop. Ich will jhm / wird er an mich setzen /

Die Zähn mit disem Hammer wetzen.

Smil. Wolan / wolan / wir wöllen jhn

Wie vns befolchen / führen hin

755In der Vnsinnign Kötterlein /

Darinn dergleichen Leut schon seyn.

[36]Mar. Von dannen bringt jhr mich kein tritt /

Ich sag euchs / ainmal geh ich nit.

Drop. Ghab dich wol / wöllen dich schon tragen /

760Du Smilax nimb jhn bey dem Kragen.

Mar. Ich geh nit / ich geh nit / ich gehe nit /

Ich geh nit / geh nit / ich gehe nit.