Читать книгу Цветок души. Сборник стихов / Урмала савгъат - - Страница 2

ГIажаибал руго мугIрул руччаби

(Чан нухалъ гьарулел гьедин пикраби),

Жал холеб мехалъги вац ваккичIони,

Вугониги гIелин гIодула берал.

ГIодоса рахъине рухI гьечIониги,

Гьел тIаде рачIиндал рортула кванде.

Квераз мугь ххенонги

батула тIагIам,

МагIу бакIарунги

балагьула лъим.

Кьун ругоха мугIруз гьединал дарсал,

Улбуз ясазухъе, наслабазухъе.

Хъизаналда ругел тIолалго тIагърал

ТIадегIанал, тIокIал руго гьезие.

Гьеб дие хирияб дарсихъ гIенеккун

ГIумруялъ йикIина дунги, дир вацал.

Ругониги гIолел нужеде ракIгун

Рогьина дицаги даимго сардал.

Дир рукъалда тIохлъун ругин тола нуж,

Намусалъул къедлъун руго дие нуж.

Дир кIазалъул къадру, къоязул хIубал,

ХIалимал, рокьулел,

рукIа, рукIа нуж.

Амма нуж унтуге, дир ракI лъукъуге,

Лъукъун-къотIун бугин гьеб дир къисматалъ.

Нужерги ургъелаз чIунтизаюге,

Нилъер рукъ жегиги бугин гъуждузда.

Яккизе кватIани, гIайиб гьабуге,

Нуж лъикI ругин лъала, рихьичIониги.

Нужер тIалабалде дунгоги ккечIин,

Къисматалъ мугъчIвазе къед кьечIониги.

ЧIаго йиго жакъа. Метер? Лъаларо.

Лъалеб жо цо буго: нуж дий рокьула.

Унго, яцазул ракI вацазе лъикIин

Нужергун бикьараб тIул инагьдула.

Дицаги цо къоялъ тела дуниял,

Нужго-нужан араб лъугIила гIумру,

Амма дир хъатинир ратила мугьал,

МагIарул гIертIиниб батила магIу…