Читать книгу Благослови, душа моя!.. Псалмы русских поэтов - Коллектив авторов - Страница 7

Господи, к Тебе душу воздвизаю,

Боже мой, на Тя, раб Твой, уповаю:

тем да не буду посрамлен вовеки

пред человеки.

Врагом из мене не даждь ся смеяти,

терпящим Тебе не лепо срам знати.

Беззаконницы, иже в злобе тщатся,

да постыдятся.

Ты пути Твоя изволи явити

и стезям Твоим мене научити:

на истину Ти да мя наставиши

и научиши.

Ты Бог и Спас мой, терпех весь день Тебе,

благости ради яви щедра Себе:

помяни милость, яже есть от века,

на человека.

Юности грехи и неведения

да покрыеши прахом забвения:

помяни же мя по Твоей милости,

ради благости.

Благ и прав Господь, закон полагает,

слез, кто в пути семь грехи содевает:

кроткия люди на суд наставляет,

путь Свой являет.

Милость и правда вси путие Его,

завет свидений ищущим от Него:

за имя Твое грех мой да чистиши,

иже мног зриши.

Кто муж есть иже Господа боится,

тому на пути закон положится,

душа во благих его водворится,

дом внаследится.

Держава Господь боящимся Его,

не потаит им завета Своего;

аз же ко Богу очи обращаю,

милости чаю;

Яко исторгнет нозе ми от сети,

помиловав мя, изволит призрети:

яко нищ есмь аз и уединенный,

от всех лишенный.

Сердца моего скорбь преумножися:

от всех бед, Боже, спас мне сотворися;

виждь низость мою и труд сущ наяве,

всяк грех остави.

Виждь враги моя, яко мнози беша

И без правды мя возненавидеша.

Сохрани душу, всего мя избави,

без срама остави.

Уповах на тя, мне ся прилепляху,

иже незлобнии и праведны бяху,

терпех Тя, спаси от бед Твоя люди,

милостив буди.